1 Mechizebe nyi a he chu Salim nye nga ran he nji ri Ti Baan riwa Izhi ri shu. Riwa Ibrahi a zhu ri bubu riwa a han gbengbren wa chu ngbɨre nza ran ye, Mechizebe ka fe wu ran ti lɨbu sroo, 2 nga Ibrahi ka ri rimi wuru ri kya riwa fe ri bubu ku.(Itu nde Mechizebe ri mimilan a he <<Ichu ri ndindi ti;>> Ngha ritu a he chu ri Salim, inde wan ka he <<Chu ri si sron.>>)

3 Mechizebe a ran he ri ti ka iyi ka bubu riwa a zhu ran; a ran he ri chachu riwa wa ngɨzhi-u nga chachu kuu wan ran. A he ka ivren Izhi; a he nji ri Ti Baan ri wawu. 4 To bibi rinkon riwa a he mba. Ibrahi Iti wa ti mbu a no iri rimi wuru ri kya riwa a fe ri bubu tiku. 5 Ritu kya riwa doka a tre ri, Igɨzhi Lawi wawa wa he wa Ti Baan nye wa ye waka kpa gbu ri rimi gbu wulu ri wa nji, wa to, ri wo miri vayi mba, ko riwa wawa wa he gɨzhi Ibrahi ngawen. 6 Ama Mechizebe, riwa a ran zhu ri bubu riri iwawa ran, a kpa gbu ri rimi wuru riwo Ibrahi, nga ran ti lɨbu sro ri Ibrahi riwa wawu nye wa ka tre dzi ritu wan. 7 Ihon vu sron ran he ran, nji riwa ari ti tɨlu sro nji a han nji riwa ari kpa tɨlu. 8 Riwa wawa wa Ti Baan ronron wawa wa kuu nye wa kpa iri rimi wuru; Ama riwa Mechizebe, wawa wa vɨri nye wa kpa ri rimi wuru, bibi riwa imbe Izhi tre. 9 Nga wa to tre ri Lawi ri tu wan (riwa igɨzhi wan nye a ran kpa Zaka) a de zaka wan hu ri wo Ibrahi. 10 Wa to tre ngamba ritu chachu riwa Ibrahi wa dzon ngamba mba Mechizede wa ran ngizhi Lawi rina, ama a he ri mi nne wa titiwan. 11 To bibi ti riwa wa Ti Baan bibi riwa Lawi a ye ri doka Musa bibi riwaq wa no Israilawa. Wa ri tre ri indu wa Ti Baan riwa wa gɨzhi Lawi a ri to ngizhi son tsra ye ran ran he riwa wa Ti Baan wari nkan wari bru ye ran, riwa a he bibi wa Makizedek, a ran bibi wa Haruna ran. 12 Ka ndu wa Ti Baan sran, doka ngawen ri sran. 13 Wawu Bachi mbu riwa wa tre kyawa wanyi ritu wan, a zhu ri gɨzhi ri nkan nye. Injo rimi gɨzhi wan a ran ti ndu wa ti Baan to zari ran. 14 A he ri rira ri Bachi zhu ri gɨzhi Yahuda; nga Musa a ran tre kya ritu wan ran riwa a ran tretre ritu wa ti Baan.

15 Itre nyi a zhu ngaa ri tsu shizhi bran riwa nji ri Ti Baan ri nka a zhu, riwa a zhu Mechizebe. 16 Rinyi a ran he nji ri Ti Baan ritu doka ri ka rimi nkon riwa gɨzhi ran, ama ritu gbengbren ri son riwa nji ran ri kuu ran. 17 Itre Izhi a tre ri, <<A wu wu he nji ri Ti Baan riwa wuran kuu ran, ritu dzi tre Mechizebe. 18 Wa ka baan ri sen dzi ri gran nye mba, ritu a ran he ri gbengbren nga ka ri ndu ran. 19 Ibaan riwa Musa ran tsra riwa ari no kyari no kri mgban ran. Wawu nye no wa milan kya riwa a bi han riwa ki yo sron ri wu ritu ki ri ye kusan Izhi. 20 Izhi a dzi tre nyi ri shizhi. Imgbron wa Ti Baan waka gra ri tindu mba a ran ri shizhi ran. 21 Ama Yeso a he nji ri Ti Baan nye ri shizhi Izhi riwa a shi ri, <<Bachi a gbuchi shizhi, a ran sran sron wan ran: <Bachi a tre ri a wu wu he nji ri Ti Baan riwa a ran kuu ran.<< 22 Ritu shizhi nyi nye riwa Yeso a he nji riwa a ka tre riwa a bi han dzi. 23 Wa Ti Baan wa sen wa kigbu ritu ikuu ran ri no wa ban kusi ri ndu mba ran. 24 Ama Yeso a ngɨzhi kpanchi wan riwa wa Ti Baan riwa a ran kuu ran, ritu wawu rituwan-a ran. 25 Ritu ngamba a to ti, luwa imbambre, ari kpa nji wawa wa ye hwɨreri Izhi dzu ri wo wan, ritu riwa a ran ri kuu ran, nga ari ban kusi ri bre Izhi ritu mba. 26 Yeso nye he rinkon wa Ti Baan nyi riwa ki wa. Wawu nye he nji ri tsitsri; riwa a ran ti meme ti kyari ran, wa chu wu zho rimi wa ti meme ti wari no mkpen han ko ngye riwa a he ri shu. 27 Wawu ran he ka wa rinkon wa Ti Baan mu ran; a ran ri wa Ti Baan bla vi ran, riwa a ran ri tsri ngawan ritu meme ti wan ko ran Ti Baan ritu meme ti wa nji. Wawu a gbuchi Ti Baan wan mkpa riri gyen ri vi riwa a ka tu wa de. 28 Ritu iban riwa Musa riwa wa chanchon chu riwa wa Ti Baan ri tsutsu wawa wa ŋeren nye. Ama ika tre dzi riwa Izhi a ka dzi ri shizhi, a ye zhu kugon riwa wa de doka. Ritu ika tre dzi nye wa ka nye vra-a riwa wa kɨma-u ti nji riwa a tsra hi chachu riwa a ran kre ran.