1 Haʼ ndʉʉghɔfii, bəbɛʼbʉə ndə bɔ̂ŋ kə bɛ chɔ, shyíi Jiso ndə Bale kə yítə bʉə-Galili, fìnə fɔbʉəkə-ʉə mu fɔ-fɛ̀ʼndɛŋ-bə-ʉə. 2 Jiso bə̀ŋhə, ghɔ̀ŋ mbɔ, "Bii kwɔ̀ʼtə mbɔ bʉə-Galili-bɔ̄ŋ ndə bɔ̂ŋ kə nyíɛ ŋgʉəʼ-ɔ̄ nɔ, bʉ̂ʼtə-ʉə shʉ́əshʉ́ə daa tə chàa bʉ̂ʼʉ bəbɛʼbʉə-Galili mɛ? 3 Mbee, nukə ndə bii tʉʼ kwɔ̀ʼtə kʉ̀ʼnə fɛ, kaʼ bii gòʼ təmə shìe liɛŋtə-ii ndəŋ bʉ̂ʼʉ fɛ, bii bənchəŋ kwú bɛ́. 4 Bii nɔ kínə te nə bʉə njuɔ fɔŋ nə wuŋ ndə bɔŋ kə kwútə ndʉʉ ndə njaa bəyuhəbəyuhə Silɔŋ kə gwù ndəŋ bɔŋ. Bii kwɔ̀ʼtə mbɔ bʉ̂ʼtə-ʉə yɔ́ŋ chàa yi-bəbɛʼbʉə-yə ndə bɔ̂ŋ kə́ chí Jɛlosalɛŋ mɛ? 5 Mbee, mɔ nɔ tʉʼ shyíi bii, kaʼ bii gòʼ təmə shìe liɛŋtə-ii ndəŋ bʉ̂ʼʉ fɛ, bii bənchəŋ kwú bɛ́."

6 Ndʉʉmɛ, ɔ mɔ̀ʼ chəŋkə-ɔ̄ŋ tʉ bɔŋ mbɔ, "Wobɛʼ nɔ nə bɛ ghɔ ndə ɔ nə bè fik mutɔ-ɔ, ɔ gɛ̀ ndə məlɛ́nə ntɔŋmə-i, bɔŋ təmə nyíɛ fɔkə chɔ fɛ. 7 Ɔ gìe tʉ wo ndə ɔ kə́ lɛ́nə mbʉ mutɔ mbɔ, ‘Nɔ ŋgʉʼhə-ɔ̄ŋ itia nduɔ ndə mɔ tʉʼ gwè ndə məlɛ́nə ntɔŋmə ndəŋ tyʉ-fik-kə-ɔ̄ŋ təmə bɔŋ kə́ nyíɛ fɔkə chɔ fɛ. Gwìa mɛ̀ʼ! Mɔ kʉ̀ʉ mbɔ mɔ mɛ̀ʼtə i kə́ bʉ́əhə sê-ɔ njʉnjʉ fɛ.’

8 "Mbʉ wo lɛ́nə mutɔ bə̀ŋhə tʉ ɔŋ mbɔ, ‘Tiefɔʼ-ɔ, kə a mɛ̀ʼtə chɔ ndə ŋgʉʼʉmbi le, mɔ bu tyúutə yə̀ŋhə mbʉə-e fúu mɔ̀ʼ chʉəʼ chɔ. 9 Kaʼ i kʉ́ʉnə ntɔŋmə shyʉʉnə, i bʉ̀ʉ, bɔŋ byuunɔ bə gwìa mɛ̀ʼ.’ "

10 Nɔ nə bɛ Chîlɔʼbɛʼkə, Jiso kə́ dàhə mu njaagháaNyii. 11 Wokebɛʼ kə́ bɛ chɔ ndə lyʉʉhəbʉəbʉəkə nɔʼ lɛ́ŋhə ɔŋ ndə ŋgʉʼhə njuɔ fɔŋ nə wuŋ. Ɔ kə́ tòʼ bʉʉbʉʉ təmə bəkɔ ɔ bə̀ŋhə ŋwɔŋ-ɛŋ fɛ. 12 Ndʉʉ ndə Jiso nyíɛ ɔŋ, tíi ɔ, ɔ fyú gwè bəshʉ ɔ, ɔ gìe tʉ ɔŋ mbɔ, "Woke, bə nɔʼ chʉ́ʼ a ndəŋ yɔʼkə-a." 13 Jiso mɔ̀ʼ ghɔkə-i ndəŋ ɔŋ, haʼ ndʉʉmɛ, ɔ kie nchʉʼ, bə̀ŋhə ŋwɔŋ-ɛŋ, tə́nə ndyʉndyʉ, chʉ́ʉhə kə́ lə̀ʼtə Nyii.

14 Tʉʉ wokwɛʼtəŋ-mu-njaagháaNyii byʉ́ʼ tʉ Jiso bʉʼka mbɔ ɔ nɔʼ chʉ́ʼ wo ndəŋ Chîlɔʼkə. Mbʉ wokwɛʼtəŋ gìe tʉ bʉə-ghɔ̄bə mbɔ, "Chî-fɔʼɔ-bə nɔ bɛ ntʉʼʉ, mu chî-maa-bə-ɔ̄ŋ b̈ii gwè kie nchʉʼ-yii, kaa bɛ ndəŋ Chîlɔʼkə fɛ."

15 Tiekətʉ bə̀ŋhə tʉ ɔŋ mbɔ, "Bii bʉə làhə shʉ! Bii tʉʼ fyúhə bənaʼa-wada-bii ghɔŋbə bəjakashi-bii hə mu lɔ̂ŋ ndəŋ Chîlɔʼkə, gɛ̀ kɔ́ muu tʉ bɔŋ fe? 16 Bɔŋ woke-ɔ̄, vaa-Ablahaŋ ndə Sata nɔʼ kə kɔ́ʼ ɔ ndəŋ ŋgʉʼhə njuɔ fɔŋ nə wuŋ, bəkɔ bə yɔ̀ʼtə ɔŋ ndəŋ ghyʉʉ-Sata-tə ndəŋ Chîlɔʼkə fe?" 17 Ndə ɔ gìe yɔ̄ŋ-yə le, bʉə-bàa-bi bənchəŋ kie tʉvyiikə. Mbʉ bʉə-ghɔ̄bə kə́ nʉ́ətə nuchíechubə ndə ɔ tʉʼ chìi.

18 Ndʉʉghɔfii, Jiso bíʼtə mbɔ, "Sɔ́ʼ-Nyii bɛ ntɛ təka? Bəkɔ mɔ fʉ̀ʼ ndə ka? 19 I nɔ bɛ nə vaa-ŋgwie-kîa ndə wo lʉ̀ gɛ̀ shùɔ mutɔ-ɔ. I kʉ̂ʉ kóʼ bə̀ŋ lɔkɔʼ kətyʉ nuɔ-mbi-mə gwè fʉ̀ə njaahə-ʉə ndəŋ ntɔŋtə-i."

20 Ɔ bìʼ bíʼtə mbɔ, "Bəkɔ mɔ fʉ̀ʼ Sɔ́ʼ-Nyii ndə ka? 21 I nɔ bɛ nə vaadyʉʼʉ yî ndə woke lʉ̀ mɔ̀ʼ mu mbʉ̂ətə bobo buŋmbi, i chìi mbʉ mbʉ̂ətə kóʼ nchəŋnchəŋ-ɛŋ."

22 Ndʉʉghɔfii, Jiso kə́ tòʼ tíŋ hə mu yəŋkwɛʼtəŋbə ghɔŋbə lɔʼ-bətə̂ŋ-tə, kə́ tòʼ dàhə bʉə, kə́ gɛ̀ nə kwii Jɛlosalɛŋ. 23 Wobɛʼ bíʼtə tʉ ɔŋ mbɔ, "Tiekətʉ, bɛ haʼ mbyu-bʉə-hə məniʼ ndə Nyii bu kwáa bɔŋ mɛ?"

Ɔ gìe tʉ bɔŋ mbɔ, 24 "Chìi nubə inchəŋ ndə məŋíi ntoʼ-Nyii ndə chusii fíanə, mɔ nɔ tʉʼ shyíi bii bʉʼka bʉə buŋmbi nɔ bu kə́ fʉʼ fʉʼkə ndə məŋíi chɔ, bɔŋ bu ŋíi kəŋkaa. 25 Ndʉʉ ndə mbʉ ŋwɔ̌ŋ-njaa bu lɔ̀ hə sê fʉ̀əŋ chusii nɔ, bii ndə bii bíe mbi bu tə́nə chusii kə́ kwɔ̀ŋ bɔŋ fʉ̀ʉtə mbɔ, ‘Tiekətʉ, chóʼ chusii tʉ baʼa.’ Bɔŋ ɔ bu bə̀ŋhə mbɔ, ‘Mɔ kínə bii fɛ, təmə bɔŋ kínə yəŋkə ndə bii lɔ̀ hə chɔ fɛ.’ 26 Ndʉʉghɔfii, bii bu ghɔ̀ŋ mbɔ, ‘Bʉʼʉ nɔ nə kə́ yú bɔŋleʼ nú, a bɔŋ-nɔʼ-leʼ dàhə kəyəŋkwɛʼtəŋ-baʼa.’ 27 Bɔŋ ɔ bu bə̀ŋhə mbɔ, ‘Nɔʼ m̈ɔ shyíi bii, mɔ kínə bii fɛ, təmə bɔŋ kínə yəŋkə ndə bii lɔ̀ hə chɔ fɛ. B̈ii kwɛ̀ʼtə mbʉə mɔ, bʉə-bʉ̂ʼʉ.’

28 "Mu kəyəŋ-ghɔ̄, gwia bu bɛ chɔ ghɔŋbə mbʉə liŋnə shʉ́əshʉ́ə ndʉʉ ndə a bu nyíɛ Ablahaŋ, Aisi ghɔŋbə Jakɔ leʼnə bʉəyʉkəŋgieNyii-ntoʼ-Nyii, bə bɔŋ mɛ̀ʼ a mbi. 29 Bʉə bu gwè hə kwii ndə chichi tʉʼ sɔ́ʼ chɔ ghɔŋbə kwii ndə chichi tʉʼ sʉ́ʉ chɔ chusii-ɔ, byûukwe, byûumbɔŋ, lʉ̀ yəŋ-dùʼ-bə-ʉə kə́ yú fɔbə ntoʼ-Nyii. 30 Ndə ŋgie-shʉəŋ-kə, bʉə nɔ ghɔ ndə bɔ̂ŋ bɛ ndyiʼtəbə ndə bɔ̂ŋ bu yi bɛ fəŋtə, bɔŋ bəbɛʼbə kə́ bɛ ghɔ ndə bɔ̂ŋ bɛ fəŋtə ndə bɔ̂ŋ bu yi bɛ ndyiʼtəbə."

31 Haʼ ndʉʉghɔfii, bəbɛʼbʉə-Falasi gwè tʉ Jiso gìe tʉ ɔŋ mbɔ, "Mɛ̀ʼtə yəŋkə-ɔ̄ŋ gɛ̀ kəyəŋ kədɔŋ. Hɛlo nɔ tʉʼ kʉ́ʉ mbɔ ɔ yí a."

32 Ɔ bə̀ŋhə mbɔ, "Gɛ̀ gìe tʉ səŋyaŋgwo-ghɔ̄ mbɔ, ‘Mɔ bu chʉ́ʼ bʉə ndə bɔ̂ŋ kie lyʉʉhəbʉəbʉəbə ghɔŋbə bʉə-bəyɔʼ laa ghɔŋ yɔ̂ŋ, chîbə kʉ̂ʉ yi mì itia nɔ, mɔ mìʼtə fɔʼɔ-ɔ.’ 33 Kaʼ nubə kə́ ghɔʼ təka, mɔ bu kə́ gɛ̀ nə shʉbə laa, yɔ̂ŋ, leʼnə yɔ̂ŋ-ɛŋ, bʉʼka yʉkəŋgieNyii kaa ghɔ ndə ɔ gòʼ təmə kwú mu Jɛlosalɛŋ fɛ.

34 "A goo Jɛlosalɛŋ! A goo Jɛlosalɛŋ! Yəŋkwɛʼtəŋkə ndə bii yítə bʉəyʉkəŋgieNyii bɔŋleʼ túŋtə bʉə ndə bə tə́ŋ bɔŋ tʉ bii. Bɛ vɛʼsɛʼɛ ndə mɔ nɔʼ kʉ̀ʉ ndə məchə̀ŋtə bii ndə ŋkwê ŋgwo chə̀ŋtə vâa-bi kwóhə tɔʼɔ bəghɔnə-ɔŋ le, təmə bii bɔŋ kʉ̀ʉ fɛ. 35 Bə nɔʼ ké njaa-yii, mɔ bɔŋleʼ kə́ shyíi bii mbɔ, bii bieleʼ nə nyíɛ mɔ fɛ, tʉ bii nə ghɔ̀ŋ mbɔ, ‘Tə Nyii bìʼ Wo ndə ɔ gwè yie-Tiekətʉ.’ "