João 10

Jiso ghɔ̀ŋ mbɔ ɔ la bɛ yʉʼ nchyii-binjyʉʉhə

1 "M̈ɔ kɛŋ shyíi bii nə shʉəŋ mbɔ wo ndə ɔ gòʼ təmə tíŋ hə ndəŋ chulɔŋ ndə məŋíi mu lɔ̂ŋ-binjyʉʉhə fɛ, bɔŋ kóʼ bə ndəŋ fia kədɔŋ buŋ ŋíi, nɔ bɛ lʉʼ bɔŋleʼ kə́ bɛ lʉʼ shùɔ wo. 2 Bɔŋ wo ndə ɔ ŋíi hə chulɔŋ nɔ bɛ mbʉ nchyii-binjyʉʉhə. 3 W̃o chyìi chulɔŋ nɔ ŋɔ́ʼhə mbʉ chulɔŋ tʉ ɔŋ. Mbʉ binjyʉʉhə yʉ́ gyʉʉ-i, ɔ tíi bɔŋ nə yie-yʉə, tə́ŋ bəshʉ ghɔŋ bɔŋ fyú mbi. 4 Ndʉʉ ndə ɔ fyúhə bihə-ii mbi bənchəŋ nɔ, ɔ kə́ gɛ̀ hə bəshʉ, mbʉ binjyʉʉhə kə́ gwè hə bɔ̌ŋ ɔŋ, bʉʼka bɔ̂ŋ nɔ kínə gyʉʉ-i. 5 Kaʼ bɛ ntoʼŋgwe, bɔ̂ŋ mə gɛ̀ hə bɔ̌ŋ ɔŋ fɛ, bɔ̂ŋ bɔŋ kə́ nyʉ́ʉ ɔŋ nyʉ́ʉ bʉʼka bɔ̂ŋ kínə gyʉʉ bəntoʼŋgwe fɛ."

6 Ndʉʉ ndə Jiso kə kwə́ʼ tʉ bɔŋ ndə fʉʼkənu-ɔ̄ŋ, təmə bɔ̂ŋ kínə nukə ndə ɔ kə́ gìe fɛ. 7 Ndʉʉmɛ, Jiso bìʼ ghɔ̀ŋ tʉ bɔŋ mbɔ, "M̈ɔ kɛŋ shyíi bii nə shʉəŋ mbɔ mɔ nɔ bɛ chulɔŋ tʉ binjyʉʉhə. 8 Bʉə bənchəŋ ndə bɔ̂ŋ kə gwè mɔ buŋ gwè nɔ nə bɛ bəlʉʼʉ bɔŋleʼ kə́ bɛ bəlʉʼʉ shùɔ bʉə, bɔŋ mbʉ binjyʉʉhə kə yʉ́ gyʉʉhə-ʉə fɛ. 9 Mɔ nɔ bɛ mbʉ chulɔŋ. Wotəmiyɔŋ ndə ɔ tíŋ hə ndəŋ mɔ ŋíi, bu kie ŋkwaa, ɔ bu kə́ fyú bʉ̀nə sʉ́ʉ bɔŋleʼ kie yəŋ-ŋkɔ-bə ndə məyú hə chɔ. 10 L̃ʉ̂ʼ nɔ gwè mu lɔ̂ŋ-binjyʉʉhə bə haʼ ndə məlʉ́ʼ, gɛ̀ yí, bʉ́əhə mɛ̀ʼ. Mɔ nɔ gwè mbɔ bɔ̂ŋ chʉʼ kie məchímbi bɔŋleʼ kie yɔ́ŋyɔ́ŋ.

11 "Mɔ nɔ bɛ yʉʼ nchyii-binjyʉʉhə. Ỹʉ́ʼ nchyii bihə nɔ kɔ́ tʉkə-i bʉʼka bihə-i. 12 Ñchyii ndə bə tʉʼ lɔ̀ʼ ɔ lɔ̀ʼ ndə məchyìi bihə təmə kə́ bɛ ŋkɛŋ fɔʼɔ-ɛ fɛ, təmə kie ɔ kie mbʉ bihə fɛ, nɔ nyíɛ buu nɔ, ɔ mɛ̀ʼ mbʉ bihə nyʉ́ʉ nə wi, mbʉ buu sɛ́ʼ chə́ŋ mu bɔŋ, wɔ̀ʼhə bɔŋ. 13 Ɔ nɔ nə nyʉ́ʉ bʉʼka bə nɔ kə́ lɔ̀ʼ ɔ lɔ̀ʼ, təmə ɔ kie fyii ndəŋ bɔŋ fɛ.

14 "Mɔ nɔ bɛ yʉʼ nchyii-binjyʉʉhə, mɔ nɔ kínə bihə-ɔŋ, bihə-ɔŋ kínə mɔ, 15 haʼ ndə mbʉ Tie kínə mɔ, mɔ kínə mbʉ Tie, mɔ bɔŋ-nɔʼ-leʼ kɔ́ tʉkə-ɔŋ bʉʼka mbʉ bihə. 16 Mɔ bɔŋleʼ kie bəbɛʼbə binjyʉʉhə ndə bɔ̂ŋ chʉʼ ŋíi mu lɔ̂ŋ-fɛ̄ŋ fɛ. Mɔ bu yaʼ gwè nə bɔŋ ghɔ, bɔ̂ŋ bɔŋleʼ yʉ́ chu-ɔ. Nɔ, mbyu-kətia-binjyʉʉhə bu bɛ imɔʼ, nə mbyu nchyii imɔʼ.

17 "Mbʉ Tie nɔ kʉ̀ʉ mɔ bʉʼka mbɔ mɔ kɔ́ tʉkə-ɔŋ tʉ kwú, mbɔ mɔ chʉʼ yi bʉ̀nə bìʼ fí. 18 Wo kaa ghɔ ndə ɔ fí hə kəghɔ-mɔ fɛ, mɔ nɔ kɔ́ tʉkə-ɔŋ ndə yɔŋ-yə ŋkʉʉnə tʉʉ. Mɔ nɔ kie ghʉəʼkə ndə məkɔ́ tʉkə-ɔŋ tʉ kwú, bɔŋleʼ bʉ̀nə kie ghʉəʼkə ndə məbìʼ fí. Nɔ bɛ nukə nɔ ndə Tie-ɔ kàhə mɔ ndə məfɔ̀ʼ."

19 Ndʉʉ ndə ɔ kə ghɔ̀ŋ nubə-ɔ̄ŋ, ŋkʉʉŋkʉʉ gwù mu bʉə-Juu. 20 Buŋmbi bɔŋ ghɔ̀ŋ mbɔ, "Ɔ nɔ kie lyʉʉhəbʉəbʉəkə mu mbʉə-ɔ, nɔʼ búu, bii tʉʼ yʉ́ ka hə kəghɔ-ɔ?" 21 Bəbɛʼbə ghɔ̀ŋ mbɔ, "Kaa ŋgiekə nɔ ndə bəkɔ i fyú hə chu-wo ndə lyʉʉhəbʉəbʉəkə bɛ mu mbʉə-ɔ kə́ chɔ́ŋhə ɔŋ fɛ. Bəkɔ lyʉʉhəbʉəbʉəkə ŋɔ́ʼhə shʉ bəfʉ̀əŋtəshʉ mɛ?"

Jiso lʉ̀ ŋwɔŋ-ɛŋ ndə məbɛ VaaNyii

22 Ndʉʉ-ghɔ̄ nɔ nə bɛ ndʉʉ ndə bə kə́ yú mədʉ̀ʼ njaafɛ̀ʼndɛŋNyii chɔ Jɛlosalɛŋ, kə́ bɛ mu shyʉʉ-fəʼə. 23 Jiso kə́ tòʼ mu chunjaafɛ̀ʼndɛŋNyii, mu kənjuuhə-Salamu. 24 Bəntəŋbəshʉ-bʉə-Juu chə̀ŋtə mbʉə-ɔ, ghɔ̀ŋ tʉ ɔŋ mbɔ, "A bu tʉ́ʼ baʼa ntəŋntəŋ mbi ntyʉʉ təka? Kaʼ bɛ mbɔ a bɛ mbʉ Wo ndə Nyii Kùŋ Tə́ŋ, ä shyíi baʼa ntaa."

25 Jiso bə̀ŋhə tʉ bɔŋ mbɔ, "Mɔ nɔʼ kə shyíi bii təmə bii bɛ́ŋ fɛ. Fɔʼtə ndə mɔ tʉʼ fɔ̀ʼ yie-Tie-ɔ, nɔ bu dʉ̀ʼ wo ndə mɔ bɛ yɔŋ. 26 Bii bɔŋ bɛ́ŋ mɔ fɛ bʉʼka bii kaa nuɔ-kətia-bihə-ɔŋ fɛ. 27 B̃injyʉʉhə-ɔŋ nɔ yʉ́ gyʉʉ-ɔ, mɔ bɔŋleʼ kínə bɔŋ, bɔ̂ŋ bɔŋleʼ kə́ gwè hə bɔ̌ŋ mɔ. 28 M̃ɔ nɔ kɔ́ məchímbi tʉ bɔŋ təmə liʼ-i ghɔ fɛ, təmə bɔ̂ŋ kʉʉ nə kwú bɛ́ fɛ, təmə wo bɔŋ mə nə fyúhə bɔŋ mu kəghɔ-mɔ fɛ. 29 Tie-ɔ ndə ɔ kɔ́ bɔŋ mu kəghɔ-mɔ, nɔ shʉ́ə chàa bʉə bənchəŋ, wo kaa ghɔ ndə bəkɔ ɔ dùu bɔŋ fyúhə hə mu kəghɔ mbʉ Tie fɛ. 30 Baʼa Tie-ɔ nɔ bɛ fɔkə imɔʼ."

31 Bəntəŋbəshʉ-bʉə-Juu bìʼ lʉ̀ ŋgoʼhə ndə məyí ɔ. 32 Jiso bə̀ŋhə tʉ bɔŋ mbɔ, "Mɔ nɔʼ dʉ̀ʼ nu-jyujyu-bə tʉ bii buŋmbi ndə i lɔ̀ hə kəghɔ mbʉ Tie, bɛ yɔ̂ŋ-yə ndə bii tʉʼ kʉ́ʉ túŋtə mɔ bʉʼka yɔŋ?" 33 Mbʉ bʉə-Juu bə̀ŋhə mbɔ, "Kaa bʉʼka fɔ̀ʼ jyujyu ndə baʼa bu túŋtə a fɛ, nɔ bɛ bʉʼka məbʉ́əhə-yie Nyii, bʉʼka mbɔ mbəŋ-aŋ ndə a bɛ woməsʉʉ nɔ tʉʼ lʉ̀ ŋwɔŋ-aŋ mbɔ a nɔ bɛ Nyii." 34 Jiso bə̀ŋhə tʉ bɔŋ mbɔ, "Bə nyɔ̀ʼ mu ŋwɔʼnə-nuʼ-yii mbɔ, ‘Mɔ nɔ ghɔ̀ŋ mbɔ bii la bɛ bənyii’ fe? 35 Kaʼ ɔ tíi bɔŋ nə bənyii, kə́ bɛ bʉə ndə ŋgieNyiikə kə gwè tʉ bɔŋ, təmə bə bɔŋ-mə-leʼ tɛ́ŋ ŋgiekə ndə i gwè hə mu ŋwɔʼnə-Nyii fɛ, 36 bəkɔ bii kə́ ghɔ̀ŋ tʉ wo ndə mbʉ Tie nɔʼ chìi ɔ, ɔ bɛ ŋkʉʉ, tə́ŋ ɔŋ kɔ́ mu kəwʉʉnəmbi mbɔ, ‘A nɔ tʉʼ bʉ́əhə yie Nyii,’ bʉʼka mɔ ghɔ̀ŋ mbɔ, ‘Mɔ bɛ VaaNyii’ mɛ? 37 Kaʼ mɔ gòʼ təmə kə́ fɔ̀ʼ fɔʼɔ-Tie-ɔ fɛ, kə bii mə bɛ́ŋ mɔ fɛ. 38 Bɔŋ kaʼ mɔ kə́ fɔ̀ʼ, buŋ ndə bii gòʼ təmə bɛ́ŋ mɔ fɛ, b̈ii bɛ́ŋ mbʉ fɔʼɔ mbɔ ï chìi, bii chʉʼ kínə bɔŋ-kə́-leʼ bìʼ kínə mbɔ mbʉ Tie nɔ tʉʼ chí mu mbʉə-mɔ, mbəŋ-ɔŋ kə́ chí mu mbʉə mbʉ Tie." 39 Bɔ̂ŋ bìʼ kə́ kʉ́ʉ ndə məyá ɔ, bɔŋ ɔ bɛ́ fyú hə mu kəghɔ-bɔŋ. 40 Ɔ gɛ̀ nə wi dàa ŋgwɛŋ Jodaŋ gɛ̀ kəyəŋ ndə Jɔŋ ndə ɔ̃ kɔ́ muu, kə́ fəŋ kɔ́ muu chɔ tʉ bʉə, gɛ̀ káa chɔ. 41 Bʉə buŋmbi gwè tʉ ɔŋ kə́ ghɔ̀ŋ mbɔ, "Jɔŋ kə chìi nukəcheʼkə fɛ, bɔŋ nubə inchəŋ ndə Jɔŋ kə kwə́ʼ te wo-ɔ̄ nɔ nə bɛ shʉəŋ." 42 Bʉə buŋmbi bɛ́ŋ ɔŋ chɔ.