1 Yesu akawalongela, "Kweli huwalongeleni, mnt'hu yoyote hakwingila mkitole cha ngoto kwa kufosela ha ulwivi, mbali akuibegenyeka na kuingila kwa nzila imwenga iyo ni mbavi na muhoki. 2 Ila akuingilila kwa kufosela ha ulwivi, ndo mdima wa ngoto. 3 Mwamizi akumvugulila iyo mdima na ngoto wakumuhulika naye akuwatanga ngoto wake kwa kila imwe kwa zina dyake, na kuwalava mkitole. 4 Naye akawalava kunze ngoto wake wose, akuwalongolela na wala ngoto wakumkola kunyuma, kwa vila wakuimanya sauti yake. 5 Ngoto ao hawakudaha kumkola mtafi, mbali nawamkimbile kwa vila hawaimanyile sauti ya mtafi." 6 Yesu kawalongela mulinganyo uo, mbali ao hawayakombaganye ayo akalile akuwalongela.

7 Yesu akalonga kaidi, "Kweli huwalongeleni, nie ni lwivi wa ngoto. 8 Wose wanilongolele ni wabavi na wahoki mbali ngoto hawawategeleze. 9 Nie ni lwivi, na mnt'hu yoyote akaingila kufosela kumwangu naahonyeke, naaingile na kulawa kwita hant'hu ha kudya. 10 Mbavi akwiza ili abawe na kukoma na kubananga, nie niza ili wawe na ugima, kamala wawe na ugima ubule nk'homelezo na wawe nao lundo. 11 Nie ni mdima adamane. Mdima adamane akuulava ugima wake kwa ajili ya ngoto. 12 Mdima wa kulihwa iyo ngoto sio wake, akamuona mbwizi akwiza akuwaleka ngoto na kukimbila, kamala mbwizi akuwagwila na kuwatimula. 13 Yeye akukimbila kwa vila ni mdima wa kulihwa, wala mbuli ya ngoto kumwake sio chint'hu. 14 Nie ni mdima nidamane, nie huwamanya ngoto wangu, na ngoto wangu wakunimanya, 15 gesa Tata ivo akunimanya na nie ivo hummanya Tata. Na nie ni tiali kudanganika kwa ajili ya ngoto. 16 Nie ninao ngoto wamwenga sio wa mchitole kino, na ao nao vila vila hulondigwa kuwagala aho nili. Na ao nawaihulike sauti yangu, na nahawe na pelela dimwe na mdima imwe. 17 Icho akunibwedela Tati yangu kwa vila huulava ugima wangu ili niuhokele kaidi. 18 Habule mnt'hu wakunihalavila ugima wangu, mbali nie huuhalava mwenyewe. Na nie ninao udahi wa kuulava ugima wangu na ninao udahi wa kuubweleza kaidi, ndagilizi ino niihokela kulawa kwa Tati yangu." 19 Wayahudi ivo wahulikile mbuli izo za Yesu wakaigawa. 20 Wamwenga wao wakalonga, "Ino anakinyamkela na ana chilalu yambwani kumtegeleza?" 21 Wamwenga wao wakalonga, mbuli zino sio mbuli za mnt'hu eli na kinyamkela. Vino kinyamkela akudaha kuhonya meso ya vipofu?

22 Uko Yelusalemu kukala na Sikunk'hulu ya ukumbuso wa kuilava kaidi Kaya ya Mulungu kwaajili ya Mndewa, na chipindi icho kikala cha kihuhwe. 23 Nayo Yesu kakala akugenda kui Kaya ya Mulungu, hadipologwa dya Solomoni. 24 Pelela dya want'hu wakamzunguluka, Wakamuuza, "Nauchiike mdikeakea hadi lini? Ikawa weye kama ndo Kilisito chilongele bila kuchifisa chimanye." 25 Yesu akawalongela, "Nie niwalongeleni kale mbali mweye hamkutogola. Mbuli zino hutenda kwa ukulu wa Tati yangu zikunisimulila nie kumwenu. 26 Mbali mweye hamkunitogola, kwa vila mweye sio ngoto wangu. 27 Gesa vila ngoto ivo wakuihulika sauti ya mdima wawe, want'hu wangu wakunihulika icho hukilonga. Huwamanya na wakuwa wanahina wangu. 28 Nie huwenkha ugima ubule nk'homelezo, na sekewaitump'he na Mulungu mbwi wala habule mnt'hu akudaha kuwalava mmikono yangu. 29 Tati yangu anink'hile awo ni mkulu kuhuma wose na habule mnt'hu akudaha kumhoka kulawa mmikono yake. 30 Nie na Tata ni imwe." 31 Ivo Wayahudi wakadondola Maibwe kaidi kwa kulonda kumtoa. 32 Yesu akawalongela, "Niwalagisa mbuli nyingi zidamane kulawa kwa Tata. Mbuli ili hagati ya izo ikuwatenda mkulonda kunitoa kwa maibwe?" 33 Wayahudi wakamulongela, "Hachuukutoa na maibwe kwa mbuli zidamane utendile mbali kwa kumdukana Mulungu kwa vila weye ni mnt'hu mbali ukuitenda usawa na Mulungu." 34 Yesu akawalongela, "Vino, haiyandikigwe mmaandiko, ‘Nie nilonga kuwa mweye ni gesa Mulungu?’ 35 Ikawa wala awenk'hile mbuli yake Mulungu kalonga mkulingana na yeye, ivo Maandiko ya Mulungu ni yakweli siku zose. 36 Vino, mkudahaze kumulongela akudukana ila Tata amulavile kwa sank'hano yake na kumtuma mui isi, kwa vila, nilonga, nie ni Mwana wa Mulungu? 37 Ikawa sikutenda sank'hano za Tata, msekunitogola. 38 Mbali nikawa hazitenda sank'hano za Tata japo hamkunitogola nie, zitogoleni zila sank'hano mpate kumanya ya kuwa Tata ahagati yangu na nie ni hagati yake." 39 Wakalonda kumgwila kaidi, mbali akawameng'elenyuka. 40 Kamala Yesu akaita mwambo wa mto wa Yoludani, hant'hu hala akalile Yohana akabatiza, akakala uko. 41 Want'hu wengi wakamwitila Yesu, wakalonga Yohana kweli hatendile vilagiso vovote, mbali yose alongile Yohana kuusu mnt'hu ino ni ya kweli. 42 Want'hu wengi wakalile uko wakamtogola Yesu.