1 Coríntios 4

Məyúnə-Bɔɔ ghɔŋbə bʉə-Kɔlɛŋ

1 Bii nɔ kie ndə məlʉ̀ baʼa ndə vâafɔʼɔ-Klai ndə bə nɔʼ kɔ́ nu-shʉəŋ-Nyii-bə ndə bə kə lə̀ŋ hə kəghɔ-bʉəməsʉʉ kɔ́ mu kəghɔ-baʼa ndə mə-kə́-lɛ́nə fʉ̀ʼtə tʉ bʉə. 2 Nɔ, bə nɔ tʉʼ kʉ́ʉ mbyu kənu imɔʼ hə kəghɔ-wo ndə bə nɔʼ kɔ́ nubə tʉ ɔŋ mbɔ ɔ kə́ lɛ́nə, kə́ bɛ mbɔ ɔ̈ kə́ gìe shʉəŋ. 3 Ndə mɔ, mɔ tʉʼ fɛ̀ʼ ntɛ ndə bii tʉʼ kíi mɔ fɛ, byuunɔ ndə wobɛʼ təmiyɔŋ tʉʼ kíi mɔ fɛ. Ndə ŋgie-shʉəŋ-kə, mɔ tʉʼ buŋ kíi ŋwɔŋ-ɔŋ fɛ. 4 Bʉʼka mɔ kínə nukə ndə bəkɔ bə yá kətʉ-mɔ fɛ, təmə mɔ bɔŋ yú fɛʼɛ bʉʼka maa-yɔ̄ŋ fɛ. Nɔ bɛ Tiekətʉ ndə ɔ tʉʼ kíi mɔ.

5 Nɔ, kə bii mə kíi mɔ ndʉʉ buŋ kʉ̀ʼnə fɛ, Tiekətʉ buŋ yi gwè fɛ, ndə ɔ bu chìi bə nyíɛ nubə ndə i tʉʼ líi nduɔ mu kənjəŋ, bɔŋ-bu-leʼ kɛ̀ʼ nubə ndə bʉə kie mu fyii-bɔŋ. Wotəmiyɔŋ, bu kie yie jyujyu hə kəghɔ-Nyii haʼ ghʉə ndə ɔ kie ndə məkie.

6 Bəliŋ-bɔŋ, mɔ nɔ lʉ̀ Abolo ghɔŋbə mbəŋ-ɔŋ ndə fʉʼkənu, ndə nukə ndə mɔ tʉʼ gìe tʉ bii, ndə məbɛ sii-yii, mbɔ b̈ii yétə hə kəghɔ-baʼa, nukə ndə ŋgiekə-ɔ̄ŋ bɛ yɔŋ mbɔ, "Kə́ tòʼ haʼ ndə bə nyɔ̀ʼ mu ŋwɔʼnə-Nyii." Mbɔ kə wo hə mu bii mə kə́ dʉ̀ʼ ŋwɔŋ-ɛŋ nə mbyu ntəŋbəshʉ-yii imɔʼ, kə́ dʉ̀ʉhə ibɛʼ-yə fɛ. 7 Bʉʼka nubɛʼkə bɛ ghɔ ndə i chìi bii bɛ ŋkʉʉ mɛ? Bɛ ka ndə bii kie, təmə bə kɔ́kɔ́ tʉ bii fɛ? Kaʼ bɛ mbɔ bə kɔ́kɔ́ tʉ bii, chìi ka bii kə́ ŋàʼtə fi nə bə kɔ́kɔ́ tʉ bii fɛ?

8 Bii nɔʼ chìi fi nə bii nɔʼ kie fɔbə inchəŋ ndə bii tʉʼ byúu. Bii nɔ tʉʼ chìi fi nə bii nɔʼ bɛ bʉə-kəfʉʼ. Bii nɔ tʉʼ chìi fi nə bii nɔʼ bɛ bəfɔŋ təmə mbəŋ-yaʼ nɔʼ bɛ fɛ. Mɔ nɔ tʉʼ gwía mbɔ nɔ bʉ̀ʉ bii nɔʼ bɛ bəfɔŋ, mbɔ bʉʼʉ chʉʼ kə́ sɔ́ʼ mɔʼɔ nə bəfɔŋ. 9 I nɔ bɛ tʉ mɔ fi nə Nyii nɔʼ kɔ́ ndyiʼtə-kəyəŋ-kə tʉ baʼabə bəlɔntəŋNyii, nə bʉə ndə bɔ̂ŋ kie ndə məkwú kətɔʼnə fia, tʉ wʉʉnəmbi-bʉəntəŋNyii-kə bənchəŋ ghɔŋbə bʉəməsʉʉ ndə mə-kə́-tíŋ, nyíɛ.

10 Baʼa lɛ bə̀ŋ bənɔ̌ʼɔ bʉʼka baʼa nɔʼ bɛ́ŋ Klai, bii bɔŋ lʉ̀ ŋwɔŋ-yii ndə məbɛ bʉə-kətʉ-súunə bʉʼka bii nɔʼ fúu ŋwɔŋ-yii biibə Klai! Baʼa lɛ lʉ́ʉtə, bii bɔŋ shʉ́ə! Bʉə lɛ kɔ́ kuŋhə tʉ bii, bɔŋ jɛ́ŋhə baʼa! 11 Tə gwè dàa nduɔ, baʼa nɔ tʉʼ dùʼ nə jyʉʉ, tʉʉtə-aʼ kə́ yəŋ, baʼa kə́ mɔ̀ʼ ŋkwu-ndyihə-bə, bə kə́ gwúu baʼa təmə baʼa kie yəŋ-chí-kə fɛ, 12 baʼa kə́ fɔ̀ʼ shʉ́əshʉ́ə nə yaʼ-yə ghɔkə. Bə túu ŋgʉəʼ kɔ́ tʉ baʼa nɔ, baʼa túu bʉʉ kɔ́, bə chɔ́ŋhə baʼa nɔ, baʼa lyʉ̀ʉtə́nə, 13 ndʉʉ ndə bə kɔ́ yie bʉəbʉə kətʉ-baʼa nɔ, baʼa bə̀ŋhə nə ŋgie-búɔnə-bə. Baʼa nɔʼ bɛ, bɔŋ-kə́-leʼ bìʼ bɛ, ŋkwu-bəfɔ-bə kəwʉʉnəmbi, bə nɔ lʉ̀ baʼa nə fɔ-mɛ̀ʼ-bə kəwʉʉnəmbi-fɛ̄ŋ.

14 Mɔ tʉʼ nyɔ̀ʼ nubə-ɔ̄ŋ ndə məmɔ̀ʼ tʉvyiikə-ii fɛ, mɔ bɔŋ kə́ nyɔ̀ʼ ndə məmɔ̀ʼ tʉ̂ʼ tʉ bii nə vâa-bɔŋ ndə mɔ kʉ̀ʉ daa. 15 Kaʼ bii buŋ kie bʉə ŋkɔŋ ndə bɔ̂ŋ tʉʼ dàhə bii te Klai təmə bə mə súu ntyʉʉ yʉə fɛ, təmə bii kie bətie buŋmbi ndə bɔ̂ŋ tʉʼ dàhə bii nə fia-Nyii fɛ. Ndə məchimbi-yii mu Klai Jiso ndʉʉ ndə mɔ kə lɔ̀ʼ ntəŋjyujyu tʉ bii. 16 Mɔ nɔ tʉʼ kwèʼhə bii ndʉʉmɛ mbɔ b̈ii kə́ lʉ̀ hə kəwu-mɔ. 17 Nɔ bɛ luu-i ndə mɔ tə́ŋ Timɔti tʉ bii, vaa-ɔŋ ndə mɔ kʉ̀ʉ daa, ndə ɔ tʉʼ gìe shʉəŋ mu Tiekətʉ. Ɔ bu kə́ kwɛ́nə ntɛ məchimbi-ɔ tʉ bii ndə mɔ tʉʼ gɛ̀ hə bɔ̌ŋ Klai, ndə mɔ tʉʼ dàhə ndə yəŋbə inchəŋ mu-bəchɔshi-hə. 18 Bəbɛʼbʉə mu bii nɔʼ kɔ́ tʉʉ gʉ́ənə mbʉə-bɔŋ, bʉʼka bii nɔ kwɔ̀ʼtə mbɔ mɔ bieleʼ gwè mətòʼ tʉ bii fɛ. 19 Mɔ bɔŋ bu gwè ndə vaa kəkʉʉ məniʼ, kaʼ Tiekətʉ kʉ̀ʉ, mɔ kʉ̂ʉ gwè nɔ, kə́ kʉ́ʉ bə haʼ ndə məkínə ndə bʉə-tʉʉ gʉənə-bɔ̄ŋ tʉʼ kwə́ʼ fɛ, mɔ bɔŋ bu kə́ kʉ́ʉ ndə mənyíɛ ghʉəʼkə-ʉə ndə bɔ̂ŋ kie. 20 Bʉʼka Sɔ́ʼ-Nyii kaa nu-kwə́ʼ-kə fɛ, i nɔ bɛ nu-kəghʉəʼ-kə. 21 Bii tʉʼ kʉ́ʉ ka? M̈ɔ yi gwè tʉ bii nə ŋgwɔŋ mɛ, kə nə ŋkʉ̂ʉ ghɔŋbə mbuɔnəbə?