Nu-kɛ̀ʼ-bə 7

Mbʉ bʉə-Isilɛ 144,000 ndə bə nɔʼ chèʼ bɔŋ

1 Yɔ̄ŋ-yə kʉ̂ʉ tíŋ, mɔ nyíɛ bʉəntəŋNyii kwi, bɔ̂ŋ kə́ tə́nə ndəŋ byûu-mbi-tə kwi, kə́ kyʉ̀hə fʉʉkə kwi bʉʼka i məfʉ̀ʉ ndəŋ ŋkʉə-sê-kə byuunɔ muukwɛʼtəŋmə byuunɔ mətʉ́ʉhə tyʉkə təmiyɔŋ. 2 Mɔ nyíɛ ibɛʼ-yə wontəŋNyii ndə ɔ kə́ kóʼ gwè hə kwii ndə chichi sɔ́ʼ chɔ nə cheʼ-Nyii-kə ndə ɔ bɛ ŋɛnə kəghɔ-ɔ, tíi mbʉ bʉəntəŋNyii kwi ndə bə nɔʼ kə kɔ́ ghʉəʼkə tʉ bɔŋ ndə məmɔ̀ʼ ləŋkə ndəŋ ŋkʉə-sê-bə ghɔŋbə muu nə gyʉʉ dədə, 3 mbɔ, "Kə bii mə mɔ̀ʼ ləŋkə ndəŋ ŋkʉə-sê-kə byuunɔ ndəŋ muu byuunɔ ndəŋ tyʉbə fɛ, tʉ baʼa chèʼ vâafɔʼɔ Nyii-yaʼ ndəŋ chutəyitə-ʉə lìʼ."

4 Mɔ yʉ́ ntyʉʉ-bʉə ndə bə kə chèʼ bɔŋ, ndə lɔŋbə nchəŋnchəŋ-ɛŋ ndə i bɛ mu Isilɛ kə́ bɛ bʉə 144,000,

5 bʉə 12,000 nɔ kə lɔ̀ hə mu kəlɔŋ Juda ndə bə chèʼ bɔŋ,

bʉə 12,000 lɔ̀ hə mu kəlɔŋ Lɔbiŋ,

bʉə 12,000 lɔ̀ hə mu kəlɔŋ Ga,

6 bʉə 12,000 lɔ̀ hə mu kəlɔŋ-Asha,

bʉə 12,000 lɔ̀ hə mu kəlɔŋ Natali,

bʉə 12,000 lɔ̀ hə mu kəlɔŋ Manasi,

7 bʉə 12,000 lɔ̀ hə mu kəlɔŋ Simiɔŋ,

bʉə 12,000 lɔ̀ hə mu kəlɔŋ Lɛvi,

bʉə 12,000 lɔ̀ hə mu kəlɔŋ Isaka,

8 bʉə 12,000 lɔ̀ hə mu kəlɔŋ Sɛbulɔŋ,

bʉə 12,000 lɔ̀ hə mu kəlɔŋ Jɔsɛ,

bʉə 12,000 lɔ̀ hə mu kəlɔŋ-Bɛŋnjamɛ bə nɔʼ chèʼ bɔŋ.

Nuɔ-bʉə-buŋmbi lə̀ʼtə Nyii

9 Yɔ̄ŋ-yə kʉ̂ʉ tíŋ, mɔ lɛ́nə, nyíɛ nuɔ-bʉə-tə buŋmbi ndə wo mə nə súu fɛ. Bɔ̂ŋ lɔ̀ hə mu lɔʼ-bətə̂ŋ-tə inchəŋ, lɔ̀ hə mu lɔŋbə inchəŋ, mu bie-bʉə-hə leʼnə ŋgie-bətə̂ŋ-bə kə́ tə́nə bəshʉ mbʉ kəyetə leʼnə shʉ-mbʉ-Vaabinjyʉʉ-bə, tʉ bə nɔʼ mɔ̀ʼ ndyi-kəfyuʼ-hə mbʉə-bɔŋ. Bɔ̂ŋ yátə yuu-tɛ́ŋ-bə kəghɔ-bɔŋ, 10 kə́ tíitə nə gyʉʉ dədə kə́ ghɔ̀ŋ mbɔ,

"Ŋkwaa nɔ bɛ yi-Nyii-yʉʼʉ-yə ndə ɔ yétə kəyetə, leʼ kə́ bɛ yi-mbʉ-Vaabinjyʉʉ-yə!"

11 BʉəntəŋNyii bənchəŋ tə́ŋtə yə̀ŋ mbʉ kəyetə, yə̀ŋ mbʉ bəntəŋbəshʉ ghəŋ ndə bɔ̂ŋ kie kuŋhə bɔŋleʼ yə̀ŋ fɔ-ŋɛnə-bə-īŋ kwi fúu. Ndʉʉmɛ, bɔ̂ŋ bʉ́ʉnə sê bəshʉ mbʉ kəyetə, lə̀ʼtə Nyii, 12 kə́ ghɔ̀ŋ mbɔ, "Ï bɛ haʼ nɔ, m̈əchʉ̀ʉ, məgʉ́ə, mukətʉ-súunə, ndɔ, kuŋhə, ghʉəʼkə ndə məsɔ́ʼ bʉə leʼnə ghʉəʼkə bɛ tʉ Nyii-yʉʼʉ təmə liʼ-i ghɔ fɛ! Ï bɛ haʼ nɔ."

13 Ndʉʉmɛ, ibɛʼ-yə mbyu ntəŋbəshʉ ghəŋ ndə ɔ kie kuŋhə bíʼtə tʉ mɔ mbɔ, "Bɛ bənda nɔ ndə bɔ̂ŋ mɔ̀ʼ ndyi-kəfyuʼ-hə nɔ? Bɔ̂ŋ lɔ̀ hə fa?"

14 Mɔ ghɔ̀ŋ tʉ ɔŋ mbɔ, "Tie-ɔ, nɔ kínə aŋ." Ɔ ghɔ̀ŋ tʉ mɔ mbɔ, "Nɔ bʉə nɔ ndə bɔ̂ŋ nɔʼ tíŋ hə mu ndʉʉ ŋgʉəʼ shʉ́əshʉ́ə. Bɔ̂ŋ nɔʼ sʉ̀ ndyihə-ʉə nə fɔbʉə-Vaabinjyʉʉ-kə, chìi i bɛ kəfyuʼ.

15 Nɔ chìi yɔŋ bɔ̂ŋ tə́nə bəshʉ mbʉ kəyetə Nyii,

kə́ fɔ̀ʼ tʉ ɔŋ ndʉʉnəchî ghɔŋbə ndʉʉbətyuʼ mu njaafɛ̀ʼndɛŋNyii-ɔŋ.

Mbəŋ-ɛŋ ndə ɔ yétə ndəŋ yetəkə-i

bu kwóhə bɔŋ tɔʼɔ ɔ.

16 Jyʉʉ bieleʼ nə yɔ́ʼ bɔŋ fɛ, təmə tʉʉ-yʉə bieleʼ nə yə́ŋ fɛ,

təmə chichi bieleʼ nə tɔ̀ŋ bɔŋ fɛ, təmə mbi núunə bieleʼ nə núʼhə bɔŋ fɛ.

17 Bʉʼka mbʉ Vaabinjyʉʉ ndə ɔ bɛ mbʉə mbʉ kəyetə

bu bɛ nchyii-yʉə.

Ɔ chìhə bɔŋ gɛ̀ nə bɔŋ chu lʉ̂ʉ muu ndə ĩ kɔ́ məchímbi.

Nyii bu yʉ̀əʼ ŋwia-məshʉ-kə təmiyɔŋ shʉ-bɔŋ."