2 ሳሜላ 16

ዳዊታነ ጺባ

1 ዳዊተ ደርያ ሁጲያፐ ሄፍን ባጋና አሽን፥ ጺባ ጌተትያ ማንፍቦሼታ ቆማይ አናና ጋከቴዳ፤ ላኡ ጼቱ ባሶ ኡክ፥ ዎይንያ ቴራ ኡክ ጼቱዋ፥ ባላስያ ቴራ ኡክ ጼቱዋነ እት ኦጎሩዋ ዎይንያ ኤሳ ላኡ ሀረቱዋን ጫኔዳ።✝16:1 2 ሳሜላ 9:9-10

2 ካቲ ጺባ፥ "ሀዋ አያዉ አሃድ?" ያጊደ ኦቼዳ።

ጺብ፥ "ሀረቱ ካትያ ሶ አሳይ ቶጋናዉ፤ ኡክይነ ዱማ ዱማ አይፍያ አሳቱ ማናዳና፤ ቃይ ዎይንያ ኤሳይ ዎራን ዳቡርያዋንታ ኡሻናዉ" ያጌዳ።

3 ሄዋፐ ጉይያን ካቲ ጺባ፥ "ነ ጎዳ ናኣ ናአይ ሀቃን ደኢ?" ያጊደ ኦቼዳ።

ጺብ፥ "እ፥ ‘እስራኤልያ አሳይ ታ አዉዋ አዉዋ ካዉተ ሀቼ ታዉ ዛር እማና’ ያጊደ የሩሳላመን ኡቴዳ" ያጌዳ።✝16:3 2 ሳሜላ 19:26-27

4 ካቲ ጺባ፥ "በአ! ማንፍቦሼታዉ ደእያባይ ኡባይ ሀእ ኔሳ" ያጌዳ።

ጺብ፥ "ኤኖ ታ ጎዳዉ ካትያዉ! ታን ቢታን ጉፋናይ፤ ታን ኔና ናሸችያዋ ኦና" ያጌዳ።

ሽምእ ዳዊታ ሸቄዳ

5 ካቲ ዳዊተ ባሁሪማ ጌተትያ ካታማ ዬዳ ዎደ፥ ሳኦላ ዳቦ ግድያ እት ብታኒ ሄዋፐ ከሴዳ። አ ሱንይ ጌራ ናኣ ሽምአ። እ ዳዊታ ሸቂደ ከሴዳ። 6 ዳዊታ ቦላነ ካትያ ኦሳንቻቱ ቦላ ሹቻ ኦሌ፤ እ ሄዋ ኦያ ዎደ፥ ኦላንቻቱ ኡባይነ ካትያ ናግያዋንቱ ኡሸቻናነ ሀድርሳና ካትያ ዳዊታ ዶድ ዎድኖ። 7 ሽምእ ዳዊታ ሸቂደ፥ "ክቻ፤ ክቻ! ሀ ሱ ጉስያዌ! ሀ ፓናዌ! 8 ኔን ሳኦላ ካዉተ ዉኣደ ካተታዳ፤ ኔን ጉሴዳ ሳኦላ አሳ ሱ ኡባ መና ጎዳይ ነ ቦላ ዛሬዳ፤ ቃይ መና ጎዳይ ካዉተ ነ ናኣ አበሰሎማዉ ሼዳ። ኔን ሱ ጉሴዳ አሳ ግድያ ድራዉ፥ ኔን ይያ ዎዲ ጋኬዳ" ያጌዳ።

9 ሄዋፐ ጉይያን፥ ጻሩይ ናአይ አብሻይ ካትያ፥ "ሀ ካና ባኩታይ ታ ጎዳ ካትያ አያዉ ሸቂ? ታን ባደ አ ቆያ ሙጫይ" ያጌዳ።

10 ካቲ፥ "ህንተንቶ፥ ጻሩይ ናቶ፥ ህንተንታ ጋያዌ አዬ? መና ጎዳይ አ፥ ዳዊታ ሸቃ ያጌዳ ድራዉ እ ሸቂያዋ ግዶፐ፥ ‘ኔን አያዉ ሀዋ ኦይ?’ ያጊደ ኦቻናዉ ዳንዳይያዌ ኦኔ?" ያጌዳ።

11 ሄዋፐ ጉይያን፥ ዳዊተ አብሻያነ ባረ ቆማቱዋ ኡባቱዋ፥ "ታ ናአይ፥ ታ አሹ፥ ታና ዎናዉ ኮዬ፤ ያትና፥ ሀ ቢንያማ አሳይ ዎት አጊቴ! አ ቦቾፕተ፤ እ ባሽና ሸቆ! አያዉ ጎፐ፥ መና ጎዳይ አ አዛዜዳ። 12 ኦን ኤሪ፥ መና ጎዳይ ታ መቱዋ በኢደ፥ ታን ሀቼ አክያ ሸቃ ድራዉ ታዉ ኬካ ዛራነንቶነ" ያጌዳ።

13 ዳዊተነ አ አሳይ ኦግያ ኦይቂደ ቢኖ። ሽምእካ ደርያፐ ህን ባጋና፥ ዳዊታ ሄራና ቢደ አ ሸቄነ ሹቻ አ ቦላ ኦሌ፤ ባናካ አ ቦላ ላሌ። 14 ካቲነ አናና ደእያ አሳቱ ባረንቱ ብያሳኣ ዳቡሪደ ጋኬድኖ። ካቲ ያን ሸምፔዳ።

አበሰሎማነ አ ዞርያዋንታ

15 አበሰሎምነ እስራኤልያ አሳቱ ኡባይ የሩሳላመ ገሌድኖ፤ አክጾፌልካ ኡንቱንቱና እትፐ ደኤ። 16 ዳዊታ ላጊ አርክያ ሁሻይ አበሰሎማኮ ዪደ፥ "ካትያ ሸምፑ ጋምኦ! ካትያ ሸምፑ ጋምኦ!" ያጌዳ።

17 አበሴሎም ሁሻያ፥ "ኔን ነ ላግያ ሲቄዳ ሲቁ ሀዌካ? ነ ላግያና አያዉ ባበይኪ?" ያጌዳ።

18 ሁሻይ አበሰሎማ፥ "ቱይት! መና ጎዳይነ ሀ አሳይ ቃይ እስራኤልያ አሳይ ኡባይነ ዶሬዳዎ ታን አቃና፤ ታን አናና አታና። 19 ሄዋፐካ ቃይ ታን ኦዉ ኦኔ? አ ናአዉ ኦናዉ በስክታየ? ታን ነ አዎ ኦዳዋዳን ሀእ ነዉካ ኦና" ያጌዳ።

20 አበሴሎም አክጾፌላ፥ "ኔን አነ ኑና ዞራ፤ ኑን አይ ኦነ?" ያጌዳ።

21 አክጾፌል አበሰሎማ፥ "ካትያ ጎልያ ናጋናዉ አቴዳ ነ አዉዋ ባኮቱዋና ባደ ግሳ፤ ኔን ነ አዉዋ ሲያን ጽንቄዳዋ እስራኤልያ አሳይ ኡባይ ስሳና፤ ኔናና እትፐ ደእያ ኡባቱዋ ኩሺ ሄዋን ምናና" ያጌዳ። 22 ካትያ ጎልያ ቦላን ደምባዪደ ኦዳ ሳኣን፥ አበሰሎማዉ ዱንካንያ ቶሌድኖ፤ አሳይ ኡባይ ጼልሽን አበሴሎም ገሊደ፥ ባረ አዉዋ ባኮቱዋና ግሴዳ።✝16:22 2 ሳሜላ 12:11-12

23 ሄ ጋላሳቱዋን አክጾፌል አ ዞሬዳ ዞርያ እት አሳይ ጾሳ ኦቺደ አክያ ዞርያ ማላ። ዳዊተነ አበሰሎምነ ላአቱካ አክጾፌላ ዞርያ ኡባ አኬዳዌ ሀዋዳና።