Marcos 5

Yesu kangumlohola yawele na chijeni

1 Yesu na walanguswa wa heye nawafika kuli isi ya Wagelasi, kumwambu mwa ilamba lya Galilaya. 2 Baho du Yesu vyoyalawile kuli itumbwi nakating’hana na munhu yawele yochikala kuwele na vilaga. Ayo munhu nayali na chijeni chihile. 3 Nayali yochikala kuli vilaga, nakwali kuduhu munhu yajezile kumhejelela yamibate yojeza kumkoweleza na minyololo. 4 Chila mhela nawali womuwopa pingu na minyololo ila nakaweza kujidumula ajo minyololo na kuzibena azo pingu na hakuwele ne munhu wa kumlemeza. 5 Nemisi na nechilo nayali yochikala kuli vilaga mchidunda yotowa iyowe na kitemangatemanga kwa maganga.

6 Loyamuwene Yesu kwa kutali, nakambilimila, kenamiza. 7 Nakalonga kwa lizi ng’hulu, "Kuna choni na heni, hegwe Yesu Mwana wa Nguluwi yawele kuchanya? Kwa itagwa lya Nguluwi ndangukulanda uleche kungaza!" 8 Nakalonga ahyo kwa vila Yesu nayali yamlonjele, "Chijeni chihile chimlawe munhu ayo."

9 Yesu nakamuuza, "Itagwa lyako whaani?" Na heye nakedichila, "Itagwa lyangu chilundo cha wamizi, mina hetwe twa wenji." 10 Vijeni navimdedeza Yesu yaleche kuviwinga avyo vijeni mli isi yila.

11 Nakwali na lung’hongola lukulu lwa migubi jidimigwa kuli chidunda. 12 Ahyo, vila vijeni navimlanda, "Utugale kuli ajo migubi, tujinjile." 13 Yesu nakavikundiza, avyo vijeni vihile navilawa, navinjila kuli jila migubi. Lula lung’hongola nalwali na migubi jifichile elufu mbili, najo jeng’ha najifiduka mnyenje mwa chidunda na kwinjila milamba, najibagama.

14 Wadimi wa ajo migubi nawabilima, nawadamla mbuli azo kuli miji na kumigunda. Wanhu nawoya kulola galawile.