1 Siku ya katatu kukala na zengele kudibululu da Kana ya Galilaya, na Mami yake Yesu kakala uko, 2 Yesu hamwenga na wanahina wake, na ao watangigwa kudizengele. 3 Divai ivo imalile, Mami yake Yesu akamulongela, "Divai imala." 4 Yesu akamulongela mami yake, "Mama usekunilongela da kutenda, saa ya kutenda sank'hano yangu ink'hali hainafika." 5 Mami yake Yesu akawalongela wasank'hani, "Chochote akulonda kuwalongeleni tendeni." 6 Aho hakala na mabiga sita ya kuikila mazi yatengenezigwe na maibwe, kwa ajili ya Wayahudi ivo wazowele kuinawila, kila biga dimwe dikusola madebe matano egu sita. 7 Yesu akawalongela wala wasank'hani, "Yamemezeni mazi mabiga yano." Nao wakamemeza yala mabiga hadi kuchanya. 8 Kamala akawalongela, "Elo tekeni mumgalile mkulu wa kutala ndia." Nao wakateka wakamgalila. 9 Ila mkulu wa kutala ndia ivo akayalanza yala mazi akafika yabiduka yawa divai. Hamanyile divai iyo uko ilawile, mbali wala wasank'hani watekile yala mazi wakala wamanya uko yalawile. Ila mkulu akamtanga ila mzengele kunk'handa, 10 akamulongela "Want'hu wose, tenk'hu wakulava divai idamane, kamala watafi wakang'wa wakakolela wakugala divai ihile, mbali weye kugala divai idamane hadi haluse!" 11 Kino ndo kilagiso cha mwanduso cha Yesu akitendile uko kudibululu dya Kana ya Galilaya. Yesu kaulagisa utunyo wake, na wanahina wake wakamtogola. 12 Kamala ivo akomeleze ayo yose, Yesu hamwenga na Mamiake na ndugu zake na Wanahina wake, wakatelemka hadi Kapelinaumu, na wakakala uko kwa siku ndodo.

13 Ivo ifikile haguhi na sikunk'hulu ya Pasaka ya Wayahudi, Yesu akakwela kwita Yelusalemu. 14 Uko kui Kaya ya Mulungu akawafika Want'hu wakugula ng'ombe na ngoto na njiwa na wamwenga wakala mvisumbi wakuvunja hela. 15 Akabota mulugwa kwa ngozi kamala akawainga wose walawe hai Kaya ya Mulungu, hamwenga na ngoto na ng'ombe. Vila vila akazipwimwilusa hela zawe na kuzibidula meza za wala wakubadilisha hela. 16 Akawalongela wala wakalile wakugula njiwa, "Wahalaveni njiwa wenu hano, msekuitenda Kaya ya Tati yangu iwe gulilo." 17 Wanahina wake wakakumbukila vila maandiko ya Mulungu yalongile kuwa, "Mulungu, kuibweda kwangu kaya yako nakunikome." 18 Aho ndo Wayahudi wamwenga wakamuuza Yesu, "Ukudaha kutenda kilagiso kili cha kukangawaza chikulonda kuchilagisa unao ukulu wa kutenda yano yose?" 19 Yesu akawalongela, "Ibomoleni ino Kaya ya Mulungu, na nie naniizenge kaidi kwa siku nt'hatu." 20 Wala Wayahudi wakamuuza, "Kaya ino izengigwa kwa myaka alubaini na sita, weye naudaheze kuizenga kwa siku nt'hatu?" 21 Mbali Kaya ya Mulungu akalile akuilonga Yesu ikala mtufi wake. 22 Yesu ivo abwelezigwe muugima, wanahina wake wakakumbukila yala walongelwe, wakayatogola Maandiko ya Mulungu na yala wakalile wakulongeligwa na Yesu.

23 Yesu ivo akalile Yelusalemu kui sikunk'hulu ya Pasaka, Want'hu wengi wamtogola ivo waonile vilagiso ivo akalile akuvitenda. 24 Mbali Yesu kakala haitogole utogozi wawe kumwake kwa vila kakala akuwamanya ivo weli mumoyo. 25 Halondile kulongelwa kint'hu chochote kuhusu want'hu, kwa vila kakala akuvimanya vose vila vili mmioyo yawe.