1 "Mɔ nɔ bɛ mbʉ ŋkɛŋ lyʉʼʉ-geleb, * Tie-ɔ kə́ bɛ mbʉ wofɔ̀ʼ-mutɔ. 2 Ntɔŋ ndə i bɛ ndəŋ mɔ təmə kə́ kʉ́ʉnə ntɔŋmə fɛ, ɔ fɔ̀ʼ mɛ̀ʼ. Bɔŋ ntɔŋ ndə i tʉʼ leʼ kʉ́ʉnə ntɔŋmə, ɔ fìitə mbʉə-e, mbɔ i chʉʼ kʉ́ʉnə ntɔŋmə yɔ́ŋyɔ́ŋ. 3 Bii bɔŋ bɛ tʉ́ʉnə bʉʼka ŋgiekə ndə mɔ nɔʼ kwə́ʼ tʉ bii. 4 B̈ii káa mu mbʉə-mɔ, mɔ káa mu mbʉə-bii. Haʼ ndə ntɔŋ-kətyʉ mə kʉ́ʉnə ntɔŋmə nə mbəŋ-ɛŋ fɛ, yaʼkɛŋ mbɔ i tyʉ̀nə ndəŋ ŋkwê-kətyʉ, nɔ bɛ haʼ nɔ bii mə kʉ́ʉnə ntɔŋmə fɛ yaʼkɛŋ mbɔ bii káa mu mbʉə-mɔ.

5 "Mɔ nɔ bɛ mbʉ lyʉʼʉ-geleb, bii kə́ bɛ ntɔŋtə-i. Wo ndə ɔ káa mu mbʉə-mɔ mbəŋ-ɔŋ káa mu mbʉə-ɔ, nɔ bɛ ɔ ndə ɔ bu kʉ́ʉnə ntɔŋ-yɔ́ŋyɔ́ŋ-mə, bʉʼka mbɔ kaʼ byúu mɔ, bii mə chìi nubɛʼkə fɛ. 6 Kaʼ wo gòʼ təmə káa mu mbʉə-mɔ fɛ, bə mɛ̀ʼ ɔŋ ndə bə mɛ̀ʼ ntɔŋ-kətyʉ-tə le, i yə́ŋtə, bə chə̀ŋtə mbʉ təntɔŋ, mɛ̀ʼ mu viʼi, tɔ̀ŋ. 7 Kaʼ bii káa mu mbʉə-mɔ, ŋgiekə-ɔŋ káa mu mbʉə-bii, b̈ii bíʼtə nukə təmiyɔŋ ndə bii kʉ̀ʉ, bə bu fɔ̀ʼ tʉ bii. 8 T̃ie-ɔ nɔ kie məgʉ́ə ndə yɔ̄ŋ-yə, mbɔ b̈ii kʉ́ʉnə ntɔŋ-yɔ́ŋyɔ́ŋ-mə, nɔ, b̈ii dʉ̀ʼ mbɔ bii la bɛ vâafɔʼɔ-bɔŋ.Jiso nɔ mbʉ bɛ lyʉʼ

9 "Ndə mbʉ Tie kʉ̀ʉ mɔ, nɔ haʼ nɔ ndə mɔ kʉ̀ʉ bii. B̈ii káa mu ŋkʉ̂ʉ-ɔ. 10 Kaʼ bii tʉ́ʼ bəŋkahə-bɔŋ, bii káa mu ŋkʉ̂ʉ-ɔ, haʼ ndə mɔ kə tʉ́ʼ bəŋkahə Tie-ɔ bɔŋleʼ káa mu ŋkʉ̂ʉ-i. 11 Mɔ nɔʼ kwə́ʼ nubə-ɔ̄ŋ tʉ bii mbɔ tʉʉjyu-ɔ chʉʼ bɛ mu bii, ẗʉʉ-yii bɔŋleʼ bʉ̀ʉ ghɔ gɛ̀ kùu. 12 Nɔ bɛ ŋkahə-ɔŋ nɔ, mbɔ b̈ii kʉ̀ʉ ŋwɔŋtə-ii haʼ ndə mɔ nɔʼ kʉ̀ʉ bii. 13 Ŋkʉ̂ʉbɛʼ bɛ ghɔ ndə i gʉ́ə chàa yɔ̄ŋ-yə, mbɔ ẅo kɔ́ ŋkwiitʉ-e yie-bətieŋkɔŋ-bi fɛ. 14 Bii nɔ bɛ bətieŋkɔŋ-bɔŋ kaʼ bii tʉʼ bəŋkahə-bɔŋ. 15 Mɔ bieleʼ tíi bii nə fʉəhə fɛ bʉʼka fʉə kyinə kínə nukə ndə tiefɔʼ-ɛ tʉʼ fɔ̀ʼ fɛ, bɔŋ mɔ nɔʼ kə tíi bii nə bətieŋkɔŋ-bɔŋ, bʉʼka nubə inchəŋ ndə mɔ yʉ́ hə kəghɔ-Tie-ɔ, mɔ nɔʼ chìi bii kínə. 16 Bii kə séʼ mɔ fɛ, nɔ nə séʼ mɔ séʼ bii, bɔŋleʼ chóʼ bii ndə məgɛ̀ kʉ́ʉnə ntɔŋmə ndə i bu chí dɔ̀ŋnə, kə mbɔ nukə təmiyɔŋ ndə bii bíʼtə tʉ mbʉ Tie nə yie-ɔ, ɔ bu kɔ́ tʉ bii. 17 Nukə-ɔ̄ŋ, mɔ nɔ kàhə bii, mbɔ b̈ii kʉ̀ʉ ŋwɔŋtə-ii.

18 "Kaʼ bʉə-kəwʉʉnəmbi bàa bii, bii kínə mbɔ bɔ̂ŋ nɔʼ kə fəŋ bàa mɔ buŋ kə́ bàa bii. 19 Bii kʉ̌ʉ bɛ nə bʉə-kəwʉʉnəmbi, təmə bɔ̂ŋ nɔ kʉ̀ʉ bii nə yʉə-yə, bɔŋ bʉʼka bii leʼ bɛ nə bɔŋ fɛ, bɔŋ bʉʼka mɔ nɔʼ séʼ bii fyúhə mu bɔŋ, nɔ chìi yɔŋ bɔ̂ŋ bàa bii. 20 B̈ii kə́ kwɛ́nə ŋgiekə ndə mɔ nɔʼ kə fəŋ shyíi bii mbɔ, ‘Vaafɔ̀ʼ mə gʉ́ə chàa tiefɔʼ-ɛ fɛ.’ Kaʼ bɔ̂ŋ kə chɔ́ŋhə mɔ təmə bɔ̂ŋ bu chɔ́ŋhə bii ghɔ. Kaʼ bɔ̂ŋ kə yʉ́ chu-ɔ, təmə bɔ̂ŋ bu yʉ́ chu-yii ghɔ. 21 Bɔŋ bɔ̂ŋ bu fɔ̀ʼ nubə-ɔ̄ŋ nchəŋnchəŋ-ɛŋ tʉ bii bʉʼka yie-ɔ, bʉʼka mbɔ bɔ̂ŋ kínə wo ndə ɔ tə́ŋ mɔ fɛ. 22 Mɔ kʉ̌ʉ gòʼ təmə nɔʼ kə gwè kwə́ʼ ŋgieNyiikə tʉ bɔŋ fɛ, təmə bɔ̂ŋ kə mə gwù fɛʼɛ nə bʉə-bʉ̂ʼʉ fɛ, bɔŋ nduɔ, bɔ̂ŋ mə túu chu-yʉə te bʉ̂ʼtə-ʉə fɛ. 23 Wotəmiyɔŋ ndə ɔ bàa mɔ, nɔ bàa Tie-ɔ ghɔ. 24 Mɔ kʉ̌ʉ gòʼ təmə nɔʼ fɔ̀ʼ nubə mu bɔŋ ndə wobɛʼ təmiyɔŋ nɔʼ nə fɔ̀ʼ fɛ, təmə bɔ̂ŋ kə mə gwù fɛʼɛ nə bʉə-bʉ̂ʼʉ fɛ, bɔŋ nduɔ, bɔ̂ŋ nɔʼ nyíɛ bɔŋ, bàa baʼa Tie-ɔ. 25 Bɔŋ ŋgiekə ndə bə kə nyɔ̀ʼ mu ŋwɔʼnə-nuʼ-yʉə bu fyú shʉəŋ ndə i kə ghɔ̀ŋ mbɔ, ‘Bɔ̂ŋ nɔ bàa mɔ təmə mɔ̀ʼ luu-i fɛ.’

26 "Bɔŋ ndʉʉ ndə mɔ bu tə́ŋ Wo Ghʉ́əhə Fyii tʉ bii hə kəghɔ mbʉ Tie, mbʉ kəLyʉʉhə shʉəŋ ndə ɔ gwè hə kəghɔ-ɔ, ɔ bu nú gwù te mɔ. 27 Mbəŋ-yii ghɔ bu nú gwù te mɔ, bʉʼka mbɔ bʉʼʉ nɔ nə bɛ mɔʼɔ lʉ̀ hə ndəŋ nchʉʉhə.