ሳኦላ ያራቱዋ ቦላ ዎዳ ፕርዳ
1 ዳዊተ ካተቴዳ ዎደ፥ ሄዙ ላይ ኩመን ቢታይ ኮሻቴዳ። ሄዋ ድራዉ፥ ዳዊተ መና ጎዳ ኦቼዳ፤ መና ጎዳይ አ፥ "ሄዌ ሀኔዳዌ ሳኦላ አሳይ ጉሴዳ ሱ ድራሳ፤ አያዉ ጎፐ፥ እ ጋባኦና አሳቱዋ ዎዳ" ያጌዳ።
2 ሄዋ ድራዉ፥ ካቲ ጋባኦና አሳቱዋ ጼሲደ ሃሳይሴዳ። ጋባኦና አሳቱ እስራኤልያ ዛርያ ግድክኖ፤ ኡንቱንቱ አሞረ ቢታ አሳቱዋፐ አቴዳዋንታ። እስራኤላቱ ኡንቱንታ አሻናዉ ኡንቱንቱና ጫቀቴድኖ፤ ሽን ሳኦል እስራኤልያዉነ ይሁዳዉ ምሸቴዳ ድራዉ፥ ኡንቱንታ ኡባና ይሳናዉ ዶሜዳ።21:2 ኢያሳ 9:3-15 3 ዳዊተ ጋባኦና አሳቱዋ፥ "ታን ህንተንቶ አያ ኦ? መና ጎዳ ቡዞ ቢታ ህንተንቱ አንጃና ማላ፥ ታን ህንተንቶ አያ አጮ?" ያጌዳ።
4 ጋባኦና አሳቱ ዛሪደ ካትያ፥ "ኑፐነ ሳኦላፐ ግዱዋን፥ ዎይ ኑፐነ ሳኦላ ጎልያ አሳፐ ግዱዋን ደእያ የዉ ዎርቃ ዎይ ብራ የዉዋ ግደና፤ ቃይ ኑን እስራኤልያ ግዶን እት ኡራነ ዎናዉ ኑዉ ማታይ ባዋ" ያጌድኖ።
ዳዊተ ኡንቱንታ፥ "ያትና፥ ታን ህንተንቶ አያ ኦናዉ ኮዪቴ?" ያጊደ ኦቼዳ።
5 ኡንቱንቱ ካትያ፥ "ሳኦል ኑና ይሴዳ፤ ኑፐ አይ አሳይነ እስራኤልያ ዛዋን ሀቃንነ ፓጻ አተናዳን ማቀቴዳ። 6 ሄዋ ድራዉ፥ ሳኦላ ያራፐ ላፑን አቱማ አሳቱዋ ኑዉ አደ እማ፤ መና ጎዳይ ዶሪደ ካተዬዳ ሳኦላ ካታማን ግብአን መና ጎዳ ስንን ኑን ኡንቱንታ ካቃና" ያጌድኖ።
ካቲ ኡንቱንታ፥ "ታን ኡንቱንታ ህንተንቶ አደ እማና" ያጌዳ።
7 ሳኦላ ናአይ ዮናታንነ ዳዊተ መና ጎዳ ስንን ጫቄዳ ጫቁዋ ድራዉ፥ ሳኦላ ናኣ ዮናታና ናኣ ማንፍቦሼታ ካቲ አሼዳ።21:7 1 ሳሜላ 20:15-17፤ 2 ሳሜላ 9:1-7 8 ሽን ዳዊተ አታ ናታ ርጽፋ ሳኦላዉ የሌዳ ላኡ አቱማ ናና፥ አርሞናነ ማንፍቦሼታ፥ ቃይ ሳኦላ ናታ መራባ ማሆላ ካታማፐ ዬዳ ባርዝላያ ናኣ አድሪኤላዉ የሌዳ እቼሹ ናና አኬዳ።21:8 1 ሳሜላ 18:19 9 ጋባኦና አሳቶ አደ እሜዳ፤ ኡንቱንቱ ኡንቱንታ መና ጎዳ ስንን ደርያ ሁጲያን ካቄድኖ፤ ላፑናቱካ እትፐ ሀይቄድኖ፤ ካ ጫካን፥ ባንጋ ጫካይ ዶምያ ዎድያን ኡንቱንታ ዎድኖ።
10 አታ ናታ ርጽፋ ማቅያ አካደ፥ ዛላ ቦላ ባረዉ ሂጻዱ፤ ካ ጫክያ አግናይ ዶምያ ጋላሳፐ ቢደ አሃቱዋ ቦላ እራይ ሳሉዋፐ ዎናዋ ጋካናዉ፥ ጋላስ ሳሉዋ ካፎቱ ዎይ ቃማ ሳኣ ዶአቱ ቦቼናዳን ናጋዱ።
11 ሳኦላ ባካታ፥ አታ ናታ ርጽፋ ኦዳዌ ዳዊታዉ ኦደቴዳ። 12 ዳዊተ ቢደ፥ ሳኦላ መቀነ አ ናኣ ዮናታና መቀ ጋላኣደን ደእያ ያቤሻ ካታማ አሳቱዋፐ አኬዳ። ፕልስጼማ አሳቱ ሳኦላነ አ ናና ግልቦአ ደርያን ዎደ፥ ቤትሻና ጉታራን ካቄዳዋፐ ጉይያን፥ ሄ ጉታራፐ ጋላኣደን ደእያ ያቤሻ አሳቱ ቆሱዋን አኬድኖ።21:12 1 ሳሜላ 31:8-13 13 ዳዊተ ሳኦላ መቀነ አ ናኣ ዮናታና መቀ ሄ ሳፐ አሄዳ፤ ቃይ ሱለቴዳ ላፑን አሳቱዋፐ መቀካ ሺሼድኖ። 14 ሳኦላ መቀነ አ ናኣ ዮናታና መቀ ቢንያማ ቢታን ጸላአ ካታማን ደእያ አ አዉዋ ቂሳ ዱፉዋን ሞጌድኖ። ካቲ አዛዜዳዋ ኡባ ኡንቱንቱ ፖሌድኖ፤ ሄዋፐ ጉይያን፥ ኡንቱንቱ ሄ ቢታዉ ዎሴዳ ዎሳ ጾሳይ ስሴዳ።
ፕልስጼማ አሳቱዋና ኦለቴዳ ኦላቱዋ
(1 ኦዱዋ 20:4-8)
15 ፕልስጼማ አሳቱዋናነ እስራኤልያ አሳቱዋና ላኤንዋ ኦላይ ደንዴዳ፤ ዳዊተ ባረ አሳቱዋና ቤዳ። ፕልስጼማቱዋና ኦለቲደ ዳዊተ ዳቡሬዳ። 16 አዱሳ ምኖ አሳቱዋ ያራፐ ግድያ ይሽብባኖባ ግያ እት ብታኒ ደኤ፤ እ ኦይቄዳ ቶራይ ሄዙ ኪሎ ግራመነ ባጋ ዴጽያ፥ ናሃስያ ጌተትያ ብራታፐ ቆጸቴዳዋ፤ እ ኦራ ማሻ ዳንጭ ኡቴዳ። ያቴዳዌ "ታን ዳዊታ ዎና" ጌዳ፤ 17 ሽን ጻሩይ ናአይ አብሻይ ዳዊታ አሼዳ፤ ፕልስጼምያ ሾጪደ ዎዳ። ሄዋፐ ጉይያን ዳዊታ አሳቱ ዳዊታ፥ "እስራኤልያ ጾምፒ ቶኤናዳን ኔን ላኤን ኡባካ ኑናና ኦላዉ ባካ" ያጊደ ጫቄድኖ።21:17 1 ካታ. 11:36፤ ማዝ. 132:17
18 ሄዋፐ ጉይያን፥ ጎባ ጌተትያ ሳኣን ፕልስጼማ አሳቱዋና ኦላይ ኦለቴዳ፤ ሁሻፐ ዬዳ ስባካይ አዱሳ ምኖ አሳቱዋ ያራፐ ግድያ ሳፋ ዎዳ። 19 ቃይካ ሄ ሳኣን ፕልስጼማ አሳቱዋና ሀራ ኦላይ ኦለቴዳ፤ ቤተሌመፐ ዬዳ ያኢራ ናአይ ኤልሀናን፥ ቶራ ቶማይ ሸማይንያ ዎንዳራሽያ ኬሻቶ፥ ጋተ ካታማፐ ዬዳ ጎልያዳ ዎዳ።
20 ቃይካ ጋተ ካታማን ሀራ ኦላይ ኦለቴዳ። ሄ ሳኣን እት ዎጋ አዱሳ ብታኒ ደኤ። ሄ ብታንያዉ እት እት ኩሽያን ኡሱፑን ብራቱ፥ እት እት ገድያንካ ኡሱፑን ብራቱ፥ ኡባና ላታማነ ኦይዱ ብራቱ ደኢኖ። እካ አዱሳ ምኖ አሳቱዋ ያራፐ ግድያ አሳ። 21 ሄ ብታኒ እስራኤልያ ናሴዳ ዎደ፥ ዳዊታ እሻ ሻማ ናአይ ዮናታን አ ዎዳ።
22 ሄ ኦይዳቱ ጋተ ካታማን ደእያ አዱሳ ምኖ አሳቱዋ ያራቱዋ። ኡንቱንታ ዳዊተነ አ አሳቱ ዎድኖ።