1 Yesu ivo akomeleze kulonga ayo, akalola kuchanya kuulanga kwa Mulungu, akalonga, "Tata, ula mda ufika! Mtunye Mwanako ili nae adahe Kukutunya weye. 2 Kwa vila kumwink'ha Mwanako ukulu mchanya ya want'hu wose ili awenk'he ugima ubule nk'homelezo wala wose umwink'hile. 3 Na ugima ubule nk'homelezo ndo uno, kukumanya weye udumwe Mulungu wa kweli, na kummanya Yesu kilisito umtumile. 4 Nie nikutunya hano hai isi kwa kuikomeleza ila sank'hano unink'hile niitende. 5 Haluse elo, Tata, nitunye halongozi hako kwa ula mtunyo nikalile nao tangu isi hainaumbigwa."

6 "Nikutenda umanyike kwa want'hu wala unink'hile mui isi. Wakala want'hu wako, na weye ukanink'ha wawe wangu, nao wakuzitenda mbuli zako, 7 haluse wakumanya kuwa kila icho unink'hile kilawa kumwako. 8 Kwa vila nie niwenk'ha mbuli zose unink'hile, nao wazihokela na kumanya kuwa kweli zilawa kumwako na wakutogola kuwa weye ndo unitumile." 9 "Huwalombela ao. Nie sikuwalombela want'hu wa isi, mbali huwalombela wala unink'hile kwa vila ao ni wako. 10 Want'hu wose nili nao ni wako, na awako ni wangu, na ukulu wangu uoneka kufosela ao unink'hile. 11 Nie sekeniwe kaidi mui isi, mbali ao wank'hali mui isi na nie hwiza kumwako. Tata wa udumwenga! Hukulomba uwakunzagize wawe gesa weye ili wawe chint'hu chimwe gesa cheye ivo chihamwe. 12 Ivo nikalile nao, nie niwakunzagiza goya kwa nguvu ya ukulu wako unink'hile. Nie niwaamila na habule hata mnt'hu imwe hagati yawe agile, mbali mnt'hu imwe tu asaguligwe age ndo agile, ili Maandiko ya Mulungu yadahe kutimia. 13 Mbali haluse hwiza kumwako, nilonga mbuli zino mui isi ili wadahe kuwa na bwedo dyangu ditimie mgati yawe. 14 Nie niwenk'ha mbuli yako, nao want'hu wa isi ino wawaihila, kwa vila ao sio wa want'hu wa isi ino, gesa nie ivo nili sio wa isi ino. 15 Sikulomba uwalave mui isi, mbali hulomba uwaamile kulawana na ila Mbananzi. 16 Ao sio wa isi, gesa nie ivo sio wa isi ino. 17 Watende wawe wako kwa ila kweli yako. Mbuli yako ni ya kweli. 18 Gesa ivo unitumile mui isi, na nie vila vila niwatuma ao mui isi. 19 Niilava mwenyewe kumwako ili ao wapate yadamane na ao watendwe wawe wako kwa kufosela ukweli.

20 "Sikuwalombela ao muhala, mbali huwalombela ao wose wakulonda kutogola kulawana na nt'hume yawe. 21 Hulomba wose wawe chint'hu chimwe gesa vila weye Tata ivo wili mgati mwangu na nie mgati mmwako. Hulomba wawe mgati yetu ili isi idahe kutogola kuwa weye ndo unitumile. 22 Nie niwenk'ha utunyo ula unink'hile nie, ili wawe chint'hu chimwe gesa cheye ivo chili hamwe. 23 Nie nanikale mgati mmwawe na weye naukale mgati mmwangu, ili wakamilike wawe wamwe ili want'hu wa isi wadahe kumanya kuwa weye ndo unitumile na ukuwabweda ao gesa ivo ukunibweda nie.

24 "Tata! Hulonda ao unink'hile wawe hamwenga na nie hala nili, ili wauwone ukulu wangu unink'hile, kwa vila kunibweda tangu isi hainaumbigwa. 25 Tata ukutenda mbuli zidamane siku zose, want'hu wa isi hawakukumanya, mbali nie hukumanya. Wano nao wakumanya kuwa weye ndo unitumile. 26 Nie nikutenda umanyike kumwawe na nanigendelele kutenda ivo, ili ubwedo wili nao kumwangu uwe mgati yawe, na nie niwe mgati yawe."