1 Ivo ifikile haguhi na sikunk'hulu ya Pasaka, Yesu akamanya kuwa mda wake wa kuhalawa mui isi na kwita kwa Tata ukala ufika. Kakala kawabweda nk'hani Want'hu wake wakalile mui Isi, kweli kakala akuwabweda hadi akaulava ugima wake. 2 Yesu na Wanahina wake ivo wakalile wakudya ndia ya dihungile. Shetani kakala kamtenda kale Yuda Isikaliote mwana wa Simoni, alonde kumbiduka Yesu. 3 Yesu kuno akamanya kuwa Tata kamwink'ha kila chint'hu kiwe haukulu wake, na kuwa kakala kalawa kwa Mulungu na akubwela kwa Mulungu. 4 Ivo, akaleka kudya ndia na, akavula mwenda wake wa kunze akauika kunk'handa, akasola kitambala cha kuhangusila na akaifunga kibwebwe. 5 Kamala akagela mazi mdibakuli, akandusa kuisunt'ha migulu ya wanahina wake na kwandusa kuwahangusa na kitambala aifungile kibwebwe. 6 Ivo amfikile Simoni Petulo, Simoni akamuuza, "Mndewa, vino nauninawize na nie migulu?" 7 Yesu akamulongela, "Haukumanya icho hutenda haluse, mbali nachifike chipindi naumanye." 8 Petulo akamulongela, "Weye sekeuninawize nie migulu mbwi." Yesu akamulongela, "Ikawa sikunawize migulu sekeuwe na lumbavya na nie." 9 Simoni Petulo akamulongela, "Mndewa usekuninawiza migulu muhala mbali ninawize na mikono yangu na mutwi wangu vila vila." 10 Yesu akamulongela, "Mnt'hu aogele kale hakulondigwa kuogela kaidi mbali akulondigwa kunawa migulu muhala, kwa vila mtufi wake wose wela. Mweye mwela mbali sio mose." 11 Yesu kakala akummanya ila naambiduke, ndo mana kalonga mweye mwela mbali si mose. 12 Ivo amalile kuwanawiza migulu yao, akavala kaidi umwenda wake, akabwela ha india akalile, akawauza, "Vino, mkumanya ivo niwatendeleni?" 13 Mweye mkunitanga nie Mfunza na Mndewa. Ivo kulonga ivo mukulonga kweli, kwa vila nie ndo iyo. 14 Ivo elo ikawa nie Mndewa na mfunza wenu niwanawizeni mweye migulu, na mweye ikulondeka muinawize migulu mweye kwa mweye. 15 Nie niwalagisa mlinganyo uo kuwa ikulondeka mweye kutenda gesa vila nie niwatendeleni mweye. 16 Kweli huwalongela msank'hani si mkulu kufosa mkulu wake, wala ila atumigwe si mukulu kuhuma ila amtumile. 17 Elo kwa vila mkuzimanya mbuli zino, Mulungu naawatendele yadamane mkazitenda. 18 Sikulonga ivo kumwenu mweye mose. Mbali huwamanya wala niwasagulile ili ila mbuli yandikigwe idahe kulawila yala yalongile kuwa, "Adile ndia yangu, kanibiduka." 19 Huwalongela mbuli izo zikawa hazinalawila ili zikeza kulawila mpate kutogola ya kuwa, "Nie Ndo." 20 Kweli huwalongela, "Yoyote akumhokela ila anitumile akunihokela na nie, nayo akunihokela nie akumhokela ila anitumile."

21 Ivo akomeleze kulonga ayo, Yesu akagazika mu umoyo, akalonga, "kweli huwalongeleni, imwe wenu naanibiduke." 22 Wanahina wake wakalolana kwavila hawamanyile kuwa kakala akumulonga niani. 23 Imwe wa wanahina wake akalile akumbwedigwa nk'hani na Yesu, kakala haguhi na Yesu. 24 Simoni Petulo akamtendela kilagiso ila mwanahina, akamulongela kwa kilagiso amuuze Yesu, "Akulonga kuusu niani?" 25 Ila mwanahina kuno akawa kamsigamila Yesu, akamuuza, "Mndewa chilongele ukumulonga niani?" 26 Yesu akalonga, "Ila hulonda kumwink'ha chino kibenza cha mgate nikakitoweza mumsuzi ndo iyo." Ivo akasola kibenza cha mgate akakitoweza mumsuzi akamwink'ha Yuda Isikalioti mwana wa Simoni. 27 Na ivo akihokela icho kibenza cha mgate, shetani akamwingila. Yesu akamulongela Yuda, "Icho ukulonda kukitenda kitende hima." 28 Wala wose wakalile wakudya ndia, habule hata imwe amanyile kuwa hangi Yesu kamulongela ivo. 29 Kwa vila Yuda kakala akuika hela, wamwenga wagesa Yesu kamulongela Yuda agule vint'hu kwaajili ya sikunk'hulu egu kwaajili ya kuwenk'ha wachiwa. 30 Ivo ahokele ula mgate, Yuda akalawa kunze hima. Mda uo ukala ichilo.

31 Yuda ivo alawile kunze, Yesu akalonga, "Elo Mwana wa Mnt'hu katunyigwa, na Mulungu katunyigwa kufosela yeye. 32 Ikawa utunyo wa Mulungu ugubuligwa mgati ya Mwana, ivo nae Mulungu naaulagise utunyo wa Mwana mgati yake mwenyewe, na naatende ivo aho aho. 33 Wanangu, nie nink'hali hamwenga na mweye kwa mda mdodo, namnilonde gesa vila niwalongele Wayahudi, na ivo ivo huwalongeleni mweye. Uko hwita mweye hamkudaha kwiza. 34 Huwenk'hani Lagilizo mpya, mbwedane mweye kwa mweye gesa nie ivo niwabwedileni, na mweye mbwedane ivo ivo. 35 Gesa mkabwedana mweye kwa mweye, kwa nzila ino, want'hu wose nawamanye kuwa mweye ni wanahina wangu."

36 Saimoni Petulo akamuuza Yesu, "Mndewa ukwitahi?" Yesu akamulongela, "Kwa haluse uko hwita weye hukudaha kunikola, mbali nawize kunikola." 37 Petulo akamuuza kaidi, "Mndewa hangi sikudaha kukukola haluse? Nie ni tayali kudanganika kwaajili yako." 38 Yesu akamulongela, "Vino ni kweli weye utayali kudanganika kwa ajili yangu? Kweli hukulongela zogole seke alile hadi weye aho ukulonda kunilema mala nt'hatu."