1 Ndʉʉ ndə Jiso nɔʼ lìʼ ndə məgìe nubə-ɔ̄ŋ inchəŋ, ɔ gìe tʉ vâafɔʼɔ-bi mbɔ, 2 "Bii lɛ kínə mbɔ chîbə kʉ̂ʉ tíŋ ibûu nɔ Yíɛʼsii* gwè, bə chɔ̀ʼhə Vaa-Woməsʉʉ kɔ́, bə kwɛ̀ŋ ɔŋ yí."

3 Ndʉʉ-ghɔ̄, bətiefɛ̀ʼndɛŋNyii ghɔŋbə bəntəŋbəshʉ nɔ nə chə̀ŋtə ntoʼ tiefɛ̀ʼndɛŋkwɛʼtəŋNyii, ndə yie-e kə bɛ Kaifa, 4 kə́ shʉ̀tə ntɛ ndə bɔ̂ŋ bu yá Jiso bɔ̌ŋbɔ̌ŋ yí ɔ. 5 Bɔ̂ŋ bɔŋ ghɔ̀ŋ mbɔ, "Kaa ndəŋ chî-Yíɛʼsii-kə fɛ, təmə ntɔŋntɔŋ bu ŋɛ̀nə hə kəghɔ mbʉ bʉə."

6 Ndʉʉ ndə Jiso kə bɛ Bɛtani mu njaa-Samu ndə bɛ wo-kəlɔ, 7 wokebɛʼ gwè tʉ ɔŋ nə vaakətəŋ məŋgwo ndə bə chìi nə ŋgoʼbɛʼ bə kə́ tíi nə alabasta, nə ŋgwo-chuɔŋ-chyʉʉchyʉʉ-mə muŋgɔ, gwè véʼ kətʉ-ɔ ndʉʉ ndə ɔ kə dùʼ mbʉə tebele ndə məyú fɔbə. 8 Ndʉʉ ndə vâafɔʼɔ-bi kə nyíɛ yɔ̄ŋ-yə tʉʉ-yʉə byʉ́ʼ daa, bɔ̂ŋ bíʼtə mbɔ, "Yɔ̄ŋ-yə bɛ́ bɛ mbuka? 9 Bə nɔ kə kə́ kʉ̌ʉ fɛ̀ŋ yɔ̄ŋ-yə ndə kyʉə yɔ́ŋyɔ́ŋ, kɔ́ kyʉə-ɛ tʉ bʉə-mbʉʼ." 10 Bɔŋ Jiso, kə́ kínə nukə ndə i bɛ mu fyii bɔŋ, bíʼtə mbɔ, "Bii tʉʼ chɔ́ŋhə woke-ɔ̄ mbuka? Ɔ nɔʼ fɔ̀ʼ yʉʼ kənu ndəŋ mɔ. 11 Bʉʼka biibə bʉə-mbʉʼ bu kə́ bɛ mɔʼɔ, təmə kʉʉ kə́ kie mɔ təvɛʼtəvɛʼ fɛ. 12 Məvéʼ ndə ɔ véʼ ŋgwomə-ɔ̄ŋ ndəŋ mɔ nɔ, ɔ nɔ shʉ̀tə mɔ tʉ́ʼ ndə mətyúu. 13 Nɔʼ m̈ɔ shyíi bii nə shʉəŋ mbɔ, yəŋkə təmiyɔŋ ndə bə bu lɔ̀ʼ ntəŋjyujyu-ɔ̄ chɔ mu kəwʉʉnəmbi inchəŋ, nukə ndə woke-ɔ̄ nɔʼ chìi, bə bu kə́ fʉ̀ʼtə ndə mə-kə́-kwɛ́nə ɔŋ."

14 Ndʉʉmɛ, mbyu wo mu vâafɔʼɔ-Jiso njuɔ bûu nə wuŋ ndə yie-e kə bɛ Juda Iskalo lɔ̀ gɛ̀ bìatə bətiefɛ̀ʼndɛŋNyii, 15 ghɔ̀ŋ tʉ bɔŋ mbɔ, "Bii bu kɔ́ ka tʉ mɔ, m̈ɔ kɔ́ ɔ tʉ bii?" Bɔ̂ŋ kɔ́ mbyu-kyʉə-hə tʉ ɔŋ wuŋ tia ndə bə chìi nə tə́ŋbɛʼkə bə kə́ tíi nə siliba. 16 Lʉ̀ hə ndʉʉmɛ, Juda chʉ́ʉhə kə́ kʉ́ʉ yʉʼ fia ndə məchɔ̀ʼhə Jiso kɔ́ tʉ bɔŋ.

17 Kʉ̂ʉ bɛ ndəŋ fəŋ kəchî ndə b̃ə yú Nchəŋtə ndə b̃ə Kwó Bele təmə yî chɔ fɛ le, vâafɔʼɔ Jiso gwè gìe tʉ ɔŋ mbɔ, "A kʉ̀ʉ mbɔ b̈aʼa gɛ̀ shʉ̀tə fa tʉ a ndə məyú mbʉ Yíɛʼsii chɔ?"

18 Ɔ ghɔ̀ŋ tʉ bɔŋ mbɔ, "B̈ii gɛ̀ mu kəyəŋkwɛʼtəŋ, bii bu nyíɛ wobɛʼ gìe tʉ ɔŋ mbɔ, ‘Chicha nɔ ghɔ̀ŋ mbɔ, "Ndʉʉ-ɔ nɔʼ kʉ̀ʼnə. Baʼbə vâafɔʼɔ-bɔŋ bu yú Yíɛʼsii mu njaa-a." ’ " 19 Mbʉ vâafɔʼɔ fɔ̀ʼ haʼ ndə Jiso kə gìe tʉ bɔŋ, gɛ̀ shʉ̀tə mbʉ bəfɔ Yíɛʼsii.

20 Kʉ̂ʉ bɛ ndʉʉbuumbi, ɔ dùʼ mbʉə tebele ghɔŋbə vâafɔʼɔ-bi njuɔ bûu nə wuŋ ndə məyú fɔbə. 21 Ndə bɔ̂ŋ kə́ yú le, ɔ ghɔ̀ŋ mbɔ, "Nɔʼ m̈ɔ shyíi bii nə shʉəŋ mbɔ, mbyu wo mu bii bu fɛ̀ŋ mɔ." 22 I chɔ́ŋhə bɔŋ daa, bɔ̂ŋ chʉ́ʉhə kə́ bíʼtə tʉ ɔŋ bəmɔʼbəmɔʼ mbɔ, "Bɛ mɔ mɛ, Tiekətʉ?" 23 Jiso bə̀ŋhə ghɔ̀ŋ mbɔ, "Wo ndə ɔ nɔʼ shúʼhə ghɔkə-i baʼa ɔ mɔʼɔ mu baŋ bu fɛ̀ŋ ɔŋ. 24 Vaa-Woməsʉʉ bu gɛ̀ haʼ ndə bə nɔʼ kə nyɔ̀ʼ te ɔ, bɔŋ ŋgʉəʼ kətʉ wo ndə ɔ bu fɛ̀ŋ mɔ! I nɔ kə buŋ bɛ jyujyu tʉ wo-ghɔ̄ kaʼ bə kʉ̂ʉ kə gòʼ təmə bí ɔ fɛ." 25 Juda ndə ɔ bu chɔ̀ʼhə ɔŋ kɔ́, ghɔ̀ŋ mbɔ, "Chicha, bɛ mɔ mɛ?" Ɔ ghɔ̀ŋ tʉ ɔŋ mbɔ, "A nɔʼ gìe nɔ."

26 Ndʉʉ ndə bɔ̂ŋ kə́ yú, Jiso lʉ̀ bele, kʉ̂ʉ kɔ́ ndɔ chɔ tʉ Nyii bə́ʼtə, kɔ́ tʉ vâafɔʼɔ-bi, ghɔ̀ŋ tʉ bɔŋ mbɔ, "B̈ii kɔ́ kwó, nɔ bɛ mbɔʼ mbʉə-ɔ nɔ." 27 Ɔ leʼ lʉ̀ ndʉ̂ʉ kʉ̂ʉ kɔ́ ndɔ tʉ Nyii, chɔ̀ʼhə kɔ́ tʉ bɔŋ, ghɔ̀ŋ mbɔ, "B̈ii nú bənchəŋ, 28 bʉʼka nɔ bɛ fɔbʉəkə-ɔŋ nɔ ndə i kɔ́ʼ mbʉ məŋkaa, ndə bə tyú yie bʉə buŋmbi ndə məsʉ̀fyii hə ndəŋ bʉ̂ʼtə-ʉə. 29 M̈ɔ shyíi bii mbɔ mɔ bieleʼ nə bìʼ nú ndʉʼmə-ɔ̄ŋ fɛ, tə chî-ghɔ̄-kə nə gwè ndʉʉ ndə mɔ bu nú fefe bʉʼʉ ndʉʉ ndə Tie-ɔ bu kə́ sɔ́ʼ bʉə-bi ndə fɔŋ." 30 Ndʉʉmɛ, bɔ̂ŋ yùɔ lyuu, lɔ̀ kóʼ gɛ̀ ndəŋ Kwɔŋ-bəTyʉ-Oli.

31 Ndʉʉmɛ, Jiso ghɔ̀ŋ tʉ bɔŋ mbɔ, "Bii bənchəŋ bu nyʉ́ʉ wɔ̀ʼnə tʉ́ʼ mɔ ndʉʉbətyuʼ-ɔ̄ bʉʼka bə nɔ nə nyɔ̀ʼ mu ŋwɔʼnə-Nyii mbɔ, ‘Mɔ bu yí nchyii-binjyʉʉhə, mbʉ kətia binjyʉʉhə nyʉ́ʉ wɔ̀ʼnə.’ 32 Bɔŋ ndʉʉ ndə mɔ bu bʉ̀nə kóʼ nɔ, mɔ bu gɛ̀ bəshʉ bii mu Galili." 33 Bita bə̀ŋhə tʉ ɔŋ mbɔ, "Kaʼ bʉə bənchəŋ nyʉ́ʉ wɔ̀ʼnə tʉ́ʼ a, mɔ mə nə nyʉ́ʉ fɛ." 34 Jiso ghɔ̀ŋ tʉ ɔŋ mbɔ, "M̈ɔ shyíi a nə shʉəŋ mbɔ ndʉʉbətyuʼ-ɔ̄, ŋkʉəʼə bu yi kə tʉ́ʉ nɔ, tʉ a nɔʼ kɔ́tuu a vɛʼ tia mbɔ a la kínə mɔ fɛ." 35 Bita ghɔ̀ŋ tʉ ɔŋ mbɔ, "Kaʼ buŋ kʉ̀ʉ i bɛ mbɔ baʼa kwú mɔʼɔ, mɔ mə nə tɛ́ŋ aŋ fɛ." Vâafɔʼɔ-bi bənchəŋ bə̀ŋhə haʼ nɔ.

36 Ndʉʉmɛ, Jiso gɛ̀ ghɔŋbə vâafɔʼɔ-bi kəyəŋbɛʼ ndə bə kə́ tíi nə Gɛsemani, ɔ gìe tʉ vâafɔʼɔ-bi mbɔ, "B̈ii dùʼtə fɛ̄ŋ, mɔ gɛ̀ bəshʉ fīi, gɛ̀ gháaNyii." 37 Ɔ kʉ̂ʉ lʉ̀ Bita ghɔŋbə vâa-Sabɛdi bəbûu, mbʉə-e chʉ́ʉhə kə́ dìe daa, bɔŋ-kə́-leʼ chɔ́ŋhə ɔŋ. 38 Ndʉʉmɛ, ɔ ghɔ̀ŋ tʉ bɔŋ mbɔ, "Fyii-ɔ tʉʼ chɔ́ŋhə mɔ daa, tə kə́ dʉ̀ʼ kwú. B̈ii káa fɛ̄ŋ, kə́ kíi dyʉʼbə bʉʼʉ mɔʼɔ."

39 Ɔ kʉ̂ʉ kwɛ̀ʼtə gɛ̀ bəshʉ məniʼ, bʉ́ʉhə tʉkə-i sê gháaNyii ghɔ̀ŋ mbɔ, "Tie-ɔ, kaʼ i yùhə, a fí ndʉ̂ʉ ŋgʉəʼ-ɔ̄ kəghɔ-mɔ, bɔŋ kə a mə fɔ̀ʼ ŋkʉʉnə-tʉʉ-ɔ fɛ, fɔ̀ʼ bə ya-yə ŋkʉʉnə tʉʉ." 40 Ɔ bʉ̀nə gwè nyíɛ vâafɔʼɔ-bi, bɔ̂ŋ kə́ bɛ́ŋbɛ́ŋ. Ɔ ghɔ̀ŋ tʉ Bita mbɔ, "Bɛ mbɔ a kə mə kíi dyʉʼbə baʼa ndə vaa kəkʉʉ mbi fe? 41 B̈ii kə́ kíi dyʉʼbə bɔŋleʼ kə́ gháaNyii bʉʼka bii mə yi gwù mu nubə ndə i mùutə wo mbɔ ɔ̈ gwù mu bʉ̂ʼʉ. Mbʉ fyii nɔ bɛ chɔ, bɔŋ mbɔʼ mbʉə lʉ́ʉtə."

42 Ɔ bìʼ gɛ̀ gháaNyii ghɔ̀ŋ mbɔ, "Tie-ɔ, kaʼ bɛ mbɔ mɔ kie ndə mə-yaʼ-nú ndʉ̂ʉ-ɔ̄, təmə i mə tíŋ fɛ, ä fɔ̀ʼ ndə a kʉ̀ʉ." 43 Ɔ bʉ̀nə bìʼ gwè nyíɛ bɔŋ bɔ̂ŋ kə́ bɛ́ŋbɛ́ŋ, bʉʼka shʉtə-ʉə nɔ nə bɛ idìenə nə mbɛŋhə.

44 Ɔ kʉ̂ʉ bìʼ mɛ̀ʼtə bɔŋ, gɛ̀ bìʼ gháaNyii ndə vɛʼ tia, kə́ gìe haʼ nubə ndə ɔ nɔʼ kə fəŋ gìe. 45 Ɔ bʉ̀nə ndʉʉmɛ tʉ vâafɔʼɔ-bi, ghɔ̀ŋ tʉ bɔŋ mbɔ, "Bii bíe bɛ́ŋ mbɛŋhə-ii kə́ káa mɛ? B̈ii nyíɛ, mbʉ ndʉʉ tʉʼ kʉ̀ʼnə gwè, bə nɔʼ kɔ́ Vaa-Woməsʉʉ mu kəghɔ-bʉə bʉ̂ʼʉ. 46 B̈ii lɔ̀ hə sê b̈ʉʼʉ kə́ gɛ̀, nyíɛ, wo ndə ɔ fɛ̀ŋ mɔ nɔʼ kə́ŋhə."

47 Ndə ɔ kə́ bíe kwə́ʼ, Juda gwè, ndə ɔ kə́ bɛ mbyu wo mu vâafɔʼɔ-bi njuɔ bûu nə wuŋ, ghɔŋbə nuɔ-bʉə buŋmbi nə setəbə ghɔŋbə mbuuhə kəghɔ-bɔŋ, tə́ŋ bətiefɛ̀ʼndɛŋNyii ghɔŋbə bəntəŋbəshʉ mbʉ bʉə tə́ŋ bɔŋ. 48 Mbʉ wo ndə ɔ kə fɛ̀ŋ ɔŋ nɔʼ kə kɔ́ cheʼkə tʉ bɔŋ ghɔ̀ŋ mbɔ, "Wo ndə mɔ bu bɔ́nə ɔŋ ndə nchaʼtə nɔ bɛ mbʉ wo-ghɔ̄, b̈ii yá ɔ." 49 Ɔ kwɛ̀ʼtə gɛ̀ mbʉə-Jiso haʼ ndʉʉmɛ ghɔ̀ŋ mbɔ, "Chicha, mɔ gìe tʉ a!" bɔ́nə ɔŋ.

50 Bɔŋ Jiso ghɔ̀ŋ tʉ ɔŋ mbɔ, "Tiekənu, fɔ̀ʼ nukə ndə a gwè ndə məfɔ̀ʼ." Ndʉʉmɛ, bɔ̂ŋ gwè mɔ̀ʼ ghɔbə-ʉə ndəŋ Jiso, yá ɔ. 51 Kə nyíɛ ndʉʉmɛ, mbyu wo mu vâafɔʼɔ-Jiso kɔ́ ghɔkə-i sʉ̀ʉ setəkə-i, gwìa tyunə-fʉə-tiefɛ̀ʼndɛŋkwɛʼtəŋNyii-kə chɔ chʉ̀ə.

52 Ndʉʉmɛ, Jiso ghɔ̀ŋ tʉ ɔŋ mbɔ, "Bʉ̀nə sʉ́ʉhə setəkə-a kəyəŋ-ghɔ̄. Bʉʼka bʉə bənchəŋ ndə bɔ̂ŋ tʉʼ yí bʉə nə setəkə bu nə kwú hə kəghɔ-setəkə. 53 A kwɔ̀ʼtə mbɔ, mɔ mə gwía tʉ Tie-ɔ, haʼ ndʉʉmɛ ɔ tə́ŋ ŋkɔŋ-bʉəntəŋNyii-hə tʉ bʉʼʉ fe? 54 Bɔŋ nɔ, a kwɔ̀ʼtə mbɔ ŋwɔʼnə-Nyii bu fyú shʉəŋ təka, ndə i ghɔ̀ŋ mbɔ, nubə kie ndə mətíŋ nɔ?"

55 Ndʉʉ-ghɔ̄, Jiso kwə́ʼ tʉ mbʉ nuɔ-bʉə ghɔ̀ŋ mbɔ, "Bii tʉʼ gwè tʉ mɔ nə setəbə ghɔŋbə mbuuhə təka fi nə bii tʉʼ gwè tʉ wo bə̀ŋhə bədyʉʼ ndə məyá mɔ? Mɔ nɔ kə kə́ dùʼ bɔŋleʼ dàhə mu chunjaafɛ̀ʼndɛŋNyii bəchibəchi təmə bii yá mɔ fɛ. 56 Bɔŋ nubə-ɔ̄ŋ nchəŋnchəŋ nɔ fyú mbɔ nukə ndə bʉəyʉkəŋgieNyii kə nyɔ̀ʼ chʉʼ fyú shʉəŋ." Ndʉʉmɛ, vâafɔʼɔ-bi bənchəŋ mɛ̀ʼtə ɔŋ nyʉ́ʉ nə wʉə.

57 Bʉə ndə bɔ̂ŋ kə yá Jiso lʉ̀ ɔ gɛ̀ nə nɔŋ tʉ Kaifa tiefɛ̀ʼndɛŋkwɛʼtəŋNyii, kəyəŋ ndə bʉə dàhə nuʼ-Mushi ghɔŋbə bəntəŋbəshʉ kə chə̀ŋtə chɔ. 58 Bita kə́ bɛ dɔdɔ gɛ̀ hə bɔ̌ŋ ɔŋ, kɔ́ kʉʉkə, tə́nə sêfu-tiefɛ̀ʼndɛŋkwɛʼtəŋNyii, ɔ kʉ̂ʉ sʉ́ʉ muŋgɔ dùʼ ghɔŋbə bʉə chyìi mbʉ kəyəŋ ndə mənyíɛ ndə i bu yi liʼ.

59 Nduɔ, bətiefɛ̀ʼndɛŋNyii ghɔŋbə ŋguu-kaŋsotə-hə bənchəŋ kə́ kʉ́ʉ wo ndə ɔ bu bɛ́ŋ lɛɛŋkə kətʉ Jiso, bɔ̂ŋ chʉʼ yí ɔ, 60 bɔŋ təmə b̈ɔ̂ŋ nyíɛ wo fɛ, buŋ ndə bʉə buŋmbi kə fyú gwè mbi ndə məbɛ́ŋ lɛɛŋkə kətʉ-ɔ. Kəliʼ bʉə bəbûu fyú gwè bəshʉ 61 ghɔ̀ŋ mbɔ, "Wo-ɔ̄ nɔ ghɔ̀ŋ mbɔ, ‘Bəkɔ mɔ kùu njaafɛ̀ʼndɛŋNyii, bʉ̀nə bɔ́ŋ ndəŋ chîbə itia.’ "

62 Ndʉʉmɛ, tiefɛ̀ʼndɛŋkwɛʼtəŋNyii lɔ̀ hə sê bíʼtə mbɔ, "A kie ŋgiekə ndə məbə̀ŋhə tʉ bɔŋ fe? Bɛ ka ndə a kie ndə məgìe te nubə-ɔ̄ŋ ndə bʉə-bɔ̄ŋ gìe kətʉ-a nɔ?" 63 Bɔŋ Jiso líitə mbɔ loʼo. Tiefɛ̀ʼndɛŋkwɛʼtəŋNyii gìe tʉ ɔŋ mbɔ, "Mɔ nɔ tʉʼ kàhə a, yie Nyii ndə ɔ bɛ ghɔ, shyíi baʼa, kaʼ bɛ mbɔ a bɛ mbʉ Wo ndə Nyii Kùŋ Tə́ŋ, mbʉ VaaNyii."

64 Jiso bə̀ŋhə tʉ ɔŋ mbɔ, "Nɔ bɛ ndə a ghɔ̀ŋ. Nɔʼ m̈ɔ bɔŋ shyíi bii mbɔ lʉ̀ hə nduɔ gɛ̀ nə shʉbə, bii bu nyíɛ Vaa-Woməsʉʉ, ɔ kə́ bɛ kwiiləŋ Wo Shʉəshʉə, kə́ gwè hə ndəŋ mbɔʼ-yuo-kə."

65 Ndʉʉmɛ, tiefɛ̀ʼndɛŋkwɛʼtəŋNyii jɔ̀ʼtə ndyihə-i* ghɔ̀ŋ mbɔ, "Ɔ nɔʼ bʉ́əhə yie Nyii nə chu-i. Bʉʼʉ tʉʼ leʼ kʉ́ʉ ndə məyʉ́ ka nduɔ te ɔ? Bii nɔʼ yʉ́ nduɔ ndə ɔ bʉ́əhə yie Nyii. 66 Bii kwɛ̀ təka?"

Bɔ̂ŋ bə̀ŋhə mbɔ, "Ɔ nɔ kie ndə məkwú."

67 Ndʉʉmɛ, bɔ̂ŋ tyùtə ntɛmə shʉ-ɔ, kwɔ̀ŋ ɔŋ. Bəbɛʼbʉə gwúu ghɔbə chu-ɔ, 68 kə́ ghɔ̀ŋ mbɔ, "Mbəŋ-aŋ Wo ndə Nyii séʼ, kaʼ bɛ mbɔ a bɛ yʉkəŋgieNyii, tɔ́ wo ndə ɔ kwɔ̀ŋ aŋ."

69 Bita nɔ kə dùʼ mbi sêfu-tiefɛ̀ʼndɛŋkwɛʼtəŋNyii. Vaabəkebɛʼ ndə kə bɛ vaafɔ̀ʼ tiefɛ̀ʼndɛŋkwɛʼtəŋNyii gwè tʉ ɔŋ ghɔ̀ŋ mbɔ, "Mbəŋ-aŋ ghɔ nɔ nə bɛ bii Jiso ndə ɔ lɔ̀ hə Galili."

70 Ɔ bɔŋ tɛ́ŋ bəshʉ bɔŋ bənchəŋ, ghɔ̀ŋ mbɔ, "Mɔ kínə nukə ndə a tʉʼ gìe fɛ."

71 Ɔ kʉ̂ʉ lɔ̀ fyú mbi dàa chulɔŋ, ibɛʼ-yə vaafɔ̀ʼ ndə bɛ vaabəke nyíɛ ɔŋ, ghɔ̀ŋ tʉ bʉə ndə bɔ̂ŋ kə tə́ŋtə chɔ mbɔ, "Wo-ɔ̄ nɔ nə bɛ ghɔŋ Jiso ndə ɔ lɔ̀ hə Nasalɛ."

72 Ɔ bìʼ tɛ́ŋ tə kàa nukə, ghɔ̀ŋ mbɔ, "Mɔ kínə mbʉ wo-ghɔ̄ fɛ."

73 Kʉʉkə məniʼ, mbʉ bʉə ndə bɔ̂ŋ kə tə́ŋtə chɔ gwè ghɔ̀ŋ tʉ Bita mbɔ, "A nɔ bɛ mbyu wo yʉə ghɔ leʼ shʉəŋ, bʉʼka ntɛ kwəʼ-a nɔʼ fɛ̀ŋ aŋ."

74 Ndʉʉmɛ, ɔ chʉ́ʉhə ndə mətíi ndɔŋ kɔ́ kətʉ-ɔ bɔŋleʼ kàa nukə, ghɔ̀ŋ mbɔ, "Mɔ buŋ kínə mbʉ wo-ghɔ̄ fɛ." Haʼ ndʉʉmɛ, ŋkʉəʼə tʉʉ. 75 Ndʉʉmɛ, Bita kwɛ́nə nubə ndə Jiso kə ghɔ̀ŋ mbɔ, "Ŋkʉəʼə bu yi kə tʉ́ʉ nɔ tʉ a nɔʼ kɔ́tuu a vɛʼ tia mbɔ a la kínə mɔ fɛ." Bita fyú gɛ̀ mbi kɛŋ gɛ̀ gwía nə shʉəŋ-ɛŋ.