Jiso Klai nɔ bɛ VaaNyii
1 Lʉ̀ hə ŋgʉʼŋgʉʼhə, təvɛʼtəvɛʼ ndəŋ fiatə buŋmbi, Nyii nɔ kə kwə́ʼ tʉ bətietie-bʉʼʉ tíŋ hə bɔ̌ŋ bʉəyʉkəŋgie-bi, 2 bɔŋ ndə ndyiʼtə bəchi-bɔ̄ŋ laa, ɔ nɔʼ kwə́ʼ tʉ bʉʼʉ tíŋ hə bɔ̌ŋ Vaa-ɛ ndə ɔ nɔʼ dùʼhə ɔŋ ndə mə-yi-yú fɔbə inchəŋ ɔ bɔŋleʼ kə́ bɛ wo ndə ɔ kə chìi wʉʉnəmbikə tíŋ hə bɔ̌ŋ ɔŋ. 3 Ntɛhə-i nɔ dʉ̀ʼ ntɛ məgʉ́ə ndə Nyii kie, ɔ kɛŋ bɛ haʼ Nyii nchəŋnchəŋ-ɛŋ ndə nuʼ-i, ɔ nɔ bɛ̀ʼ wʉʉnəmbikə nchəŋnchəŋ-ɛŋ nə ŋgie-shʉ́əshʉ́ə-kə-i. Ndʉʉ ndə ɔ nɔʼ kə fɛ̀ʼndɛŋ ndə məsʉ̀ bʉ̂ʼʉ liʼ, ɔ gɛ̀ dùʼ kwiiləŋ Nyii ntoʼ-ɔ, ndə ɔ shʉ́ə chàa fɔbə inchəŋ.
4 Bə nɔ nə dùʼhə ɔŋ ndəŋ yʉʉ ndə i gʉ́ə chàa yi-bʉəntəŋNyii-yə, haʼ ndə mbʉ yie ndə Nyii kə kɔ́ tʉ ɔŋ gʉ́ə chàa yʉə-yə.
Jiso Klai nɔ chàa bʉəntəŋNyii
5 Bʉʼka nukə ndə Nyii kə gìe tʉ Vaa-ɛ, ɔ kə gìe tʉ mbyu wontəŋ-ɛŋ mbɔ,
"A nɔ bɛ Vaa-ɔŋ,
laa mɔ nɔ kɛŋ bɛ Tie-a" fɛ.1:5 Ŋwɔʼnə təLyuu 2:7.
Ɔ kə bʉ̀nə bìʼ ghɔ̀ŋ mbɔ,
"Mɔ bu bɛ Tie-e,
ɔ bɛ Vaa-ɔŋ" fɛ.1:5 2 Samuɛ 7:14.
6 Ndə məbìʼ chɔ, ndʉʉ ndə ɔ kə gwè nə fəŋ vaa-ɛ mu kəwʉʉnəmbi, ɔ ghɔ̀ŋ mbɔ,
"B̈ʉəntəŋNyii bənchəŋ lə̀ʼtə ɔŋ."1:6 Məbìʼ Kɔ́ Nuʼ 32:43.
7 Nyii nɔ nə kwə́ʼ te bʉəntəŋ-bi, ghɔ̀ŋ mbɔ,
"Ɔ la kə chìi bʉəntəŋ-bi, bɔ̂ŋ bɛ nə fʉʉkə1:7 "Fʉʉkə" ghɔŋbə "lyʉʉhəkə" nɔ bə mbyu kəŋgie imɔʼ kəŋgie-Gili.,
bɔŋleʼ chìi bʉə-fɔʼɔ-bi, bɔ̂ŋ bɛ nə lɛɛŋhə-viʼi-bə."1:7 Ŋwɔʼnə təLyuu 104:4.
8 Bɔŋ te Vaa-ɛ, ɔ ghɔ̀ŋ mbɔ,
"Yetəkə-a, Oo Nyii, kʉʉ nə kie liʼ-i fɛ.
Məbɛ ndyʉndyʉ nɔ bɛ ntʉʼkə-a ndə a tʉʼ sɔ́ʼ bʉə-ba nə yɔŋ.
9 A nɔ kʉ̀ʉ nubə ndə i bɛ ndyʉndyʉ, bàa nu-bʉəbʉə-bə.
Ndʉʉghɔfii, Nyii, ndə bɛ Nyii-aŋ, nɔʼ nùʼ aŋ nə ŋgwo-tʉʉjyu-mə, ndə i gʉ́ə chàa yi-bʉə-nuɔ-ba-yə."1:9 Ŋwɔʼnə təLyuu 45:6-7.
10 Bɔŋ,
"Mbəŋ-aŋ Tiekətʉ, nɔ nə mɔ̀ʼ a mɔ̀ʼ yiesê kəchisê lʉ̀ hə ndəŋ nchʉʉhə,
njəŋ-yuo-hə a fɔ̀ʼ nə ghɔkə-a.
11 Bɔ̂ŋ bu mì, bɔŋ təmə a kʉʉ nə mì fɛ,
bɔ̂ŋ bu dùɔŋ, tə ŋʉ́ə nə ndyi.
12 A bu kíatə bɔŋ ndə bə kíatə ndyi fəʼə le.
A bu kwɛ́nə bɔ̂ŋ ndə bə kwɛ́nə ndyi kənduɔŋ le.
"A bɔŋ bu gòʼ haʼ nɔ,
təmə ŋgʉʼhə-a kʉʉ nə lìʼ fɛ."1:12 Ŋwɔʼnə təLyuu 102:25-27.
13 Bɔŋleʼ bɛ yɔ̂ŋ-yə wontəŋNyii ndə ɔ nɔʼ nə ghɔ̀ŋ tʉ ɔŋ mbɔ,
"Dùʼ kwiiləŋ-mɔ,
tə mɔ yi mɔ̀ʼ bʉə-bàa-ba,
sê bəshʉ a"?1:13 Ŋwɔʼnə təLyuu 110:1.
14 Bɔ̂ŋ bənchəŋ kaa lyʉʉhəbə ndə bɔ̂ŋ tʉʼ fɔ̀ʼ tʉ Nyii, bə tə́ŋ bɔŋ ndə məgwè kə́ kwáa bʉə ndə bɔ̂ŋ bu kie ŋkwaaNyii fe?