ይሁዳ ካትያ አብያ
(2 ኦዱዋ 13:1—14:1)
1 ናባጻ ናኣ እዮርባም ካተቴዳ ታማነ ሆስፑን ላይን አቢይ ይሁዳን ካተቴዳ። 2 አቢይ የሩሳላመን ሄዙ ላይ ካተቴዳ። አ ዳያ አበሰሎማ ናት ናቶ፤ እ ሱንይ ማእኮ። 3 አፐ ካሰ አ አዉ ኦዳ ናጋራቱዋ ኡባ ኦዳ፤ አ ዎዛናይ አ አዉዋ አዉዋ አዉዋ ዳዊታ ዎዛናይ ፖሎ ግዴዳዋዳን መና ጎዳዉ፥ ባረ ጾሳዉ ፖሎ ግድቤና። 4 ግዶፐነ፥ አፐ ጉይያን የሩሳላመን ካተታና ማላነ የሩሳላመ ሳሮተ ናጋና ማላ፥ መና ጎዳይ አ ጾሳይ ዳዊታ ድራዉ አቢያዉ እት አቱማ ናኣ እሜዳ።15:4 1 ካታ. 11:36 5 ጾሳይ ሀዋ ኦዳ ጋሶታይ፥ ዳዊተ መና ጎዳ ስንን ሱረባ ኦዳ፤ ሂትያ ኦርዮና ቦላ ናጋራ ኦንፐ አትና፥ ባረ ደኡዋ ላይ ኡባን መና ጎዳ አዛዞቱዋፐ እትባነ ናገናን አግቤና።15:5 2 ሳሜላ 11:1-27 6 አቢይ ደኤዳ ላይ ኡባን ሮብኣማ አሳናነ እዮርባማ አሳና ኦለቲደ ደኤድኖ።
7 አቢይ ሀኔዳ ሀራባይነ እ ኦዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። አቢይነ እዮርባም ኦለቲደ ደኤድኖ። 8 አቢይ ሀይቂደ ባረ ማይዛን ጋከቴዳ፤ እ ዳዊታ ካታማን ሞገቴዳ። አ ሳኣን አ ናአይ አሳይ ካተቴዳ።
ይሁዳ ካትያ አሳ
(2 ኦዱዋ 15:16—16:6)
9 እስራኤልያ ካቲ እዮርባም ካተቴዳ ላታማን ላይን አሲ ይሁዳን ካተቴዳ። 10 አሲ የሩሳላመን ኦይታማነ እት ላይ ካተቴዳ። አ አዉዋ ዳይ ሱንይ ማእኮ፤ አ አበሰሎማ ናቶ። 11 አሲ ባረ ማይዛ አዉ ዳዊተ ኦዳዋዳን፥ መና ጎዳ ስንን ሱረባ ኦዳ። 12 ጎይኖ ዎጋ ኦደ አቱማ አሲ ሻርሙጽያ አቱማ አሳቱዋ አሳይ ባረ ቢታፐ ይሴዳ፤ አፐ ካሰ ደኤዳ ካተቱ መዳ ኤቃ ምስለቱዋ ኡባ ቆለረደ ኦሌዳ። 13 አ አዉዋ ዳያ ማእካካ አሼሮ ግያ ጾሳትዉ ቱና ኤቃ ምስልያ መዳ ድራዉ፥ ካትያ አቶ አ ጌተትያ ቦንቹዋፐ እዞ ድጌዳ። አሲ ሄ ኤቃ ምስልያ ቃንጸሬደ፥ ቀድሮና ዛንጋራን ጹጌዳ። 14 አሲ ጎይንያ ቃ ሳኣ ይሰናን አጎፐነ፥ እ ባረ ደኤዳ ላይ ኡባን መና ጎዳዉ ዎዛናፐ አማነትያ አሳ ግዲደ ደኤዳ። 15 እነ አ አዉ ጾሳዉ ዱማይ ዎዳ ብራ፥ ዎርቃነ ሀራ ሚሻቱዋ አሂደ፥ ጾሳ ጌሻ ጎልያ ግዶን ዎዳ።
16 ይሁዳ ካቲ አስነ እስራኤልያ ካቲ ባእሽ፥ ባረንቱ ካተቴዳ ላይ ኡባን ኦለቴድኖ። 17 እስራኤልያ ካቲ ባእሽ ይሁዳ ቦላ ዎራጄዳ፤ ማዪደ ይሁዳ ካትያ አሳ ቢታፐ ኦንነ ገለናዳንነ ከሰናዳን ተአናዉ ራማ ካታማ ዩሹዋ ምንሲደ ግምቤዳ።
18 ሄዋ ጋሱዋን ካቲ አሳይ መና ጎዳ ጌሻ ጎልያንነ ባረ ካትያ ጎለን አቴዳ ዎርቃነ ብራ ኡባ ከሲደ፥ ባረ ኦሳንቻቱ ኩሽያን ዎዳ። ሄዝያና ናኣ ናኣ፥ ጻብርሞና ናአዉ፥ ዳማስቆ ካታማን ደእያ ሶርያ ካትያ በንሀዳዳዉ፥ እሞታ ኦደ የዲደ ሀዋዳን ያጌዳ፦ 19 "ካሰ ታ አዉዋናነ ነ አቡና ጫቀቴዳዋዳን፥ አነ ታናናነ ኔናና ጫቀቶይተ። በአ፥ ሀዋ ብራነ ዎርቃ ታን ነዉ እሞታ እማናዉ የዳድ። እስራኤልያ ካቲ ባእሽ ባረ ኦላንቻቱዋ ታ ጋድያፐ ከሳና ማላ፥ ኔን ካሰ አናና ጫቀቴዳ ጫቁዋ ኮላ" ያጌዳ።
20 በንሀዳድ ካቲ አሲ ጌዳዋ ማዪደ፥ ባረ ኦላ ጋዳዎቱዋ እስራኤልያ ካታማቱዋ ኦላናዉ የዴዳ። ኡንቱንቱ አይኖ፥ ዳናነ አቤል-ቤትማእካ ጌተትያ ካታማቱዋ፥ ጋሊላ አባ ማታን ደእያ ቢታ፥ ንፍታሌማ ቢታናካ ጉጂደ ኡባ ጾኔድኖ። 21 ካቲ ባእሽ ሄዋ ስሲደ፥ ራማ ካታማ ግምቢያዋ አጊደ፥ ትርጻ ካታማ ቤዳ።
22 ሄዋፐ ጉይያን ካቲ አሲ ይሁዳን ደእያ አሳ ኡባ አዛዚና እቱነ አተናን ደንዲደ፥ ባእሽ ካሰ ያን ጎኤትያ ሹቻነ ም ራማፐ ኬዜድኖ። ካቲ አሲ ምጽጳነ ቢንያማ ቢታን ደእያ ገባአ አን ምንሲደ ግምቤዳ።
23 አሲ ሀኔዳ ሀራባይ፥ አ ምኖተ ኡባይ፥ እ ኦዳባይ ኡባይነ እ ኬጼዳ ካታማቱ ይሁዳ ካተቱ ታርክያ ማጻፋን ጻፈት ኡቴድኖ። ሽን እ ጭሜዳ ዎደ ገድያ ሳከቴዳ። 24 አሲ ሀይቂደ፥ ባረ ማይዛን ጋከቴዳ፤ ባረ ማይዛ አዉዋ ዳዊታ ካታማን ሞገቴዳ። አ ናአይ ዮሳፌጸ አ ሳኣን ካተቴዳ።
እስራኤልያ ካትያ ናዳባ
25 ይሁዳ ካቲ አሲ ካተቴዳ ላኤን ላይ እዮርባማ ናአይ ናዳበ እስራኤላን ካተቴዳ፤ እ እስራኤልያ ቢታን ላኡ ላይ ካተቴዳ። 26 ናዳበ ካሰ ባረ አዉዋ ኦግያነ እስራኤልያ አሳ እ ኦስሴዳ አ ናጋራ ኦግያን ሀመቲደ፥ መና ጎዳ ስንን ኢታባ ኦዳ።
27 ይሳኮራ ዛርያ ግዴዳ አኪያ ናአይ ባእሽ ናዳባ ቦላ ማቀቴዳ። ሄ ዎደ ናዳብነ አ ኦላንቻቱ ፕልስጼማን ደእያ ግባቶና ካታማ ዶዲደ ደኢኖ። 28 ይሁዳ ካቲ አሲ ካተቴዳ ሄዘን ላይን ባእሽ ናዳባ ዎደ፤ አ ሳኣን እ ባረዉ ካተቴዳ። 29 ባእሽ ካዉተ ዶሞ ሳናካ እዮርባማ ሶ አሳ ኡባ ዎ ዉርሴዳ፤ መና ጎዳይ ሴሎፐ ዬዳ ባረ ቆማ ትምቢትያ ኦድያ አኪያ ባጋና ኦዴዳዋዳንካ እዮርባማ ጎልያ አሳይ ኡባይ ሀይቂ ዉሬዳ።15:29 1 ካታ. 14:10 30 ሄዌ ሀኔዳዌ እዮርባም ባረ ሁጲያዉ ኦዳ ናጋራ ድራሳ፥ እስራኤልያ አሳ እ ኦስሴዳ ናጋራ ድራሳነ መና ጎዳ እስራኤልያ ጾሳ ሀንቀዳ ድራሳ።
31 ናዳበ ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 32 ይሁዳ ካትያ አስነ እስራኤልያ ካትያ ባእሽ ባረንቱ ካዉተ ላይ ኡባን ኦለቲደ ደኤድኖ።
እስራኤልያ ካትያ ባእሻ
33 ይሁዳ ካቲ አሲ ካተቴዳ ሄዘን ላይን አኪያ ናአይ ባእሽ እስራኤልያ አሳ ኡባ ቦላ ካተቴዳ፤ እ ትርጻ ካታማን ላታማነ ኦይዱ ላይ ካተቴዳ። 34 እዮርባም እስራኤልያ አሳ ኦስሴዳ ናጋራ ኦደነ አ ኦግያን ሀመቲደ፥ ባእሽ መና ጎዳ ስንን ኢታባ ኦዳ።