Mateus 3

Jɔŋ ndə ɔ̃ kɔ́ muu shʉ̀tə fia tʉ Tiekətʉ

1 Nɔ nə bɛ ndʉʉ-ghɔ̄, Jɔŋ ndə ɔ̃ kɔ́ muu gwè kə́ lɔ̀ʼ ŋgieNyiikə mu kwɔŋkəyəŋnə*3:1 Kwɔŋkəyəŋnə fɛ̄ŋ nɔ tʉʼ dʉ̀ʼ yəŋkə ndə i yə́ŋhə daa təmə muu kə́ bɛ chɔ fɛ, təmə fɔyubə kə́ bʉ̀ʉ chɔ fɛ. ndə i bɛ Judia, 2 kə́ ghɔ̀ŋ mbɔ, "B̈ii shìe liɛŋtə-ii hə ndəŋ bʉ̂ʼtə-ii bʉʼka ndʉʉ nɔʼ kʉ̀ʼnə tʉ Fɔŋ Yuo ndə məsɔ́ʼ."*3:2 Fɔŋ Yuo ndə məsɔ́ʼ, i nɔ bɛ haʼ ndə məghɔ̀ŋ mbɔ "Nyii nɔ tʉʼ sɔ́ʼ bʉəməsʉʉ." 3 Bʉʼka nɔ bɛ mbəŋ-ɛŋ nɔ ndə Adaya yʉkəŋgieNyii kə kwə́ʼ te ɔ ndʉʉ ndə ɔ kə ghɔ̀ŋ mbɔ,

"Gyʉʉ-wobɛʼ nɔ tʉʼ tíi mu kwɔŋkəyəŋnə kə́ ghɔ̀ŋ mbɔ,

‘B̈ii shʉ̀tə fia Tiekətʉ,

b̈ii shʉ̀tə fiatə-i, ï tə́nə ndyʉndyʉ.’ "*3:3 Adaya 40:3.

4 J̃ɔŋ nɔ kə́ mɔ̀ʼ ndyi mbʉə-ɔ ndə bə túŋ nə nyu-nyaabɛʼ-hə ndə bə kə́ tíi ɔ nə kamɛ bɔŋleʼ kə́ kɔ́ʼ kwɔkə tʉʉ-ɔ ndə bə chìi nə gwo-nyaa, fɔyubə-i kə́ bɛ ŋgwehə leʼnə yʉʉ-mu-ŋkɔ-hə. 5 Ndʉʉmɛ, bʉə-Jɛlosalɛŋ ghɔŋbə bʉə bənchəŋ mu Judia leʼnə bʉə bənchəŋ ndə bɔ̂ŋ bɛ mbʉə ŋgwɛŋ Jodaŋ kə́ fyútə gwè tʉ Jɔŋ. 6 Bɔ̂ŋ kə́ fí muu kəghɔ-ɔ mu ŋgwɛŋ Jodaŋ, gwía fyùufyùu ndəŋ bʉ̂ʼtə-ʉə.