2 ሳሜላ 10

ዳዊተ አሞናቱዋነ ሶረቱዋ ጾኔዳ

1 ሄዋፐ ጉይያን፥ አሞናቱዋ ካትያ ናኦስ ሀይቄዳ፤ አ ናአይ ሀኑን አ ኮታን ካተቴዳ። 2 ዳዊተ፥ "አ አዉ ታዉ ኬከዳዋዳን ናኦሳ ናኣ ሀኑናዉ ታንካ ኬካና" ያጌዳ። ሄዋ ድራዉ፥ አ ምንናዉ ዳዊተ ባረ አሳ አኮ ኪቴዳ።

ዳዊታ አሳይ አሞና ጋድያ ጋኬዳ ዎደ፥ 3 አሞና አሳ ካፓቱ ባረንቱ ጎዳ ሀኑና፥ "ዳዊተ ኔና ምንናዉ ሀ አሳቱዋ ኪቴዳዌ ነ አዉዋ ቦንቹዋ ድራሳ ጋድየ? እ ባረ አሳ ኪቴዳዌ ሀ ካታማ ጼላናሳ፥ ዎቻናሳነ ኦለቲደ ጾናናሳ" ያጌድኖ። 4 ሀኑን ዳዊተ ኪቴዳዋንታ ኦይቂደ፥ ኡንቱንቱ ቡቻፐ ባጋ ሜዴዳ፤ ኡንቱንቱ ማዩዋካ ኡትያ ዱልያ ባጋፐ ቃንጽ አኪደ፥ ኡንቱንታ የዴዳ።

5 ሄዋ ድራዉ፥ አሳቱ ዳሮ ዬላቴድኖ። ዳዊተ ሄዋ ስሲደ፥ እ ኡንቱንቱና ጋከትያ አሳ ኪቴዳ፤ ኡንቱንቱኮ ኪቲደ፥ "ህንተንቱ ቡቻይ ድጫና ጋካናዉ፥ ያርኮ ካታማን ደእሽተ፤ ሄዋፐ ጉይያን ሃ ዪተ" ያጌዳ።

6 አሞናቱ ባረንቱ ኪታን ዳዊተ ኡንቱንታ ሞርካናዳን ኦዳዋ ኤሬዳ ዎደ፥ ቤት-ራሆባነ ጾባ ካታማቱዋን ደእያ ሶርያ አሳቱዋፐ ላታሙ ሻአ ገድያ አሳቱዋ፥ ቶባ ጋድያፐ ታማነ ላኡ ሻአ አሳቱዋነ ማእካ ቢታ ካትያፐ እት ሻአ አሳቱዋ ቃጻሬድኖ።

7 ዳዊተ ሄዋ ስሴዳ ዎደ፥ ዮኣባነ ደእያ ኦላንቻቱዋ ኡባ ኡንቱንቱ ቦላ የዴዳ። 8 አሞናቱ ከሲደ፥ ካታማ ፐንግያን ኦላዉ ሳልፔድኖ፤ ጾባፐነ ራሆባፐ ዬዳ ሶርያ አሳቱ፥ ቶባ አሳቱነ ማእካ አሳቱ ደምባን ባረካ ደኢኖ።

9 ዮኣበ ባረና ኦላይ ስንናነ ጉየና ዶዴዳዋ በኤዳ፤ እስራኤላቱ ግዶፐ ኡባፐ ምንያ ኦላንቻቱዋ ዶር አኪደ፥ ሶርያ አሳቱዋ ስንን ሳልፕሴዳ። 10 አቴዳ አሳቱዋ ባረ እሻይ አብሻይ አዛዛና ማላ ኦደ፥ አሞና አሳቱዋ ስንን ሳልፕሴዳ። 11 ዮኣበ ባረ እሻ፥ "ሶርያ አሳቱ ታዉ ዎልቃሞፐ፥ ኔን ያደ፥ ታና ማዳ። ቃይ አሞና አሳቱ ነዉ ዎልቃሞፐ፥ ታን ያደ፥ ኔና ማዳና። 12 ስም ምና! ኑ አሳ ድራዉነ ኑ ጾሳ ካታማቱዋ ድራዉ፥ አነ ምን ኦለቶይተ። መና ጎዳይ ባረና ሎእያዋ ኦ" ያጌዳ።

13 ሄዋፐ ጉይያን፥ ዮኣብነ አናና ደእያ አሳይ ሶርያ አሳቱዋና ኦለታናዉ ላዉሁ ጌድኖ። ያትና፥ ሶርያ አሳቱ አ ስንፐ ባቃቴድኖ። 14 ሶርያ አሳቱ ባቃቴዳዋ አሞና አሳቱ በኤዳ ዎደ፥ ኡንቱንቱካ አብሻያ ስንፐ ባቃቲደ፥ ካታማ ገሌድኖ። ዮኣበ አሞና አሳቱዋና ኦለትያዋ አጊደ፥ የሩሳላመ ስሜዳ።

15 ሶርያ አሳቱ እስራኤልያ አሳቱ ኡንቱንታ ጾኔዳዋ ኤሬዳ ዎደ፥ ባረንቱ ኦላንቻቱዋ ኡባ ዛሪደ ሺሼድኖ። 16 ካቲ ሀዳድኤዘረ ሶርያ አሳቱዋ ኤፍራጺሳ ሻፋፐ ሄፍን ባጋፐ ኪቲደ አህሴዳ፤ ሄላማ ቤድኖ። ሀዳድኤዘራ ኦላንቻቱ ጋዳዋይ ሾባክ ኡንቱንታ ካለ።

17 ዳዊተ ሄዋ ስሴዳ ዎደ፥ እስራኤልያ ኦላንቻቱዋ ሺሺደ፥ ዮርዳኖሳ ሻፋ ፕኔዳ፤ ሄላማ ጋኬዳ። ሶርያ አሳቱ ዳዊታና ጋከታናዉ ሳልፒደ፥ አናና ኦለቴድኖ። 18 ሽን ሶርያ አሳቱ እስራኤላቱ ስንፐ ባቃቴድኖ፤ ዳዊተ ሶርያ ኦላንቻቱዋፐ ፓራ ጋርያ ላግያ ላፑን ጼቱ አሳቱዋነ ኦይታሙ ሻአ ፓራ አሳቱዋ ዎዳ፤ ኡንቱንቱ ኦላ ጋዳዉዋ ሾባካካ ሾጭና፥ ሄ ሳኣን ሀይቄዳ። 19 ሀዳድኤዘራዉ ሞደቲደ ደእያ ካተቱ እስራኤላቱ ኡንቱንታ ጾኔዳዋ ኤሬዳ ዎደ፥ እስራኤላቱዋና ስገቲደ፥ ኡንቱንቶ ሞደቴድኖ። ሄዋፐ ስሚደ፥ ሶርያ አሳቱ አሞና አሳቱዋ ማዳናዉ ያዬድኖ።