1 Kɔlɛŋ 14

Məlɔ̀ʼ-ŋgieNyiikə ghɔŋbə məkwə́ʼ ŋgie-bətə̂ŋ-bə

1 Nyʉ́ʉ gɛ̀ hə bɔ̌ŋ ŋkʉ̂ʉ ndə məkie, bɔŋleʼ mʉ̀ʉ shʉ́əshʉ́ə ndə məkie kɔkə ndə ĩ gwè hə kəghɔ-LyʉʉhəNyiikə, fɔŋ ɛŋ kə́ bɛ mətéʼ ntəŋ ndə i gwè hə kəghɔ-Nyii. 2 Bʉʼka w̃o ndə ɔ kwə́ʼ ŋgiebə ŋkʉʉŋkʉʉ, tʉʼ kwə́ʼ tʉ wo fɛ, ɔ nɔ tʉʼ kwə́ʼ tʉ Nyii, bʉʼka wo kínə nukə ndə ɔ tʉʼ gìe fɛ, ɔ bɔŋ kə́ kwə́ʼ nubə ndə bə kə lə̀ŋ nə ghʉəʼ-kəLyʉʉhəNyii-kə. 3 Bɔŋ wo ndə ɔ tʉʼ téʼ ntəŋ ndə i gwè hə kəghɔ-Nyii, nɔ tʉʼ kwə́ʼ tʉ bʉə ndə məbɔ́ bɔŋ, kwèʼhə bɔŋ, bɔŋleʼ ghʉ́əhə fyiihə-ʉə. 4 Wo ndə ɔ tʉʼ kwə́ʼ ndə ŋgiebə ndə ɔ gòʼ təmə yétə fɛ, nɔ tʉʼ bɔ́ ŋwɔŋ-ɛŋ, bɔŋ wo ndə ɔ tʉʼ téʼ ntəŋ ndə i gwè hə kəghɔ-Nyii nɔ tʉʼ bɔ́ chɔshi.

5 Nduɔ, mɔ nɔ kʉ̀ʉ mbɔ b̈ii bənchəŋ kə́ kwə́ʼ ndəŋ ŋgie-bətə̂ŋ-bə. Bɔŋ fɔŋ ɛŋ bɛ ndə mə-kə́-téʼ ntəŋ ndə i gwè hə kəghɔ-Nyii. Wo ndə ɔ tʉʼ lɔ̀ʼ ŋgieNyiikə nɔ chàa wo ndə ɔ tʉʼ kwə́ʼ ndəŋ ŋgie-bətə̂ŋ-bə, yaʼkɛŋ mbɔ wo bɛ ghɔ ndə məfʉ̀ʼtə nubə ndə ɔ kwə́ʼ mbɔ i chʉʼ bɔ́ chɔshi.

6 Nduɔ bəliŋ-bɔŋ, kaʼ mɔ gwè tʉ bii, kə́ kwə́ʼ ndəŋ ŋgiebə ndə i bɛ ŋkʉ̂ʉ, i bu kwáa bii ndəŋ ka? Bɔŋ kaʼ mɔ gwè nə nubə ndə Nyii kɛ̀ʼ tʉ mɔ byuunɔ ŋgie-ndaa-bə ndə i bɛ ŋkʉʉ byuunɔ ndə mətéʼ ntəŋ ndə i gwè hə kəghɔ-Nyii byuunɔ ndə mədàhə, i kwáa bii. 7 Buŋ lʉ̀ fɔkə nə fɔ-bʉ́ʼ-kəlyuu-bə ndə bɔ̂ŋ gòʼ təmə kie məchímbi fɛ nə vaandʉ̂ʉ byuunɔ ŋkyitə, wo bu kínə gyʉʉ ndə i tʉʼ bʉ́ʼ chɔ təka, kaʼ i gòʼ təmə kə́ gìe jyujyu fɛ? 8 Kaʼ wo ndə ɔ tʉʼ tʉ́ʉ gyʉəʼə-vaa, gòʼ təmə tʉ́ʉ ndə gyʉʉ-chɔ̂ fɛ, bu shʉ̀tə nda shʉ̀tə ŋwɔŋ-ɛŋ ndə chɔ̂? 9 Nɔ bɛ haʼ nɔ tʉ mbəŋ-yii, kaʼ a kə́ kwə́ʼ ndə ŋgiekə təmə bəkɔ bʉə yʉ́ fɛ, bɔ̂ŋ bu kínə nukə ndə a tʉʼ gìe təka? A bu kə́ mɛ̀ʼ ŋgiekə-a mɛ̀ʼ mu kəyie.

10 Kaa nu-jínə-kə mbɔ ŋgie-bətə̂ŋ-bə yɔ́ŋ mu kəwʉʉnəmbi fɛ, bɔŋ mbyu i təmiyɔŋ nɔ bɛ itʉ́ʉnə tʉ bʉə ndə bɔ̂ŋ tʉ kwə́ʼ. 11 Bɔŋ kaʼ mɔ gòʼ təmə kínə nukə ndə ŋgie-kətəŋ-kə tʉʼ fʉ̀ʼtə fɛ, mɔ bɛ ntoʼŋgwe tʉ wo ndə ɔ tʉʼ kwə́ʼ, mbʉ wo ndə ɔ tʉʼ kwə́ʼ bɔŋleʼ bɛ ntoʼŋgwe tʉ mɔ ghɔ. 12 Ndə bii kie jyʉʉ ndə məkie kɔkə ndə L̃yʉʉhəNyiikə kɔ́ nɔ, b̈ii kɔ̀ɔtə ndə məgɛ̀ nə shʉbə ndə məkie ntɛ-bənu-hə ndə i tʉʼ bɔ́ chɔshi.

13 Nɔ, wo ndə ɔ tʉʼ kwə́ʼ ndə ŋgie-kədɔŋ-bə ndə bə gòʼ təmə kínə fɛ, ɔ̈ gháaNyii mbɔ bəkɔ ɔ fʉ̀ʼtə mbʉ bənu. 14 Bʉʼka kaʼ mɔ kə́ gháaNyii ndə ŋgie-kədɔŋ-kə ndə bə mə kínə fɛ, təmə lyʉʉhəkə-ɔŋ nɔ tʉʼ gháaNyii, təmə mɔ bɔŋ kínə nukə ndə mɔ tʉʼ gìe fɛ. 15 Mɔ kie ndə məbɛ təka, ndʉʉmɛ? Mɔ bu kə́ gháaNyii nə lyʉʉhəkə-ɔŋ bɔŋ-kə́-leʼ gháa ɔ nə ndaahə-ɔŋ ghɔ. Mɔ bu yùɔ lyuutə ndə mələ̀ʼtə Nyii nə lyʉʉhəkə-ɔŋ bɔŋleʼ kə́ yùɔ lyuutə nə ndaahə-ɔŋ. 16 Kaʼ bɔŋ gòʼ təmə bɛ nɔ fɛ, kaʼ a kə́ gháaNyii nə Lyʉʉhəkə-a, wo ndə ɔ gòʼ təmə kínə nukə ndə a tʉʼ gìe fɛ bu gwìahə təka mbɔ, "Ï bɛ haʼ nɔ"? 17 Bəkɔ məghaaNyii-aŋ kə́ kɔ́ ndɔ kɛŋ bʉ̀ʉ, təmə i bɔŋ məbɔ́ ibɛʼ-yə wo fɛ.

18 Mɔ nɔ kɔ́ ndɔ Nyii mbɔ m̃ɔ nɔ kwə́ʼ ntɛ-bəŋgie-hə ŋkʉʉŋkʉʉ chàa bii bənchəŋ. 19 Bɔŋ mu chɔshi, mɔ bu kʉ̀ʉ ndə məkwə́ʼ mbyu-bəŋgie-hə itaa ndə bəkɔ bə kínə ndə bəkɔ i dàhə ibɛʼ-yə wo, tə chàa mbɔ mɔ kwə́ʼ ŋkɔŋ-bəŋgie-hə ndə i bɛ ntɛ-bəŋgie-hə ŋkʉʉŋkʉʉ.

20 Bəliŋ-bɔŋ, kə bii mə bɛ nə vâambuɔ ndəŋ ŋkwɔʼtə-yii fɛ. B̈ii bɛ nə vâambuɔ ndə məkínə nu-bʉəbʉə-bə bɔŋ nɔʼ tə̀ŋ ndəŋ ŋkwɔʼtə-yii. 21 Mu ŋwɔʼnə-Nyii, Tiekətʉ nɔ bʉ́ mbɔ,

"Mɔ bu kwə́ʼ tʉ bʉə-bɔŋ

nə ŋgie-lɔʼɔ-kətəŋ-kədɔŋ-bə

bɔŋleʼ tíŋ hə ndəŋ wuochu-bəntoʼŋgwe-bə.

Buŋ ndə nɔ, bɔ̂ŋ kʉʉ yʉ́ chu-ɔ fɛ."*14:21 Adaya 28:11-12.

22 Nɔ, məkwə́ʼ ntɛ-bəŋgie-hə ŋkʉʉŋkʉʉ, kaa cheʼkə tʉ bʉə ndə bɔ̂ŋ nɔʼ bɛ́ŋ Nyii fɛ, i nɔ bɛ tʉ bʉə ndə bɔ̂ŋ nɔʼ gòʼ təmə bɛ́ŋ Nyii fɛ, haʼ ndə məlɔ̀ʼ-ŋgieNyiikə gòʼ təmə bɛ cheʼkə tʉ bʉə ndə bɔ̂ŋ gòʼ təmə nɔʼ bɛ́ŋ Nyii fɛ, i bɔŋ bɛ tʉ bʉə ndə bɔ̂ŋ nɔʼ bɛ́ŋ Nyii. 23 Kaʼ bɛ nɔ, chɔshi inchəŋ chə̀ŋtə kəyəŋ kəmɔʼ kə́ kwə́ʼ ŋgiebə ndə i bɛ ŋkʉʉŋkʉʉ bənchəŋ, wo ndə ɔ gòʼ təmə kínə nukə ndə bɔ̂ŋ tʉʼ gìe fɛ, byuunɔ wo ndə ɔ gòʼ təmə bɛ́ŋ Nyii fɛ, ŋíi, ɔ kʉʉ gìe mbɔ bii nɔʼ bɛ́ ndaahə-ii fe? 24 Bɔŋ kaʼ bii bənchəŋ kə́ téʼ ntəŋ ndə i gwè hə kəghɔ-Nyii, wo ndə ɔ gòʼ təmə nɔʼ bɛ́ŋ Nyii fɛ, byuunɔ wo ndə ɔ gòʼ təmə kínə nukə ndə bii tʉʼ gìe fɛ, ŋíi, ɔ kʉ̌ʉ bɛ nə wo ndə ɔ kie nukə bətɔ-ɔ bʉʼka mbʉ bənu inchəŋ fe? Ŋkwɔʼtə-i kʉʉ kə́ chɔ́ŋhə ɔŋ bʉʼka nubə-ɔ̄ŋ inchəŋ fe? 25 I bu kɛ̀ʼ nubə ndə ɔ nɔʼ lə̀ŋ mu fyii-ɔ, ndʉʉmɛ, ɔ bu bʉ́ʉnə sê lə̀ʼtə Nyii ghɔ̀ŋ mbɔ, "Leʼ shʉəŋ Nyii nɔ bɛ fɛ̄ŋ mu bii."

Mələ̀ʼtə Nyii ndyʉndyʉ mu chɔshi

26 Nɔ bɛ nukə nɔ ndə mɔ tʉʼ gìe, bəliŋ-bɔŋ, mbɔ ndʉʉ ndə bii chə̀ŋtə kəyəŋ kəmɔʼ ndə mələ̀ʼtə Nyii, wobɛʼ kie lyuu ndə mələ̀ʼtə Nyii, ibɛʼ-yə wo kie nukə ndə mədàhə, ibɛʼ-yə wo kie nukə ndə Nyii nɔʼ kɛ̀ʼ tʉ ɔŋ, ibɛʼ-yə wo kie ndə kwə́ʼ ndəŋ ŋgiebə ndə i bɛ ŋkʉʉ, ibɛʼ-yə wo bɔŋleʼ kínə ndə məfʉ̀ʼtə nubə ndə mbʉ bəŋgie bɛ yɔŋ, b̈ɔ̂ŋ fɔ̀ʼ nchəŋnchəŋ-ɛŋ ndə məbɔ́ chɔshi. 27 Kaʼ wo kwə́ʼ ndə ŋgiekə ndə i bɛ ŋkʉ̂ʉ, bɔ̂ŋ kie ndə mə-yɔ́ŋ-tíŋ bəbûu byuunɔ bətia fɛ, ẅomɔʼ kə́ kwə́ʼ kɔ́ fia tʉ ibɛʼ-yə wo, ẅo bɔŋleʼ bɛ ghɔ ndə məfʉ̀ʼtə mbʉ bənu. 28 Bɔŋ kaʼ wo gòʼ təmə bɛ ghɔ ndə məfʉ̀ʼtə mbʉ bənu fɛ, wotəmiyɔŋ mu bɔŋ nɔ kie ndə məlíitə mbɔ loʼo mu chɔshi, kə́ kwə́ʼ bə haʼ tʉ ŋwɔŋ-ɛŋ ghɔŋbə Nyii.

29 B̈ʉə bəbûu byuunɔ b̈ʉə bətia ndə bɔ̂ŋ kie ntəŋ kəghɔ-Nyii kwə́ʼ bəʼ-bʉə-kə lɛ́nə mu-i. 30 Kaʼ bɔŋ ibɛʼ-yə wo ndə ɔ bɛ mu mbʉ nchəŋtə kie ntəŋ ndə Nyii nɔʼ kɛ̀ʼ tʉ ɔŋ, fəŋ wo ndə ɔ tʉʼ kwə́ʼ nɔ kie ndə məlíitə, 31 bʉʼka bəkɔ bii bənchəŋ téʼ ntəŋhə ndə i gwè hə kəghɔ-Nyii bəmɔʼbəmɔʼ mbɔ i chʉʼ dàhə bii bənchəŋ bɔŋleʼ kwèʼhə bii bənchəŋ. 32 Wo ndə ɔ kie ghʉəʼkə ndə mətéʼ ntəŋ-Nyii, bəkɔ ŋgɛɛ yá ŋwɔŋ-ɛŋ nə yɔŋ, 33 bʉʼka Nyii kaa Nyii-mbyuutəmbyuutə fɛ, bɔŋ nɔ bɛ Nyii-fyiighʉ́ənə. Nɔ bɛ nubə nɔ ndə i tʉʼ fyú mu-bəchɔshi-bʉə-Nyii-hə inchəŋ.

34 Bəke nɔ kie ndə məlíitə mbɔ loʼo mu-bəchɔshi-hə. Bʉʼka bə bɛ́ŋ mbɔ bəke kwə́ʼ fɛ, bɔŋ bɔ̂ŋ kie ndə məké ŋwɔŋ-yʉə haʼ ndə bə nyɔ̀ʼ mu ŋwɔʼnə-nuʼ. 35 Kaʼ nukə bɛ ghɔ ndə bɔ̂ŋ tʉʼ kʉ́ʉ kínə, b̈ɔ̂ŋ bíʼtə tʉ bələŋ-bʉə chunjaa. Bʉʼka nɔ bɛ nu-kətʉvyii-kə tʉ woke ndə məkwə́ʼ mu chɔshi.

36 Byuunɔ, bii kwɔ̀ʼtə mbɔ ŋgieNyiikə kə chʉ́ʉhə bə haʼ kəghɔ-bii mɛ? Byuunɔ, bə kɔ́ bə haʼ tʉ bii tətɛʼ bii mɛ? 37 Kaʼ wo kwɔ̀ʼtə mbɔ ɔ bɛ yʉkəŋgieNyii byuunɔ kie kɔkə ndə Lyʉʉhəkə nɔʼ kɔ́ tʉ ɔŋ byuunɔ kie LyʉʉhəNyiikə mu mbʉə-ɔ, ɔ̈ chèʼnə jyujyu mbɔ nubə ndə mɔ tʉʼ nyɔ̀ʼ nɔ bɛ ŋkahə ndə i gwè hə kəghɔ-Tiekətʉ. 38 Kaʼ wo gòʼ təmə chèʼnə yɔ̄ŋ-yə fɛ, bə kʉʉ chèʼnə ɔŋ fɛ.

39 Nɔ, bəliŋ-bɔŋ, b̈ii kie jyʉʉ ndə mətéʼ ntəŋ ndə i gwè hə kəghɔ-Nyii, kə bii mə bɔŋ chíe wo ndəŋ mə kwə́ʼ ŋgiebə ndə i bɛ ŋkʉ̂ʉ fɛ. 40 Bə bɔŋ kie ndə məchìi nubə inchəŋ jyujyu, ï bɔŋleʼ bɛ kʉ̀ʼnə.