1 Aho haumwanduso ivo ikalile vint'hu vose havinalumbwa kukala na Mbuli, na iyo Mbuli kalala hamwenga na Mulungu, na iyo Mbuli kalala Mulungu. 2 Nae Mbuli kakala hamwenga na Mulungu tangu kumwanduso. 3 Vint'hu vose vilumbigwa kufosela iyo Mbuli, na habule kint'hu chochote chilumbigwe bila yeye. 4 Mgati mmwake mkala ugima, na ugima uo ni lumuli kwa want'hu. 5 Na lumuli uo ukumulika mdiziza na ziza hadidahile kuuhuma lumuli.

6 Kukala na Mnt'hu imwe atumigwe na Mulungu, zina dyake Yohana. 7 Yohana keza kuwalongela want'hu mbuli ya iyo lumuli. Keza ili kwa kuwalongela kwake want'hu wose watogole. 8 Yohana hakalile uo lumuli, mbali keza kuwalongela want'hu mbuli ya uo lumuli. 9 Uo ndo lumuli wa kweli, wiza muiisi kuwamulikila want'hu wose. 10 Iyo Mbuli kakala mui isi, kufosela iyo Mbuli vint'hu vose vilumbigwa, mbali want'hu hawammanyile. 11 Keza kwa want'hu wake, mbali want'hu wake hawamuhokele. 12 Mbali wala wamuhokele na kumtogola akawenk'ha udahi wa kutendeka kuwa wana wa Mulungu. 13 Wawa wana wa Mulungu sio kwa nzila ya kwelekigwa na welesi egu kwa vila want'hu wakubweda kuwa na wana, na hawaelekigwe kwa vila mnt'hu kalonda kuwa na mwana mbali ni Mulungu mwenyewe kawatenda wawe wanake.

14 Mbuli katendeka mtufi na akakala hamwenga na cheye, na cheye chikauona utunyo wake, na utunyo wake gesa wa Mwana dumwe akulawa kwa Tata kamema wende wa Mulungu na kweli.

15 Yohana akawalongela want'hu mbuli za mnt'hu iyo, kakala akulonga kwa izi kulu, "Ino ndo ila niwalongeleni, ‘Naeze kulongozi kumwangu mnt'hu mkulu kuhuma nie, kwa vila kakala uko tangu nie sihali.’"

16 Kulawana na wingi wa ubwedo wake, cheye chose chihokela wende wa Mulungu kaidi na kaidi. 17 Kwa vila Malagilizo yeza kufosela Musa, mbali wende wa Mulungu na ukweli viza kufosela Yesu Kilisito. 18 Habule Mnt'hu yoyote awahile kumuona Mulungu, mbali Mwana adumwe ila ahaguhi na Tata, iyo ndo amtendile Tata amanyike.

19 Ino ndo nt'hume ailongile Yohana chipindi vilongozi wa Kiyahudi kula Yelusalemu ivo wawalagilizile walava nt'hambiko na Walawi kwita kwa Yohana wakamuuze, "Weye niani?"

20 Yohana halemile mbali akawalongela, "Niye sio Kilisito mgombozi." 21 Wakamuuza, "Ivo elo weye ni niani? Egu weye ni Eliya?"

Yohana akalonga aka nie sio?

Wakamuuza egu weye ni ila Mlotezi alongigwe naeze?

Akalonga "Aka nie siyo." 22 Kamala wakamuuza, "Weye niani? Chilongele Ili chipate cha kwita kuwalongela wala wachitumile. Elo chilongele weye niani?" 23 Yohana akawalongela kuwa nie ndo ila muhulike mbuli zake kulawa kwa Isaya mulotezi wa Mulungu, alongile,

"Sauti ya mnt'hu ikutanga mchiwala,

Igololeni nzila ya kufosela Mndewa."

24 Want'hu ao wakala watumigwa na Mafalisayo, 25 wakamuuza Yohana, "Ikawa weye sio kilisito, wala sio Eliya na wala sio mulotezi wa Mulungu ila alongigwe akwiza hangi ukubatiza?" 26 Yohana akawalongela, "Niye hubatiza kwa mazi, mbali hagati yenu hana mnt'hu mweye hamummanyile. 27 Iyo naeze halongozi hangu, mbali nie sikuagizwa hata kufungula ngozi ya vilatu vake."

28 Mbuli zino zose zilawila uko Besania, mwambo ya mto Yolidani, hant'hu Yohana akalile akubatiza.

29 Siku ya kaidi, Yohana akamuona Yesu akumwizila halongozi hake na Yohana akalonga, "Ino ndo mwanangoto wa Mulungu akuhalava zambi za want'hu wose. 30 Ino ndo ila niwalongeleni halongozi hangu naeze mnt'hu mkulu kuhuma nie, kwa vila yeye kakala auko tangu nie sinaeza! 31 Nie mwenyewe aho haumwanduso simmanyile, mbali niza kubatiza want'hu kwa mazi, ili want'hu wa Izilaeli wadahe kummanya." 32 Kamala Yohana akalonga vino, "Nimuona Muhe wa Mulungu ukatelemka kulawa kuulanga gesa njiwa, na akakala mchanya yake. 33 Nie simmanyile mbali ila anitumile nie nibatize kwa mazi kanilongela, ‘Mnt'hu ila ukulonda kumuona akutelemkelwa na Muhe wa Mulungu kulawa kuulanga gesa njiwa na kutua mchanya yake, iyo ndo akulonda kubatiza kwa Muhe wa Mulungu.’ 34 Nie niona mbuli iyo na huwalongeleni, ino ndo Mwana wa Mulungu."

35 Siku ya kaidi yake, Yohana kakala uko kaidi hamwenga na wanahina wake waidi. 36 Ivo amuonile Yesu akufosa, akalonga, "Loleni! Ino ndo mwanangoto wa Mulungu." 37 Wala wanahina waidi ivo wamuhulikile Yohana akulonga ayo, wakamkola Yesu. 38 Yesu akabiduka kunyuma, akawaona wala wanahina wakumkola akawauza, "Mkulonda mbwani?" Nao wakamuuza.

"Mfunza ukukala kwani?" Labi ikumanisha mfunza. 39 Yesu akawalongela, "Inzoni na mweye namuhaone." Ivo wakaita wakahaona hant'hu aho. Kwa vila ikala saa kumi ya dihungile ivo awakabili, wakagona aho siku iyo. 40 Andelea ndugu yake Simoni Petulo, kakala imwe wa wala waidi wamuhulikile Yohana akulonga ivo, na akamkola Yesu. 41 Andelea ivo alekane na Yesu, kint'hu cha mwanduso atendile Andelea ni kumulonda Saimoni ndugu yake na akamulongela, "Chimuona Masihi yani asaguligwe na Mulungu." 42 Kamala Andelea akamgala Saimoni kwa Yesu. Yesu ivo amulolile Simoni, akalonga, "Weye ni Simoni mwana wa Yohana. Nautangigwe Kefa" Kwa kigiliki ni Petulo, yani, "Talawe."

43 Siku ya kaidi yake, Yesu akalamula kwita kudibululu dya Galilaya, na uko akamfika mnt'hu imwe zina dyake Filipu, akamulongela, "Nikole" 44 Iyo Filipu na ndugu yake Petulo wakala wakaya wa bululu dya Betisaida. 45 Filipu akamfika Nasanaeli na akamulongela, "Chimfika Yesu wa Nazaleti mwana wa Josefu ila Musa kandika mbuli zake mvitabu va Malagilizo na ila walotezi wandikile mbuli zake." 46 Nasanaeli akamuuza Filipu, "Vino, ikudahika kint'hu kidamane kulawa Nazaleti?" Filipu akamulongela, "Inzo ulole!" 47 Yesu ivo amuonile Nasanaeli akumwizila, akalonga, "Ino ni msingili wa Izilaeli kweli kweli, na abule uhuni mgati mmwake!" 48 Nayo Nasanieli akamuuza Yesu, "Kudahaze kunimanya?" Yesu akamulongela, "Nikuona ivoukalile hasi ya mti wa mkuyu tangu Filipu hanakutanga."

49 Nasanaeli akamulongela, "Mfunza, weye ni Mwana wa Mulungu. Weye ndo Mwene wa Izilaeli!"

50 Yesu akamulongela Nasanaeli, "Kwa vila kutogola vila nikulongele nikuona tangu unk'hali hasi ya mti wa mkuyu. Nauone mbuli nk'hulu kuhuma izo." 51 Yesu akawalongela, "Huwalongela ukweli, mweye namuone ulanga ukagubuka na wasank'hani wa kuulanga kwa Mulungu wakukwela mchanya na kutelemka hasi kwa ajili ya Mwana wa Mnt'hu."