ሶሎሞነ ጌሻ ጎልያ ኬጼዳ
1 እስራኤልያ አሳይ ግብጼ ጋድያፐ ከሴዳ ኦይዱ ጼታነ ሆስፑን ታማን ላይን፥ ሶሎሞነ እስራኤልያ ቦላ ካዉቴዳ ኦይደን ላይን፥ ዚፋ ግያ ላኤን አግናን፥ ሶሎሞነ መና ጎዳ ጌሻ ጎልያ ኬጻናዉ ዶሜዳ። 2 ሶሎሞነ መና ጎዳዉ ኬጼዳ ጌሻ ጎሊ ጌሳይ ኡሱፑን ታሙ ዋ አዱሳ፤ ጎምፓይ ላታሙ ዋ አካ፤ ጌሳይ ሀታሙ ዋ ቃ። 3 ጌሻ ጎልያ ገልያ ሳኣን ደእያ ባራንዳይ ቦከት ገሌዳ ኦላይ ጌሻ ጎልያ ጎምፓ ኬሻ ላታሙ ዋ፤ ጎልያ ጎምፓይ ጌሻ ጎልያ ገልያ ሳኣ ጋካናዉ ታሙ ዋ። 4 ጌሻ ጎልያዉ ሶ ባጋና አኪደ፥ ካረ ባጋና ጹሜዳ ማስኮተቱ ደኢኖ። 5,6 ሄ ጎልያ ዩሹዋን ሀራ ክፍለቱዋ ኬጼዳ፤ ሄ ሻካቱ ሄዙ ፖቀቱ ደእያዋንታ፤ ሜጋ የግያ ምይ ጌሻ ሳኣ ግዶ ገለና ማላ፥ ኮይሮ ጎዳና ኦይሰደ ሹቻ ዎደ፥ ግምቢያዉ ህርክ ዉርሰ ኦርድሴዳ። ሄዋ ጋሱዋን ጋርሳ ኮይሮ ፖቂ እቼሹ ዋ አካ፤ ላኤን ፖቂ ኡሱፑን ዋ አካ፤ ሄዘን ፖቂ ላፑን ዋ አካ።
7 ጌሻ ጎሊ ህን ቆኢያሳን ማሰቴዳ ሹቻ ጻላላን ግምበቴዳ፤ ያትና፥ ጌሻ ጎሊ ግምበቴዳ ዎደ፥ ድጅኑዋ፥ ካልታ፥ ዎይ ሀራ አይ ብራታ ኮሻይነ ጌሻ ጎልያን ስሰትቤና።
8 ኡባፐ ጋርሳና ደእያ ፖቅያ ገልያ ፐንጊ ጌሻ ጎልያፐ ገድሳ ባጋና ደኤ፤ ሄ ሳፐ ላኤን ፖቅያዉነ ሄዘን ፖቅያዉ ባናዉ የ ከስያ ደቱ ደኢኖ። 9 ሄዋዳን ኦደ፥ ሶሎሞነ ጎልያ ኬጺደ ፖሌዳ፤ ያቲደ ዝጋ ጻዉላነ ማሰ ቦላና ካሜዳ። 10 ቃይ ጌሻ ጎልያ ዩሹዋን ፖቀቱዋ ኬጺደ ፖሌዳ፤ ኡንቱንቱ ቃተይ እቱዋዌ እቱዋዌ እቼሹ ዋ ግዲደ፥ ጎዳና ዝጋ ጻዉላን ኦይቀቴድኖ።
11 መና ጎዳ ቃላይ ሶሎሞነኮ ዬዳ፤ ሶሎሞና፥ 12 "ሀ ኔን ኬጽያ ጌሻ ጎልያ ግዶፐ፥ ኔን ታ አዋዩዋ ካሎፐ፥ ታ ዎጋ ኦፐ፥ ታ አዛዙዋ ኡባ ናጎፐነ አዛዘቶፐ፥ ታን ነ አዉዋ ዳዊታዉ እሜዳ ህዶታ ነ ባጋና ፖላና። 13 ያታደ ታን እስራኤልያ አሳ ግዶን ደአና፤ ታን ታ አሳ እስራኤልያ አግከ" ያጌዳ።
ጌሻ ጎልያዉ ሶ ግዶ ኦሱዋ
(2 ኦዱዋ 3:8-14)
14 ሶሎሞነ ጌሻ ጎልያ ኬጺደ ፖሌዳ። 15 ጌሻ ጎልያዉ ሶ ባጋ ጎዳ፥ ዉይግያፐ ቢደ ካራ ጋካናዉ ዝጋ ጻዉላ ልቅ ካሜዳ፤ ቃይ ዉይግያንካ ጽድያ ጻዉላ ሂጼዳ። 16 ጌሻ ጎልያ ግዶን ኡባፐ አያ ጌሻ ሳኣ ግያ ቆልኡዋ መናዉ፥ ጉየ ባጋና ላታሙ ዋ ግድያ ሳኣ ሻኬዳ፤ ዉይግያፐ ካራ ጋካናዉ ዝጋ ጻዉላ ጎዳ ኤሴዳ።6:16 ከሳ 26:33-34 17 ሄ ቆልኡዋፐ ስን ባጋና ደእያ ዉይግያ ጌሳይ ኦይታሙ ዋ አዱሳ። 18 ጌሻ ጎልያዉ ሶ ባጋይ ማሴዳ ጎስያነ ጪሼዳ ጪሻ ምስልያ መዳ ዝጋ ጻዉላን ልቅ ካመቴዳ፤ ኡባባይካ ዝጋ፤ አይ ሹችነ ቤተና።
19 ሶሎሞነ መና ጎዳ ቃላ ጫቁዋ ታቦታ ዎናዉ ጌሻ ጎልያ ግዶን ኡባፐ አያ ጌሻ ሳኣ ጊግሴዳ። 20 ኡባፐ አያ ጌሻ ሳአይ ላታሙ ዋ አዱሳ፥ ላታሙ ዋ አኮነ ላታሙ ዋ ቃ። ሶሎሞነ ሄ ቆልኦ ሶ ባጋ ዋላካይ ባይና ዎርቃን ሼሼዳ። ቃይ ያርሽያ ሳአይካ ዝጋ ጻዉላን ካመቴዳ። 21 ሶሎሞነ ጌሻ ጎልያ ግዱዋ ዋላካይ ባይና ዎርቃን ሼሼዳ፤ ዎርቃ ሼሼዳ ቆልኡዋ ገልያ ፐንግያዉ ቦላ ጉባንያ ያነ ሃነ ጋክያ ዎርቃ ሳንሳላታ አሌቂሴዳ። 22 ያቲደ ጎልያ ግዶ ኡባ ዎርቃን ሼሼዳ፤ ቃይ ኡባፐ አያ ጌሻ ሳኣ ስንን ደእያ ያርሽያ ሳኣ ዎርቃን ሼሼዳ።6:22 ከሳ 30:1-3
23 ኡባፐ አያ ጌሻ ሳኣን ዎናዉ እቱ እቱ ታሙ ዋ አዱቂያ ዎጋራፐ ላኡ ክሩበቱዋ ምስለቱዋ ማሲደ ጊግሴዳ።6:23-28 ከሳ 25:18-20 24 ኮይሮ ክሩብያ ቀፊ እቱ እቼሹ ዋ፤ ላኤን ቃይ እቼሹ ዋ፤ ኮይሮ ቀፍያ ጼራፐ ቢደ ላኤን ቀፍያ ጼራ ጋካናዉ ታሙ ዋ። 25 ላኤን ክሩቢካ ታሙ ዋ፤ ላኡ ክሩበቱዋ መይነ ማላይ እት ማላ። 26 እት ክሩብያ ጌሳይ ታሙ ዋ፤ ላኤንካ ሄዋ ኬሻ። 27 ሶሎሞነ ጌሻ ጎልያን ደእያ ኡባፐ አያ ጌሻ ሳኣን ክሩበላ ዎዳ። ኡንቱንቱ ቀፊ ምጨት ኡቴዳ፤ እት ክሩብያ ቀፊ እት ባጋ ጎዳ ቦችያ ዎደ፥ ህንኮ ክሩብያ ቀፊ ቃይ ህንኮ ባጋ ጎዳ ቦቼ፤ ኡንቱንቱ ላኡዋ ቀፈቱካ ሶ ግዶን እቱ እቱዋ ቦቺኖ። 28 ሶሎሞነ ክሩበቱዋካ ዎርቃን ሼሼዳ።
29 ቆልኡዋነ ዉይግያ ጎዳ ኡባ ክሩበላ፥ ዛምባነ ጪሼዳ ጪሻ ምስልያ ማሴዳዋን አሌቂሴ። 30 ጌሻ ጎልያዉ ሶ ግዶ ክፍልያ ዉይግያካ ካረ ባጋ ክፍልያ ዉይግያካ ዎርቃን ሼሼዳ።
31 ኡባፐ አያ ጌሻ ሳኣ ገልያ ፐንግያዉ ዎጋራ ምፐ ሳንቃቱዋ ከሴዳ። ቆስለቱ እቼሹ ባጋና ዞዚ ደእያዋንታ። 32 ዎጋራ ምፐ ኦሰቴዳ ላኡ ሳንቃቱ ቦላን ክሩቤላ፥ ዛምባነ ጪሼዳ ጪሻ ምስልያ ማሲደ፥ ሳንቃቱዋ፥ ክሩበቱዋነ ዛምባ ዎርቃን ሼሼዳ። 33 ሄዋዳንካ፥ ጌሻ ጎልያ ዉይግያ ገልያ ፐንግያዉ ዎጋራፐ ከሴዳ ኦይዱ ዞዝያና ደእያ ቆስለ ኤሴዳ። 34 እ ቃይ ሄ ፐንግያዉ እት እት ሳንቃይ ግዱዋን ዳኮቲደ ዶየትያ ላኡ ሳንቃቱዋ ከሴዳ። 35 ክሩበቱዋ፥ ዛምባነ ጪሼዳ ጪሻ ምስለቱዋ ኡንቱንቱ ቦላ ማሴዳ፤ ሄ ማሰቴዳዋንቱ ቦላ ዎርቃ እት ማላ ኦደ ሼሼዳ።
36 ሶ ባጋና ደእያ ጉታራ ግምቤዳ፤ ሄ ግምቢ ማሰቴዳ ሹቻ ሄዛቱዋ፥ እቱዋ እቱዋ ቦላ ዎደ፥ እት ዝጋ ማሰ ኡንቱንቱ ቦላ ዎደ ግምቤዳዋ።
37 መና ጎዳ ጌሻ ጎልያ ባሱ ሶሎሞነ ካዉቴዳ ኦይደን ላይን፥ ዚፋ ግያ ላኤን አግናን ባሰቴዳ። 38 ሶሎሞነ ካዉቴዳ ታማነ እተንያ ላይን፥ ቡላ ግያ ሆስፑን አግናን ጌሻ ጎሊ ሀልቼዳዋዳን ኡባና ኬጸቲደ ፖለቴዳ። ሶሎሞነ ጌሻ ጎልያ ላፑን ላይን ኬጺደ ዉርሴዳ።