1 Ivo yamalile ayo Yesu akakwela kwita Yelusalemu kui siku nk'hulu ya Wayahudi. 2 Uko Yelusalemu haguhi na lwivi ukutangigwa Lwivi wa Ngoto, kukala na bwawa kwa kiebulania dikutangwa Betisaza, bwawa idyo dizungulukigwa na balaza tano. 3 Aho hakala na watamu wengi wakalile, Vipofu, vimbetembete na waholole wakugozela mazi yatibulwe. 4 Kwa vila kuna chipindi msank'hani wa kuulanga kwa Mulungu kakala akutelemka na kuyatibula yala mazi. Ivo mtamu akulonda kwandusa kuingila muna amazi yatibuligwe, akuhona utamu wake. 5 Aho kukala na mnt'hu akalile mtamu nk'hani kwa myaka selasini na nane. 6 Yesu ivo amuonile mnt'hu iyo kagona, na kuno akamanya kuwa kakala aho kwa chipindi chitali, akamuuza, "Ukulonda kuhona?"

7 Ila mtamu akamulongela, "Weye mkulu niye nibule mnt'hu wa kunigela muna amazi chipindi yakatibuligwa, na chipindi nikalonda kuingila mnt'hu imwenga akulawila na kuingila nie nikawa sinaingila." 8 Yesu akamulongela, "Timalala, sola lili dyako ugende." 9 Aho aho mnt'hu iyo akahona, akasola lili dyake na akaandusa kugenda. Na siku ilawile mbuli iyo ikala Siku ya Humulo. 10 Kulawana na iko vilongozi wa Kiyahudi wakamulongela ila mnt'hu ahonyigwe, "Dielo ni Siku ya Humulo yaani Sabato, Malagilizo yakulemesa kupapa lili dyako."

11 Nae akawalongela, "Ila anihonyile ndo anilongele, ‘Sola lili dyako ugende.’ " 12 Wakamuuza, "Niani akulongele utende ivo?" 13 Mbali mnt'hu ila ahonyigwe kakala hammanyile niani amuhonyile, kwa vila Yesu kakala kasegela na kaingila mdipelela kulu dya want'hu. 14 Kamala Yesu akamfika kui Kaya ya Mulungu ila mnt'hu akalile kamuhonya akamulongela, "Tegeleza, kuhona kale, leka ubananzi, kisekwiza kukulawila kint'hu kihile kufosa kila." 15 Kamala mnt'hu ila akaita, akawalongela vilongozi wa Wayahudi kuwa ni Yesu ndo amuhonyile. 16 Ivo Wayahudi wakaandusa kumgaza Yesu, kwa vila katenda mbuli izo mui Siku ya Humulo. 17 Yesu akawalongela, "Tati yangu akusankhana siku zose hadi haluse, na nie ivo ivo hulondigwa kusank'hana siku zose."

18 Mbuli iyo iwatenda vilongozi wa Wayahudi walonde nzila ya kumkoma Yesu. Sio kwa vila kabananga Lagilizo dya Humulo tu, mbali kwa vila Yesu kakala akulonga Mulungu ni Tati yake, ivo kaitenda yeye gesa Mulungu.

19 Yesu akawalongela, "Huwalongeleni kweli, Mwana hakudaha kutenda chint'hu chochote akawa adumwe, akudaha kutenda kila akuona Tata akutenda. Kwa vila chint'hu chochote akuchitenda Tata Mwana nae naakitende. 20 Kwa vila Tata akumbweda Mwana, na akumulagisa vint'hu vose akuvitenda yeye, na naamulagise mbuli nk'hulu kuhuma zino ili na mweye mdahe kukangawala. 21 Gesa vila Tata ivo akuwabweleza muugima wadanganike na kuwenk'ha ugima, ivo ivo nae Mwana akuwenk'ha ugima wala akuwalonda. 22 Tata hakumulamula mnt'hu yoyote, mbali lamulo dyose kamulekela Mwana, 23 ili want'hu wose wamtunye Mwana gesa ivo wakumtunya Tata. Ila hakumtunya Mwana hakumtunya Tata amtumile." 24 "Huwalongeleni kweli, mnt'hu yoyote akuhulika mbuli zangu na kumtogola ila anitumile, anaugima wa siku zose na seke alamuligwe, mbali kafosa kale muukudanganika na kuingila muugima wa siku zose bila nk'homelezo. 25 Huwalongela kweli, chipindi chikwiza, na chifika kale, wadanganike nawaihulike sauti ya Mwana wa Mulungu, na wala wakuihulika sauti nawawe na ugima. 26 Gesa vila Tata ivo eli mwanduso wa ugima, ivoivo kamwink'ha Mwanake kuwa chanduso cha ugima. 27 Nae Mulungu kamwink'ha Mwanake ukulu wa kulamula kwa vila yeye ni mnt'hu ila atumigwe na Mulungu. 28 Msekukangawala kwa mbuli izo, kwa vila chipindi chikwiza ambaho wala want'hu wose wammakabuli nawaihulike sauti yake. 29 Wose nawabwelezigwe muugima, wala watendile yadamane nawapate ugima wa siku zose na wala watendile ubananzi nawalamulwe."

30 Nie sikudaha kutenda chint'hu chochote kwa udahi wangu mwenyewe. Nie hulamula gesa ivo huhulika kulawa kwa Tata, nayo ulamuzi wangu wa kweli. Ivo hulonda nie sio kutenda ivo hubweda nie mwenyewe, mbali hutenda ivo akubweda ila anitumile. 31 Nikalonga mbuli zangu mwenyewe, ayo hulonda kuyalonga sekeyatogoligwe kuwa ya kweli 32 Mbali auko imwenga akulonga mbuli zangu, na nie humanya yala akuyalonga kwaajili yangu ni ya kweli. 33 Mweye mtuma want'hu kwa Yohana, nae akawalongela mbuli za ukweli. 34 Nie sikulonda want'hu wakunilongela, huyalonga yano ili mdahe kuhonyigwa. 35 Yohana kakala kimuli kikwaka na kumulika, na mweya kwa chipindi kidodo muwa tiali kuudenk'helela lumuli wake. 36 Mbali nie nina mbuli nyingi za kuwalagisa ukweli wa kila nikilongile kuhuma yala ayalongile Yohana. Kwa vila sank'hano zila anink'hile Tata nizitende ndo zikuwalagisa kuwa Tata ndo anitumile. 37 Na Tata anitumile akulonga kwa ajili yangu, ikawa mweye hamuihulike sauti yake egu kumwona ivo eli, 38 na mbuli yake haikukala mgati mmwenu kwa vila hamumtogole ila amtumile. 39 Mweye mkuyapelemba maandiko ya Mulungu mkugesa nampate ugima wa siku zose, mbali maandiko ayo yakulonga mbuli zangu! 40 Mbali mweye hamkulonda kwiza kumwangu ili mpate ugima.

41 "Nie sikuhokela utunyo kulawa kwa want'hu. 42 Mbali nie huwamanya kuwa mweye hamukumbweda Mulungu. 43 Nie niza kwa ukulu wa Tati yangu, mweye hamnihokele, mbali mnt'hu imwenga akeza kwa ukulu wake, iyo nammuhokele. 44 Mweye mkudahaze kutogola ikawa mkwink'hana utunyo mweye kwa mweye, mbali hamkugangamala kupata utunyo ukulawa kwa Mulungu muhala. 45 Msekugesa nie naniwachongee kwa Tata, mbali Musa iyo lolelo dyenu ndo akulonda kuwachongea kwa Tata. 46 Ingi mumtogole kweli Musa, ingi mnitogole na nie, kwa vila Musa kandika mbuli zangu. 47 Mbali ikawa hamkutogola ayandikile Musa, namdaheze kuyatogola yano huyalonga?"