2 ሳሜላ 3

1 ሳኦላ አሳይነ ዳዊታ አሳይ ዳሮ ዎድያ ኦለቴድኖ፤ ዳዊተ ኦላን ምን ምኒደ ብያ ዎደ፥ ሳኦላ አሳይ ዳቡር ዳቡር ቤዳ።

ዳዊታ አቱማ ናና

2 ከብሮነ ካታማን ዳዊታዉ ናናይ የለቴድኖ፤ እዝራኤልያ አህኖኣማ የሌዳ ባይራ ናአይ አምኖና፤ 3 ቃርመሎስያ ናባላ አምአታ አብጋላ የሌዳ ናአይ ክልኣብ ላኤንዋ፤ ጋሹራ ካትያ ታልማያ ናታ ማእካ የሌዳ አበሴሎም ሄዘንዋ። 4 ኦይደን ሀጊት ናኣ አዶንያ፤ እቼሸን አቢጻል ናኣ ሻፋጽያ። 5 ኡሱፑን ዳዊታ ማቻት ኤግል ናኣ ይትራኣማ፤ ሀ ናናይ ኡባይ ከብሮናን ዳዊታዉ የለቴድኖ።

አባኔር ዳዊታና ጫቀቴዳ

6 ሳኦላ አሳናነ ዳዊታ አሳና ኦለትያ ዎደ፥ አባኔር ሳኦላ አሳቱዋ ግዶን ምን ምኒደ ቤዳ። 7 ሳኦላዉ አታ ናታ ርጽፎ ጌተትያ እት ጋራዳታ ደአዉ፤ እያቡስተ አባኔራ፥ "ታ አዉዋ ጋራዳትና አያዉ አቃዲ?" ያጊደ ኦቼዳ።

8 አባኔር አ ሃሳያን ዳርስ ይሎቲደ ያቡስታ፥ "ታና ኔን ይሁዳ ካና ሁጰ ጋድየ? ሀቼ ታን ነ አዉዋ ሳኦላዉ፥ አ እሻቶነ አ ዳቦቶ ሎኣድ፤ ታን ኔና ዳዊታ ኩሽያን አደ እማበይከ። ሽን ሀእ ኔን ታና ሀ ምሽራት ጋሱዋን ሞታዳ! 9,10 ሳኦላ ዛርያፐ ካዉተ ዎ አኪደ፥ ዳነፐ ቢደ በርሳበሀ ጋካናዉ፥ እስራኤልያ ቦላነ ይሁዳ ቦላ፥ ዳዊታ ካዉተ ኤሳናዉ መና ጎዳይ ጫቂ ዎዳ ሀ የዉዋ ታን ኦና ዮፐ፥ ጾሳይ አባኔራ ጉፋን" ያጌዳ።✝3:9-10 1 ሳሜላ 15:28 11 እያቡስተ አባኔራዉ ያዬዳ ድራዉ፥ ሀራ ቃላ ቃትቤና።

12 አባኔር ከብሮናን ደእያ ዳዊተኮ፥ "ቢታይ ኦሴ? ኔን ታናና ቃላ ጫቁዋ ጫቃ፤ እስራኤልያ አሳይ ኡባይ ኔኮ ስማናዳን ታን ኔና ማዳና" ያጊደ ኪታ የዴዳ።

13 ዳዊተ፥ "ሎኦ! ታን ኔናና ቃላ ጫቁዋ ዎና። ሽን ታን ኔና እትባ ኦቻይ፤ ኔን ታና በአናዉ ይያ ዎደ፥ ሳኦላ ናቶ ሚካሎ ታዉ አከናን ዮፓ" ያጌዳ። 14 ሄዋፐ ጉይያን፥ ዳዊተ ሳኦላ ናኣ እያቡሰቱዋኮ ኪቲደ፥ "ጼቱ ፕልስጼማቱዋ ቃራቱዋ ጭሎሻደ አኬዳ ታ ማቻቶ ሚካሎ ታዉ እማ" ያጌዳ።✝3:14 1 ሳሜላ 18:27 15 እያቡስተ ኪታ የዲደ፥ እ አስና ላውሻ ናኣ ፓልጽኤላፐ ዎ አኪደ አህሴዳ። 16 እ አስናይ ባሁሪማ ካታማ ጋካናዉ ዬኪደ እ ጌዱዋ ካሌዳ፤ አባኔር አ፥ "ጉየ ስማደ ሶ ባ" ያጌዳ፤ ብታኒ ጉየ ስሚደ ቤዳ።

17 አባኔር እስራኤልያ ጭማቱዋኮ ቢደ፥ ሀዋዳን ያጌዳ፤ "ዳዊተ ህንተንቱ ቦላ ካተታና ማላ፥ ዳሮ ዎድያ አሞቴድታ፤ 18 አነ ሄኮ ሀእ ፖልተ! አያዉ ጎፐ፥ መና ጎዳይ፥ ‘ታ አሳ እስራኤልያ፥ ታን ፕልስጼማ አሳቱዋ ኩሽያፐነ ኡንቱንቱ ሞርክያ ኡባቱዋ ኩሽያፐ ታ ቆማ ዳዊታ ባጋና አሻና’ ጌዳዋ ሀሳይተ" ያጌዳ። 19 አባኔር ቢንያማ ዛረቶ ዱማ ሃሳዬዳ፤ ሄዋፐ ጉይያን፥ እስራኤልያ አሳይነ ቢንያማ አሳይ ኡባይ ኦናዉ ኮዮዋ ኡባባ ዳዊታዉ ኦዳናዉ ከብሮነ ካታማ ቤዳ።

20 አባኔር ባረናና ላታሙ አሳቱዋ አኪደ፥ ከብሮነ ካታማ ቢና፥ ዳዊተ አስነ አ አሳዉ እሞታ ማኬዳ። 21 ሄዋፐ ጉይያን አባኔር ዳዊታ፥ "ኡንቱንቱ ኔናና ቃላ ጫቁዋ ጫቀታናዳንነ ነ ዎዛናይ አሞትያ ኡባ ሞዳናዳን፥ ታን ባደ እስራኤልያ አሳ ኡባ ካትያዉ ታ ጎዳዉ ሺሻይ" ያጌዳ፤ ዳዊተ አባኔራ ሞይዚደ ሳሮ የዴዳ።

እዮኣበ አባኔራ ዎዳ

22 ሄ ዎደ ዳዊታ አሳይነ እዮኣበ ኦላፐ ዳሮባ ኦሞዲደ ስሜድኖ፤ ሽን አባኔር ከብሮነ ካታማን ዳዊታና ደኤና፤ አያዉ ጎፐ፥ ዳዊተ የድና እ ሳሮ ቤዳ። 23 እዮኣብነ አናና ደእያ ኦላንቻቱ ጋክያ ዎደ፥ አሳይ እዮኣባ፥ "ኔራ ናኣ አባኔር ካትያ ዳዊታኮ ዪና፥ ካቲ አ የድና፥ እ ሳሮ ቤዳ" ያጊደ ኦዴዳ።

24 ሄዋ ድራዉ፥ እዮኣበ ካትያኮ ቢደ፥ "ዋናዲ! አባኔር ኔኮ ዪና፥ አያዉ ሳሮ የዳድ? ሄኮ እ ቤዳ! 25 ኔራ ናአይ አባኔር ኔና ጭማናዉ፥ ኔን ገልያሳነ ከስያ ሳኣ በአናዉነ ኔን ኦያ ኡባባ ኤራናዉ ዬዳ" ያጌዳ።

26 እዮኣበ ዳዊታ ስንፐ ከሲደ፥ አባኔራ ጌዱዋ ኪታ የዴዳ፤ ኡንቱንቱ አ ሲራ ሃ ኦላ ምያፐ ጉየ ዛሬድኖ፤ ሽን ዳዊተ ሀ የዉዋ ኤረና። 27 አባኔር ከብሮነ ካታማ ጉየ ስሚደ ዬዳ ዎደ፥ እዮኣበ አናና ዱማ ሃሳያናዋዳን ድርሳ ፐንግያ አ አፌዳ፤ ባረ እሻ አሳሄላ ሱ አቻናዉ አባኔራ ኡሉዋ ጫዴዳ፤ አባኔር ሄ ሳኣን ሀይቄዳ።

28 ዳዊተ ሀ የዉዋ ስሴዳዋፐ ጉይያን፥ "ታንነ ታ ካዉተይ ኔራ ናኣ አባኔራ ሱን መና ጎዳ ስንን መናዉካ ኦሸቶኮ። 29 አ ሱይ እዮኣባነ አ አዉዋ ሶ አሳ ኡባ ኦቾ፤ አሹዋ ቦላ ማዱይ ደእያ አሳይ፥ ዎይ ጋልባይ ሎይ ሳክያ አሳይ፥ ዎይ ዎቢያ አሳይ፥ ዎይ ማሻን ሀይቂያ አሳይ፥ ዎይ ኮሻቴዳ አሳይ እዮኣባ ዛርያን ኡባካ ዮፖ!" ያጌዳ። 30 ሄዋዳን ኦደ፥ ጋባኦና ካታማን ከሴዳ ኦላን ባረንቱ እሻ አሳሄላ አባኔር ዎዳ ድራዉ፥ እዮኣብነ አ እሻ አብሻይ አባኔራ ዎድኖ።

31 ዳዊተ እዮኣባነ አናና ደእያ አሳ ኡባ፥ "ህንተንቱ ማዩዋ ፔተ፤ ማቅያ ማይተ፤ አባኔራ ሻንቻማ ስንን ሀመቲደ ዬክተ" ያጌዳ። ካቲ ዳዊተ ሻንቻማ ካሊደ ቤዳ። 32 አባኔር ከብሮናን ሞገቴዳ፤ ካቲ ባረ ቃላ ቂሲደ ዱፉዋን ዬኬዳ፤ አሳይ ኡባይካ ዬኬዳ።

33 ካቲ አባኔራዉ፥

"አባኔር ኤያ አሳዳን ሀይቃናዉ በሲ?

34 አ ኩሺ ቃሸት ቤና፤

አ ገዲካ ሳንሳላታን ቃሸት ቤና።

አሳይ ኢታ አሳቱዋ ኩሽያን ሀይቂያዋዳን እ ሀይቄዳ"

ያጊደ ዝላሌዳ።

አሳይ ኡባይ አባኔራዉ ዛረደካ ዬኬዳ።

35 ሳአይ ፖኦ ደእሽን፥ ዳዊተ ኡክ ማናዳን ሾባናዉ አሳይ ኡባይ አኮ ዬዳ፤ ሽን ዳዊተ፥ "አዋ አይፊ ዉለናን ደእሽን፥ ኡክ ዎይ ሀራባ ባረናና በኦፐ፥ ጾሳይ ታና ዎ" ያጊደ ጫቄዳ። 36 ካቲ ኦዳዋ አሳይ ኡባይ በኢደ ናሸቴዳ፤ ቱሙካ ካቲ ኦዳ ኡባባይ አሳ ኡባ ናሸቼዳ። 37 ሄዋ ድራዉ፥ ሄ ጋላስ ዳዊታ አሳይ ኡባይነ እስራኤልያ አሳይ ኡባይ ካቲ ኔራ ናኣ አባኔራ ዎስቤናዋ አኬኬድኖ።

38 ካቲ ባረ ቆማቱዋ ሀዋዳን ያጌዳ፤ "እስራኤልያ ቢታን ዎልቃማ አሳይነ ካፑ ሀይቄዳዋ ህንተንቱ አኬክክቴ? 39 ታን ኦከቴዳ ካትያ ግዶፐነ፥ ሀቼ ታዉ ምዪ ፓጬዳ። ሀዋንቱ ጻሩይ ናናይ ታዉ ምኔድኖ፤ ኢታ ኦዳዋንቶ መና ጎዳይ ኡንቱንቱ ኦሱዋዳን ዛሮ" ያጌዳ።