1 Kamala Yesu akalonga, "Nie ni mzabibu wa kweli, Tata yangu ndo akulima. 2 Kila tambi mgati mmwangu hadikweleka matunda Tati yangu akudikant'ha, na kila tambi dikweleka akudisafisha ili dyeleke nk'hani. 3 Mweye muwa kale mnank'hana mmioyo kwaajili ya ila mbuli niwalongeleni. 4 Kaleni mgati mmwangu, gesa nie ivo hukala mgati mmwenu. Gesa vila tambi hadikudaha kweleka matunda dikawa didumwe, ivo ivo na mweye ikawa hamkukala mgati mmwangu, hamkudaha kweleka matunda." 5 "Nie ndo Mzabibu, na mweye ni matambi. Mnt'hu akukala mgati mmwangu na nie mgati mmwake, iyo akweleka matunda mengi, kwa vila bila ya nie mweye hamkudaha kutenda chochote. 6 Mnt'hu yoyote hakulonda kukala mgati mmwangu, akusumbigwa kunze gesa tambi ivo dikusumbigwa kunze na kunyala, want'hu wakuyaduganya matambi yanyalile na kuyasoma mmoto. 7 Mweye mkakala mgati mmwangu, na mbuli zangu zikakala mgati mmwenu, lombeni dyodyote mkudilonda, na mweye namwink'higwe. 8 Tati yangu akutunywa ikawa mkutenda mbuli nyingi za kumbwedeza Mulungu, namweye namuwe wanahina wangu. 9 Gesa vila Tata ivo anibwedile, na nie ivo ivo niwabweda, kaleni muubwedo wangu. 10 Mkayatoza malagilizo yangu, naamkale muubwedo wangu, gesa nie ivo niyatozile malagilizo ya Tati yangu na kukala muubwedo wake." 11 Niwalongela mbuli zino ili ubwedo wangu ukale mgati mmwenu, na ubwedo wenu uwe utoga. 12 Malagilizo yangu ndo yano, mbwedane gesa nie ivo niwabwedile. 13 Habule ubwedo mkulu kuhuma ubwedo uno wa mnt'hu kuulava ugima wake kwaajila ya mbuya zake. 14 Mweye ni wambuya zangu, mkatenda yala huwalagiliza. 15 Mweye sikuwatanga kaidi wasank'hani, kwa vila msank'hani hakumanya icho akutenda mkulu wake. Mbali nie niwatanga mweye mbuya zangu kwa vila niwalongela mbuli zose zila nizihulikile kwa Tati yangu. 16 Mweye hamnisagulile nie, mbali nie ndo niwasagula mweye na kuwaika mkatende akuyalonda Mulungu, yala yakulonda kukala siku zose, ili Tata awenk'heni dyoydote mkudilomba gesa ivo akulonda awenk'he. 17 Dino ndo lagilizo dyangu huwenk'hani, mbwedane.

18 "Ikawa want'hu wa isi ino wakawehila, mmanye kuwa waniihila nie tangu hawana waihila mweye. 19 Ingi muwile want'hu wa isi ino, want'hu wa isi ingi wawabwedileni mweye gesa want'hu wawe. Mbali mweye sio wa isi ino, mbali nie niwasagula kulawa hagati ha want'hu wa isi ino, kulawana na iyo want'hu wa isi nawawaihile." 20 Msekuzimiza ila mbuli niwalongeleni kuwasank'hani sio mkulu kuhuma mkulu wake. Ikawa wanihenyeza nie, na mweye nawawahenyeze ivo ivo, ikawa wayahokela mafunzo yangu, ivo ivo nawahokele na mafunzo yenu. 21 Nawawatendeleni yano yose kwa vila mweye mkunikola nie, kwa vila hawammanyile ila anitumile. 22 Ingi sizile na kuwalongela mbuli za Mulungu, ingi hawalondile kuwa na zambi, mbali haluse hawakudaha kuiyalala kuwa wabule zambi. 23 Iyo akuniihila nie, akumuihila na Tati yangu. 24 Ingi sitendile kumwao mbuli zila habule mnt'hu imwenga atendile, hawalondile kuwa na ubananzi, mbali haluse waona mbuli nizitendile na wank'hali wakuniihila nie na Tati yangu. 25 Ndo mana yala yandikigwe muna Malagilizo yawe ni kweli, "Waniihila bule." 26 "Mbali akeza iyo Mtazi hulonda kumtuma kumwenu kulawa kwa Tata, uo Muhe wa kweli, ukulawa kwa Tata, yeye naawasimulile mbuli zangu zose. 27 Namweye mkulondigwa mzisimulila mbuli zangu, kwa vila mkala hamwenga na nie tangu haumwanduso."