1 Reis 3

ኮይሮ ላይቱዋ

1 ሶሎሞነ ግብጼ ካትያና ዙፐቲደ፥ አ ናቶ ባረዉ ማቼ ኦ አኪደ ባረ ካትያ ጎልያ፥ መና ጎዳ ጌሻ ጎልያነ የሩሳላመ ዩሹዋ ድርሳ ግምቢደ ፖላናዉ፥ እዞ ዳዊታ ካታማ አሄዳ። 2 መና ጎዳ ሱንዉ ጌሻ ጎሊ ብሮ ኬጸትቤና ድራዉ፥ አሳይ ሄ ዎደ ጎይንያ ቃ ግሹዋን ያርሺደ ታኬዳ። 3 ሶሎሞነ መና ጎዳ ሲቅያዋ ባረ አዉዋ ዳዊታ ዎጋን ሀመትያዋዳን ኤርሴዳ፤ ሽን ጎይንያ ቃ ግሹዋን ያርሼዳነ እጻና ጩውሴዳ።

4 ካቲ ያርሹዋ ያርሻናዉ ጋባኦና ቤዳ፤ አያዉ ጎፐ፥ ሄ ሳአይ ሀራ ኡባፐ አ ኮሽያ ጎይንያ ቃ ሳኣ። ሶሎሞነ ሻአ መህያ አሂደ፥ ሄ ያርሽያ ሳኣን ጹግያ ያርሹዋ ያርሼዳ። 5 መና ጎዳይ ሶሎሞናዉ ጋባኦናን ቃማ አኩሙዋን ቆንጬዳ። ጾሳይ አ፥ "ታን ነዉ አያ እማናዳን ኮያይ?" ያጌዳ።

6 ሶሎሞነ፥ "ነ ቆማይ ታ አዉ ዳዊተ ነዉ አማነትያ ጽሉዋነ ሱረ አሳ ግድያ ድራዉ፥ ኔን አገና ሲቁዋን አ ሲቃደ። ኔን ሀ ዎልቃማ ሲቁዋ አገናን ሲቃደ፥ ሀቼ ሀ ጋላስ አ ካዉተ አራታን ኡትያ አቱማ ናኣ አዉ እማዳ።

7 "ሀእካ አቤት መና ጎዳ፥ ታ ጾሳዉ፥ ኔን ታና ነ ቆማ፥ ታ አዉዋ ዳዊታ ሳኣን ካተያዳ። ሽን ታን ጉ ናኣ ግድያ ድራዉ፥ አሳ ዋታ ካለነንቶ ታን ኤርከ። 8 ታን ነ ቆማይ ኔን ዶሬዳ አሳ ግዶን፥ ፓይዱ ባይና አሳ ግዶን ደአይ። 9 ሄዋ ድራዉ፥ ታን ነ አሳ አይሳናዉነ ሎኡዋነ ኢታ ሻካደ ኤራናዉ ታዉ ነ ቆማዉ አኬካ ዎዛና እማ። ሄዌ ዮፐ፥ ሀ ነ ዎልቃማ አሳ ኦን ካለናዉ ዳንዳዪ?" ያጌዳ።

10 ሶሎሞነ ሄዋ ኦቼዳ ድራዉ፥ ጾሳይ ናሸቴዳ። 11 ሄዋ ድራዉ፥ ጾሳይ አ ሀዋዳን ያጌዳ፤ "ኔን ነዉ ላይይ አዱቃናዉ፥ ዎይ ዱረ ግዳናዉ፥ ዎይ ነ ሞርከቱ ሀይቃናዉ ኦቼናን አጋደ፥ ሀዋ አሳ ሱረ ፕርዳን አይስያ አዳ ኤራ ኦቼዳ ድራዉ፥ 12 ኔን ኦቼዳዋ ታን ኦና። በአ፥ ኔፐ ካሰ ነ ማል ባይናዋዳን ኔፐ ዶምና ነ ማል ደንደናዋዳን፥ አዳ ኤራተነ አኬካ ዎዛና ታን ነዉ እማና። 13 ቃይ ኔን ኦቻቤናባካ ታን ነዉ እማና፤ ኔን ደኤዳ ላይ ኡባን ካተቱዋ ግዶን ነ ኬሻ ካቲ ደኤናዳን፥ ዱረታነ ቦንቹዋ ታን ነዉ እማና። 14 ኔን ነ አዉ ዳዊተ ሀመቴዳዋዳን ታ ኦግያን ሀመቶፐ፥ ታ ዎጋዉነ ታ አዛዞ አዛዘቶፐ፥ ታን ነ ላይ አዱሳና" ያጌዳ።

15 ሄዋፐ ጉይያን ሶሎሞነ ቤጎቲደ ሄዌ አኩሙዋ ግድያዋ አኬኬዳ። እ የሩሳላመ ስም ቢደ፥ ጾሳ ቃላ ጫቁዋ ታቦታ ስንን ኤቂደ ጹግያ ያርሹዋነ እትፐተ ያርሹዋ ያርሼዳ። ያቲደ ባረ ኦሳንቻቱ ኡባዉ ባላ ከሴዳ።

ሶሎሞነ ኤራ ፕርዳ ፕርዴዳ

16 እት ጋላስ ላኡ ሻርሙጻቱ ካትያ ሶሎሞነኮ ዪደ፥ አ ስንን ኤቄድኖ። 17 ኡንቱቱፐ እትና ሀዋዳን ያጋዱ፤ "ታ ጎዳዉ፥ ታንነ ሀ ምሽራታ እት ጎለን ደኤቶ። ያን እዛ ታናና እትፐ ደእሽን፥ ታን እት ናኣ የላድ። 18 ታ ናአይ የለቴዳ ሄዘን ጋላስ ሀ ምሽራታካ እት ናኣ የላዱ። ሄ ጎለን ኑ ላኡዋፐ ሀራ አሳይ ኦንነ ባዋ።

19 "እት ጋላስ ቃማ እዛ አ ቦላ ግሴዳ ድራዉ፥ ሀ ምሽራት ናአይ ሀይቄዳ። 20 አ ቃማ ብላሄ ደንዳደ፥ ታን ነ ቆማታ ገምእሻ ደእሽን፥ ታ ናኣ ታ ምይያፐ አካደ አ ባረ ክዉዋን ዎደ፥ ባረ ሀይቄዳ ናኣ ታ ክዉዋን ዎዱ። 21 ጉራን ታን ታ ናኣ ንናዉ ደንዴዳ ዎደ፥ ሀይቂክቼዳ! ሽን ታን ዎንታ ፖኡዋን ትሽ ኡዳደ ጼልያ ዎደ፥ ታን የሌዳ ናኣ ግደና" ያጋዱ።

22 የንኮ ምሽራታ ሀዋዳን ያጋዱ፤ "ቱይት! ደኡዋን ደእያዌ ታ ናኣ፤ ሀይቄዳዌ ነዋ" ያጋዱ።

ሽን ኮይሮ ምሽራታ ዛራደ፥ "ቱይት፥ ሀይቄዳዌ ነ ናኣ፤ ፓጻ ደእያዌ ታ ናኣ" ያጋዱ። ሄዋዳን ጊደ ኡንቱንቱ ካትያ ስንን ፓሉመቴድኖ።

23 ካቲ ሶሎሞነ ሀዋዳን ያጌዳ፤ "ሀ ምሽራታ፥ ‘ፓጻ ደእያ ናአይ ታዋ፤ ሀይቄዳዌ ነዋ’ ያጋዉ፤ የንኮራካ፥ ‘ቱይት! ነ ናአይ ሀይቄዳዋ፤ ታ ናአይ ፓጻ ደእያዋ’ ያጋዉ" ያጌዳ።

24 ካቲ፥ "ታዉ ማሻ አኪደ ዪተ" ያጌዳ፤ ኡንቱንቱ አዉ ማሻ አሄድኖ። 25 ካቲ፥ "ደኡዋን ደእያ ናኣ ላኡ ከሲደ ጳልቂተ፤ እት ባጋ ሀንዉ እምተ፤ እት ባጋ ዬንዉ እምተ" ያጊደ አዛዜዳ።

26 ሀ ፓጻ ደእያ ናአይ ኢዋ ግዴዳ ምሽራታ ባረ ናአዉ ምሸታደ ካትያ፥ "ሀይ ታ ጎዳዉ፥ ፓጻ ደእያ ናኣ እዝዉ እማ! አ ዎፓ!" ያጋዱ።

ሽን የንኮራ፥ "ታዉካ ነዉካ ግዶፖ፤ ላኡ ከሲደ ጳልቀቶ" ያጋዱ።

27 ሄዋፐ ጉይያን ካቲ፥ "ሀ ፓጻ ደእያ ናኣ ሀ ኮይሮ ምሽራትዉ እምተ፤ ናኣ ዎፕተ። ሀና ናኣ ዳዮ!" ያጊደ ፕርዴዳ።

28 እስራኤልያ አሳይ ኡባይ ካቲ ፕርዴዳ ፕርዳ ስሴዳ ዎደ፥ ኡንቱንቱ ካትያ ሎይ ቦንቼድኖ። አያዉ ጎፐ፥ አሳዉ ጽሎተን ፕርዳናዉ አዉ አዳ ኤራተይ ጾሳፐ እመቴዳዋ በኤድኖ።