1 Fɩɛsɛ wɩɩ garɛ Yesu na wʋ kpalɛnara baa dɔŋ kiliŋgbe fʋɔ garɛ naŋ. Sɛ wʋ kpalɛnara baa fara baa jaɩ kiliŋgbe ŋii ŋarɛ baa tawʋ. 2 Sɛ Farasitina baa barɛ tasɛ Yesu sɛ, <<Be dʋɔ sɛ ɩ yɩɛ ŋii daa mbara n fa gbɩɛ sɛ dɩ n yɩɛ Fɩɛsɛ wɩɩ?>>

3 Sɛ Yesu tasɛ ba sɛ, <<Ɩŋ karaŋ Ɩsʋɔ wɩɛ ŋii naŋ ŋii Dawidi yɩɛ saŋa gaa dusoŋ a kʋ wʋ na dɔŋa naa? 4 Dawidi ju Ɩsʋɔ tʋm danɛ naŋ ga tawʋ bodobodo gaa ba yɩɛ ga chɩrɩchɩrɩ fa Ɩsʋɔ yela Mosesi mbara n fa gbɩɛ sɛ ba n tawʋ ʋ, amʋɔ Ɩsʋɔ seina nyiŋeŋ. Sɛ wʋ mʋ ŋarɛ fa wʋ dɔŋa na.>> 5 Sɛ Yesu ti bɔrɛ tawɩ ba sɛ, <<Dɩmʋŋ dʋɔ, Wʋkpa Bu wʋŋ yɩɛ Kpaŋjuo Fɩɛsɛ wɩɩ dʋɔ bɛ.>>

6 Fɩɛsɛ wɩɩ ga baŋbaŋ na, Yesu ti bɔrɛ ju Yudatina tʋm danɛ naŋ ga kalaa. Na Baalɛ wʋrʋ wɩɛ dɩmaŋ wʋ pam jɩsaŋ sɩŋ. 7 Farasitina na mbara bakalaasa baa barɛ aja sɛ baa pʋɩ ɩ. Dɩmʋŋ dʋɔ baa pɩɛtɩ ɩ na baa kɩɛ sɛ wʋ a chɔ baalɛ wʋŋ fɩɛsɛ wɩɩ gaa yaa. 8 Ama Yesu jiŋ ba n fɩɛrɛ sɛ wʋ tawɩ pam ga sɩŋsatɛ wʋŋ sɛ, <<Kʋlʋ sɩŋ bakpa baa asanaŋ jɩna.>> Sɛ wʋ kʋlʋ sɩŋ.

9 Sɛ Yesu tasɛ ba sɛ, <<Maa tasɛ amɩɛ sɛ be sɛ daa mbara fa gbɩɛ sɛ dɩ n yɩɛ fɩɛsɛ wɩɩ? Dɩ n yɩɛ dɩbam yaa dɩsʋbʋ? Dɩ n lɩɛ nkpa yaa dɩ n kʋ?>>

10 Sɛ Yesu kɩɛ ba kpiniŋ logo sɛ wʋ tawɩ baalɛ wʋŋ sɛ, <<Tɩɛŋɩ n pam.>> Sɛ wʋ tɩɛŋɩ sɛ gaa yɩɛ doŋ. 11 Ama biŋbira chaŋ ba sɛ ba fara baa ja ganaŋkʋ baa yɩɛ Yesu na.

12 Gɩyɩɛnɩŋ ŋii naŋ na. Yesu ju bʋrɔŋ garɛ dʋɔ na wʋ a ga jɔ dɩga yuluma gana kpiniŋ. 13 Gʋ tɩɛna na, wʋ yagɛ wʋ kpalɛnara baa kɔŋ wʋ jaŋ sɛ wʋ lɩsɛ ba tɩba gifi bala sɛ wʋ yagɛ ba sɛ kpirida. 14 Gifi bala baa wʋ yagɛ na ba yɩrɩɛ mɩnaŋ: Simoŋ [wʋŋ Yesu si ɩ yɩrɛ sɛ Petero] na wʋ nabu Andurusi, Jamesi, Yohane, Filipo, Batolomiyo, 15 Matiyo, Tomasi, Yakubu Alifiyosi bu, Simoŋ wʋŋ baa yagɛ ɩ sɛ Sɩlɔtɩ,* 16 Yudasi Yakubu bu, na Yudasi Isikariyoti wʋŋ wʋ lɩsɛ Yesu fa na.

17 Yesu na wʋ kpalɛnara baa tibi bʋrɔŋ kɔŋ gateŋpireŋ dʋɔ. Na wʋ kpalɛnara fɔɩ baa wɩɛ dɩmaŋ, sɛ bakpa fɔɩ lɩɩ Yudiya tibi dʋɔ gapɩlɛkʋma, Yerusalem dɩɛ naŋ na Tirosi na Sidoŋ ɔpʋ buo nʋɔ, 18 kɔŋ na baa gaa nyii wʋ wɩɛ na wʋ a chɔ ba lʋmɩɛ. Sɛ wʋ gɩŋ feliŋ sʋbʋ lɩɩ baa a nyala ba na tɩba. 19 Sɛ bakpa baa kpiniŋ aja sɛ baa mʋ ba pamɩɛ tapʋ ɩ, akala takɩɛ ba na gʋ yikuo a lɩɩ wʋ tɩba gaa chɔ ba kpiniŋ.

20 Sɛ Yesu kɩɛ wʋ kpalɛnara baa sɛ wʋ tawɩ ba sɛ,

<<Kusee n nyina amɩɛ baa ɩ yɩɛ ayɔŋtina,

akala takɩɛ Ɩsʋɔ Juori gaa yɩɛ amɩɛ teri.

21 Kusee n nyina amɩɛ baa dusoŋ akʋ amɩɛ dɩtɩɛna gana,

akala takɩɛ amɩɛ aaŋ ja ɩ paa.

Kusee n nyina amɩɛ baa ɩ wii dɩtɩɛna gana. Akala takɩɛ amɩɛ aaŋ ja ɩ mʋɩ.

22 Kusee n nyina amɩɛ baa bakpa akɔla amɩɛ,

baa lɩsɛ amɩɛ baa lɩɩ ba tɩba, yela baa ti amɩɛ,

baa yagɛ amɩɛ bakpa sʋbʋɛ,

Wʋkpa Bu wʋŋ dʋɔ.>>

23 Saŋa gana naŋ na, n yela na amɩɛ asa a lɩɛ na ɩ sʋyɛ asadi naŋ. Akala takɩɛ Ɩsʋɔ aja tɔ amɩɛ kɩm gajanɛ Ɩsʋɔ adugbe. Dɩmʋŋ sɛ ba kɔla Ɩsʋɔ bajana.

24 <<Ama amɩɛ akpaŋtatina, amɩɛ lakʋ,

akala takɩɛ amɩɛ wʋsɛ fɩɛ amɩɛ chawʋ naŋ.

25 Amɩɛ baa ɩ di paa dɩtɩɛna gana, amɩɛ lakʋ,

akala takɩɛ amɩɛ sɛ dusoŋ aja chaŋ.

Amɩɛ baa ɩ mʋɩwʋ dɩtɩɛna gana, amɩɛ lakʋ,

akala takɩɛ ɩ bɔtaa na ɩ wii.

26 Amɩɛ baa bakpa kpiniŋ a tawɩ wɩɛ abama lɩɩ amɩɛ dʋɔ na, amɩɛ lakʋ,

akala takɩɛ dɩmʋŋ sɛ ba duluŋ mʋ yɩɛ akarɩɛ bajana baa.>>

27 Sɛ Yesu ju dʋɔ tawɩ sɛ, <<Ama maa tawɩ amɩɛ baa ɩ nyii ma jaŋ na sɛ, n ja amɩɛ badʋŋna na ɩ yɩɛ dɩbam fa baa baa kɔla amɩɛ. 28 N yɩɛ kusee fa baa baa tawɩ amɩɛ nʋɔsɛ, na ɩ jɔ dɩga fa baa baa nyala amɩɛ na. 29 Sɛ wʋrʋ kpa nyaŋ gabaa na, biliŋi alatɛ fa ɩ. Sɛ wʋrʋ mʋ nya adugbe gagba na, mʋ tie gagba kpi ɩ. 30 Sɛ wʋrʋ sʋlʋ nyaŋ bʋrʋ darɛ na fa ɩ, sɛ wʋrʋ mʋ n bʋrʋ na, n baa lɩɛ lɩɩ wʋ jaŋ. 31 N yɩɛ fa amɩɛ dɔŋa ganaŋkʋ ɩ ja sɛ ba n yɩɛ fa amɩɛ na.>>

32 Sɛ wʋ ju dʋɔ tawɩ sɛ, <<Sɛ ɩ ja baa baa ja amɩɛ nyiŋeŋ na, yɩrɛ bam gamʋɔ sɛ ɩ yu? Dɩsʋbʋ yɩɛra gba a yɩɛ dɩmʋŋ. 33 Sɛ ɩ yɩɛ dɩbam fa baa baa yɩɛ amɩɛ dɩbam nyiŋeŋ na, yɩrɛ bam gamʋɔ sɛ ɩ yu? Dɩsʋbʋ yɩɛra gba a yɩɛ dɩmʋŋ. 34 Sɛ ɩ mʋ kɩŋ baa ɩ wɩɛna tamaa sɛ baa gaa tɔ amɩɛ na, yɩrɛ bam gamʋɔ sɛ ɩ yu, dɩsʋbʋ yɩɛra gba a yɩɛ dɩmʋŋ. 35 Ama amɩɛ bɩrɛ n ja amɩɛ badʋŋna na ɩ yɩɛ dɩbam yɩɛ fa ba. Ɩ mʋ kɩŋ ba na, n baa kɩɛ gbɩɛ sɛ baa gaa tɔ amɩɛ. Ŋii sɛ Ɩsʋɔ aja tɔ amɩɛ kɩmtʋɔ gajanɛ, na ɩ yɩɛ Wʋjanɛ wʋŋ bie. Akala takɩɛ wʋ a yɩɛ dɩbam wʋ a fa baa ba asa baa su abʋrɩ na nyinaŋ doŋtina. 36 N wɩɩ bakpa gɩyɔŋ takɩɛ ganaŋkʋ amɩɛ Juo gba a wɩɩ bakpa gɩyɔŋ na.>>

37 Sɛ Yesu ju dʋɔ tawɩ sɛ, <<N baa kpaala di wɩɛ na ɩ tawɩ sɛ wʋrʋ yɩɛ dɩsʋbʋ yɩɛrɛ, na Ɩsʋɔ gba a tawɩ amɩɛ dɩmʋŋ. N baa fu dɩpʋɛ na Ɩsʋɔ gba n baa fu amɩɛ dɩpʋɛ. N mʋ dɩsʋbʋ chɩɛ na wʋ a mʋ amɩɛ dɩsʋbʋ chɩɛ amɩɛ. 38 N fa na Ɩsʋɔ a fa amɩɛ. Ɩsʋɔ aja wʋ a mʋ mudu kalaa na ŋii su, na wʋ a jigisi na ŋii tʋsʋ, na wʋ a mʋ dʋ amɩɛ chamaŋsɛ naŋ. Akala takɩɛ mudu gaa ɩ mʋ kalaa bʋrʋ darɛ fa wʋrʋ na, gaa sɛ Ɩsʋɔ gba aja wʋ a mʋ kalaa fa amɩɛ.>>

39 Sɛ Yesu jɔ ba diduu sɛ, <<Ɔtaŋpʋ a dɩlɛ pala ɔtaŋpʋ asanaŋ? Baa bala baa sala dɩchabʋɔ naŋ? 40 Kpalɛnarɛ baa kii wʋkalaasa a, ama wʋkʋma wʋŋ wʋ kpalɩɛna sɛ wʋ jiŋ na dieli na, a dɩlɛ yɩɛ takɩɛ wʋkalaasa.>>

41 Sɛ Yesu ju dʋɔ tawɩ sɛ, <<Be n yɩɛ sɛ nyaa kɩɛ kabie gaa ga jagaɩ n dʋɔ dɩsɛ dʋɔ, ama dakpie gaa ga jagaɩ n tɩŋtɩŋ nya dɩsɛ dʋɔ na bɩrɛ, nyaa na a? 42 Sɩnɛ sɛ nyaa dɩlɛ tawɩ n dʋɔ sɛ, <Ma dɩɛtɛ, yela maa lɩsɛ kabie gaa ga jagaɩ n dɩsɛ dʋɔ.> Yela dakpie gaa ga jagaɩ n tɩŋtɩŋ n dɩsɛ dʋɔ na bɩrɛ nyaa na a. Nyaŋ aluguusitɛ, chɩŋkpɩɛ lɩsɛ dakpie gaa ga jagaɩ n tɩŋtɩŋ n dɩsɛ dʋɔ na pɔɩ na nyaa dɩlɛ na na dieli, na nyaa lɩsɛ kabie gaa ga jagaɩ n dʋɔ dɩsɛ dʋɔ.>>

43 Sɛ Yesu ju dʋɔ tawɩ sɛ, <<Daŋ bam baa si bie sʋbʋ ʋ yaa daŋ sʋbʋ baa si bie abama a. 44 Daŋ kʋma ga bie sɛ ba chamɩna baa jiŋ ga. Bakpa baa kɔ ponponsi bie lɩɩ sɔba daŋ dʋɔ ɔ yaa dikutu lɩɩ didiŋpo daŋ dʋɔ ɔ. 45 Wʋkpa bam a fa nfɩɛrɛ abama sɛ wʋ a yɩɛ bʋrʋ bam. Dɩmʋŋ sɛ wʋkpa sʋbʋ a fa nfɩɛrɛ sʋbʋ sɛ wʋ a yɩɛ bʋrʋ sʋbʋ. Akala takɩɛ wɩɛ ŋii ŋɩ suu wʋkpa digela naŋ na, ŋii aaŋ lɩɩna wʋ nʋɔ.>>

46 Sɛ Yesu tawɩ sɛ, <<Be n yɩɛ sɛ ɩ yagɛ maŋ Kpaŋjuo, Kpaŋjuo, ama ɩɩ di ma wɩɛ dʋɔ? 47 Maa kalaa amɩɛ wʋkʋma wʋŋ wʋ a kɔŋ ma jaŋ, sɛ wʋ a nyii ma wɩɛ sɛ wʋ aa di ma wɩɛ dʋɔ na, ganaŋkʋ wʋ kɩɛna na. 48 Wʋ kɩɛna bɛ takɩɛ wʋkpa wʋŋ wʋ a ma danɛ sɛ wʋ wuru ju tie sɛ wʋ si tie dɩpɔrɛ jaga bʋɛ dʋɔ. Duoni janɛ nɩɛ sɛ buo suu sɛ ɔjalɛ gaa jɔ danɛ gaa, ama ga n dɩlɛ salɩɛ ga a, akala takɩɛ wʋ ma ga na dieli. 49 Ama wʋkʋma wʋŋ wʋ nyii ma wɩɛ sɛ wʋ n di ŋɩ dʋɔ ɔ, kɩɛna bɛ takɩɛ baalɛ wʋrʋ wʋŋ wʋ n si tie dɩpɔrɛ pɔɩ sɛ wʋ ma wʋ danɛ jaga tɩɛra dʋɔ na. Duoni janɛ nɩɛ sɛ buo su sɛ ɔjalɛ gaa jɔ danɛ gaa sɛ ga salɩɛ kpiniŋ-kpiniŋ.>>