1 No he ri yo sron a he ri no nyɨme ri kya riwa wu yosron ritu wan, no nyime ri kya riwa wu ran to-u ran. 2 A he ritu yosron wa nji wa sen nye ko wa fe gbre ri Izhi. 3 A he ritu yosron nye ko ki to ri wa ti mgbumgblume ri tre Izhi nye, ritu kya riwa ki to-u wa ti-u rimi kya riwa ki ran ri to-u ran. 4 A he ritu yosron nye a no Habila no ti Baan riwa a han wa Kayinu. Ritu yosron wan nye a fe gbre ri Izhi, ritu wawu Izhi kyuwan a nyɨme de wan. Ritu yosron wan nye Habila a kawan tre, ko ri riwa a kuu. 5 Yosron nye a no Enok ran kuu ran. Tsede wa ban wu hi ri shu ri Izhi, nga injo ka ran to-u ran, ritu Izhi a ban wu hi shu. Imbe Izhi tre ri Enok a sii Izhi sron ri ko wa ban wu hi ri shu. 6 Inji riwa a ran he ri yosron ran a ran sii Izhi sron ran, ritu nji riwa ari ye ri Izhi tse a he ri yosron ri Izhi he nga ran no wawa wa wa-u lada. 7 A he ritu yosron nye Nuhu a wo fe nton riwa Izhi a fen wu ritu kyawa wawa wa ye kusi riwa a ran to wa ran. A wo tre Izhi ran kpan nvuma riwa wawu nga wa ko wan wa jɨbuwo. Ri ngamba nye, iima a vu mgbumgblume, nga Nuhu ka fe ndindi ti ri Izhi riwa a he ritu yosron. 8 A he ritu yosron nye Ibrahi a hu tre Izhi riwa Izhi a yo-u no hi ri meme riwa a kadzi ri wawu no. a ka meme wan don, a ran to bubu riwa ari hi ran. 9 Ritu yosron nye a son ri meme riwa Izhi a kadzi ri wu. A ran son ri wa bru, bibi riwa Ishaku mba Yakubu riwa wa fe bibi katredzi riri ri-a ri Izhi. 10 Ibrahi a ran gben nchon gbu riwa Izhi a milan-u mme, igbu riwa wa dzi wa nchi mba ri wawu. 11 A he yosron nye a no Ibrahi a he a ti, ko ri riwa a kunchon bran nga Saratu ngawen ka ran ngɨzhi miri ran. A kpanyɨme ri Izhi ri a ran ri sran kya riwa a tre ri wawu ri ti ran. 12 Ko ri riwa Ibrahi a he ri nkon kuu, zhu ri nji riri nyi wa fe gɨzhi kigbu ka intsen hwa ri shuwulu, wa kigbu ka meme nzan ri nyu ne riwa wa ran to bla ran. 13 A he rimi yosron nye wawu nji wanyi wa kuu. Wa ran kpa kyawa wawa Izhi a tre ri wawu ri no wa-a ran, ama ri kpata riwa wa to wa wa ye kpa wa ri nkon, nga wari nyɨme ri wa he tsren nga wa ri gran mgbumgblume. 14 Wawa wa tre ngamba a tsro ri wa wa meme ri tumba. 15 Wa ran ri sondu taka meme riwa wa kadon ran; wa ri tre ri wa taka, wari fe nkon riwa wa bru kɨma hi ngamba. 16 Tsede, a he meme ri shu nye riwa a bi han nye wa ran wa. Ngha Izhi ran ri ti shan ri no wa yo wawu ri Izhi mba ran, ritu a milan meme ri ti dzi ri wa. 17 A he ritu yosron nye Ibrahi a ka vren wan Ishaku de ri Ti Baan riwa Izhi a tsra-u. A he wawu Ibrahi nye riwa Izhi a katredzi ri wu, ama ka kawan ran wa ran ka vren wan riri-a de ri Ti Baan. 18 Izhi a tre ri wu ri, <<A he ritu Ishaku nye wu fe wa gɨzhi riwa me katre dzi.>> 19 Ibrahi a yonga ri Izhi ri to ta wawa wa kuu shime nga, wa to tre ri Ibrahi kpa Ishaku zhu ri kuu nye. 20 A he ritu yosron nye Ishaku a katredzi ri ti lɨbu sro Yakubu mba Isuwa ritu kyawa wawa wa ye kusi. 21 A he yosron nye a no Yakubu a tilɨbu sro miri Yusufu wawu mba ri ko ran kuu. A klo kri ri tu kpala wan ran gbre Izhi. 22 A he ritu yosron nye Yusufu, riwa a ran wa ran kuu, ka tre ritu riwa wa nji Israila wa ka meme Masar don, nga ran la wa kya riwa wa ti ri kimo wan. 23 A he ritu yosron nye riwa wa Ti Musa wa ka-u rii ri hwa tra kugon riwa wa ngizhi-u. Wa to riwa a bi vren, nga wa ran ran ti sisiri riwa wa kamba ri hu doka chu ran. 24 A he ritu yosron nye riwa Musa a gbron, ka wan ri no wa ran yo wawu ri ivren vra chu ran. 25 A chu ran so yaa ri wa nji Izhi riwa ari ri ro ri meme ti ri vi tsawen. 26 Ritu a yosron wan ran so yaa ritu Kristo riwa a han kyawa wa ndindi ri meme Masar, ritu a yo si ri kyawa wawa ari fe wa kusi. 27 A he ritu yosron nye Musa a wulunde ka Masar don ran ran ti sisiri fu chu. a vu sron ritu a to Izhi riwa wa ran ri to-u ran, ran kawan ri kɨma ya gon. 28 A he ritu yosron nye a no no zhu ri ro ri dzagran ran no wa nzii yii wa nkon tra, ritu no Vren ko Kuu no ran wuu miri wa mimilan riwa wa nji Israila ran. 29 A he ritu yosron nye wa nji Israila wa ru nchon ne ka wa zren ri meme kuklu; ama riwa wa nji Masar wa wa wari ru, iima ka miyen wa kre. 30 A he ritu yosron nye kankan Yeriko a joku kugon riwa wa nji Israila wa zren kagon wan vi tamgban. 31 A he ritu yosron nye wa ran wuu Raab iwa ri ntran-a ri wawa wa kamba ri hu tre Izhi-a ran, ritu a milan kpa wawa wa bre ran ya meme Israila. 32 Ko me tre ngye ri? me ran he ri vi riwa me tre ritu Gidiyon, Barak, Samson nga Yafta nga Doda nga Samela nga wa Ti Baan. 33 Ritu yosron we ti ku ri meme wawu nga wa ri ri. Wa ti kya riwa a tsra nga wari kpa kya riwa Izhi a katredzi ritu wan. Wa gru wa nyun wa chen, 34 Wa no nzan wulu no yibi, wari no nji mgban ka ran to gra wa ran. Ikpa mba a kuu ama wa no ngamba senkpa; wa senkpa ri nyun ku nga wari han gbengbren wa klukpa wa tsren. 35 Ritu yosron wa mba wawa wa miri vayi mba wa kuu wa tashime. Wari, wa kamba ri kpa sontumba, wa kuu ritu de yaa ritu wa ri tashime ri son riwa a bi han. 36 Wa wyen no wari nga wari tsi wari ri gbagba, nga wa ri lo wari ri che wari vu wa hi ri tra tren nji. 37 Wa ta wa ri tita, han wari ti hari, wa wu wari ri nji mgban. wari ran kagon ri wa ntan ntɨma ko yawo, wa ran he ri kyari ran, wa ran no wa yaa. 38 Gbungblume ka ran ro ri wa ran! Wa shan ran zren ka wawa iku dzu wa ri meme riwa konkron ko ima ran he ri bubu wan ran nga ri tu wa mgblu, wa ran son rimi ran tita nga rimi wa bwo ri meme. 39 Wawu nji wa nyi wa sii Izhi sron ritu yosron mba, ama waka kuu wa ran fe kya riwa Izhi a tre ri wawu ri no wa-a ran, 40 Rinyi a hu ritu Izhi a ka kya riwa a bi han ka dzi ri ta. A ran wa no wa ngizhi wa hi ri son tsra ri nkankshe mba a ran ri kita rimi mba ran.