1 Lʉ̀ hə ŋgʉʼŋgʉʼhə, təvɛʼtəvɛʼ ndəŋ fiatə buŋmbi, Nyii nɔ kə kwə́ʼ tʉ bətietie-bʉʼʉ tíŋ hə bɔ̌ŋ bʉəyʉkəŋgie-bi, 2 bɔŋ ndə ndyiʼtə bəchi-bɔ̄ŋ laa, ɔ nɔʼ kwə́ʼ tʉ bʉʼʉ tíŋ hə bɔ̌ŋ Vaa-ɛ ndə ɔ nɔʼ dùʼhə ɔŋ ndə mə-yi-yú fɔbə inchəŋ ɔ bɔŋleʼ kə́ bɛ wo ndə ɔ kə chìi wʉʉnəmbikə tíŋ hə bɔ̌ŋ ɔŋ. 3 Ntɛhə-i nɔ dʉ̀ʼ ntɛ məgʉ́ə ndə Nyii kie, ɔ kɛŋ bɛ haʼ Nyii nchəŋnchəŋ-ɛŋ ndə nuʼ-i, ɔ nɔ bɛ̀ʼ wʉʉnəmbikə nchəŋnchəŋ-ɛŋ nə ŋgie-shʉ́əshʉ́ə-kə-i. Ndʉʉ ndə ɔ nɔʼ kə fɛ̀ʼndɛŋ ndə məsʉ̀ bʉ̂ʼʉ liʼ, ɔ gɛ̀ dùʼ kwiiləŋ Nyii ntoʼ-ɔ, ndə ɔ shʉ́ə chàa fɔbə inchəŋ.

4 Bə nɔ nə dùʼhə ɔŋ ndəŋ yʉʉ ndə i gʉ́ə chàa yi-bʉəntəŋNyii-yə, haʼ ndə mbʉ yie ndə Nyii kə kɔ́ tʉ ɔŋ gʉ́ə chàa yʉə-yə.

5 Bʉʼka nukə ndə Nyii kə gìe tʉ Vaa-ɛ, ɔ kə gìe tʉ mbyu wontəŋ-ɛŋ mbɔ,

"A nɔ bɛ Vaa-ɔŋ,

laa mɔ nɔ kɛŋ bɛ Tie-a" fɛ.*

Ɔ kə bʉ̀nə bìʼ ghɔ̀ŋ mbɔ,

"Mɔ bu bɛ Tie-e,

ɔ bɛ Vaa-ɔŋ" fɛ.*

6 Ndə məbìʼ chɔ, ndʉʉ ndə ɔ kə gwè nə fəŋ vaa-ɛ mu kəwʉʉnəmbi, ɔ ghɔ̀ŋ mbɔ,

"B̈ʉəntəŋNyii bənchəŋ lə̀ʼtə ɔŋ."*

7 Nyii nɔ nə kwə́ʼ te bʉəntəŋ-bi, ghɔ̀ŋ mbɔ,

"Ɔ la kə chìi bʉəntəŋ-bi, bɔ̂ŋ bɛ nə fʉʉkə*,

bɔŋleʼ chìi bʉə-fɔʼɔ-bi, bɔ̂ŋ bɛ nə lɛɛŋhə-viʼi-bə."*

8 Bɔŋ te Vaa-ɛ, ɔ ghɔ̀ŋ mbɔ,

"Yetəkə-a, Oo Nyii, kʉʉ nə kie liʼ-i fɛ.

Məbɛ ndyʉndyʉ nɔ bɛ ntʉʼkə-a ndə a tʉʼ sɔ́ʼ bʉə-ba nə yɔŋ.

9 A nɔ kʉ̀ʉ nubə ndə i bɛ ndyʉndyʉ, bàa nu-bʉəbʉə-bə.

Ndʉʉghɔfii, Nyii, ndə bɛ Nyii-aŋ, nɔʼ nùʼ aŋ nə ŋgwo-tʉʉjyu-mə, ndə i gʉ́ə chàa yi-bʉə-nuɔ-ba-yə."*

10 Bɔŋ,

"Mbəŋ-aŋ Tiekətʉ, nɔ nə mɔ̀ʼ a mɔ̀ʼ yiesê kəchisê lʉ̀ hə ndəŋ nchʉʉhə,

njəŋ-yuo-hə a fɔ̀ʼ nə ghɔkə-a.

11 Bɔ̂ŋ bu mì, bɔŋ təmə a kʉʉ nə mì fɛ,

bɔ̂ŋ bu dùɔŋ, tə ŋʉ́ə nə ndyi.

12 A bu kíatə bɔŋ ndə bə kíatə ndyi fəʼə le.

A bu kwɛ́nə bɔ̂ŋ ndə bə kwɛ́nə ndyi kənduɔŋ le.

"A bɔŋ bu gòʼ haʼ nɔ,

təmə ŋgʉʼhə-a kʉʉ nə lìʼ fɛ."*

13 Bɔŋleʼ bɛ yɔ̂ŋ-yə wontəŋNyii ndə ɔ nɔʼ nə ghɔ̀ŋ tʉ ɔŋ mbɔ,

"Dùʼ kwiiləŋ-mɔ,

tə mɔ yi mɔ̀ʼ bʉə-bàa-ba,

sê bəshʉ a"?*

14 Bɔ̂ŋ bənchəŋ kaa lyʉʉhəbə ndə bɔ̂ŋ tʉʼ fɔ̀ʼ tʉ Nyii, bə tə́ŋ bɔŋ ndə məgwè kə́ kwáa bʉə ndə bɔ̂ŋ bu kie ŋkwaaNyii fe?