2 ሳሜላ 24

ዳዊተ አሳ ፓይድሴዳ

1 ቃይካ መና ጎዳ ሀንቁ እስራኤልያ ቦላ ኤጽ ከሴዳ፤ ያትና፥ ጾሳይ ዳዊታ ኡንቱንቱ ቦላ ደንደ፥ "ባ፤ እስራኤላነ ይሁዳ አሳ ፓይዳ" ያጌዳ። 2 ሄዋ ድራዉ፥ ካቲ እዮኣባነ አናና ደእያ ኦላንቻቱዋ ካፓቱዋ ሀዋዳን ያጌዳ፤ "እስራኤልያ ዛራቱዋ ግዶ ዳናፐ ቢደ በርሳበሀ ጋካናዉ ቢደ ኡንቱንቱ አፑነንቶ ታን ኤራና ማላ፥ እስራኤልያ አሳ ፓይድተ" ያጌዳ።

3 ሽን እዮኣበ ካትያ፥ "መና ጎዳይ ነ ጾሳይ ሀ ደእያ አሳ ቦላ ጼቱ ኩሽያ ጉጆ! ሄዋ ነ አይፊ፥ ታ ጎዳ ካትያ አይፊ በኦ! ሽን ታ ጎዳይ ካቲ አያዉ ሄዋ ማላ ኦናዉ ኮዪ?" ያጌዳ። 4 ሽን ካትያ ቃላይ እዮኣባነ ኦላንቻቱ ካፓቱዋ ጾኔዳ። ኡንቱንቱ ካትያ ስንፐ ከሲደ፥ እስራኤልያ አሳ ፓይዳናዉ ቤድኖ።

5 ኡንቱንቱ ዮርዳኖሳ ሻፋ ፕኔዳዋፐ ጉይያን፥ ዛንጋራፐ ገድሳ ባጋን ደእያ አሮኤራ ካታማን ኡቴድኖ፤ ሄዋፐ ቃይ ጋደ አደ ያእዜራ ጋኬድኖ። 6 ሄዋፐ ጉይያን፥ ኡንቱንቱ ጋላኣደነ ሂተቱዋ ቢታን ደእያ ቃዴሳ ቤድኖ፤ ሄ ሳፐ ቃይ ዳና ካታማ ቤድኖ፤ ሄዋና ሲዶና ካታማ ቤድኖ። 7 ሄ ሳፐ ደንዲደ፥ ጺሮሳ ካታማ ጌሱዋነ ሂዌቱዋነ ካናነቱ ካታማ ኡባ ቤድኖ። ዉርሰን ቃይ ይሁዳ ኔጌባን ደእያ በርሳበሀ ካታማ ቤድኖ።

8 ኡንቱንቱ ቢታ ኡባ ዩዪደ፥ ኡዱፑን አግናነ ላታሙ ጋላሳ ጋምኤዳዋፐ ጉይያን፥ የሩሳላመ ካታማ ስሜድኖ።

9 እዮኣበ ፓይዴዳ አሳ ፓይዱዋ ካትያ ኤርሴዳዋዳን እስራኤላን ማሻን ኦለታናዉ ዳንዳይያ ሆስፑን ጼቱ ሻአ፤ ምኖ ኦላንቻቱ ደኢኖ፤ ይሁዳን ቃይ እቼሹ ጼቱ ሻአይ ደኢኖ።

10 አሳ ፓይዴዳዋፐ ጉይያን፥ ዳዊታ ዎዛናይ ሻበረቴዳ፤ ሄዋ ድራዉ፥ ዳዊተ መና ጎዳ፥ "ታን ሀ ኪታን ዎልቃማ ናጋራ ኦድ። ሽን ሀእ አቤት መና ጎዳዉ፥ ታን ኔና ዎሳይ፤ ታ ባይዙዋ፥ ነ ቆማ ባይዙዋ ቁጫ። ታን ዳሮ ኤያባ ሀናድ" ያጌዳ።

11 ዎንተ ጋላስ ጉራ፥ ዳዊተ ግሱዋፐ ደንዴዳ ዎደ፥ ዳዊታዉ ትምቢትያ ኦድያ ጋዳኮ መና ጎዳ ቃላይ ዪደ፥ 12 "ባ፤ ዳዊታ፥ ‘መና ጎዳይ ኔና፥ "ታን ኔና ሄዙባፐ ዶሩዋ በሳይ፤ ታን ነ ቦላ ፖላናዉ ታዉ ኡንቱቱፐ እቱዋ ዶራ" ያጌ’ ያጋ" ያጌዳ።

13 ጋድ ዳዊታኮ ቢደ፥ "ሄዙ ላይ ነ ቢታይ ኮሻታናዋ ዶራይ? ዎይ ነ ሞርከቱ ኔና የደርስሽን፥ ሄዙ አግና ኔን ኡንቱንቱ ስንፐ ባቃታናዋ ዶራይ? ዎይ ነ ቢታ ቦላ ሄዙ ጋላሳ ኢታ ሀርጊ ያናዋ ዶራይ? አነ ሀእ ቆፋ ቃቻደ፥ ታን ታና ኪቴዳዎ ዛርያዋ ኦዳ" ያጌዳ።

14 ሄዋፐ ጉይያን ዳዊተ ጋደ፥ "ታን ሎይ ኡንኤታድ። መና ጎዳ ማሮተይ ዎልቃማ ግድያ ድራዉ፥ ኑን አነ አ ኩሽያን ኩንዶይተ፤ ታና አሳቱዋ ኩሽያን ኩንድሶፓ" ያጌዳ።

15 ሄዋ ድራዉ፥ ዎንታፐ ቢደ ባረ ጌዳ ጋላሳይ ጋካናዉ፥ መና ጎዳይ እስራኤልያ ቢታን ኢታ ሀርግያ ኪቴዳ፤ እስራኤልያ ዛዋን ዳናፐ ቢደ በርሳበሀ ጋካናዉ፥ ላፑን ታሙ ሻአ አሳይ ሀይቄዳ። 16 የሩሳላመ ካታማ ይሳናዉ ኪታንቻይ ባረ ኩሽያ የዴዳ ዎደ፥ መና ጎዳይ ሄ ጋኬዳ ቦሻዉ ካዮቴዳ፤ አሳ ሾጭያ ኪታንቻ፥ "አጋ! ሄዌ ግዳና!" ያጌዳ። መና ጎዳ ኪታንቻይ ሄ ዎደ ያቡስያ ኦርና ኡዱማን ደኤ።

17 አሳ ሾጭያ ኪታንቻ ዳዊተ በኤዳ ዎደ፥ መና ጎዳ፥ "በአ! ናጋራ ኦዳዌ ታና፤ ታን ባይዛድ! ሀ ዶርሳቱ፥ ኡንቱንቱ አይ ኦድኖ? ሀያና፥ ታናነ ታ አዉዋ ሶ አሳ ኔን ሙራና ማላ ታን ዎሳይ" ያጌዳ።

18 ሄ ጋላስ ጋድ ዳዊታኮ ዪደ፥ "ባ፤ ፑደ ያቡስያ ኦርና ኡዱማ ባደ፥ መና ጎዳዉ ያርሽያ ሳኣ ያን ግምባ" ያጌዳ። 19 ዳዊተ መና ጎዳይ ጋደ ባጋና አዛዜዳዋዳን ፑደ ቤዳ። 20 ኦርን ዱገ ጼልያ ዎደ፥ ካቲነ አ አሳቱ ባረኮ ይያዋንታ በኤዳ፤ ጋጻ ከሲደ፥ ባረ ዴሙዋ ሳኣ ጋደ፥ ካትያዉ ጎይኔዳ።

21 ዝጊደ ኦርን፥ "ታ ጎዳይ ካቲ ባረ ቆማኮ፥ ታኮ አያዉ ዬዴ?" ያጌዳ።

ዳዊተ፥ "አሳ ቦላፐ ቦሻይ ክቻናዳን ታን መና ጎዳዉ ያርሽያ ሳኣ ግምባናዉ፥ ነ ኡዱማ ሻማናዉ ያድ" ያጌዳ።

22 ኦርን፥ "ታ ጎዳይ ካቲ ባረ ኮዬዳዋ አያነ አኪደ ያርሾ! በአ፤ ጹግያ ያርሾ ቦራቱ፥ ኤያ ምዉ ቃይ ካ ቡክያ ሚሻቱነ ቦራ ሞርገ ምቱ ሀዋንቱሽ። 23 ካትያዉ፥ ሀዋ ኡባ ታን ኦርን ካትያዉ እማይ" ያጌዳ። ቃይካ ኦርን ካትያ፥ "መና ጎዳይ ነ ጾሳይ ነ ያርሹዋ አኮ" ያጌዳ።

24 ሽን ካቲ ኦርና፥ "ቱይት፥ ሃኮ! ታን ቱሙፐ ሚሻን ሻማና፤ አያዉ ጎፐ፥ ሚሻ አክቤና ጹግያ ያርሹዋ ታን መና ጎዳዉ፥ ታ ጾሳዉ፥ ያርሽከ" ያጌዳ።

ሄዋ ድራዉ፥ ካቲ ኡዱማፐ ቦራቱዋ ኦርናፐ እሻታሙ ጻጋራ ብራን ሻሜዳ። 25 ዳዊተ ሄ ሳኣን ያርሽያ ሳኣ ግምቢደ፥ ጹግያ ያርሹዋነ እትፐተ ያርሹዋ መና ጎዳዉ ያርሼዳ፤ ያትና፥ መና ጎዳይ ሄ ቢታ ድራዉ ዎሰቲደ ዎሳ ስሲደ፥ ቦሻ እስራኤልያፐ ድጌዳ።