12 Ivoelo, msekutogola zambi italamile kaidi mmitufi yenu ikudanganika na muleke kukola mitufi yenu ivo ikulonda. 13 Msekulava hata mp’hingili ya mitufi yenu iwe kinthu cha kutendela. Mbali ilaveni mweye wenyewe kwa Mulungu gesa want’hu mbwelezigwe muugima. Ilaveni mweye wenyewe kwa Mulungu gesa want’hu wabwelezigwe muugima kwa kuzitenda mbuli zidamane. 14 Zambi isekuwatalamila kaidi, kwavila hamkutalamilwa na Malagilizo, mbali mkutalamilwa na ujomwa wa Mulungu.

15 Chilongeki? Vino, chitende zambi, kwavila hachikutalamilwa na malagilizo mbali chikutalamilwa na ujomwa wa Mulungu? Bule! 16 Vino, hamkumanya kuwa mkailava kwa mnt’hu yoyote gesa watwana mweye ni watwana wa mnt’hu iyo? Mkawa watwana wa zambi mbuli ikulonda kulawila ni kudanganika, na mkawa watwana wa kumuhulika Mulungu mbuli ikulonda kulawila ni kutogoligwa halongozi hake. 17 Umwaka mweye mkala watwana wa zambi, mbali aink’higwe hewala Mulungu, kwavila haluse mtogola kwa myoyo yenu yose kukola mafunzo muyahokele. 18 Mkomboligwa kulawa muutwana wa zambi, muwa wasank’hani wa mbuli zidamane.