1 É ghɛŋ tak ye nabɛ ɛ́ Zaŋ Nduuel-bot eetuula tɔ kyee bɔs bɛsyɛ di ààbɛ nɛ mɛdii ɛ pɛ kyee dik Yude. Nyɛ nadi elyo ɛ́ náá: 2 «Liigka elyem bin, etɛɛ náá, Ɛyoŋ ɛ di tɔ gwoo ɛ, yɛ eezekunaa!» 3 Ngoolel-Mɛkpa ɛ Zɛɛb Ezayi nalii étɛp’ɛ ɛ́ náá:

«Mot ngɔt ɛpetuud kɔ kyee bɔs bɛsyɛ di ààbɛ nɛ mɛdii ɛ náá:

"Koobalka mɛze ɛ Ghɛŋ!

Tuuka nyɛ mɛze mɛ na looba-looba*!"»

4 Kaad Zaŋ nadi ebɔt ɛ nasael ɛ́ nɛ mya mɛ boo yaaga bal. Nyɛ nabɛ ɛ́ nɛ bhɛtɛ ket é kuu. Nyɛ nadedɛ ɛ́ etsemaaka nɛ egho. 5 Bot ɛ ghaada Yeluzalɛm nɛ bot ɛ kyee dik Yude djas, zɛnɔɔ bot ɛ nadidi mbaka-mbaka nɛ dii Yuldɛn ɔ, nadi ezyɛ pɛ daa lɛ. 6 Bɛ nadi evaa mesyem mɔɔ é mis mɛ bot. Bhii tak, Zaŋ ɛ́ zɛduu bɛ Zɛɛb tɔ dii Yuldɛn.

7 Dáa Zaŋ nabee náá, bɛtɛ nɛ eFalizyɛ nɛ eSaduseɛ nadi ezyɛ pɛ daa lɛ ɛbuɛpe zɛduwa Zɛɛb ɛ, nyɛ ɛ́ boozɛke nɛ nɔɔ náá: «Biyɔ mbyak mɛgel mak! Ɛzɛ lyo bin náá, bi kaab ɛbuk ɛ Zɛɛb zekunaa nɛ ɛzyɛ’enek? 8 Lyaalka nɛ esesɛɛ bin náá, yɛ ɛ́ tsɛɛtsɛ náá, bi eezeliig elyem bin. 9 Betka ɛke biyɔ nɛ biyɔ náá: "Dhiiti sonok aanàkwaasa mena, etɛɛ náá: Abalaam ɛ́ bhaab’enaka." Etɛɛ náá, Zɛɛb ɛ́ nɛ ghwyil ɛliig mɛkok mak ye liiza bɛdha ɛ Abalaam. 10 Ye nyɔ ɛ́ bi gu náá, zoŋ moo ɛ́ nɛɛga é ɛbok ɛ le étɛp ye neetsaal ekaŋal e tak. Ele ee di ààdjɛ mbɛɛ bhum ɔ djas, goka ɛ́ nɛ ɛkwyalaa. Bhii tak, da yɛ ɛ́ kɛmwasaa tɔ du.

11 Yɛ ɛ́ tsɛɛtsɛ náá, mam duu bin Zɛɛb ɛ́ tɔ mɛdii, étɛp ye neelyaal náá, bi eezeliig elyem. Yɛ kabɛ mot di zyɛ bhis’am ɔɔ, nyɛ aaduu bin Zɛɛb ɛ́, tɔ ghwyil Sisim na Dɛɛ nɛ du. Nyɛ eedhaa mɛ nɛ mɛbwala. Mam aanàkwaakobela-bela duu ɛmalal étɛp ɛkotii-tiiak ekel ekoko bɛ. 12 Tɔ mɛmbɔ mɛ, nyɛ eemɛt wal étɛp nyɛ neewa mbɛk pak ezeeza nɛ embɛɛ mɛbhek. Tin, da nyɛ ɛ́ kwom mbɛɛ bhum kɔ taa. Yɛ kabɛ ezeeza ɔɔ, nyɛ kakɛmwas yɛ ɛ́ tɔ du na kɔm-kɔm.»

13 Dhiiti dwoo Yezu naazɛdus pɛ kyee dik Ghalile zɛkum pɛ dii Yuldɛn pɛ kyee Zaŋ nadi ɛ́, étɛp nyɛ needuwa Zɛɛb dáa Zaŋ. 14 Wɔ gwaa Zaŋ zɛbyen yɛ. Nyɛy nɛ nɛ náá: «Yɛ ɛ́ mam ɛ di egoka nɛ ɛzyɛ, zɛduwa Zɛɛb pɛ daa lɔ. Deenek, wɔy ɛ kadi ezyɛ pɛ daa lam é!» 15 Yezu eezɛbɔɔza nɛ nɛ náá: «Wɔ goka ɛ́ wɔ myaal náá, ye sɛ́ɛ deenek é ɛwala ɛlak. Etɛɛ náá, yɛ ɛ́ deenek ɛ́ mena aasaka ɛkwosak ɛ Zɛɛb.» Tin, Zaŋ ɛ́ boozɛmyaal.Yezu eeduwa Zɛɛb

16 Dáa Yezu naduwa Zɛɛb ɛ, wyisa nyɛ nazowyis tɔ mɛdii ɛ, é di tak wat, wɔ gwaa, gwoo zɛbɛŋel. Bhii tak, Sisim na Dɛɛ eezyɛ, zɛsul kɔ lɛ tyee ɛghum. 17 Dhiiti gwood eezɛgék tɔ gwoo náá: «Nwyak ɛ́ mɔn’am mɛ di kwyɛl ɔ. Mɛ eedyeebamyaala nɛ nɛ ɛbuɛpe.»