1 ሄዋፐ ጉይያን ካቲ ሶሎሞነ መና ጎዳ ታቦታ ዳዊታ ካታማፐ፥ ጽዮነፐ ከሲደ፥ ጌሻ ጎልያ አሀናዳን፥ እስራኤልያ ጭማቱዋ፥ ዛራቱዋ ኡባ ካፓቱዋነ እስራኤልያ ጎልያ አሳቱዋ ካለያዋንታ የሩሳላመ ካታማ ሺሼዳ።✝ 2 ኤታኒማ ጌተትያ ላፑን አግናን፥ ዳስያ ባላይ ቦንቼትያ ዎደ፥ እስራኤልያ አሳይ ኡባይ ካትያ ሶሎሞነኮ ሺቄዳ።✝

3 እስራኤልያ ጭማቱ ኡባይ ጋክና፥ ቄሳቱ ታቦታ ደንድኖ። 4 ሌዋቱነ ቄሳቱ፥ መና ጎዳ ታቦታ፥ ዱንካንያነ ዱንካንያ ግዶን ደእያ ጌሻ ሚሻቱዋ ኡባ ቶኪደ አሄድኖ። 5 ካቲ ሶሎሞንነ አናና ደእያ እስራኤልያ ያአይ ኩመንይ ታቦታ ስንን ሺቂደ፥ ፓይዳናዉ ዳንዳየተና ጮራ ዶርሳነ መህያ ያርሼድኖ።

6 ሄዋፐ ጉይያን ቄሳቱ መና ጎዳ ቃላ ጫቁዋ ታቦታ ጌሻ ጎልያዉ ግዶ ጌሻ ቆልኡዋ፥ ኡባፐ አዳ ጌሻ ሳኣ ግያ ሳኣ አሂደ፥ ክሩበቱዋ ምስለቱ ቀፈቱዋፐ ጋርሳ ባጋና ዎድኖ። 7 ምጨት ኡቴዳ ክሩበቱዋ ቀፈቱ ታቦታነ ታቦታ ቶክያ ካሱዋ ካሜድኖ። 8 ካሶቱ ሎይ አዱሳ ግድያ ድራዉ፥ ኡንቱንቱ ጼራይ ኡባፐ አያ ጌሻ ሳኣ ስንን ደእያ ጌሻ ሳኣን ቤታናዉ ዳንዳዬ፤ ሽን ጌሻ ሳኣፐ ካረና ቤታናዉ ዳንዳየና። ኡንቱንቱ ሀቼ ጋካናዉ ሄ ሳኣን ደኢኖ። 9 እስራኤልያ አሳይ ግብጼ ጋድያፐ ከሴዳ ዎደ፥ መና ጎዳይ ኡንቱንቱና ቃላ ጫቁዋ ጫቀቴዳ ሲና ደርያን ሙሴ ዎዳ ላኡ ማሰቴዳ ሹቻቱዋፐ አትና፥ ታቦታ ግዶን ሀራባይ አያይነ ባዋ።✝

10 ቄሳቱ ጌሻ ሳኣፐ ከስና፥ ሻሪ መና ጎዳ ጌሻ ጎልያ ኩሜዳ።✝ 11 ሄ ሻርያ ጋሱዋን ቄሳቱ ባረንቱ ኪታ ኦናዉ ዳንዳይበይክኖ፤ አያዉ ጎፐ፥ መና ጎዳ ቦንቹ አ ጌሻ ጎልያ ኩም ኡቴዳ።

12 ሄዋፐ ጉይያን ሶሎሞነ ሀዋዳን ያጌዳ፤ "አቤት መና ጎዳዉ፥ ኔን፥ ‘ታን ማ ሻርያን ደአና’ ያጋ ዎዳ።✝ 13 ታን ቱሙፐ ነዉ ሎኦ ጌሻ ጎልያ፥ ኔን አን መናዉ ደአናሳ ኬጻድ" ያጌዳ።

14 እስራኤልያ ያአይ ኩመንይ ኤቂደእሽን፥ ካቲ ኡንቱንቱኮ ስሚደ፥ ሀዋዳን ያጊደ ኡንቱንታ አንጄዳ፤ 15 "መና ጎዳይ እስራኤልያ ጾሳይ ጋላተቶ! ታ አዉዋ ዳዊታዉ ባረ ዶናን ኦዴዳ ህዶታ ባረ ኩሽያን ፖሌዳ። ሄ እ ኦዴዳ ህዶታይ፥ 16 ‘ታን ታ አሳ እስራኤልያ ግብጼፐ ከሳደ አሄዳ ጋላሳፐ ዶምና፥ ታ ሱንይ አን ደአና ማላ፥ ጌሻ ጎልያ ኬጻናዉ እስራኤልያ ዛራቱዋ ግዶን አይ ካታማነ ዶራበይከ፤ ሽን ታ አሳ እስራኤልያ ካለና ማላ፥ ታን ዳዊታ ዶራድ’ ያጌዳ።✝

17 "ታ አዉ ዳዊተ መና ጎዳ እስራኤልያ ጾሳ ሱንዉ ጌሻ ጎልያ ኬጻናዉ ባረ ዎዛናን ቆፔዳ።✝ 18 ሽን መና ጎዳይ ታ አዉዋ ዳዊታ፥ ‘ኔን ታ ሱንዉ ጌሻ ጎልያ ኬጻናዉ ነ ዎዛናን ቆፔዳ ድራዉ፥ ሎኦባ ኦዳ። 19 ግዶፐነ፥ ጌሻ ጎልያ ኬጻናዌ ኔና ግዳካ፤ ታ ሱንዉ ጌሻ ጎልያ ኬጻናዌ ነ ጉልባታፐ የለታና ነ ናኣ’ ያጌዳ።✝

20 "ሀእካ መና ጎዳይ ባረ እማና ጌዳ ህዶታ ቃላ ፖሌዳ። መና ጎዳይ ካሰ እሜዳ ህዶታዳንካ ታን ታ አዉዋ ዳዊታ ሳኣን ካተታድነ ሀእ እስራኤልያ ካዉተ አራታን ኡታድ። ቃይ መና ጎዳ እስራኤልያ ጾሳ ሱንዉ ጌሻ ጎልያ ኬጻድ። 21 መና ጎዳይ ኑ አዎቱዋ ግብጼፐ ከሴዳ ዎደ ኡንቱንቱና ጫቀቴዳ ጫቁ ደእያ ታቦታዉካ አ ግዶን ሳኣ እንጀያድ" ያጌዳ።

22 ሄዋፐ ጉይያን ሶሎሞነ መና ጎዳዉ ያርሽያ ሳኣ ስንን፥ እስራኤልያ ያአይ ኩመንይ ደእያ ሳኣን ኤቂደ፥ ባረ ኩሽያ ሳሉዋ ዛር ምጪደ፥ 23 ሀዋዳን ያጊደ ዎሴዳ፤ "አቤት መና ጎዳዉ፥ እስራኤልያ ጾሳዉ፥ ቦላ ሳሉዋን ዎይ ጋርሳ ሳኣን ነ ማላ ጾስ ባዋ። ኔን ነ ቃላ ጫቁዋ ናጋሳ፤ ባረ ኩመን ዎዛናፐ ነ ስንን ሀመቴዳ ነ ቆማቱዋ አገና ሲቁዋን ሲቃሳ። 24 ነ ቆማዉ፥ ታ አዉዋ ዳዊታዉ ኔን ኦና ጋደ ሃሳዬዳ ቃላ ናጋዳ፤ ኔን ካሰ ነ ዶናን ሃሳዬዳዋ ነ ኩሽያን ሀቼ ፖላዳ።

25 "ሀእካ አቤት መና ጎዳ፥ እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ፥ ‘ኔን ታ ስንን ሀመቴዳዋዳን ነ ናናይካ ታ ስንን ሀመታና ማላ ባረንቱ ኦግያ ናጎፐ፥ ታ ስንን እስራኤልያ ካዉተ አራታን ኡትያ አሳ ኔን ኡባካ ያካ’ ያጌዳ ቃላ ፖላ።✝ 26 አቤት እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ ሃሳዬዳ ነ ቃላ ሀእካ አጎፓ።

27 "ሽን ጾሳይ ቱሙ ሳኣን ደአኔየ? በአ፥ ሳሎቱ፥ ኡባፐ ቃን ደእያ ሳሉካ ነዉ ግዳናዉ ዳንዳየና። ያትና፥ ሀ ታን ኬጼዳ ጌሻ ጎሊ ነዉ አይ ኬሻ ጉጻንዴሻ!✝ 28 ግዶፐነ፥ አቤት መና ጎዳዉ፥ ታ ጾሳዉ፥ ታን ነ ቆማይ ሀቼ ዎስያዋነ ዋትዋትያዋ ኔን ሀይዛ። 29 ኔን፥ ‘ታ ሱንይ ሄ ሳኣን ደአና’ ጌዳ ሀ ጌሻ ጎልያ ነ አይፊ ቃማነ ጋላስ ጼሎ። ታን ነ ቆማይ ሀ ሳኣኮ ስማደ፥ ዎስያ ዎሳ ኔን ስሳ።✝ 30 ታን ነ ቆማይነ ነ አሳይ እስራኤሊ ሀ ጌሻ ጎልያኮ ስሚደ፥ ዋትዋትያ ዋትዋቱዋ ኔን ስሳ። ኔን ደእያ ሳን ሳሉዋን ስሳደ፥ ኑዉ አቶ ያጋ።

31 "እት አሳይ ባረ ሾሩዋ ናቂና፥ አ ጫቀናዉ ሀ ጌሻ ጎልያ አይና፥ አ ግዶን ደእያ ያርሽያ ሳኣ ስንን እ ጫቆፐ፥ 32 ኔን ሳሉዋን ስሳደ፤ ኪተታ። ነ ቆማቱዋ ግዱዋን ፕርዳ። ባይዛንቻቱዋ ቦላ ፕርዳደ፥ እ ኦዳዋ አ ቦላ ዛራ፤ ጽሉዋ ሻትንደ፥ አዉ አ ጽሎተዳን ዛራ።

33 "ነ አሳይ እስራኤሊ ነ ቦላ ናጋራ ኦዳ ጋሱዋን ሞርክያን ጾነቲደ፥ ኡንቱንቱ ኔኮ ስሚደ፥ ነ ሱን ጼሲደ፥ ሀ ጌሻ ጎልያን ኔና ዎሶፐነ ነዉ ዋትዋቶፐ፥ 34 ኔን ሳሉዋን ስሳ። ነ አሳ እስራኤልያ ናጋራ አቶ ያጋ፤ ያታደ ኔን ካሰ ኡንቱንቱ ማይዛ አዋቶ እሜዳ ቢታዉ ኡንቱንታ ጉየ ዛራ።

35 "ነ አሳይ ነ ቦላ ናጋራ ኦዳ ጋሱዋን ሳሎቱ ጎርደትናነ እራይ ቡከናን እጽና፥ ኡንቱንቱ ሀ ሳኣ ስሚደ፥ ዎሶፐነ ኔን ኡንቱንታ ኡንኤዳ ድራዉ ነ ሱን ጼሲደ፥ ባረንቱ ናጋራፐ ስሞፐ፥ ኔን ሳሉዋን ስሳ። 36 ነ ቆማቱዋ ናጋራ፥ ነ አሳ እስራኤልያ ናጋራ አቶ ያጋ። ኡንቱንቱ ሀመታናዉ በስያ ሎኦ ኦግያ ኡንቱንታ ታማርሳ፤ ያታደ ኔን ነ አሳ ላትሴዳ ቢታን እራ ቡክሳ።

37 "ቢታ ቦላን ኮሻይ ዎይ ኢታ ሀርጊ ዪና፥ ዎይ ካ ጹግ ይስያ ጫርኩ ዎይ ቦሊ ዎይ ቡምቡረይ ቢታ ቦላን ዪና፥ ዎይ ሞርኪ ኡንቱንቱ ካታማቱዋ ዶድና፥ ዎይ አይ ማላ ባሻይ ዎይ ሀርጊ ዪና፥ 38 ነ አሳ እስራኤልያፐ ኦንነ ኔና ዎሶፐነ ነዉ ዋትዋቶፐ፥ ቃይ አይ አሳይነ ባረ ዎዛናን ኡንኤያዋ ኤሪደ፥ ሀ ጌሻ ጎልያኮ ስሚደ፥ ባረ ኩሽያ ምጮፐ፥ 39 ኔን ደእያ ሳኣን ሳሉዋን ስሳ። ኡንቱንቱ ናጋራ አቶ ያጋ፤ ያታደ ኡንቱንቶ ኪተታ። ኔን አሳ ዎዛና ኤርያዋዳንካ፥ አሳ ኡባዉ አ ኦሱዋዳን ኦሱዋዳን እማ። አያዉ ጎፐ፥ አሳ ኡባ ዎዛና ኤርያዌ ነ ጻላላ። 40 ያቶፐ፥ ኔን ኑ ማይዛ አዋቶ እሜዳ ቢታን ደእያ ዎደ ኡባን፥ ኡንቱንቱ ነዉ ያያና።

41,42 "ሄዋዳንካ፥ ነ አሳ እስራኤልያ ግደና ካረ ቢታ አሳይ ነ ዎልቃማ ሱንዋነ ኔን ነ አሳዉ ኦዳ ማላልስያ ኦሶቱዋባ ስሲደ፥ ሃኮ ጋድያፐ ዪደ፥ ሀ ጌሻ ጎልያኮ ስሚደ፥ ኔና ዎሶፐ፥ 43 ኔን ደእያ ሳኣን ሳሉዋን ስሳ። ነ አሳቱ እስራኤላቱ ኤርያዋዳን፥ ሳኣን ደእያ አሳይ ኡባይ ነ ሱን ኤራና ማላነ ነዉ ያያና ማላ፥ ቃይ ታን ኬጼዳ ሀ ጌሻ ጎሊ፥ ነዉ ጎይንያ ሳኣ ግዴዳዋ ኡንቱንቱ ኤራና ማላ፥ ሄ ካረ ቢታ አሳይ ኔና ዎስያዋ አዉ ፖላ።

44 "ነ አሳቱ ባረንቱ ሞርከቱዋ ኦላና ማላ ኔን ኪቴዳ ሳኣ ሀቃነ ቢደ፥ ኡንቱንቱ ኔን ዶሬዳ ሀ ካታማኮነ ታን ነ ሱንዉ ኬጼዳ ጌሻ ጎልያኮ ስሚደ፥ ኔና መና ጎዳ ዎሶፐ፥ 45 ኡንቱንቱ ዎሳነ ዋትዋቱዋ ሳሉዋን ኔን ስሳ፤ ኡንቱንቶ ጾኑዋ እማ።

46 "ናጋራ ኦና አሳይ ባይናዋዳንካ፥ ኡንቱንቱ ነ ቦላ ናጋራ ኦና፥ ኔን ኡንቱንቶ ሀንቀታደ ሞርከቶ ኡንቱንታ አደ እምና ሞርከቱካ ኡንቱንታ ኦሞዲደ፥ ሃክና ማትናካ ባረንቱ ጋድያ አኪደ አፍና፥ 47 ኡንቱንቱ ሄ ኦሞደቴዳ ቢታን ደኢደ፥ ባረንቱ ዎዛናን ናጋራፐ ስሞፐ፥ ሄ ኦሞደቴዳ ቢታን ኡንቱንቱ ደኢደ፥ ‘ኑን ናጋራ ኦዶ፤ ኑን ባይዜዶ፤ ኑን ኢታባ ሀኔዶ’ ያጊደ ነዉ ዋትዋቶፐ፥ 48 ባረና ኦሞዲደ አፌዳ ሞርከቱዋ ቢታን ደኢደ፥ ኡንቱንቱ ባረንቱ ኩመን ዎዛናፐነ ባረንቱ ኩመን ቆፋፐ ኔኮ ስሞፐ፥ ኔን ኡንቱንቱ ማይዛ አዋቶ እሜዳ ኡንቱንቱ ቢታኮ፥ ኔን ዶሬዳ ካታማኮነ ታን ነ ሱንዉ ኬጼዳ ጌሻ ጎልያኮ ስሚደ፥ ኔና ዎሶፐ፥ ያቶፐ፥ 49 ኡንቱንቱ ዎሳነ ኡንቱንቱ ዋትዋቱዋ ኔን ደእያ ሳኣን ሳሉዋን ስሳ። ኡንቱንቶ ፕርዳ። 50 ነ አሳይ ነ ቦላ ኦዳ ናጋራነ ባይዜዳ ባይዙዋ አቶ ያጋ፤ ኡንቱንቱ ኦሞዲደ አፌዳ አሳቱ ኡንቱንቶ ቃረታናዳን ኦ። 51 አያዉ ጎፐ፥ ኡንቱንቱ ሄ ብራታ ሲልስያ ጮጭያ ማላ ጋድያፐ፥ ግብጼፐ ኔን ከሴዳ ነ አሳቱዋነ ነ ቡዞቱዋ።

52 "ታን ነ ቆማይነ ነ አሳይ እስራኤሊ ዋትዋትያዋ ነ አይፊ ጼሎ፤ ቃይ ኡንቱንቱ ዋስያ ዎደ አዉደነ ኔን ኡንቱንቶ አላ። 53 አያዉ ጎፐ፥ አቤት ኡባ ሞድያ መና ጎዳዉ፥ ኔን ካሰ ኑ አዎቱዋ ግብጼፐ ከስያ ዎደ ነ ቆማ ሙሴ ባጋና ኦዴዳዋዳን፥ ኡንቱንታ ኔን ሳኣን ደእያ ካዉተቱ ኡባ ግዶፐ ነ ቡዞ ኦናዉ ዱማያዳ" ያጊደ ዎሴዳ።

54 ሶሎሞነ መና ጎዳ ዎሳነ ዋትዋቱዋ ፖሌዳዋፐ ጉይያን፥ ባረ ኩሽያ ሳሉዋ ምጪደ መና ጎዳ ያርሹዋ ሳኣ ስንን ጉልባቴዳ ሳኣፐ ደንድ ኤቄዳ። 55 እስራኤልያ ሽቁዋ ኡባ ባረ ቃላ ቂሲደ፥ ሀዋዳን ያጊደ አንጄዳ፤ 56 "እ ካሰ ሃሳዬዳ ባረ ቃላዳን ባረ አሳ እስራኤልያ ሸምፕሴዳ መና ጎዳይ ጋላተቶ፤ እ ባረ ቆማ ሙሴ ባጋና እሜዳ ሎኦ ህዶታይ ኡባይ ፖለቴዳ።✝ 57 መና ጎዳይ ኑ ጾሳይ ካሰ ኑ አዎቱዋና ደኤዳዋዳን፥ ኑናናካ ደኦ፤ እ ኑና ኡባካ አጎፖ ዎይ የጎፖ። 58 ኑን አ ኦግያን ኡባን ሀመታና ማላነ እ ኑ አዋቶ እሜዳ አዛዙዋ፥ ዎጋቱዋነ ህግያ ናጋና ማላ፥ ኑ ዎዛና ባረኮ ዛሮ። 59 ሀቼ ሀቼ ደኦ ኮሽያዋዳን፥ ጾሳይ ታና ባረ ቆማነ ባረ አሳ እስራኤልያ ማዳና ማላ፥ ታን መና ጎዳ ስንን ዎሳደ ጌዳ ሀ ቃላቱ ቃማነ ጋላስ መና ጎዳኮ፥ ኑ ጾሳኮ፥ ሺቅኖ። 60 ሄዌነ፥ ሳኣን ደእያ አሳይ ኡባይ መና ጎዳይ ጾሳ ግድያዋነ አፐ አትና ሀራ ጾስ ባይናዋ ኤራናዳና። 61 ሀቼዋዳንካ ህንተንቱ አ ዎጋዳን ሀመታናዉነ አዉ አዛዘታናዉ መና ጎዳዉ፥ ኑ ጾሳዉ፥ ህንተንቱ ዎዛናይ አማነትያዋ ግዶ" ያጊደ አንጄዳ።

62 ሄዋፐ ጉይያን ካቲነ እስራኤልያ አሳይ ኡባይ እትፐ መና ጎዳ ስንን ያርሹዋ ያርሼድኖ። 63 ሶሎሞነ መና ጎዳዉ እትፐተ ያርሹዋ ያርሻናዉ ላታማነ ላኡ ሻአ ቦራቱዋነ ጼታነ ላታሙ ሻአ ዶርሳቱዋ ሺሼዳ። ሄዋዳን ኦደ ካቲነ እስራኤልያ አሳይ ኡባይ መና ጎዳ ጌሻ ጎልያ አንጅሴድኖ። 64 ካቲ ሶሎሞነ ጌሻ ጎልያዉ ስን ባዙዋን ደእያ ግዶ ዳባባ ሄ ጋላስ ዱማዬዳ። ሄ ሳኣን ጹግያ ያርሹዋ፥ ካ ያርሹዋነ እትፐተ ያርሹዋፐ ሞዋ ያርሼዳ። እ ሄዋ ኦዳዌ መና ጎዳ ስንን ደእያ፥ ናሃስያ ግያ ብራታፐ ኦሰቴዳ ያርሽያ ሳአይ ጹግያ ያርሹዋ፥ ካ ያርሹዋነ እትፐተ ያርሹዋፐ ሞዋ ያርሻናዉ ጉጼዳ ድራሳ።

65 ሄ ዎደ ሶሎሞንነ እስራኤልያ አሳይ ኡባይ ላፑን ጋላሳዉ ዳስያ ባላ ቦንቼዳ፤ እስራኤልያ ዛዋን ሀማታ ፕኑዋፐ ቢደ ግብጼ ሻፋ ጋካናዉ ደእያ ጮራ አሳይ መና ጎዳ ስንን ባላ ቦንቻናዉ ሺቄዳ። 66 ዎንተ ጋላስ ካቲ አሳ ሞይዜዳ፤ አሳይ ካትያ አንጂደ፥ መና ጎዳይ ባረ ቆማ ዳዊተዉነ ባረ አሳ እስራኤልያዉ ኦዳ ኬካተን ናሸቲደነ ዎዛናፐ ፓሽኪደ፥ ባረ ሶ ባረ ሶ ቤዳ።