26 Bʉʼka nubə ndə i tʉʼ kɔ́ ŋgʉəʼ nduɔ, mɔ nɔ kwɔ̀ʼtə mbɔ nɔ bʉ̀ʉ ẅo káa haʼ ndə ɔ kə bɛ. 27 A nɔ̂ʼ kɔ́ʼ ŋwɔŋ-aŋ bii woke mɛ? Kə a mə kə́ kʉ́ʉ ndə məwɔ̀ʼtə bii ɔ fɛ. A bɛ təmə woke kəghɔ-a fɛ mɛ? Kə a mə kə́ kʉ́ʉ ndə məkie woke fɛ. 28 Kaʼ a bɔŋ lʉ̀ woke, təmə a chìi bʉ̂ʼʉ fɛ, kaʼ bɔŋ vaabəke ndə bə nɔʼ bíʼtə ɔŋ bɛ́ŋ lɔŋ, təmə ɔ chìi bʉ̂ʼʉ fɛ. Bɔŋ bʉə ndə bɔ̂ŋ kie lɔŋ nduɔ, bu nyíɛ ŋgʉəʼ-kəwʉʉnəmbi-ɔ̄, mɔ bɔŋleʼ kə́ kʉ́ʉ ndə məfyúhə bii chɔ.
29 Nukə ndə mɔ tʉʼ ghɔ̀ŋ bəliŋ-bɔŋ nɔ mbɔ ŋgwɔʼmbi nɔʼ mì. Lʉ̀ hə nduɔ gɛ̀ nə shʉbə, b̈ʉə ndə bɔ̂ŋ kie bəke, kə́ chí mbi fi nə bɔ̂ŋ kie woke fɛ. 30 Bʉə ndə bɔ̂ŋ tʉʼ gwía, b̈ɔ̂ŋ kə́ chí mbi fi nə bɔ̂ŋ tʉʼ gwía fɛ, bʉə ndə tʉʉtə-ʉə tʉʼ bʉ̀ʉ, b̈ɔ̂ŋ kə́ chí mbi fi nə tʉʉtə-ʉə tʉʼ bʉ̀ʉ fɛ, bʉə ndə bɔ̂ŋ tʉʼ nyúɔ fɔbə, b̈ɔ̂ŋ kə́ chí mbi fi nə bɔ̂ŋ kie fɔkə fɛ. 31 Bʉə ndə bɔ̂ŋ tʉʼ chìi nubə nə fɔ-kəwʉʉnəmbi-bə mə mɔ̀ʼfyiihə-ʉə chɔ fɛ. Bʉʼka wʉʉnəmbikə-ɔ̄ŋ ndə ntɛhə ndə i bɛ nduɔ nɔ tʉʼ tíŋtíŋ.