1 Yesu akagendelela kulonga, "Niwalongeleni ayo yose ili mgangamale msekwiza kumulema Mulungu. 2 Want'hu nawawaingeni mzikaya za kufikanila Wayahudi, na kipindi kikwiza cha kila mnt'hu akulonda kuwakoma naamanye kuwa akumsank'hanila Mulungu. 3 Nao nawawatende yano, kwa vila hawammanyile Tata na wala hawanimanyile nie. 4 Mbali niwalongeleni mbuli zino ili mda ukafika mkumbuke kuwa nie niwalongeleni kale."

Siwalongele ayo tangia ha ukwandusa, kwa vila nikala na mweye. 5 Elo nie hwita kumwake ila anitumile, mbali habule hata imwe wenu akuniuza, "Ukwitahi?" 6 Mbali kwa vila niwalongela ayo, mioyo yenu imema usungu. 7 Mbali nie huwalongeleni kweli, muhavu nie nisegele kwa vila ikawa sikusegela iyo Mtazi sekeeze kumwenu, mbali nikasegela nanimtume kumwenu. 8 Naye akeza naawalagise want'hu isi kuhusu zambi na kutogolwa kulongozi kwa Mulungu na ulamuzi. 9 Watenda zambi kwa vila hawakunitogola. 10 Muhe wa Mulungu naawalagise kwa mbuli ya kutogoligwa kwangu halongozi ha Mulungu kwa vila hwita kwa Tata, na mweye sekemnione kaidi, 11 kwa vila Shetani mkulu wa Isi ino kalamuligwa kale, iyo mtazi naawalagise want'hu wa isi ino vila ulamuzi wawe ivo wili sio wa kweli. 12 "Nik'hali nnayo mengi ya kuwalongeleni, mbali kwa haluse hamkudaha kuyahokela na kuyakombaganya. 13 Mbali akeza iyo Muhe wa kweli naawalongoze mna ikweli yose, mbali sekealonge kwa udahi wake, mbali naalonge ayo ayahulikile kulawa kumwangu na kuwalongeleni mbuli zikulonda kulawila kulongozi. 14 Yeye naanitunye nie kwa vila naawalongeleni, yala akulonda kuyahulika kulawa kumwangu. 15 Vose ivo eli navo Tata, ni vangu, ndo mana nilonga kuwa iyo Muhe naawalongeleni yala akulonda kuyahulika kulawa kumwangu."

16 "Chink'hali chipindi chidogo na mweye sekemnione, na chink'hali chipindi chidogo na mweye namnione." 17 Ivo Wanahina wamwenga wakauzana, "Akumanisha mbwani ivo akulonga ank'hali chipindi chidogo sekechimuone na chink'hali chipindi chidogo nachimuone?" Na vilavila akulonga, "Kwa vila hwita kwa Tata?" 18 Akalonga chink'hali chipindi chidogo hachikumanya akulonga mbwani. 19 Yesu akamanya kuwa walonda kumuuza, ivo akawalongela, "Vino, mkuuzana yala nilongile nink'hali chipindi chidogo sekemunione, na chink'hali chipindi chidogo namunione? 20 Huwalongeleni kweli, mweye namlile na kuomboleza, mbali want'hu wa isi nawabwede, namwingile usungu mbali usungu wenu naubiduke denk'ho. 21 Mda wa mwanamke kweleka ukafika akuona usungu kwa vila mda wake ufika, mbali akeleka akamala akuuzimiza usungu ula kwa vila akudenk'helela mnt'hu kaelekigwa mui isi. 22 Mweye mna usungu haluse, mbali naniwaone kaidi, na mweye namdenk'helele, na denk'ho idyo habule mnt'hu akulonda kudaha kuwasegezela kumwenu." 23 Siku iyo sekemnilombe chochote. Kweli huwalongeleni chochote mkulonda kumulomba Tata gesa ivo hulonda naawenk'heni. 24 Hadi haluse hamnalomba chochote kwa ukulu wangu. Lombeni na mweye namwink'higwe ili denk'ho dyenu ditimie.

25 Niwalongeleni mbuli zino kwa visingilimo. Mda ukwiza sekenilonge na mweye gesa ivo, mbali nanilonge na mweye bila kufisa mbuli za Tata. 26 Siku iyo namulombe gesa ivo mkunitogola nie, na sekeniwalongele, kuwa nanimlombe Tata kwa ajili yenu, 27 kwa vila Tata mwenyewe akuwabweda mweye, kwa vila mweye mnibweda nie na mtogola kuwa nilawa kwa Mulungu. 28 Nie nilawa kwa Tata, nikeza mui isi, na haluse huhalawa mui isi na hubwela kwa Tata. 29 Ivoelo Wanahina wakamulongela, "Ahaa, elo ukulonga bila kufisa hukutumia visingilimo. 30 Elo cheye chikumanya kuwa weye ukumanya kila chint'hu, na hukulondigwa kuuzwa chochote, ivo elo chitogola kuwa kulawa kwa Mulungu." 31 Yesu akawauza, vino, elo mtogola? 32 Mda ukwiza, na ufika kale, ula mweye mose namuimwage kila mnt'hu naaite ukaya kumwake, na nie namnileke nidumwe. Mbali nie sio nidumwe, kwa vila Tata ahamwenga na nie. 33 Niwalongeleni mbuli zino ili muwe na utindiwazi kwa kuiyunga na nie. Mui isi nampate mahenyeko, muigangamaze kwa vila nie nizihuma nguvu bananzi za isi ino.