ሶሎሞነ ኤራ ፕርዳ ፕርዴዳ
16 እት ጋላስ ላኡ ሻርሙጻቱ ካትያ ሶሎሞነኮ ዪደ፥ አ ስንን ኤቄድኖ። 17 ኡንቱቱፐ እትና ሀዋዳን ያጋዱ፤ "ታ ጎዳዉ፥ ታንነ ሀ ምሽራታ እት ጎለን ደኤቶ። ያን እዛ ታናና እትፐ ደእሽን፥ ታን እት ናኣ የላድ። 18 ታ ናአይ የለቴዳ ሄዘን ጋላስ ሀ ምሽራታካ እት ናኣ የላዱ። ሄ ጎለን ኑ ላኡዋፐ ሀራ አሳይ ኦንነ ባዋ።
19 "እት ጋላስ ቃማ እዛ አ ቦላ ግሴዳ ድራዉ፥ ሀ ምሽራት ናአይ ሀይቄዳ። 20 አ ቃማ ብላሄ ደንዳደ፥ ታን ነ ቆማታ ገምእሻ ደእሽን፥ ታ ናኣ ታ ምይያፐ አካደ አ ባረ ክዉዋን ዎደ፥ ባረ ሀይቄዳ ናኣ ታ ክዉዋን ዎዱ። 21 ጉራን ታን ታ ናኣ ንናዉ ደንዴዳ ዎደ፥ ሀይቂክቼዳ! ሽን ታን ዎንታ ፖኡዋን ትሽ ኡዳደ ጼልያ ዎደ፥ ታን የሌዳ ናኣ ግደና" ያጋዱ።
22 የንኮ ምሽራታ ሀዋዳን ያጋዱ፤ "ቱይት! ደኡዋን ደእያዌ ታ ናኣ፤ ሀይቄዳዌ ነዋ" ያጋዱ።
ሽን ኮይሮ ምሽራታ ዛራደ፥ "ቱይት፥ ሀይቄዳዌ ነ ናኣ፤ ፓጻ ደእያዌ ታ ናኣ" ያጋዱ። ሄዋዳን ጊደ ኡንቱንቱ ካትያ ስንን ፓሉመቴድኖ።
23 ካቲ ሶሎሞነ ሀዋዳን ያጌዳ፤ "ሀ ምሽራታ፥ ‘ፓጻ ደእያ ናአይ ታዋ፤ ሀይቄዳዌ ነዋ’ ያጋዉ፤ የንኮራካ፥ ‘ቱይት! ነ ናአይ ሀይቄዳዋ፤ ታ ናአይ ፓጻ ደእያዋ’ ያጋዉ" ያጌዳ።
24 ካቲ፥ "ታዉ ማሻ አኪደ ዪተ" ያጌዳ፤ ኡንቱንቱ አዉ ማሻ አሄድኖ። 25 ካቲ፥ "ደኡዋን ደእያ ናኣ ላኡ ከሲደ ጳልቂተ፤ እት ባጋ ሀንዉ እምተ፤ እት ባጋ ዬንዉ እምተ" ያጊደ አዛዜዳ።
26 ሀ ፓጻ ደእያ ናአይ ኢዋ ግዴዳ ምሽራታ ባረ ናአዉ ምሸታደ ካትያ፥ "ሀይ ታ ጎዳዉ፥ ፓጻ ደእያ ናኣ እዝዉ እማ! አ ዎፓ!" ያጋዱ።
ሽን የንኮራ፥ "ታዉካ ነዉካ ግዶፖ፤ ላኡ ከሲደ ጳልቀቶ" ያጋዱ።
27 ሄዋፐ ጉይያን ካቲ፥ "ሀ ፓጻ ደእያ ናኣ ሀ ኮይሮ ምሽራትዉ እምተ፤ ናኣ ዎፕተ። ሀና ናኣ ዳዮ!" ያጊደ ፕርዴዳ።
28 እስራኤልያ አሳይ ኡባይ ካቲ ፕርዴዳ ፕርዳ ስሴዳ ዎደ፥ ኡንቱንቱ ካትያ ሎይ ቦንቼድኖ። አያዉ ጎፐ፥ አሳዉ ጽሎተን ፕርዳናዉ አዉ አዳ ኤራተይ ጾሳፐ እመቴዳዋ በኤድኖ።