1 Kamala Yesu akaita kudi gamba da Mzaituni. 2 Igolo yake nalugunzu ivo kuchile akaita kaidi kui Kaya ya Mulungu, want'hu wengi wakamwitila na kumzunguluka na yeye akakala na akaandusa kuwafunza. 3 Wafunza Malagilizo na Mafalisayo wakamgalila Mwanamke agwiligwe ugoni wakamwika halongozi hawe. 4 Kamala wakamulongela Yesu, "Mfunza, mwanamke ino kagwiligwa ugoni. 5 Muna Amalagilizo yetu chink'hige na Musa kalagiliza want'hu kumkoma kwa kumtowa kwa maibwe wanake gesa ino, mbali weye ukulongaze?" 6 Walonga mbuli ino ili wamgeze, ili wapate mbuli ya kumgwila. Mbali Yesu akaidulika hasi kaandusa kuandika kwa kidole chake hasi muulongo. 7 Nao ivo wagendelele kumuuza, akeinuka akawalongela, "Mnt'hu abule zambi hagati yenu naanduse kumtowa ibwe." 8 Kamala akaidulika kaidi, akawa akuandika hasi. 9 Nao ivo wahulikile mbuli iyo, wakandusa kuhalawa imwe imwe kuandusila walala. Yesu akasigala adumwe na ila mwanamke katimalala halahala halongozi hake. 10 Yesu ivo ainukile akamuuza ila mwanamke, "Mama, wakwani wala want'hu wakalile wakukuchongea? Vino, habule mnt'hu yoyote asigalile ili kukulamula?" 11 Iyo mwanamke akamulongela, "Mkulu, habule hata mnt'hu imwe!" Na Yesu akamulongela, "Hata nie sekehulamule, genda zako na kwandusila haluse usekutenda kaidi zambi."

12 Kamala Yesu ivo ezile kulonga nao kaidi, akawalongela, "Nie ndo lumuli wa want'hu wa mui isi, mnt'hu akanikola nie hakugendela mdiziza mbwi, mbali naawe na lumuli lwa ugima." 13 Mafalisayo wakamulongela, "Weye ukuisimulila mbuli zako mwenyewe, ivo ayo ukuyalonga sio ya kweli." 14 Yesu akawalongela, "Nie ingawa husimulila mbuli zangu mwenyewe, mbuli zangu ni za kweli kwa vila nie humanya uko hulawa na uko hwita, mbali mweye hamkumanya uko nilawile wala uko hwita. 15 Mweye mkulamula gesa want'hu ivo wakulamula, mbali nie sikumulamula mnt'hu yoyote. 16 Mbali ikawa hulamula, lamulo dyangu ni da kweli kwa vila nie sio nidumwe mbali hulamula hamwenga na Tata anitumile. 17 Mmalagilizo yenu yandikigwa kuwa yala yakulongwa na want'hu waidi ni ya kutogolwa. 18 Nie husimulila mbuli zangu mwenyewe, na Tata anitumile akusimulila mbuli zangu nie." 19 Aho wakamuuza, "Akwani Tati yako?" Yesu akawalongela, "Mweye hamnimanyile nie wala Tati yangu. Mbali ingi mnimanyile nie, na Tati yangu ingi mummanyile." 20 Yesu kalonga mbuli izo ivo akalile akafunza mui Kaya ya Mulungu, haguhi na sanduku da kuikila sadaka, na habule mnt'hu amgwilile kwa vila mda wake ukala unk'hali haunafika.

21 Yesu akawalongela kaidi, "Nie huhalawa na mweye namnilonde mbali namdanganike mzi zambi zenu. Uko hwita nie mweye hamkudaha kufika." 22 Niho Wayahudi wakaiyuza, "Vino, akulonda kuikoma hangi akulonga uko hwita nie mweye hamkudaha kufika?" 23 Yesu akawalongela mweye ni wa hano hano mui isi, mbali nie ni wa kuchanya kuulanga kwa Mulungu, mweye mkulawa hano hasi mui isi mbali nie sio wa isi ino. 24 Ndo mana niwalongeleni kuwa namdanganike mzi zambi zenu, ikawa hamtogolile kuwa, "Nie Niyo." Namdanganike mzi zambi zenu. 25 Na ao wakamuuza, "Weye niani?" Yesu akawalongela, "Nie ndo ila nikalile huwalongela tangu kumwanduso. 26 Nina mbuli nyingi za kuwalongela na kuwalamula, mbali anitumile ni wa kweli, na nie huyalonga mui isi yala niyahulike kulawa kumwake." 27 Ao hawamanyile kuwa kakala akulonga nao mbuli za Tata. 28 Yesu akawalongela, "Mkeza kumwinula Mwana wa Mnt'hu mumti, aho ndo nammanye kuwa, ‘Nie Niyo.’ Na sikutenda kint'hu chochote icho hulonda nie mwenyewe, mbali hutenda yala tu anifuzile Tata. 29 Ila anitumile ahamwenga na nie, hananileka nidumwe kwa vila siku zose hutenda yala yakumbwedeza." 30 Na ivoakalile akulonga ayo, want'hu wengi wakamtogola.

31 Kamala Yesu akawalongela wala Wayahudi wamtogolile, "Mweye mkakala mui mbuli yangu, namuwe wanahina wangu kweli kweli. 32 Mweye namumanye ukweli, na iyo kweli naiwatende mulekelwe." 33 Nao wakamulongela, "Cheye ni weleko wa Ibulahimu wala hachinawa watwana wa mnt'hu yoyote, ukulongaze nachilekeligwe?" 34 Yesu akawalongela, "Tegelezeni, huwalongeleni, kila mnt'hu akutenda zambi ni mtwana wa zambi. 35 Mtwana hakukala hai kaya siku zose, mbali mwana akukala hai kaya siku zose. 36 Mwana akatenda mulekelwe, namulekelwe kweli kweli. 37 Nie humanya mweye ni weleko wa Ibulahimu, mbali mkulonda kunikoma kwa vila mbuli yangu haimuli mgati mmwenu. 38 Nie hulonga yala niyaonile ivo nikalile na Tata, na mweye vila vila mkutenda yala mulongeligwe na tati yenu."

39 Wakamulongela, "Cheye tati yetu ni Ibulahimu" Yesu akawalongela, "Ingi muwile wana wa Ibulahimu, ingi mtendile gesa ivo atendile Ibulahimu. 40 Mbali mweye mkulonda kunikoma nie niwalongeleni ukweli niuhulikile kwa Mulungu, mbali Ibulahamu hatendile mbuli gesa iyo. 41 Mweye mkutenda mbuli zila akutenda Tati yenu." Ao wakamulongela, "Usekuchilongela china tata imwenga, chinayo Tati yetu imwe tu, nayo ni Mulungu." 42 Yesu akawalongela, "Mulungu ingi awile Tati yenu, ingi mnibwedile nie, kwa vila nie nilawa kwa Mulungu na haluse nihano. Sizile kwa udahi wangu mwenyewe, mbali wa ila anitumile. 43 Hangi hamkuyamanya yano huwalongela? Kwa vila hamkudaha kutegeleza icho huwafunza. 44 Mweye ni wana wa tati yenu Shetani, na mkulonda kutenda yala yakulondigwa na tati yenu. Yeye kakala akukoma tangu haumwanduso na hakukola ukweli, kwa vila ukweli haumuli mgati mmwake. Akahuna, akulonga kulawana na vila eli. Kwavila ni muhuni na ni tata wa uhuni. 45 Nie hulonga ukweli, mweye hamkunitogola. 46 Vino niani hagati yenu akudaha kunilongela kuwa nie nina zambi? Ikawa huwalongeleni yala ya kweli, hangi hamkunitogola? 47 Ila akulawa kwa Mulungu akuzihulika mbuli za Mulungu. Mbali mweye hamkuhulika mbuli za Mulungu kwa vila mweye hamkulawa kwa Mulungu."

48 Wayahudi, wakamuuza Yesu, "Vino, chihuna ivo chikulonga kuwa weye ni Msamalia na una kinyamkela?" 49 Yesu akawalongela, "Nie nibule kinyamkela, mbali nie humtunya Tati yangu, mbali mweye hamkunitunya." 50 Nie sikulonda utunyo wangu mwenyewe, mbali auko akunilondela uo utunyo, na iyo ndo mulamuzi. 51 Kweli huwalongeleni, mnt'hu akaitegeleza mbuli yangu, naawe mgima siku zose bila nk'homelezo. 52 Wayahudi wakamulongela, "Elo chimanya kuwa una kinyamkela! Ibulahimu kadanganika na walotezi wadanganika, mbali weye ukulonga, ‘Mnthu yoyote akaitoza mbuli yangu naawe mgima siku zose bila nk'homelezo!’ 53 Vino, weye ukuitenda ni mkulu kuhuma tati yetu Iblahimu na yeye kadanganika? Na walotezi wadanganika, vino weye ukuigesa niani?" 54 Yesu akawalongela, "Nikaitunya mwenyewe utunyo wangu si chint'hu, akunitunya nie ni Tati yangu, yeye ndo mkumtanga Mulungu wetu. 55 Ingawa mweye hamummanyile, mbali nie hummanya. Na nikalonga simmanyile naniwe muhuni gesa mweye. Mbali nie hummanya na mbuli yake huitegeleza. 56 Ibulahimu Tati yenu, kasant'hila akalolela kuiona siku ya kwiza nie, naye akaiona na akabweda." 57 Ivo Wayahudi wakamuuza, "Weye unk'hali hunafikiza hata myaka hamsini, ukudahaze kulonga kumuona Ibulahimu?" 58 Yesu akawalongela, "Huwalongeleni kweli, tangu Ibulahimu hana awa aho ‘Nie Niaho.’ " 59 Aho ndo wakadondola maibwe kulonda kumtoa nayo, mbali Yesu akaifisa, akahalawa hai Kaya ya Mulungu.