1 Na ivo yamalile ayo, Yesu kakala akwita kusank'hana kila hant'hu mdi bululu da Galilaya. Halondile kwita Yudea kwa vila vilongozi wa Wayahudi wakala wakulonda kumkoma. 2 Na sikunk'hulu ya Wayahudi ya viheha yaani ya kukumbukila kuhamahama mdijangwa ikala ihaguhi. 3 Ivo ndugu zake Yesu wakamulongela, "Lawa hano wite Yudea, ili wanahina wako wadahe kuzilola mbui zako izo ukutenda. 4 Mnt'hu akulonda kumanyika kwa want'hu hakutenda mbuli zake kwa kuifisa, ikawa ukutenda mbuli izo ilagise kwa want'hu wose ili wakumanye." 5 Ndugu zake Yesu walonga ivo kwa vila hata ao hawamtogole. 6 Yesu akawalongela, "Mda wangu wa kufaya unk'hali haunafika, mbali kumwenu kila mda ukufaya. 7 Want'hu wa isi ino hawakudaha kuwehila mweye mbali wakunihila nie kwa vila nie huwalongela kuwa mbuli zawe ziha. 8 Mweye gendeni kui sikunk'hulu iyo, nie suukwita uko, kwa vila mda wangu unk'hali haunafika." 9 Nae ivo amalile kuwalongela ayo, akasigala uko Galilaya.

10 Mbali ndugu zake ivo wahalawile kwita kui sikunk'hulu, Yesu nae akaita bila ya want'hu kumanya. 11 Vilongozi wa Wayahudi wakala wakumulonda kui sikunk'hulu iyo, wakauza, "Akwani mnt'hu iyo?" 12 Kukala na mitagaso mingi mu uyama wa want'hu. Want'hu wamwenga hagati yawe wakalonga, "Ni mnt'hu kadamana." Wamwenga wakala wakulonga, "Bule! Yeye akuwahunila want'hu." 13 Mbali habule hata Mnt'hu imwe agezile kulonga mbuli zake halongozi ha want'hu wose kwa vila wakala wakuwaogoha vilongozi wa Wayahudi. 14 Sikunk'hulu iyo ivo ifikile hagati, Yesu nae akaita kui Kaya ya Mulungu na kuandusa kuwafunza want'hu. 15 Wayahudi wakakangawala na vila akalile akufunza na wakauza, "Mnt'hu ino kadahaze kumanya mbuli zino bila kufunzigwa?" 16 Niho Yesu akawalongela, "Mafunzo hufunza nie sio yangu, mbali ni yaila anitumile. 17 Mnt'hu akalonda kutenda yala akuyalonda Mulungu, naamanye kuwa mafunzo yangu yalawa kwa Mulungu egu nie huilongela tu mwenyewe. 18 Mnt'hu akuilongela mwenyewe akulonda utunyo wake mwenyewe, mbali mnt'hu akulonda utunyo wa ila amtumile, iyo ni mtogofu na mgati mmwake mbule uhuni wowote. 19 Vino, Musa hawenk'hile Malagilizo? Hata ivo habule hata mnt'hu imwe hagati yenu atozile Lagilizo. Ivo hangi mkulonda kunikoma?" 20 Aho want'hu wakamulongela, "Weye una chinyamkela! Niani akulonda kukukoma?" 21 Yesu akawalongela, "Kuna mbuli imwe niitendile, mweye mose mkakangawala. 22 Musa kawalagilizeni kuwaingiza ulungwana wanenu, mbali Lagilizo idyo hadilawile kwa Musa mbali kwa walala wenu. Na mweye siku zose mkuingiza wanenu ulungwana hata Siku ya Kuhumula. 23 Ikawa mnt'hu akuingizwa ulungwana mui Siku ya Kuhumula ili Lagilizo dya Musa disekubanangika, hangi mkuona maya kwa vila nimuhonya mnt'hu Siku ya Kuhumula? 24 Msekumulamula mnt'hu kwa kumulola ivo eli, mbali lamuleni gesa ivo ikulondigwa."

25 Want'hu wamwenga wa Yelusalemu wakala wakuiuza, "Vino, ila mnt'hu wakalile wakumulonda wamkome sio ino? 26 Elo loleni! Ahano akulonga halongozi ha want'hu wose na habule mnt'hu akumulongela mbuli yoyote. Vino, ikudahikana vilongozi wakumanya kuwa ino ndo Kilisito? 27 Kilisito akeza habule mnt'hu akulonda kumanya hant'hu alawile, mbali cheye chikumanya uko alawile mnt'hu ino." 28 Yesu ivo akalile akufunza Kui Kaya ya Mulungu akalonga kwa sauti nk'hulu, "Mweye mkunimanya na mkumanya uko hulawa. Nie sizile kwa udahi wangu mwenyewe, mbali yeye anitumile ni wa kweli, na mweye hamummanyile. 29 Mbali nie hummanya kwa vila nilawa kumwake, nae ndo anitumile." 30 Aho ndo want'hu wakalonda kumgwila, mbali habule mnt'hu agezile kumtoza kwa vila saa yake ikala hainafika. 31 Want'hu wengi hagati ya ula uyama wakamtogola, wakala wakalonga, "Vino, Kilisito muhonyi akeza naatende kilagiso kikulu nk'hani kuhuma atendile mnt'hu ino?"

32 Mafalisayo wawahulika want'hu wakutagasa mbuli za Yesu. Ao Mafalisayo na wakulu wa walava nt'hambiko wakawatuma wamizi waite wakamgwile Yesu. 33 Ivo Yesu akalonga, "Nie nink'hali na mweye kwa chipindi chidodo, kamala nanite kwa ila anitumile. 34 Namnilonde, mbali sekemnione, na hata hala hulonda kuwa nie, mweye hamkudaha kufika." 35 Vilongozi wa Wayahudi wakala wakulongelana, "Mnt'hu ino akulonda kwita kwani uko cheye hachikudaha kumkola? Vino, akulonda kwita kwa Wayahudi waihanganye na Wagiliki na kufunza uko?" 36 Yeye akumanisha mbwani kulonga, "Namnilonde mbali sakemnione, na hala hulonda kuwa, mweye hamkudaha kufika?"

37 Siku ya nk'homelezo ya sikunk'hulu iyo ikala siku nk'hulu. Yesu akatimalala akalonga kwa sauti nk'hulu, "Mnt'hu eli na nk'hilu eze kumwangu ang'we." 38 Gesa ivoyakulonga maandiko ya Mulungu, "Yoyote ila akunitogola nie, mito ya mazi ya ugima nayakulume kulawa muumoyo mmwake!" 39 Yesu ivo alongile yano kakala akumaanisha Muhe wa Mulungu ila wose wakumtogola yeye nawamuhokele. Kwa vila chipindi icho Muhe kakala hanaeza kwa vila Yesu kakala ank'hali hanatunyigwa.

40 Want'hu wamwenga hagati ya ula uyama wahulika mbuli izo, wakalonga, "Kweli mnt'hu ino ndo ila mulotezi wa Mulungu!" 41 Want'hu wamwenga wakalonga, "Ino ndo Kilisito!" Mbali wamwenga wakalonga, "Ikudahikaze Kilisito kulawa Galilaya? 42 Vino, maandiko ya Mulungu hayakulonga kuwa Kilisito naeze kulawa muukolo wa Daudi, na naalawe Betilehemu bululu akalile Daudi?" 43 Ivo elo, want'hu wakaitump'ha kwaajili ya Yesu. 44 Want'hu wamwenga walonda kumgwila, mbali habule agezile kumgwila.

45 Kamala wala waamizi wakabwela kwa wakulu wa walava nt'hambiko na Mafalisayo na ao wakawauza, "Hangi hamumgwilile?" 46 Waamizi wakawalongela, "Habule mnt'hu akudaaha kulonga gesa ivo akulonga mnt'hu ila!" 47 Mafalisayo wakawauza waamizi, "Vino, na mweye muhuniligwa? 48 Vino, hana kilongozi yoyote egu Mfalisayo amtogolile? 49 Mbali uyama uno wa want'hu umtogola kuno haukumanya Malagilizo ya Musa, ulongigwa yehile na Mulungu!" 50 Imwe hagati ya ao vilongozi kakala Nikodemo, ila akalile kamwitila Yesu ichilo, akawauza, 51 "Vino, Lagilizo dyetu dikumulamula mnt'hu ikawa hanategelezwa na kumanya idyo atendile?" 52 Nao wakamulongela, "Vino, weye nae ukulawa Galilaya? Haya genda kayapelembe maandiko ya Mulungu naweye nauone kuwa Galilaya hakulawa mulotezi wa Mulungu." 53 Kamala wakasegela kila mnt'hu akaita ukaya kumwake.