1 Ivo yafosile ayo, Yesu akaita mwambo wa ziwa dya Galilaya egu kwa zina dimwenga dikutangigwa ziwa Tibelia. 2 Pelela kulu dya want'hu dikamkola, kwa vila want'hu ao waona uzonza autendile ya kuwahonya watamu. 3 Kamala Yesu akakwela mdigamba, akakala hasi hamwenga na Wanahina wake. 4 Chipindi icho Sikunk'hulu ya Wayahudi ikutangigwa Pasaka ikala haguhi. 5 Yesu ivo alolile na kuona uyama mkulu wa want'hu ukumwizila, akamulongela Filipu, "Nachigulehi migate, ili want'hu wano wadye?" 6 Yesu mwenyewe kamanya cha kutenda, mbali kamuuza ivo Filipu ili amgeze. 7 Filipu akamulongela, "Hata ingi chiwile na migate ya unt'hifili wa hela hazilondile kufaya kugula ndia ya want'hu wano wose hata kila mnt'hu akapata kibenza kidodo cha mgate." 8 Mwanahina wake imwe akutangigwa Andilea, mdodo wake Saimoni Petulo, akamulongela, 9 "Hano hana mbwanga imwe ana migate mitano ya shaili na somba waidi, mbali vino navifae mbwani kwa uyama uno wose?" 10 Yesu akalonga, "Walongeleni want'hu wakale hasi." Hant'hu aho hakala na mazani madododo, na want'hu wakakala. Hant'hu aho hakala na wanaalume elufu tano. 11 Kamala Yesu akaisola ila migate akamwink'ha hewala Mulungu, akawenk'ha wala wakalile hasi hadi wakaenela. Vila vila na wala somba akatenda ivo ivo, na kila mnt'hu akapata gesa vila akulonda. 12 Want'hu ivo wagutile, Yesu akawalongela wanahina wake, "Duganyeni vibenzu visigale vovote visekwaga." 13 Ivo, wakaduganya na wakamemeza visege kumi na vidi va vibenza va migate kulawa muna imigate mitano ila wadile want'hu. 14 Want'hu ivo waonile kilagiso icho atendile Yesu, wakalonga, "Ino ndo mulotezi wa Mulungu akwiza mui isi." 15 Yesu ivo amanyile kuwa want'hu walonda kumsola ili wamtende awe mwene wawe kwa nguvu, akahalawa kaidi, akaita kudigamba adumwe.

16 Ivo ifikile dihungile, Wanahina wake wakatelemka hadi kudi ziwa, 17 wakakwela mdidalu ili wavuke kwita Kapelinaumu, na chipindi icho ziza dikuingila, Yesu kakala ank'hali hanawafikila. 18 Kukawa na mawimbi makulu mdi ziwa kwa vila kukala na vungwa kulu dikuvuma. 19 Wanahina ivo wakalile waita utali wa gesa kilomita tano egu sita, wakamwona Yesu akugenda mchanya mmazi, akudisogelela dila dalu, wakaogoha nk'hani. 20 Mbali Yesu akawalongela, "Ni nie, msekuogoha!" 21 Ivo wakatogolelena kumkweza Yesu mdidalu, na aho aho wakafika mp'hwani wakalile wakwita.

22 Siku da kaidi, uyama wa want'hu wakalile wasigale ubanzi wa kaidi wa ziwa waona kukala na dalu dimwe tu hala, na Yesu haingilile mna ididalu hamwenga na wanahina wake, ila wanahina ao wakala waita wadumwe. 23 Madalu yamwenga kulawa Tibelia, yakafika hant'hu hala want'hu wadile ila migate, Mndewa ivo amalile kumwink'ha hewala Mulungu. 24 Ivo, want'hu ao ivo wamanyile kuwa Yesu na wanahina wake hawahali aho, wakakwela mmadalu yawe, wakaita Kapelinaumu kumulonda Yesu.

25 Wala want'hu ivo wamfikile Yesu mwambo wa ziwa, wakamuuza, "Mfunza, kufika lini hano?" 26 Yesu akawalongela, "Kweli huwalongeleni, mweye mkunilonda sio kwa vila muona vilagiso, mbali kwa vila mudya migate mkeguta." 27 Msekuhunganikila ndia ikuola, mbali hunganikileni ndia ikugala ugima wa siku zose. Icho Mwana wa Mnthu nawenk'heni, kwa vila Mulungu Tata ndo amsagulile na kumtogola. 28 Kamala wakamuuza Yesu, "Chikulondigwa chitende mbwani ili chidahe kusank'hana sank'hano za Mulungu?" 29 Yesu akawalongela, "Sank'hano ya Mulungu mkulondigwa muitende ni kumtogola ila amtumile." 30 Aho wakamuuza, "Nauchitendele ulagiso uli ili chiuone na kukutogola? Vino, nautende chibwani? 31 Walala wetu wadya ndia ikutangigwa Mana kula kuchiwala, gesa ivo iyandikigwe mmandiko ya Mulungu, ivo yakulonga, ‘Kawenk'ha ndia ilawile kuulanga kwa Mulungu.’ " 32 Kamala Yesu akawalongela, "Kweli huwalongeleni, sio Musa awenk'hileni migate ilawile kuulanga kwa Mulungu, mbali Tati yangu ndo akuwenk'ha ndia ya kweli kulawa kuulanga kwa Mulungu. 33 Kwa vila ndia ya Mulungu ndo ila akutelemka kulawa kuulanga kwa Mulungu na akuwenk'ha ugima want'hu wa mui isi." 34 Ivo, wakamulongela, "Mndewa, chikulomba uwe ukuchink'ha ndia iyo siku zose." 35 Yesu akawalongela, "Nie ndo ndia ya ugima. Mnt'hu akeza kumwangu sekeahulike nzala, mnt'hu akunitogola sekeahulike nk'hilu mbwi. 36 Mbali gesa ivo niwalongele kuwa, mniona mbali mnk'hali hamkunitogola. 37 Want'hu wose akulonda kunink'ha Tata nawanikole na mnt'hu yoyote akulonda kwiza kumwangu sekenimuleme, 38 Kwa vila nitelemka kulawa kuulanga sio ili nitende ivo hulonda nie, mbali nitende vila akulonda ila anitumile. 39 Vino nivo akulonda ila anitumile, kuwa nisekumwaza hata imwe hagati mwa wala anink'hile, mbali niwabweleze wose muugima siku ya nk'homelezo. 40 Kwa vila kint'hu kikulu icho akuchilonda Tati yangu ndo chino. Kila mnt'hu akumwona Mwana na kumtogola awe na ugima wa siku zose bila nk'homelezo, na nie nanimbweleze muugima siku ya nk'homelezo." 41 Wayahudi wakaandusa kumuyungudikila kwa vila kalonga, "Nie ndo ndia itelemkile kulawa kuulanga kwa Mulungu." 42 Wakawa wakulonga, "Vino, ino sio Yesu mwana wa Josefu? Tati yake na mami yake chikuwamanya! Ivo, akudahaze kulonga kuwa katelemka kulawa kuulanga kwa Mulungu?" 43 Yesu akawalongela, "Lekeni kuiyungudikila mweye kwa mweye. 44 Habule Mnt'hu akudaha kwiza kumwangu ikawa havutigwe na Tata anitumile, na nie nanimbweleze muugima mnt'hu iyo siku ya nk'homelezo. 45 Mvitabu va walotezi iandikigwa, ‘Want'hu wose nawafunzigwe na Tata.’ Kila mnt'hu akumuhulika na kukombaganya kila akulonga Tata, naeze kumwangu. 46 Ivo, hulonga vino, habule mnt'hu amuonile Tata, mbali ila alawile kwa Mulungu ndo amuonile Tata. 47 Kweli huwalongela, mnt'hu akutogola anao ugima wa siku zose bila nk'homelezo. 48 Nie ndo ndia ya ugima. 49 Walala wenu wadya mana kula kuchiwala na wakadanganika. 50 Mbali ino ndo ndia ikutelemka kulawa kuulanga kwa Mulungu ili mnt'hu yoyote akaidya asekudanganika. 51 Nie ndo ndia ngima itelemkile kulawa kuulanga kwa Mulungu. Mnt'hu yoyote akadya ndia ino naakale siku zose bila nk'homelezo. Na ndia hulonda kumwinkha ni mtufi wangu kwaajili ya ugima wa want'hu wa wose mui isi." 52 Niho Wayahudi wakaandusa kulongana hagati yawe, "Mnt'hu ino akudahaze kuchink'ha mtufi wake chiudye?" 53 Yesu akawalongela, "Kweli huwalongeleni, ikawa hamkuudya mtufi wa Mwana wa Mnt'hu na kung'wa damu yake, sekemuwe na ugima mgati mmwenu. 54 Ila akulonda kuudya mtufi wangu na kuing'wa damu yangu iyo ana ugima wa siku zose bila nk'homelezo, na nie nanimbweleze muugima siku ya nk'homelezo. 55 Kwa vila mtufi wangu ni ndia ya kweli na damu yangu ni chint'hu cha kweli chakuking'wa. 56 Mnt'hu akadya mtufi wangu na kuing'wa damu yangu, akukala mgati mmwangu, na nie hukala mgati mmwake. 57 Gesa Tata vila eli mgima ivo anitumile, na nie huwa mgima kwa kufosela Tata, Ivo ivo mnt'hu yoyote akunidya nie naapate ugima kufosela kumwangu. 58 Ino ndo ndia itelemkile kulawa kuulanga kwa Mulungu, sio gesa mana wadile walala wenu, kamala wakadanganika. Mnt'hu akaidya ndia ino naakale na ugima siku zose bila nk'homelezo." 59 Yesu kalonga ayo ivo akalile akufunza mui kaya ya kufikanila Wayahudi uko Kapelinaumu.

60 Ivo, wanahina wengi ivo wahulikile ivo, wakalonga, "Yano ni mafunzo madala. Niani akudaha kuyatogola?" 61 Nae Yesu akamanya mu moyo wake ya kuwa Wanahina wake wakuyungudika kwa mbuli ino, akawauza, "Vino, hangi mbuli ino ikuwatenda mtuke? 62 Vino naiweze mkamwona Mwana wa mnt'hu akabwela kuulanga kwa Mulungu kula alawile kumwanduso? 63 Muhe wa Mulungu ndo ukulava ugima, mtufi muhala haukufaya chint'hu, mbuli izo niwalongeleni ni Muhe na ni ugima. 64 Mbali wamwenga mgati mmwenu hawakutogola." Yesu kalonga ivo kwa vila kamanya kulawila kumwanduso niani hakumtogola na niani akulonda kumbiduka. 65 Kamala akalonga, "Ndo mana huwalongela habule mnt'hu akudaha kwiza kumwangu ikawa hadahizwe na Tati yangu." 66 Kulawana na ayo ayalongile Yesu, wanahina wake wamwenga wakamuleka na hawalongozane nayo kaidi. 67 Ivo elo Yesu akawauza wala wanahina kumi na waidi, "Vino na mweye mkulonda kuhalawa?" 68 Simoni Petulo akamulongela, "Mndewa chite kwa niani? Na weye unazo mbuli za ugima ubule nk'homelezo." 69 Cheye chitogola na chimanya ya kuwa weye ndo Mnank'hani wa Mulungu. 70 Yesu akawalongela, "Nie ndo niwasagulile mweye kumi na waidi mbali imwe hagati yenu ni shetani." 71 Yesu kakala kalonga mbuli izo kwa Yuda, Mwana wa Saimoni isikalioti kwa vila iyo ndo ambidukile, ingawa kakala imwe wa wala kumi na waidi.