Lucas 7

Yezu eetsik mot-mɛsa mɛ boo kukuma esodja eLɔm

1 Bhii Yezu nasilal ɛlii nɛ mɛdhuu mɛ bot ɛ nazemaala tin ɔ, nyɛ eezɛtɔ́ pɛ Kapɛlnaum. 2 Tin, dhiiti boo kukuma tɔ lɔɔg esodja Lɔm nadi ɛ́, nɛ dhiiti mot-mɛsa mɛ ngɔt nyɛ nadi ekwyɛl ɛbuɛpe ɔ. Mot-mɛsa mɛ tak nadi ebɛ́ ɛkpaŋɛpe, é siila nɛ ɛsyee. 3 Dáa boo kukuma esodja tak nagwak menduk ɛ Yezu ɛ, nyɛ ɛ́ boolwom bɛdhiiti bɛpaa ɛ bot ɛ mbyak eYuda, bɛ zɛdjóo Yezu étɛp nyɛ neezɛtsik nyɛ. 4 Bɛ eezɛkum pɛ daa Yezu. Bɛ moo tin edjaala nɛ nɛ ɛlyelɛpe. Bɔɔ náá: «Mot tak goka ɛ́ náá, wɔ kwyee nyɛ. 5 Nyɛ nɛ kwyɛl bot ɛ mbyak’enaka. Yɛ ɛ́ nyɛy ɛ nasum ndjaa mendjaala mɛ eYuda yenaka.»

6 Tin, Yezu eezɛghɛɛ nyel, tɔ́ bɛ nɛ bɛnɔɔ. Bɛ dinaa ààpakotseta nɛ ndjaa deenek e, kukuma esodja eezɛlwom bɛsɔ bɛ, bɛ lɛɛ nyɛ náá: «Ghɛŋ, nàdhek nyel’ɔ gwyes. Mam tok mbɛɛ mot étɛp wɔ neeni tɔ ndjaŋ’am. 7 Yɛ ɛ́ étɛp tak ɛ mam nakuma nyel, di ààzyɛ zɛlii nɛ nɔ. Deenek, iyeee! Lóoa ɛkpa wat, etɛɛ náá, mot-mɛsa mam neetsak. 8 Di mɛ di’aak, mɛ ɛ́ nɛ ekukuma bam mɛ di egwak esesɛɛ mɛ aasa ɛ́ nɛ nɔ ɔ. Pɛ si mɛko mam, mɛ ɛ́ nɛ esodja. Mɛ ke nɛ ngɔt náá: "Tɔ́ak" ɔɔ, nyɛ ɛpetɔ́. Mɛ ke nɛ nwyak náá: "Bulak" ɔɔ, nyɛ ɛpebula. Tin, mɛ ke nɛ mot-mɛsa mam: "Sa dáak" ɔɔ, nyɛ ɛpesa.» 9 Dáa Yezu nagwak eyala e kukuma yenɔk ɛ, ye nabɛ ɛ́, nyɛ naadyeebamyaala. Nyɛ ɛ́ boo liig mis, nyɛy nɛ ɛdhuu ɛ bot ɛ nadi egyee nɛ nɛ nɔɔ náá: «Mɛ lɛɛ ɛ́ náá, mɛ dinaa ààpabee kwaambi yak ɛdum koŋ nɛ Zɛɛb sok, kɔ Yisalaɛl dáa yii mot’ak.» 10 Bot ɛ nalwomaa ɔ, eezɛsik yɔbɔ pɛ daa kukuma esodja, bɛ kakɛbela mot-mɛsa nadi bɛ́ ɔ, nyɛ eezetsak.

Yezu eezɛgomal muu mɔn ɛ kus moma

11 Bhii tak, Yezu eezɛtɔ́ pɛ dɛl ɛ di djóoa Nayin ɛ, lɔɔg wat nɛ bɛdjekel bɛ nɛ mɛdhuu mɛ bot ɛ nadi egyee nɛ nɛ ɔ. 12 Dáa nyɛ nadi, nyɛ moo é ngwoob ɛniel ɛ dɛl ɛ tak ɛ, bot ɛ dɛl nadi ezyɛ nɛ muu mot pɛ mɛvit étɛp ɛkɛdel nyɛ. Ye nabɛ ɛ́ ɛtsak ɛ mɔn dhiiti kus moma. Bot ɛ dɛl ɛ tak ɛbuɛpe nadi ɛ́, é ngwoob’ɛ. 13 Dáa Ghɛŋ nabee kus moma yenɔk ɛ, ghoŋ naasa nyɛ ɛbuɛpe étɛp’ɛ. Nyɛ ɛ́ booke náá: «Nàdje!» 14 Nyɛ eezɛtiila, wɔ gwaa, nyɛ mɛt kɛs*7.14 Ye nabɛ ɛ́ elyaal náá, Yezu nadi ɛ́ kɔ etsi, etɛɛ náá, tɔ etsi eYuda, ghaa-Zɛɛb nabɛ ɛ́ ààtitila nɛ muu mot, ààkomɛt-mɛtak nyɛ., bot ɛ nadi ebɛp kɛs ɔ, eezɛtyaa. Yezu zɛke náá: «Mɔɔ ngbaaz, mɛ lɛɛ ɛ́ náá: Wyɛla!» 15 Mot nagwyɛ ɔ eezɛgom, di ndiindel, nyɛ moo tinaak elii. Yezu eezɛbulal nyɛ é mɛmbɔ mɛ nyɛɛg. 16 Bot ɛ nadi tin ɔ, naadjoka ɛbuɛpe. Bɛ ɛ́ boozɛduwal Zɛɛb é ke náá: «Boo ngoolel-Mɛkpa ɛ Zɛɛb eetuula pak’enaka. Deenek, Zɛɛb eezɛkwyee bot ɛ mbyak’ɛ!» 17 Bot ɛ kyee dik Yude nɛ mɛl mɛ mengwoob nɛ mengwoob nabɛ ɛ́, bɛ naagwak menduk mɛ sa Yezu nasa ɛ.

Engoola-ngoola ee Zaŋ Nduuel-bot nalwom ɔ

18 Bɛdjekel ɛ Zaŋ eezɛkaada Zaŋ etɛp binek djas. Zaŋ eezɛdjóo bɛdjekel ɛbá pak’ɔɔ. 19 Nyɛ eezɛlwom bɛ pɛ daa Yezu, étɛp ɛdji Ghɛŋ náá: «Yɛ ɛ́ wɔy ɛ di Mɛsia nabɛ náá, nyɛ ɛpezyɛ ɔ ohoo, nɛghu ye baabwoodaa dhiiti baadi ezyɛ ɔ?» 20 Dáa bɛ nakum pɛ Yezu nadi ɛ, bɛ eezɛke nɛ nɛ náá: «Zaŋ Nduuel-bot lwom bis ɛ́, bis zɛdji wɔ náá: Yɛ ɛ́ wɔy ɛ di Mɛsia nabɛ náá, nyɛ ɛpezyɛ é ohoo, nɛghu ye baabwoodaa dhiiti baadi ezyɛ ɔ?» 21 É ɛwala ɛ tak wat, Yezu zokazɛtsik bɛtɛ nɛ membel, bot ɛ nadi nɛ edjam ɔ, nɛ bot ɛ embee esisim nadi edhedhek ɔ, dɔɔ nɛ ɛbɛ́ ɛ mis mɛ bot ɛ edhim. 22 Bhii tak, Yezu eezɛbɔɔza nɛ engoola-ngoola ɛ Zaŋ náá: «Kɛlɛɛka Zaŋ sa bi bee ɛ, nɛ yii bi gwak ɛ. Bot ɛ edhim moo nyaasok, bot ɛ di nɛ edjam ɔ moo kɛ ɛnyɔɛpe, bot ɛ nadi nɛ mɛbɛ́ mɛ zezam ɔ, bɛ eezetsak. Bɛ na endiila e mɛlɔ, moo gwak. Bot ɛ zegwyɛ ɔ, bɛ eezegom. Mbɛɛ Bhaadal ɛpegoolel, kɛkum pɛ daa bɛdjel ɛ bot. 23 Mɛnyɔ nɛ mot aadi ààdis ɛbwaalel ɛ lɛ kɔ lam ɔ!»

24 Bhis engoola-ngoola ɛ Zaŋ nasik ɛ, Yezu moo tin elii nɛ zukamwaa nɛ mot nadi tin kɔ ɛsu ɛ Zaŋ. Nyɛ nalɛɛ nɛ nɔɔ náá: «Bi nakɛbee yé tɔ bal? Mɔɔ le ghwaazok edheegel nɛ pup é? Ààbɛ! 25 Haaa bi nakɛbee yé tɔ bal? Bi nakɛbee ɛ́, mot ngɔt nɛ vaŋ mbi bhet é? Bi nɛ gu náá, bot ɛ dyeebabɔt evaŋ ekaad ɔ, nɛ bot ɛ di edi tɔ ekum ɔ, dyeebadi ɛ́ pɛ tɔ eboo mendjaa mɛ bɛmɛkoozi. 26 Haaa bi nakɛbee yé? Bi nakɛbee ɛ́ ngoolel-Mɛkpa ɛ Zɛɛb é? Nɛ tsɛɛtsɛ mɛ lɛɛ bin ɛ́ náá, yii bi nakɛbee ɛ, nyɛ eedhaa-dhaŋak ngoolel-Mɛkpa ɛ Zɛɛb. 27 Etɛɛ náá, Zaŋ ɛ́ mot Ekwyala nalɛɛ náá:

"Ɛsok nɛ wɔ nɛ tɔ́,

mɛ waalwom ngoola-ngoola yam,

étɛp nyɛ neekɛkoobal wɔ mɛze*7.27 Mal 3.1."»

28 Yezu eebaabil náá: «Mɛ lɛɛ bin ɛ́ etɛp e tsɛɛtsɛ náá: pɛ tɔ bot djas Zɛɛb nasa ɔ, ye tok nɛ mot dhaa Zaŋ Nduuel-bot. Saabɛgɔs ɛ́ náá, mot di mɔɔ dhyeeb tɔ Ɛyoŋ ɛ Zɛɛb ɔ eedhaa Zaŋ. 29 Bot ɛ mbyak Yisalaɛl djas nɛ bɛnɔŋel ɛ epata e lapo naagwak nyɛ, bɔɔ myaal náá, Zɛɛb ɛ́ mot epiki. Bhii tak, bɔɔ batazɛduwa Zɛɛb pɛ daa Zaŋ. 30 Tin, eFalizyɛ nɛ bɛlyoel ɛ etsi naabyen ɛkwosak ɛ Zɛɛb étɛp’ɔɔ, bɛ naapɛɛ náá, Zaŋ duu bɛ Zɛɛb.»

31 Yezu eebaazɛke náá: «Mɛ gek bot ɛ membu mak nɛ bɛzɛ? Bɛ baakɔa nɛ zɛ é? 32 Bɛ ɛ́ dáa zɛɛga bɔɔ dhyeeb mendiindil kɔ ɛbɛsɛɛ ɛ bot djas di edi ɛ. Tin, ngɔt katsim ɛ́, lɛɛ nɛ bɔɔ bɛsɔ bɛ náá: "Bis eebwom bin ngɔmbi, bi ààpabɔl. Bis eedjeeb bin mɛdjeeb mɛ ɛsyee, bi ààpadje!" 33 Etɛɛ náá, Zaŋ Nduuel-bot eezyɛ. Nyɛ nabɛ ɛ́ nyɛ eetsi edee nɛ mɛnyok, bi kake ɛ́ náá: "Yɛ ɛ́ ɛlyeeb ɛ di esa nyɛ deenek!" 34 Sɛɛŋɛlɛ Mɔn Mot eezyɛ. Nyɛ ɛpedɛ yɛ edee, bi kake ɛ́ náá: "Beeka nwyak é, na ghaa-dek nɛ mɛnyok. Nyɛ ɛ́ mɔɔ sɔ ɛ bɛnɔŋel ɛ epata e lapo, nɛ bot ɛ di nɛ mbee tsik ɔ!" 35 Tin, bot djas di emyaal etsoŋ e Zɛɛb ɔ, bɛ ɛpegu náá, yɛ ɛ́ epiki.»

Yezu tɔ ndjaŋ ɛ Simɔŋ, mot Falizyɛ

36 Dhiiti mot Falizyɛ zokazɛdjóo Yezu, nyɛ zɛdɛ edee bɛ nɛ. Wɔ gwaa, Yezu zɛtɔ́ pɛ daa lɛ, nyɛ eezɛnɔɔ di kɔ mesa. 37 Pɛ kɔ dɛl ɛ tak ye nabɛ ɛ́ nɛ dhiiti moma nadi nɛ mbee dék ɔ. Dáa nyɛ nagwak náá, Yezu nadi ɛ́, kɔ mesa pɛ daa mot Falizyɛ ɛ, nyɛ eezɛzyɛ nɛ bɛɛb nasael nɛ ɛkok ɛ albat ɛ, tɔɔɔ nɛ mɛnanas. 38 Nyɛ eezɛtyaa bhii koŋ ɛ Yezu, é dje si mɛko mɛ. Nyɛ moo tin ebel mɛko ɛ Yezu nɛ miŋal mɛ. Tin, nyɛ moo esuŋal yɛ nɛ bhoo lo’ɛ, dɔɔ nɛ ɛboma nuub’ɛ é mɛko ɛ Yezu. Bhii tak nyɛ eezɛso mɛnanas kɔ mɛko mɛ tak.

39 É ghɛŋ mot Falizyɛ nadjóo Yezu náá, nyɛ zɛdɛ pɛ daa lɛ ɛ, nabee deenek ɛ́, nyɛ moo tin elii tɔ lyem’ɛ náá: «Mot tak ɛpedi ɛ́ di ngoolel-Mɛkpa ɛ Zɛɛb ɔɔ, pe nyɛ eegu mbi moma mɛt nyɛ’aak. Pe nyɛ eegu náá, nyɛ ɛ́ moma na mbee dék!» 40 Yezu eezɛke nɛ mot Falizyɛ yenɔk náá: «Simɔŋ, mɛ ɛ́ nɛ sa wat mɛ di kwyɛl ɛlɛɛ wɔ.» Simɔŋ eezɛke nɛ nɛ náá: «Bela, liia lyoel.» 41 Yezu eezɛke nɛ nɛ náá: «Mot ngɔt naakola bot ɛbá epata. Ngɔt nakola ɛ́, edhenye bɛdhet-ɛtɛn (500), dhiiti tak epata mɛkam-mɛtɛn (50). 42 Dáa bɔɔ djas nadi ààbɛ nɛ ghwyil ɛbulal epata tak ɛ, nakuma epata ɛ́ boopel kola bɔɔ djas bɛbá. Pɛ tɔ bot ɛbá binɔk ɛzɛ aakwyɛl mot’enɔk dhaa tyɛ?» 43 Simɔŋ eezɛbɔɔza náá: «Yɛ bɛ mam ɔ, mɛ gek ɛ́ náá, yɛ aadi ɛ́, mot nakola epata ɛbuɛpe ɔ.» Yezu eezɛbɔɔza nɛ nɛ náá: «Simɔŋ, wɔ ɛ́ nɛ gham.»

44 Bhii tak, nyɛ eezɛliig mis, gwyák moma tak. Nyɛy nɛ Simɔŋ náá: «Wɔ eebee moma yak é? Mɛ eeni tɔ ndjaŋ’ɔ, wɔ ààpadjɛ mɛ mɛdii mɛ ɛgwyii ɛ mɛko. Gwyáka! Nyɛ eegwyii mɛ mɛko nɛ miŋal mɛ, bhii tak, nyɛ eesuŋal yɛ nɛ bhoo’ɛ. 45 Wɔ ààpaboma nuub’ɔ é mɛmuk mam. Yɛ kabɛ nyɛy ɔɔ, dáa mɛ looni wak mos ɛ, nyɛ ààpakat ɛboma nuub’ɛ é mɛko mam. 46 Wɔ ààpalɔɔb mɛ mul kɔ lo. Yɛ kabɛ nyɛy ɔɔ, nyɛ eelɔɔb mɛ mɛnanas é mɛko! 47 Yɛ ɛ́ étɛp tak ɛ mɛ di lɛɛ wɔ náá: Bɛtɛ nɛ mesyem mɛ eepelel! Yɛ ɛ́ étɛp tak ɛ nyɛ lyaal boo kwyɛl deenek. Mot pelaa ba bim ɔ, zobaalyaal ɛ́ ba bim kwyɛl.» 48 Yezu ɛ́ boozɛke nɛ moma tak náá: «Mesyem mɔ, eepelel.»

49 Bot ɛ bɛ nɛ bɛnɔɔ nadi kɔ mesa ɔ moo tin elii pak’ɔɔ náá: «Nwyak ɛ́ nwyaa kwaambi mot di nɛ ghwyil ɛpel mesyem mɛ bot’aak?» 50 Tin, Yezu eezɛke nɛ moma yenɔk náá: «Ɛmyaal ɛ lɔ eetsik wɔ. Tɔ́a tɔ egwyem.»