1 Dáa Yezu nabee ɛdhuu ɛ bot binɔk ɛ, nyɛ naazɛbyet kɔ ɛtsok, nyɛ eezɛnɔɔ nyel’ɛ, disi. Bɛdjekel bɛ eezɛdisi é ngwoob’ɛ. 2 Nyɛ eezɛni edjɛ bɛ mɛlyo:

3 «Mɛnyɔ nɛ bɛdjel ɛ bot tɔ sisim,

etɛɛ náá, Ɛyoŋ ɛ di tɔ gwoo ɔ, yɛ ɛ́ yɔbɔ.

4 Mɛnyɔ nɛ bot ɛ di edje nenak ɔ,

etɛɛ náá, Zɛɛb ɛ́ waadis ghoŋ di tɔ elyem bɔɔ ɛ!

5 Mɛnyɔ nɛ bot ɛ di etela lyem ɔ,

etɛɛ náá, bɛ waabela kyee bɔs Zɛɛb nakɛk bɛ ɛ!

6 Mɛnyɔ nɛ bot ɛ di nɛ za nɛ gwyes ɛsa ɛkwosak ɛ Zɛɛb ɔ,

etɛɛ náá, bɛ waadɛ, djil!

7 Mɛnyɔ nɛ bot ɛ di egék bot ɛ sis ghoŋ ɔ,

etɛɛ náá, Zɛɛb ɛ́ waagek bɛ ghoŋ!

8 Mɛnyɔ nɛ bot ɛ di nɛ lyem sɛŋ ɔ,

etɛɛ náá, bɛ waabee Zɛɛb.

9 Mɛnyɔ nɛ bot ɛ di esaa egwyem pak’ɔɔ ɛ,

etɛɛ náá, Zɛɛb ɛ́ waadiig bet náá, bɛ ɛ́ bɔn bɛ!

10 Mɛnyɔ nɛ bot ɛ di tɔ tsik mezuk ɔ,

etɛɛ náá, bɛ ɛpesa ɛkwosak ɛ Zɛɛb,

etɛɛ náá, Ɛyoŋ ɛ di tɔ gwoo ɔ, yɛ ɛ́ yɔbɔ!

11 Mɛnyɔ nɛ nen, yɛ bɛ náá, bot ɛpelee bin ɔɔ, nɛ ɛwa bin tɔ tsik mezuk ɔɔ, bɛ di esu bin etɛp mbɛs ɔɔ, nɛ ɛbaasaab dék’en étɛp’am ɔɔ, 12 myaalaka, da bi ɛ́ bɔl zɛŋ, etɛɛ náá, boo etuud bin ɛ́ nɛɛga pɛ tɔ gwoo. Etɛɛ náá, yɛ ɛ́ deenek ɛ́ bɛ nazuk bɛngoolel ɛ Mɛkpa ɛ Zɛɛb nazyɛ ɛsok nɛ nen ɔ.»

13 «Yɛ ɛ́ biyɔ ɛ di mɛsɔn kɔ bɔs. Yɛ bɛ náá, mɛsɔn moo ɛ́, ààkagwom ɔɔ, ye goka ɛ́ nɛ ɛsaaa dáa, étɛp mɛsɔn neebaagwom? Deenek mɛsɔn aakadi ɛ́, ààbɛ nɛ mɛsa mɛ yɛ aasaaa nɛ yɛ. Deenek, ye goka ɛ́ nɛ ɛmwasaa pɛ kel, da bot ɛ́ nyal yɛ.

14 Yɛ ɛ́ biyɔ ɛ di mɛkas kɔ ɛko ɛ bɔs. Dɛl ɛ di suma kɔ ɛtsok ɔ, tok nɛ ghwyil ɛdi syela. 15 Wɔ aanàkwaatuub lama, da wɔ ɛ́ wa yɛ si bhe. Yɛ ààseaa deenek, ye goka nɛ ɛkɛlaa ɛ́, pɛ kɔ tɛɛg é di bot djas aadi tɔ gwyɛ tak ɔ. 16 Yɛ ɛ́ deenek ɛ́ di egoka náá, mɛkas men nyen tɔ bot, étɛp bot neebee mɛnyɔ mɛ esesɛɛ bi di esa ɛ, étɛp bɛ needuwal Sɛɛg’en di tɔ gwoo ɔ.»

17 «Nàgekeka náá, mɛ nazyɛ ɛ́ zɛgó etsi ɛ Moiiz nɛ mɛlyo mɛ bɛngoolel ɛ Mɛkpa ɛ Zɛɛb nadjɛ ɛ. Mɛ nabɛ ɛ́ ààzyɛ zɛgó etsi, mɛ nazyɛ ɛ́ zɛlyaal mɛsuk mɛ tak. 18 Tsɛɛtsɛ nɛ tsɛɛtsɛ, mɛ lɛɛ bin ɛ́ náá: Dáa ye di náá, gwoo nɛ bɔs dinaa ààpadum ɛ, ye tok nɛ sa wat aadisaa tɔ etsi. Ye nakoozodi ba mɔɔ ɛtɔn nɛghu ba mɔɔ kyeeb, sa wat aanàdus tɔ etsi kɛkum dwoo mɛsik mɛ etɛp djas. 19 Yɛ ɛ́ étɛp tak ɛ di náá, mot aazodis tsi wat, ye nakoozotɔɔl dáa, da nyɛ ɛ́ lyo bɔn-nyɛɛg náá, bɛ sa dáa nyɛ sa ɔɔ, yenɔk aadi ɛ́, mɔɔ dhyeeb tɔ Ɛyoŋ ɛ di tɔ gwoo ɛ. Tin, mot di eduwal etsi, da nyɛ ɛ́ lyo bɔn-nyɛɛg náá, bɛ sa dáa nyɛy ɔ, yenɔk aadi ɛ́ boo-mot tɔ Ɛyoŋ ɛ di tɔ gwoo ɔ. 20 Mɛ lɛɛ bin ɛ́ náá: Epiki bin é mis ɛ Zɛɛb ɛ di ààdhaa yii bɛghaŋ ɛ mɛkana mɛ etsi nɛ eFalizyɛ ɔɔ, bi aanàkwaani tɔ Ɛyoŋ ɛ di tɔ gwoo ɛ.»

21 «Ye nabɛ ɛ́, bi naagwak náá, nyɛ nake nɛ bɛbhaab bina náá: "Sa wɔ ààgó mot. Mot ɛ gó sɔ mot ɔɔ, ye goka ɛ́ ye tɔ́aa nɛ nɛ é mis mɛ bɛtetɛp, nyɛ neepɛ́ɛaa." 22 Yɛ kabɛ mam ɔɔ, mɛ lɛɛ bin ɛ náá: Mot djas aagwak ɛbuk nɛ mɔn-nyɛɛg ɔɔ, ye goka ɛ́ náá, bɛtetɛp pɛ́ɛ nyɛ. Mot aake nɛ sɔ mot náá, "wɔ ɛ́ wo ɔ", nyɛ goka ɛ́ nyɛ tɔ́ kɛpɛ́ɛaa pɛ boo kwan eYuda. Mot aake nɛ sɔ mot náá, "wɔ ɛ́ ndjemet ɔ", ye goka ɛ́ náá, nyɛ kɛmwasaa tɔ du na kɔm-kɔm. 23 Yɛ bɛ náá, wɔ ɛpetɔ́ pɛ mesa-ebuwa étɛp ɛkɛduwal Zɛɛb nɛ esa bɔ ɔɔ, tin, wɔ siiza náá, mɔn-nyoog ɛ́ nɛ tɛp nyɛ di ebwak wɔ kɔ ɛsu ɛ tak ɔɔ, 24 pookobet esa e duu tak kɔ mesa-ebuwa. Da wɔ ɛ́ pookokɛgwakel nɛ mɔn-nyoog. Bhii tak ɛ wɔ aakazyɛ, zɛkaa Zɛɛb ɛkɛɛ ɛ lɔ.

25 Mot ɛ kɛpit wɔ ɔɔ, bi ɛ di etɔ́ pɛ daa bɛtetɛp ɔɔ, lela ɛgwakel nɛ nɛ é di bi dinaa é ze yenek, ekaab náá, mot tak ɛ́ zɛkɛka wɔ é mis mɛ bɛtetɛp. Bhii tak, da bɛtetɛp ɛ́ djɛ wɔ é mɛmbɔ mɛ esodja, da bɛ ɛ́ wa wɔ é membok. 26 Tsɛɛtsɛ nɛ tsɛɛtsɛ, mɛ lɛɛ bin ɛ náá: Wɔ aanàkwaawyis tin, wɔ di ààtuud dɔɔ nɛ falanga ɛsik ɔ.»

27 «Ye nabɛ ɛ́, bi naagwak náá: "Sa wɔ ààsa ɛzɔ." 28 Tin, mam kalɛɛ nɛ nen ɛ náá, motom djas aagwyák mwaa sɔ, da nyɛ ɛ wyeeb nyɛ tɔ lyem ɔɔ, yenɔk tak eezesa ɛzɔ nɛ moma tak tɔ lyem’ɛ. 29 Yɛ bɛ náá, yɛ ɛ́ dis ɛ kyee mbɔ eghɛŋ bɔ ɛ́ di esa náá, wɔ gheekwyekwyɛ tɔ mesyem ɔɔ, wɔ goka ɛ́ nɛ ɛpiid ɛ yɛ, da wɔ ɛ́ mwas yɛ ɛtsetaɛpe. Yɛ aadi ɛ́, ɛnyɔɛpe nɛ nɔ náá, wɔ dis dhiiti kyes nyel’ɔ, ààkabɛ náá, wɔ kɛdyak tɔ du na kɔm-kɔm nɛ nyel’ɔ djas. 30 Yɛ bɛ náá, yɛ ɛ́ mbɔ eghɛŋ bɔ ɛ di esa náá, wɔ gheekwyekwyɛ tɔ mesyem ɔɔ, tsaala yɛ, da wɔ ɛ́ mwas yɛ ɛtsetaɛpe nɛ nɔ. Yɛ aadi ɛ́ ɛnyɔɛpe nɛ nɔ náá, wɔ tsaal dhiiti kyes nyel’ɔ, ààkabɛ náá, wɔ kɛdyak tɔ du na kɔm-kɔm nɛ nyel’ɔ djas.»

31 «Ye nabɛ ɛ́, bɛ naabaake náá: "Mot ɛ pɛɛ myɛl ɔɔ, nyɛ goka ɛ́ nɛ ɛdjɛ nyɛ mɛkana mɛ ɛbel ɛ ɛba." 32 Yɛ kabɛ mam ɔɔ, mɛ ke ɛ́ náá, motom djas di epɛɛ myɛl, ààmɛt nyɛ nɛ sa etsi di elu ɔ, motom tak sa ɛ́ náá, moma tak di moma mɛzɔ nyɛ baatɔ́ ɛba ɛ sis ɔɔ. Tin, motom aaba moma zebyenaa é ɛba ɔ, nyɛy baasa ɛ́ ɛzɔ.»

33 «Ye nabɛ ɛ́, bi naagwak dáa bɛ nake nɛ bɛbhaab binaka náá: "Sa wɔ ààgwakel nɛ mot, da wɔ ɛ́ tuwal myoŋ nɛ mɛsoŋ bhii tak wɔ kadi ɛ́ ààsa sa wɔ nakɛk ɛ. Ye goka ɛ́ náá, wɔ sa sa wɔ kɛk é mis mɛ Ghɛŋ ɛ." 34 Yɛ kabɛ mam ɔɔ, mɛ lɛɛ bin ɛ́ náá, sa mot ààtuwal myoŋ nɛ mɛsoŋ, da nɔɔ gwoo dáa tyaasɛs, etɛɛ náá, penek ɛ́ pɛ bóó mɛkoozi mɛ Zɛɛb di ɛ. 35 Sa mot ààtuwal myoŋ nɛ mɛsoŋ nɛ bɔs, etɛɛ náá, bɔs ɛ́ di Zɛɛb di enyal nɛ mɛko mɛ ɔ. Sa mot ààtuwal myoŋ nɛ mɛsoŋ nɛ din ɛ Yeluzalɛm, etɛɛ náá, yɛ ɛ́ ghaada ɛ boo Mɛkoozi. 36 Sa wɔ ààtuwal myoŋ nɛ mɛsoŋ, da wa lo’ɔ é ban, etɛɛ náá, wɔ tok nɛ ghwyil ɛswoola bhoo lo’ɔ náá, ye bhilal nɛghu ye pum. 37 Yɛ bɛ náá, wɔ eemyaal tɛp ɔɔ, kea "iyooo". Yɛ kabɛ náá, wɔ eebyen ɔɔ, kea "hooo", etɛɛ náá, ekɛla-ekɛla ee bot dyeebakɛl kɔ étɛp’enek dyeebadus ɛ́ pɛ daa Mbee mot.»

38 «Ye nabɛ ɛ́, bi naagwak náá: "Mot ɛ tuu sɔ dis ɔɔ, ye goka ɛ́ náá, nyɛ baatuuaa yɛ. Mot ɛ bwak wɔ ɛdjɛ ɔɔ, da wɔy ɛ́ baabwak nyɛ ɛdjɛ." 39 Deenek, mam kalɛɛ bin ɛ náá: Sa mot ààbulal ɛbiyo nɛ ɛbiyo. Mot ɛ nyuu wɔ bɛɛz é ɛmuk pɛ mbɔ eghɛŋ ɔɔ, baaka nyɛ yak kyee ɛmuk. 40 Mot ɛ di esaa wɔ nɛ etɛp étɛp nyɛ neenɔɔ kuwa yɔ ɔɔ, beta nyɛ, nyɛ baanɔɔ dɔɔ nɛ ndjookuwa yɔ. 41 Mot ɛ besal wɔ náá, wɔ kɛ nɛŋ wat ɔɔ, kɛa enɛŋ ebá. 42 Gwyena nɛ mot di ewaab wɔ sonok ɔ. Yɛ bɛ mot eenɔɔ sa yɔ ɔɔ, sa wɔ ààkabaakɛdu.»

43 «Ye nabɛ ɛ́, bi naagwak náá: "Ye goka ɛ́, wɔ kwyɛl sɔ’ɔ mot, da wɔ ɛ́ byen mot mɛbhuka mɔ." 44 Yɛ bɛ mam ɔɔ, mɛ kalɛɛ bin ɛ́ náá, kwyɛlka bot ɛ mɛbhuka men. Djaalaka Zɛɛb kɔ ɛsu ɛ bot ɛ di etiig bin ɔ. 45 Yɛ ɛ́ deenek ɛ bi aadi bɔn Sɛɛg’en di pɛ tɔ gwoo ɔ, etɛɛ náá, Zɛɛb ɛ di esa náá, gwyes kas kɔ bot djas, bɛmbee ɛ bot nɛ bɛtɛtɛ ɛ bot. Tyee wat, Zɛɛb sil bhi ɛ́, étɛp bot ɛ di sosoob ɔ, nɛ bot ɛ di ààbɛ sosoob ɔ. 46 Yɛ bɛ náá, bi zokwyɛl ɛ́ bot ɛ di ekwyɛl bin ɔɔ, étɛp yé bi di bun náá, bi ɛ́ waabela efute aadus pɛ ɛko ɛ? Dɔɔ nɛ bɛnɔŋel ɛ epata e lapo zobaakwyɛl ɛ́, bot ɛ di ekwyɛl bɛ ɔ. 47 Yɛ bɛ náá, bi zoswos ɛ́ bɔn-nyɛɛg bin ɔɔ, bi bee tin ɛ́ náá, bi ɛpesa enɛm esa? Etɛɛ náá, bot ɛ di ààbɛ bot ɛ membyak mɛ sis ɔ, bɔɔ pe zobaasa ɛ́ deenek! 48 Dika nɛ mbɛɛ elyem dáa Sɛɛg’en di tɔ gwoo ɔ di nɛ mbɛɛ lyem ɛ.»