1 B̈ii kə́ kʉ̀ʉ ŋwɔŋtə-ii ndə bəliŋ. 2 Kə bii mə mɛ̀ʼtə ndə məyɔ́ʼ ghɔkə-ii tʉ bəntoʼŋgwe fɛ, bʉʼka bəbɛʼbʉə nɔʼ nə chìi nɔ, kɔ́ ŋkwaa tʉ bʉəntəŋNyii təmə kínə fɛ. 3 B̈ii kə́ kwɛ́nə bʉə ndə bɔ̂ŋ bɛ mu njaa-chaŋ fi nə bii bɔŋ bɛ chɔ mɔʼɔ bɔŋleʼ kwɛ́nə bʉə ndə bə tʉʼ chɔ́ŋhə bɔŋ fi nə bii bɔŋ tʉʼ nyíɛ ŋgʉəʼ mɔʼɔ. 4 B̈ʉə bənchəŋ kɔ́ kuŋhə ndə lɔŋ, woke ghɔŋ woləŋ nɔ kie ndə mə-kə́-gìe shʉəŋ tʉ ŋwɔŋtə-ʉə bʉʼka Nyii bu chʉ̀ə ŋkwɛ bʉə ndə bɔ̂ŋ tʉʼ gháa bəsəŋ ghɔŋbə bʉə ndə bɔ̂ŋ bɛ njaa lɔŋ kə́ gháa bəsəŋ. 5 B̈ii fyúhə ŋwɔŋ-yii ndə ntɔ-kyʉə-mə, ẗʉʉ-yii kə́ bʉ̀ʉ ndə fɔkə ndə bii kie bʉʼka mbəŋ-ɛŋ Nyii nɔʼ ghɔ̀ŋ mbɔ,

"Mɔ kʉʉnə mɛ̀ʼtə bii fɛ,

təmə kʉʉnə lèʼnə bii fɛ."*

6 Nɔ chìi yɔŋ ndə bəkɔ bʉʼʉ gìe nə fyii shʉ́əshʉ́ə mbɔ,

"Tiekətʉ nɔ bɛ ŋkwaa-ɔ,

mɔ kʉʉ leʼ fàa fɛ,

bəkɔ wo chìi ka nə mɔ?"*

7 B̈ii kə́ kwɛ́nə bəntəŋbəshʉ-bii ndə bɔ̂ŋ kə fəŋ kwə́ʼ ŋgieNyiikə tʉ bii. B̈ii kwɔ̀ʼtə ntɛ ndə bɔ̂ŋ kə chí kəwʉʉnəmbi-fɛ̄ŋ tə nə kwútə, lʉ̀ hə kəwu-bɔŋ ndə məmɔʼfyiihə-ii ndəŋ Nyii.

8 Jiso Klai nɔ káa haʼ wo ndə ɔ kə bɛ yɔ̄ŋ-yə, yɔ̂ŋ, bu bɛ haʼ yɔ̄ŋ-yə laa kə́ bɛ haʼ nɔ təmə liʼ-i ghɔ fɛ. 9 Kə bii mə mɛ̀ʼtə ntɛntɛ-ŋkwɔnəntɔ-bənu-hə ndə bə tʉʼ dàhə byùutə ndaahə-ii ndəŋ fia-Nyii fɛ. I nɔ bʉ̀ʉ ndə məkie ghʉəʼkə mu fyii-bii ndə i gwè hə ndəŋ buuŋjyu-Nyii təmə bɛ yi-yə ndə i gwè hə ndəŋ mətʉ́ʼ nuʼ bəfɔyu fɛ. Bʉə ndə bɔ̂ŋ kə tʉ́ʼ ntɛ nuʼ-ɔ̄, i nə kwáa bɔŋ fɛ.

10 Bʉʼʉ nɔ kie yəŋ-fɛ̀ʼndɛŋNyii-kə ndə bʉə ndə bɔ̂ŋ tʉʼ fɔ̀ʼ mu lɛʼ-Nyii-kə kie ghʉəʼkə ndə məyú fɔbə fɛ. 11 Bʉʼka mbɔʼ nyaahə ndə tiefɛ̀ʼndɛŋkwɛʼtəŋNyii tʉʼ gwè nə fɔbʉəkə-ʉə mu kəyəŋ kəchɔŋkwɛʼtəŋ ndə məfɛ̀ʼndɛŋ nə yɔŋ te bʉ̂ʼtə, bə nɔ tʉʼ mɛ̀ʼtə yəŋkə ndə bɔ̂ŋ tʉʼ chí chɔ, gɛ̀ tɔ̀ŋtə mbi. 12 Nɔ bʉʼka yɔ̄ŋ-yə, Jiso nɔ kə fyú hə mu lɔ̂ŋ-lɔʼɔ buŋ nyíɛ ŋgʉəʼ kwú, mbɔ fɔbʉəkə-i chʉʼ sʉ̀ bʉʼʉ bʉə-Nyii, bʉʼʉ bɛ tʉ́ʉnə. 13 Nɔ, bʉʼʉ nɔ kie ndə məfyú hə mu kəyəŋ ndə bʉə tʉʼ chí ndə i bɛ məfyúhə ŋwɔŋ-yʉʼʉ hə ndəŋ nuʼ məfɛ̀ʼndɛŋ ghɔŋbə məbúu ŋwɔŋ ndə bʉə tʉʼ fɔ̀ʼ, gɛ̀ tʉ ɔŋ, bʉʼʉ bɔŋ-chʉʼ-leʼ kie yʉʼʉ-yə yʉʉ ndə tʉvyiikə ndə ɔ kə kie. 14 Bʉʼka bʉʼʉ kie yəŋkwɛʼtəŋkə kəchisê-fɛ̄ŋ ndə i bu bɛ gɛ̀gɛ̀ təmə liʼ-i yi bɛ ghɔ fɛ, bʉʼʉ bɔŋ kə́ tʉ́ʼ shʉtə-ʉʼʉ bə ndəŋ yəŋkwɛʼtəŋkə ndə i bíe bəshʉ gwè.

15 Nɔ, tíŋ hə bɔ̌ŋ Jiso, b̈ʉʼʉ kə́ gɛ̀ nə shʉbə ndə məfɛ̀ʼndɛŋ tʉ Nyii ndə mələ̀ʼtə ɔŋ bɔŋleʼ kə́ bɛ ntɔŋmə ndə c̃hu wo kʉ́ʉnə, ndə məghɔ̀ŋ ntaa mbɔ ɔ nɔ bɛ Tiekətʉ. 16 Kə bii mə lèʼnə ndə mə-kə́-fɔ̀ʼ bʉʉ fɛ, leʼnə mə kə́ gyʉ̀ə fɔbə ndə bii kie fɛ, bʉʼka ñtɛ-məfɛ̀ʼndɛŋ-maa-hə-ɔ̄ŋ nɔ kɔ́ tʉʉjyu tʉ Nyii.

17 B̈ii yʉ́ chu bəntəŋbəshʉ-bii, ké ŋwɔŋtə-ii tʉ bɔŋ, bʉʼka bɔ̂ŋ nɔ tʉʼ chyìi məchimbi-yii, haʼ ndə bɔ̂ŋ bu túu chu-yʉə tʉ Nyii bʉʼka bii. B̈ii mɛ̀ʼtə bɔŋ kə́ fɔ̀ʼ yɔ̄ŋ-yə nə tʉʉjyu təmə bɛ nə tʉʉbʉə fɛ, bʉʼka maa-yɔ̄ŋ mə kwáa bii fɛ.

18 B̈ii kə́ gháaNyii tʉ baʼa, bʉʼka baʼa nɔ kínə mbɔ ŋkwɔʼtə-yaʼ nɔ bɛ itʉ́ʉnə, baʼa bɔŋleʼ kʉ̀ʉ ndə məfɔ̀ʼ nubə ndə i bɛ kʉ̀ʼnə ndə vɛʼ inchəŋ. 19 Mɔ nɔ tʉʼ kwèʼhə bii shʉ́əshʉ́ə mbɔ b̈ii bìʼ fɔ̀ʼ yɔ̄ŋ-yə mbɔ ndʉʉbɛʼ b̈ə yi chʉʼ byʉ̀hə mɔ kɔ́ tʉ bii.

20 Nduɔ, tə Nyii ndə ɔ kɔ́ fyiighʉ́ənə, ndə ɔ kə bʉ̀nə kóʼhə Tiekətʉ-yʉʼʉ Jiso ndəŋ kwú ndə ɔ bɛ nchyiikwɛʼtəŋ binjyʉʉhə, tíŋ hə bɔ̌ŋ fɔbʉə-məŋkaa-kə ndə liʼ-i bɛ ghɔ fɛ, 21 shʉ̀tə bii nə fɔ-jyujyu-bə inchəŋ mbɔ bii chʉʼ kə́ fɔ̀ʼ nubə mu məchimbi-yii ndə tʉʉ-i kʉ̀ʉ, ɔ̈ bɔŋleʼ kə́ fɔ̀ʼ nubə ndə i kʉ̀ʼnə tʉ ɔŋ mu məchimbi-baʼa, tíŋ hə bɔ̌ŋ Jiso Klai ndə bɛ yi-yə təmə liʼ-i bɛ ghɔ fɛ. Ï bɛ haʼ nɔ.

22 Mɔ nɔ tʉʼ fʉ̀ʉtə bii bəliŋ-bɔŋ, b̈ii ghʉ́əhə fyiihə-ii yʉ́ ntəŋ-ɔ̄ŋ ndə mɔ téʼ tʉ bii ndə məkwèʼhə bii nɔ, bʉʼka mɔ nyɔ̀ʼ i də̀ʼ fɛ.

23 Mɔ nɔ tʉʼ kʉ́ʉ chìi bii kínə mbɔ bə nɔʼ fyúhə liŋ-yʉʼʉ Timɔti mu njaa-chaŋ. Kaʼ ɔ chʉʼ gwè, baʼa ɔ gwè nyíɛ bii.

24 B̈ii gìe tʉ bəntəŋbəshʉ-bii bənchəŋ ghɔŋbə bʉə-Nyii bənchəŋ. Bʉə-Nyii ndə bɔ̂ŋ gwè hə lɔʼɔ Itali nɔ tə́ŋ nchaʼtə-yʉə tʉ bii.

25 Tə Nyii dʉ̀ʼ buuŋjyu-i tʉ bii bənchəŋ.