1 Timóteo 3

Filongochi va mulipinga lya vanu va Nguluvi vevamwidikiye Kilisito

1 Luchowo ulu nde lwa undakyene, mvaha va lipinga lya vanu va Nguluvi vevamwidikiye Kilisito, nde munu yeigumbanikila makani gya vanu, ikela kasi nofu. 2 Suwe, kilongochi va lipinga lya vanu va Nguluvi vevamwidikiye Kilisito, ing’ang’wa kuvecha munu yeihela nongwa na vanu, ing’ang’wa aveche na mdala yumwi na aveche na kigelo na munya uginyange na munu va kuvawanuka vanu pakaye lyake na yeiwesa kuwulanicha, 3 abihile kuvecha munyuwa ugimbi vala munu va ndewo, ila aveche mfokomasi, yeikela lutengamaso, abihile kuvesa munu yeikela sendi, 4 ing’ang’wa kuvecha munu yeilongocha unofu kaye lyake na kuvagita vana vake vawe vakumuidikila kwa uginyange vonda. 5 Kwakuva ngita munu se iwesa kulongocha unofu kaye lyake iwesa wuli kulongocha lipinga lya vanu va Nguluvi vevamwidikiye Kilisito? 6 Abihile kuva munu yeamuidikile Nguluvi pepi, iyi iwesa kumgita aveche na kidada. Baho iwesa kuhigwa nongwa kwa kidada kyake ngita peahigilwe Setani. 7 Ing’ang’wa aveche munya njuma nofu pagati pa vanu vesevamwidikie Kilisito, neke vabihile kung’ong’olikiwa na kubedwa na kugomela mu litego lya Setani.