1 Siku dimwe Yesu ivo akalile akufosa, akamwona mnt'hu hakuona kulawila kwelekigwa kwake. 2 Wanahina wake wakamuuza, "Mfunza niani atendile zambi, mnt'hu ino egu welesi wake? Hadi akaelekigwa chipofu?" 3 Yesu akawalongela, "Ino hatendile zambi wala welesi wake. Mbali kaelekwa chipofu ili udahi wa Mulungu uoneke kufosela ino. 4 Chikulondigwa chizitende sank'hano zake ila anitumile ikawa chipindi chink'hali msanya, kwa vila chilo chikwiza, na habule mnt'hu akudaha kusank'hana mchipindi icho. 5 Chipindi chino ninkhali hano hai iisi, nie ni lumuli wa want'hu wa mui isi." 6 Ivo akomeleze kulonga ayo, akatema mate hasi akatenda tope na akamuhaka ila chipofu mmeso. 7 Akamulongela, "Genda kanawe mdibwawa dya Siloamu." Aho ila kipofu akaita akanawa, na akabwela akawa akuona. Mana ya zina dino ni, "Atumigwe." 8 Want'hu wa haguhi yake wala wakalile wakumanya kuwa aho haumwanduso kakala kipofu akulomba, wakauzana, "Vino, ino sio ila kipofu akalile akukala na kulomba?" 9 Wamwenga wakalonga, "Ndo yeye" Na wamwenga wakalonga, "Sio yeye, mbali kalingana naye" Mbali yeye mwenyewe akalonga, "Ndo nie." 10 Ivo wakala wakumuuza, "Meso yako yadahaze kuona?" 11 Nae akawalongela, "Mnt'hu ila akutangigwa Yesu katenda tope, akanihaka mmeso akanilongela genda Siloamu ukanawe, nikaita nikanawa, na nikandusa kuona." 12 Wakamuuza, "Akwani Mnt'hu iyo?" Nae akawalongela, "Manye uko aitile."

13 Kamala wakamgala iyo mnt'hu akalile kipofu kwa Mafalisayo. 14 Siku iyo Yesu atendile tope na kuyahonya meso ya ila akalile kipofu, ikala siku ya Kuhumula, 15 Niho Mafalisayo wakamuuza mnt'hu iyo, "kudahaze kuona?" Nae akawalongela, "Kanihaka matope mmeso, nikanawa na haluse huona." 16 Mafalisayo wamwenga wakalonga, "Mnt'hu ino halawile kwa Mulungu, kwa vila hakutoza Malagilizo ya siku ya Kuhumula." Na wamwenga wakalonga, "Akudahaze mnt'hu mbananzi kutenda ulagiso gesa uno?" Ivo kukawa na lumwago hagati yao. 17 Mafalisayo wakabwelela kumuuza ila kipofu, "Weye ndo uhonyigwe meso ukulongaze kuusu mnt'hu iyo?" Nae akawalongela, "Yeye ni mulotezi wa Mulungu." 18 Mbali vilongozi wa Wayahudi hawatogole kuwa mnt'hu iyo kakala kipofu, na vino haluse akuona, hadi ivo wawatangile welesi wake. 19 Wakawauza, "Vino ino ndo mwanenu mulongile eti kaelekigwa kipofu? Haluse akuona, elo kadahaze kuona?" 20 Welesi wake wakalonga, "Chikumanya kuwa ino ni Mwanetu, na kakala kaelekigwa kipofu. 21 Mbali kahonaze cheye hachimanyile, na hachikummanya niani amtendile hadi akuona na niani amuhoneze meso yake. Muuzeni yeye mwenyewe ni mkulu na akumanya kulonga mwenyewe." 22 Welesi wake walonga ayo kwa vila wawaogoha vilongozi wa Wayahudi, kwa vila Wayahudi wakala watogolelana kuwa mnt'hu akatogola kuwa Yesu ni kilisito, nawamulemese kuingila mui kaya ya kufikanila Wayahudi. 23 Ndo mana welesi wake wakalonga, "Iyo mnt'hu ni mkulu mgima, elo muuzeni mwenyewe." 24 Ivo elo wakamtanga lwa kaidi ila akalile kipofu, wakamulongela, mwink'he Mulungu utunyo! Cheye chikumanya ya kuwa mnt'hu ino akuhonyile anazambi. 25 Ila mnt'hu akalonga, "Nie simanyile ikawa yeye anazambi, mbali mbuli huimanya nie ni imwe tu, nikala kipofu mbali haluse huona." 26 Ivo wakamuuza, "kakutendela mbwani hadi ukahona meso yako?" Na katenda mbwani hadi meso yako yakaona? 27 Akawalongela, "Nie niwalongela kale mbali mweye hamnitegeleze, hangi mkulonda nilonge kaidi? Kwani mkulonda muwe wanahina wake?" 28 Haluse elo wakamdukana, wakalonga, "Weye ndo mwanahina wake, cheye wanahina wa Musa. 29 Cheye chikumanya ya kuwa Mulungu kakala kalonga na Musa, mbali mnt'hu hachimanyile uko alawile." 30 Ila Mnt'hu akawalongela, "Ino ni mbuli ya kukangawaza! Mweye hammanyile uko alawile, mbali yeye kayahonya meso yangu!" 31 Ila akalile kipofu akagendelela kulonga, "Chikumanya Mulungu hakuwategeleza want'hu wakutenda zambi, mbali akumtegeleza mnt'hu yoyote akawa akumfugamalila na kutenda yala akuyabweda Mulungu. 32 Tangu kulumbwa kwa isi hachina wahi kuona mnt'hu kamtenda mnt'hu aelekigwe kipofu akaona. 33 Ikawa mnt'hu ino halawile kwa Mulungu, halondile kudaha kutenda mbuli yoyote." 34 Wakamulongela, "Weye kwelekigwa ukawa na zambi, ukulonda kuchifunza cheye?" Ivo wakamuinga alawe mui kaya ya kufikanila Wayahudi.

35 Yesu ivo ahulikile kuwa wamlava mui kaya ya kufikanila Wayahudi, ivo amwonile akamuuza, "Vino, weye ukumtogola Mwana wa Mnt'hu?" 36 Iyo mnt'hu akalonga, "Mkulu, yeye niani? Nilongele ili nidahe kumtogola." 37 Yesu akamulongela, "Kumuona kale na ino ukulonga na weye ndo iyo." 38 Nae akalonga, "Hutogola Mndewa." Kamala kamfugamalila. 39 Yesu akalonga, "Niye niza mui isi ili kulamula, ili wala vipofu waone na wala wakuona wawe vipofu." 40 Mafalisayo wamwenga wakalile hamwenga naye wakahulika mbuli izo, wakamuuza, "Vino kweli cheye nao vipofu?" 41 Yesu akawalongela, "Ingi muwile vipofu hamulondile kuwa na zambi." Mbali kwa vila mkulonga, "Mukuona" Mmanye mnk'hali muna zambi.