2 ሳሜላ 6

ጾሳ ታቦታይ የሩሳላመ ዬዳ

1 እስራኤልያ ግዶፐ ዶረቴዳ ሀታሙ ሻአ አሳቱዋ ዳዊተ ላኤንዋ ጼሲደ ሺሼዳ። 2 እነ አ አሳይ ኡባይ ይሁዳን ደእያ ባኣላ (ቅርያትይ-አርም) ጌተትያ ካታማፐ ደንዲደ፥ ክሩበቱዋፐ ግዱዋን ባረ ካዉተ አራታ ቦላ ኡቴዳ ኡባፐ ዎልቃማ መና ጎዳ ሱንን ጼሰቴዳ ጾሳ ታቦታ ያፐ አሀናዉ ቤድኖ።✝6:2 ከሳ 25:22 3 ኡንቱንቱ ጾሳ ታቦታ ኦራ ጋርያን ዎደ፥ ዞዝያ ሁጲያን ደእያ አብናዳባ ሶፐ አሄድኖ፤ አብናዳባ ናናይ ኡዝነ አህዮይ ኦራ ጋርያ ካለኖ።✝6:3 1 ሳሜላ 7:1-2 4 ያፐ ጾሳ ታቦታ አህያ ዎደ፥ አህዮ ታቦታፐ ስንና ሀመቴ። 5 ዳዊተነ እስራኤልያ አሳይ ኡባይ ዲነ ማስንቁዋ ዲጺደ፥ ካባሩዋ ባቂደነ ዳዋላነ ሻሾራ ቃደ፥ ባረንቶ ኩመን ዎልቃን መና ጎዳ ስንን ናሸቲደ ቦንቼድኖ።

6 ናኮና ካ ቡክያ ኡዱማ ጋክያ ዎደ፥ ቦራቱ በትና፥ ኡዝ ባረ ኩሽያ የዲደ፥ ጾሳ ታቦታ ኦይቄዳ። 7 ኡዝ ታቦታ ቦቼዳ ድራዉ፥ መና ጎዳ ሀንቁ ኡዛ ቦላ ኤጽ ከሴዳ። ጾሳይ አ ሾጭና፥ ሄ ሳኣን ጾሳ ታቦታ ምይያን ኤለካ እ ሀይቂ አጌዳ። 8 ጾሳ ሀንቁ ኡዛ ሾጬዳ ድራዉ፥ ዳዊተ ይሎቴዳ። ሄ ሳአይ ሀቼ ጋካናዉ፥ ፐሬዝ-ኡዛ (ኡዝ መኤዳ ሳኣ) ጌተቴ።

9 ሄ ጋላስ ዳዊተ መና ጎዳዉ ያዪደ፥ "መና ጎዳ ታቦታይ ታኮ ስም ዋን ያኔ?" ያጌዳ። 10 ሄዋ ድራዉ፥ ዳዊተ ጾሳ ታቦታ ባረናና ዳዊታ ካታማ አሀናዉ ኮይቤና፤ ሄዋ አጊደ ግታትያ ኦቤድ-ኤዶማ ግያ ብታንያ ሶ አፌዳ። 11 መና ጎዳ ታቦታይ ግታትያ ኦቤድ-ኤዶማ ሶን ሄዙ አግና ጋምኤዳ፤ መና ጎዳይ አነ አ ሶ አሳ ኡባ አንጄዳ።✝6:11 1 ኦዱዋ 26:4-5

12 ሄዋፐ ስሚደ፥ "ጾሳ ታቦታ ድራዉ፥ መና ጎዳይ ኦቤድ-ኤዶማ ሶ አሳነ አዉ ደእያ ኡባባ አንጄዳ" ያግያዋ ካቲ ዳዊተ ስሴዳ፤ ሄዋ ድራዉ፥ ዳዊተ ኦቤድ-ኤዶማ ሶ ቢደ፥ ጾሳ ታቦታ ዳዊታ ካታማ ናሸቻን አሄዳ። 13 መና ጎዳ ታቦታ ቶኬዳ አሳቱ ኡሱፑኑዋ ታንጌዳ ፓይዱዋን ፓይዱዋን ኡንቱንታ ኤሲደ፥ እት ኮሩማነ እት ቦልትቦልታ ማራ ዳዊተ ያርሼዳ። 14 ዳዊተ ሱፍያ ግያ ቃጭናፐ ዳደቴዳ ኤፉድያ ማዪደ፥ ባረዉ ደእያ ዎልቃ ኡባን መና ጎዳ ስንን ዱሬዳ። 15 እነ እስራኤልያ አሳቱ ኡባቱ ናሸቻን ሆምቦጪድነ ኡልቱዋ ፑኒደ መና ጎዳ ታቦታ ዳዊታ ካታማ አሄድኖ።

16 መና ጎዳ ታቦታይ ዳዊታ ካታማ ገልያ ዎደ፥ ሳኦላ ናታ መልኮላ ማስኮትያና ጼላደ፥ ካቲ ዳዊተ መና ጎዳ ስንን ጉፕሺንነ ዱርሽና በኣዱ፤ ዳዊታ ባረ ዎዛናን ካዱ።

17 ዳዊተ መና ጎዳ ታቦታ ዎናዉ ጌዳ ዱንካንያ ግዶን ታቦታ አሂደ ዎድኖ፤ ዳዊተ ጹግያ ያርሹዋነ እትፐተ ያርሹዋ መና ጎዳዉ ያርሼዳ። 18 ዳዊተ ጹግያ ያርሹዋነ እትፐተ ያርሹዋ ያርሽያዋ ፖሌዳዋፐ ጉይያን፥ ኡባፐ ዎልቃማ መና ጎዳ ሱንን አሳ አንጄዳ። 19 እስራኤልያ አሳዉ ኡባዉ፥ ማጫዎ አቱማዎ ሁጲያን ሁጲያን እት እት ኮምፖ ኡክ፥ እት እት ሙጾ አሹዋካ ዎይንያ ቴራ መላፐ ኑከቴዳ እት እት ኡክ ግሼዳ። ሄዋፐ ጉይያን አሳይ ኡባይ ባረ ሶ ባረ ሶ ስሜዳ።✝6:19-20 1 ኦዱዋ 16:43

20 ዳዊተ ባረ ሶ አሳ አንጃናዉ ሶ ስሜዳ ዎደ፥ ሳኦላ ናታ መልኮላ አ ሞካናዉ ከሳደ፥ "ሹፉሮ አሳቱ ካሎ ሀመትያዋዳን፥ ሀቼ እስራኤልያ ካቲ ባረ ቆማቱዋ ማጫ ቆማቱዋ ስንን ካሎቲደ፥ አያ ቦንቼቴደ!" ያጋዱ።

21 ዳዊተ፥ "ነ አዉዋፐነ አ ሶ አሳፐ አደ፥ ባረ አሳ እስራኤልያ ካለናዳን ታና ዶሬዳ መና ጎዳ ስንን ዱራድ። ታን መና ጎዳ ቦንቻናዉ ዱርያዋ አግከ። 22 ታን ሀዋፐ አደ ብሮካ ታና ቶቻና፤ ታን ታ ሁጲያ ዝቂ ኦና። ሽን ኔን ጌዳ ማጫ ቆማቱዋ ስንን ታን ቦንቼታና" ያጌዳ።

23 ሄዋ ድራዉ፥ ሳኦላ ናታ ሚካላ ሀይቃና ጋካናዉ፥ ናኣ የላበይኩ።