1 Hakala na mnt'hu imwe zina dyake Lazalo, nae kakala mtamu. Yeye kakala akukala Besania hamwenga na Malia na Mata lumbu zake. 2 Ino Malia ndo ilaila amuhakile Mndewa mavuta ya bei nk'hulu yamp'hovya idamane na kuihangusa migulu kwa nyele zake. 3 Ivo ao mbudya zake Lazalo, wakagala nt'hume kwa Yesu kumulongela, "Mndewa, ila mbuyako ukumbweda ni mtamu nk'hani." 4 Mbali Yesu ivo ahulikile ayo, akalonga, "Utamu uo sekeumkome Lazalo, mbali ni kwa ajili ya utunyo wa Mulungu, ili Mwana wa Mulungu atunyigwe kufosela utamu uo." 5 Hamwenga na ayo, Yesu kakala na umbuya mkulu na Mata, Malia na Lazalo sekulu wawe. 6 Mbali Yesu ivo ahulikile kuwa Lazalo mtamu, akakala uko kaidi kwa siku mbili. 7 Kamala, ivo zifosile siku izo Yesu akawalongela wanahina wake, "Chibweleni Yudea." 8 Wanahina wake wakamuuza, "Mfunza Wayahudi wakala wakulonda kukukoma kwa kukutoa kwa maibwe, na weye ukulonda kubwela uko?" 9 Yesu akawalongela, "Vino, saa za msanya sio kumi na mbili? Want'hu wakagenda msanya hawakudaha kuikwala kwa vila akuona lumuli wa isi. 10 Mbali want'hu wakugenda ichilo wakuikwala kwa vila wabule lumuli mgati yawe wa kuwataza kuona." 11 Yesu ivo akomeleze kulonga mbuli izo, akawalongela, "Mbuya wetu Lazalo kagona mbali hwita kumwinula." 12 Wanahina wake wakamulongela, "Mndewa ikawa kagona nt'hongo naainuke tu." 13 Hata ivo Yesu kakala akuwalongela kuwa Lazalo kadanganika, mbali wanahina wake wakala wakugesa Yesu kalonga mbuli ya kugona nt'hongo tu. 14 Kamala Yesu akawalongela bila kufisa, "Lazalo kadanganika. 15 Mbali hudenk'helela kwaajili yenu kwa vila sikalile uko chipindi akudanganika, ili mdahe kutogola. Elo chiteni kumwake." 16 Tomasi akutangigwa pacha akawalongela wanahina wayage, "Cheye nayo chiteni chikadanganike hamwenga na Mndewa."

17 Yesu ivo afikile uko kafika Lazalo kazikigwa kale, ana siku ya kane tangu azikigwe. 18 Kibululu cha Besania kikala haguhi na Yelusalemu, utali wake gesa kilometa nt'hatu kulawa Yelusalemu. 19 Wayahudi wengi wakala weza kuwahani Mata na Malia kwa vila wadanganikilwa na mdodo wawe. 20 Mata ivo ahulike kuwa Yesu keza, akalawa akaita kumuhokela, mbali Malia kasigala hakaya. 21 Mata akamulongela Yesu, "Mndewa ingi ukalile hano mdodo wangu halondile kudanganika. 22 Mbali haluse humanya kuwa chochote icho ukulonda kumulomba Mulungu naakwink'he." 23 Yesu akamulongela, "Sekulu wako naabwele muugima." 24 Mata akamulongela, "Humanya ya kuwa naabwele muugima siku ya nk'homelezo ya want'hu kubwelezigwa muugima." 25 Yesu akamulongela, "Nie ndo ubwelezo wa muugima na ndo ugima. Mnt'hu akunitogola nie hata akadanganika, naawe na ugima. 26 Na kila mnt'hu mgima na akunitogola, sekeadanganike mbwi. Vino, ukuitogola ino?" 27 Mata akamulongela, "Ena Mndewa! Nie hutogola kuwa weye ndo Kilisito usaguligwe na Mulungu, Mwana wa Mulungu yeye akwiza mui isi."

28 Mata ivo akomeleze kulonga ayo, akaita kumtanga Malia lumbudyake hant'hu habule want'hu na kumulongela, "Mfunza ahano akukutanga." 29 Malia ivo ahulikile ivo, akainuka hima akaita kwa Yesu. 30 Yesu kakala hanaingila kukibululu, mbali kakala ank'hali hant'hu hala afikane na Mata. 31 Wala Wayahudi wakalile hamwenga na Malia haikaya yake wakumuhani ivo waonile kainuka na kulawa kunze hima, wakamkola wakugesa akwita kula kudikabuli kulilila uko. 32 Malia ivo afikile hant'hu hala akalile Yesu, akatumbala mavindi yake hasi na kulonga, "Mndewa ingi ukalile hano sekulu wangu halondile kudanganika." 33 Yesu ivo amuonile Malia akulila, na wala Wayahudi wezile hamwenga nayo nao wakulila, akaingilwa na usungu na kuihisi vihile. 34 Kamala akawauza, "Mumzika kwani?" Wakamulongela, "Mndewa inzo uhaone." 35 Yesu akalila. 36 Aho Wayahudi wakalonga, "Loleni ivo ambwedile Lazalo." 37 Mbali want'hu wamwenga hagati yawe wakalonga, "Vino ino amuhonezile kipofu, vino, halondile kudaha kumtenda ino asekudanganika?"

38 Ivo Yesu akawa akuugula kaidi mumoyo mmwake, akafika kudikabuli. Idyo kabuli dikala mp'hango digubikigwe na ibwe haumwingililo wake. 39 Yesu akalonga, "Disegezeni ibwe idyo." Mata Lumbudyake ila adanganike, akamulongela, "Mndewa kaandusa kale kununk'ha, kwa vila tangu ivo azikigwe ana siku ya kane dielo." 40 Yesu akamulongela, "Sikulongele kuwa ukatogola nauone utunyo wa Mulungu?" 41 Ivoelo, wakadisegeza dila ibwe kulawa mudikabuli, Yesu akalola kuchanya kuulanga, akalomba, akalonga "Tata hukwink'ha hewala kwa vila kunihulika. 42 Humanya ya kuwa weye ukunihulika siku zose, mbali nilonga yano kwaajili ya pelela dya want'hu wano, ili wadahe kutogola kuwa weye ndo unitumile." 43 Ivo akomeleze kulonga ayo, Yesu akatanga kwa sauti nk'hulu, "Weye Lazalo! Lawa kunze." 44 Ila akalile kadanganika akalawa kunze, kuno kafungigwa sanda mmigulu na mmikono, na cheni chake chigubikigwa na kitambala. Yesu akawalongela, "Mfunguleni mulekeni agende."

45 Ivo Wayahudi wengi wakalile weza na Malia, ivo waonile yala atendile Yesu, wakamtogola. 46 Mbali wamwenga hagati yawe wakaita kwa Mafalisayo na kuwalongela mbuli zose Yesu atendile. 47 Ivo elo, wakulu wa walava nt'hambiko na Mafalisayo waika chitala na kulonga, "Chitende mbwani? Kwa vila mnt'hu ino akutenda vilagiso vingi nk'hani. 48 Chikamuleka agendelele kutenda vilagiso vino, kila mnt'hu naamtogole, na wakulu wa Kilumi naweze kuchihalavila ukulu wetu mui Kaya yetu ya Mulungu na isi yetu." 49 Imwenga hagati yawe akutangigwa Kayafa yeye kakala mulava nt'hambiko mkulu mwaka uo, akalonga "Mweye hammanyile chint'hu chochote. 50 Hammanyile kuwa ni muhavu mnt'hu imwe adanganike kwa ajili ya want'hu wengi, kuliko isi yose ipugutiswe?" 51 Yeye halongile ayo kwa ivo akulonda yeye, mbali kwa vila kakala mulava nt'hambiko mkulu mwaka uo, kaona mbuli kuwa Yesu naadanganike kwa ajili ya isi ya Wayahudi, 52 na sio kuwa naadanganike kwaajili ya Wayahudi muhala, mbali kwa ajili ya wana wa Mulungu waitump'hile, ili kuwagala hamwenga na kuwatenda wawe wamwe. 53 Ivo tangu siku idyo waandusa kulonda nzila ya kumkoma Yesu. 54 Ivo elo, Yesu akawa hagendile kwa kuoneka na Wayahudi, mbali akahalawa hant'hu aho akaita haguhi na chiwala, kukibululu ukutangigwa Efulaimu. Akakala uko hamwenga na wanahina wake. 55 Sikunk'hulu ya pasaka ya Wayahudi ikala haguhi, want'hu wengi wakala wakulawa mzikaya zao na kwita Yelusalemu ili waisunt'he kwaajili ya sikunk'hulu ya pasaka. 56 Want'hu wakala wakumulonda Yesu, nao ivo waiduganye hamwe Kui Kaya ya Mulungu, wakauzana, "Mkuonaze? Vino, mnt'hu ino sekeeze mui sikunk'hulu ino?" 57 Wakulu wa walava nt'hambiko na Mafalisayo wakalava ndagilizi kuwa mnt'hu yoyote akamanya hant'hu eli Yesu awalongele ili wamgwile.