1 Bɔn-nyɛɛg bam, ɛkwosak ɛ lyem’am nɛ mendjaala mam pɛ daa Zɛɛb kɔ ɛsu ɛ bot ɛ mbyak eYuda ɛ́ náá, bɛ bela tsik. 2 Nɛ tsɛɛtsɛ, mɛ ɛ́ nɛ ghwyil ɛdi tyaasɛs é di yɔɔ náá, bɛ nɛ sa zii tɔ ɛsa mɛsa mɛ Zɛɛb. Tin, zii ɛsa mɛsa mɛ Zɛɛb tak nɛ bu ɛdjak tɔ tak. 3 É di’enek, bɛ nabɛ ɛ́ àànyɔ ɛtiibal dáa Zɛɛb di esa náá, mot di mot epiki é mis mɛ ɛ. Tin, bɛ naasa yɔbɔ mɛpek mɛ ɛdi ɛ́ piki e bot nɛ mɛghwyil mɔɔ met. É di’enek, bɛ nabɛ ɛ́ ààlooba nɛ dáa Zɛɛb di esa étɛp mot needi mot epiki ɛ. 4 Etɛɛ náá, ɛtuula ɛ Klisto nabɛ ɛ́ ɛsik ɛ Etsi ɛ Moiiz, étɛp bot djas di edum koŋ nɛ Zɛɛb ɔ needjɛaa di epiki é mis ɛ Zɛɛb.

5 Beeka sa Moiiz nakwyal dum nɛ dáa mot di egoka nɛ ɛsa étɛp nyɛ needi mot epiki dum nɛ etsi ɛ: «Mot di ekɛ dáa mɛtiŋ mɛ etsi di elɛɛ ɔ, nyɛ aadi nɛ tsik kɔ ɛsu ɛ tak✝10.5 Msa 18.5.» 6 Tin, gwakeka dáa ye di ekeaa, étɛp mot needjɛaa di epiki kɔ ɛsu ɛ ɛdum ɛ koŋ nɛ Zɛɛb ɛ: «Sa wɔ ààke tɔ lyem’ɔ náá: "Ɛzɛ aabyet tɔ gwoo?"» Ye kwyɛl ɛlɛɛ ɛ́, ɛsil Klisto kɔ ɛko ɛ bɔs. 7 Sa wɔ ààke-keak tɔ lyem’ɔ náá: «Ɛzɛ aasul tɔ guk di ààbɛ nɛ ɛsik ɛ✝10.7 Luk 8.31?» Ye kwyɛl ɛlɛɛ ɛ́, ɛgomal Klisto pak myoŋ. 8 Ye lɛɛ yé? Ye lɛɛ ɛ́ náá: «Mɛkpa ɛ Zɛɛb eezekunaa nɛ nɔ, yɛ ɛ́ pɛ tɔ nuub’ɔ, nɛ tɔ lyem’ɔ✝10.8 Dɛt 9.4; 30.12-14.» Mɛkpa mɛ tak ɛ́ bhaadal ɛdum ɛ koŋ nɛ Zɛɛb ee bis di egoola ɛ. 9 Deenek yɛ bɛ náá, pɛ tɔ nuub’ɔ wɔ eemyaal é mis mɛ bot djas náá, Yezu ɛ́ Ghɛŋ ɔɔ, yɛ bɛ náá, wɔ eemyaal nɛ lyem’ɔ met náá, Zɛɛb naagomal nyɛ pak myoŋ ɔɔ, wɔ aabela tsik. 10 Etɛɛ náá, bot dum koŋ nɛ Zɛɛb ɛ tɔ lyem. Tin, Zɛɛb djɛ mot di epiki ɛ, nyɛ di edum koŋ nɛ nɛ ɔ. Yɛ ɛ́ nɛ nuub ɛ mot di emyaal ɛdum ɛ koŋ ɛ lɛ nɛ Zɛɛb, da Zɛɛb ɛ́ tsik nyɛ. 11 Ekwyala lɛɛ ɛ́ náá: «Mot aadum koŋ nɛ Zɛɛb ɔ, nyɛ aanàkwaadhuselaa✝10.11 Eza 28.16.» 12 É di’enek, ye tok nɛ mbɛk pak bot ɛ mbyak eYuda nɛ bot ɛ mbyak eGhɛlɛk. Etɛɛ náá, bɔɔ djas djóo ɛ́ Ghɛŋ ngɔt, nyɛ sa enɛm esa bɛ ɛ́ nɛ bot djas di edjóo nyɛ ɔ. 13 Tin, Ekwyala lɛɛ ɛ́ náá: «Mot aadjaala nɛ din ɛ Ghɛŋ ɔ nyɛ waatsak✝10.13 Zol 3.5.»

14 Haaa bɛ aakodjóo nyɛ dáa, yɛ bɛ náá, bɛ ààpadum koŋ nɛ nɛ ɔɔ? Haaa bɛ aadum koŋ nɛ nɛ dáa, yɛ bɛ náá, bɛ ààpagwak bot elii dum nɛ nɛ ɔɔ? Haaa bɛ aagwak bot elii dum nɛ nɛ ɔ dáa, yɛ bɛ náá, ye tok nɛ bot ɛ di elii dum nɛ nɛ ɔɔ? 15 Tin, bɛ aakogoola yɛ dáa, yɛ bɛ náá, ye tok nɛ mot lwomaa étɛp tak ɔɔ? Yɛ ɛ́ dáa Ekwyala di elɛɛ náá: «Enɛm nɛ mɛbɔ mɛ bot ɛ di egoola embɛɛ mɛbhaadal ɔ✝10.15 Eza 52.7!» 16 Tin, bot djas nabɛ ɛ́ ààlooba nɛ Mbɛɛ Bhaadal. Ngoolel-mɛkpa Ezayi naake náá: «Ghɛŋ, ɛzɛ myaal Mbɛɛ Bhaadal bis goola ɛ✝10.16 Eza 53.1?» 17 É di’enek, guka náá, ɛdum ɛ koŋ nɛ Zɛɛb dus ɛ́ tɔ ɛgwak ɛ Mbɛɛ Bhaadal nagoolaaa ɛ. Tin, Mbɛɛ Bhaadal tak ɛ́ mɛkpa ɛ Klisto.

18 É di’enek, mɛ ɛ́ tin edji náá, eYuda nabɛ ɛ́ ààgwak bhaadal tak é? Bɛ naagwak yɛ! Ekwyala lɛɛ ɛ́ náá:

«Tuud bɛngoolel ɛ Mɛkpa ɛ Zɛɛb naagék kɔ ɛko ɛ bɔs djas,

mɛkpa mɔɔ naadjala kɔ ɛko ɛ bɔs djas✝10.18 Mɛd 19.5.»

19 Mɛ ɛpebaadji náá, bot ɛ mbyak Yisalaɛl nabɛ ɛ́ àànyɔ ɛmɛt lo mɛsɔ mɛ tak é? Tin, pookogwakeka dáa Moiiz nayala ɛ:

«Zɛɛb ke ɛ́, mɛ waasa náá, "Bi di nɛ mbee lyem nɛ bot ɛ di ààkodi bot ɛ tɛtɛ mbyak ɔ,

mɛ waabesal bin náá, bi di nɛ ɛbuk nɛ bot ɛ mbyak di ààbɛ nɛ mɛtselal ɔ✝10.19 Dɛt 32.21."»

20 Ezayi naabalazɛke náá:

«Zɛɛb ke ɛ́ náá: "Bot ɛ nadi ààsaa mɛ ɔ naabela mɛ,

mɛ naatel nyel’am nɛ bot ɛ nadi ààwaab dhiiti sonok nɛ nam ɔ."»

21 Tin, kɔ ɛsu ɛ bot ɛ Yisalaɛl, Zɛɛb naabaake náá:

«Mɛlu djas, mɛ naadja mɛmbɔ mam nɛ bot ɛ mbyak di ààlooba nɛ nam ɔ, bot ɛ mengat✝10.21 Eza 65.1-2.»