1 Ivo yafosile ayo, Yesu akawalawila kaidi wanahina wake mnk'handa nk'handa mwa ziwa Tibelia. Kawalawila vino. 2 Simoni Petulo na Tomasi yaani Pacha na Nasanaeli wa bululu dya Kana ya mui isi ya Galilaya, na wana waidi wa Zebedayo na wanahina wamwenga waidi wa Yesu, wose wakala hamwe. 3 Simoni Petulo akawalongela wayage, "Nie hwita kukwega Somba." Nao wakamulongela, "Cheye nachite hamwe na weye." Ndo wakaita, wakakwela mdadalu, mbali ichilo icho chose hawapatile chochote. 4 Ivo ifikile lukwili, Yesu akatimalala mnk'handa nk'handa ya ziwa, mbali wanahina hawammanyile kuwa ni Yesu. 5 Yesu akawauza, "Wabwanga, hamnapata somba?" Ao wakamulongela, "Ena! Hachipatile chint'hu." 6 Yesu akawalongela "Telemseni lwavu wenu ubanzi wa kulume wa dalu dyenu na nampate Somba." Ao wakazitelemsa nyavu zawe ubanzi uo, lola wakapata somba wengi nk'hani hadi wakapotwa kunyuta lwavu. 7 Ila Mwanahina akalile akubwedigwa nk'hani na Yesu, akamulongela Petulo, "Ino ni Mndewa" Simoni Petulo ivo ahulike ayo, akaizingiliza mwenda wake mchigudi kwa kuwa kakala havalile mwenda, kamala akadubwikila mmazi. 8 Mbali wala Wanahina wamwenga wakalile mp'hwani utali wake gesa mita mia wakeza hadidalu wakanyuta ula lwavu umemile somba. 9 Ivo wafikile mp'hwani, wakaona moto wa makala ukolezwa na mchanya yake waikigwa Somba na migate. 10 Yesu akawalongela, "Galeni hano somba kidogo kulawa mwa wala mvuile." 11 Simoni Petulo akakwela mdidalu na kuunyuta ula lwavu hadi mp'hwani. Lwavu uo ukala umema somba wakulu mia na hamsini na nt'hatu. Na ingawa lwavu ukala umema somba wengi mbali haudegekile. 12 Yesu akawalongela, "Inzoni mdye." Mbali habule hata imwe wa wanahina adahile kumuuza, "Weye niani? Kwa vila wakala wamanya kuwa ila ni Mndewa." 13 Yesu akaita, akasola ula mgate, akawenk'ha, kamala akasola wala somba akawenk'ha. 14 Uno ukala lwa katatu Yesu akuwalawila wanahina wake, tangu abwele muugima.

15 Ivo wamalile kudya, Yesu akamuuza Simoni Petulo, "Simoni mwana wa Yohana, ukunibweda kweli kuhuma wano wamwenga?" Yesu akamulongela, "Ena Mndewa, na weye ukumanya ya kuwa nie hukubweda." Yesu akamulongela, "Lisa wanangoto wangu." 16 Yesu akamuuza kaidi, "Simoni mwana wa Yohana ukunibweda?" Petulo akamulongela, "Ena Mndewa, weye ukumanya ya kuwa hukubweda." Yesu akamulongela, "Amila ngoto wangu." 17 Kamala akamuuza lwa katatu, "Petulo, Simoni mwana wa Yohana, vino, ukunibweda?" Petulo akaingila kiholo kwa vila Yesu kamuuza lwa katatu ,"kunibweda?" Akamulongela "Mndewa weye ukumanya yose ya kuwa nie hukubweda." Yesu akamulongela, "Lisa ngoto wangu." 18 Kweli hukulongela, "Ivo ukalile mbwanga kuzoela kuvala na kwita hohote uko ukulonda, mbali ukawa mlala naugolole mikono yako na mnt'hu imwenga naakuvike mkwiji na kukugala hant'hu hukulondile kwita." 19 Yesu kalonga ivo kulagisa ni kudanganika kwa vilihi Petulo naadanganike ili kumwink'ha Mulungu utunyo. Kamala Yesu akamulongela Petulo, "Nikole."

20 Petulo akabiduka kunyuma, akamwona ila mwanahina akubwedigwa na Yesu akuwakola. Ino nio ila mwanahina asigamile mchifua cha Yesu, ivo wakalile wakadya nayo ndia ila ya Pasaka na akamuuza, "Mndewa niani akulonda kukulema?" 21 Petulo ivo amuonile iyo mwanahina akamuuza Yesu, "Mndewa ni mbuli ili ikulonda kumulawila?" 22 Yesu akamulongela, "Ikawa hulonda akale hadi nibwele, weye ikukuhusu mbwani? Weye unikole." 23 Ivo, mbuli iyo ikaenela hagati ha wala wanahina wamwenga kuwa ino mwanahina sekeadanganike. Mbali Yesu halongile kuwa mwanahina iyo sekeadanganike, mbali kalonga, "Ikawa hulonda asigale hadi ivo hulonda kubwela weye ikukuhusu mbwani?" 24 Ino ndo ila mwanahina ayaonile mbuli izo na kuziandika, nacheye chikumanya ya kuwa ayalongile ni ya kweli.

25 Kuna mbuli zimwenga nyingi atendile Yesu ambazo haziandikigwe, ingi yaandikigwe yose hata isi hailondile kufaya kuviika vitabu vila ambavo viandikwe.