2 ሳሜላ 23

ዳዊተ ዉርሰን ሃሳዬዳ ቃላቱዋ

1 ሀዋንቱ ዳዊተ ዉርሰን ሃሳዬዳ ቃላቱዋ።

እሰያ ናአይ ዳዊተ ሃሳዬ፤

ጾሳይ ቁ ቁ ኦዳዌ፥

ያቆባ ጾሳይ ኦኪደ ካተዬዳዌ፥

እስራኤላን ሎኦ ማዝሙርያ ከሴዳዌ ሀዋዳን ያጌ፦

2 "መና ጎዳ አያናይ ታ ባጋና ሃሳዬ፤

አ ቃላይ ታ እንጻርሳን ደኤ።

3 እስራኤልያ ጾሳይ ሃሳዬዳ፤

እስራኤልያ ዛላይ ታና ሀዋዳን ያጌዳ፤

‘ጽሎተን ጋድያ ሞድያ ካቲ፥

ጾሳዉ ያዪደ ካተትያ ካቲ፥

4 ሻሪ ባይና ጉራን ዶልያ ጻልቂያ ፖኡዋ ማላ።

ሄ ኡራይ እራይ ቡክ ስምና፥

ቢታፐ ማታ ዶልስያ ቦቃልሳ ማላ’ ያጌዳ።

5 "ቱሙ ታ ጎልያ አሳይ ጾሳ ስንን ሱረ።

እ ታናና መና ቃላ ጫቁዋ ጫቀቴዳ፤

ኡባባይካ ሀ ቃላ ጫቁዋ ግዶን ጊጊደነ ምኒደ ኡቴዳ።

ጾሳይ ታዉ ጾኑዋ እማና፤

ቃይ ታን አሞቴዳዋ ኡባ እ ቱሙፐ ፖላና።

6 ሽን ኢታ አሳቱ ኡባይ

ኩሽያን ሺሻናዉ ሀነና አጉንቱዋዳን

ዎራ ኦለታና።

7 አጉንቱዋ ቦችያ ኦንነ

ብራታ ዎይ ቶራ ቶማ ባረ ኩሽያን ኦይቃናዉ ኮሼ።

ሄ አጉንይ ባረንቱ ደእያ ሳኣን ኤጻና"

ያጌዳ።

ዳዊታ ምኖ አሳቱዋ

8 ዳዊታ አሳቱዋ ምኖቱ ሱንይ ሀዋፐ ካሊደ ጻፈቴዳ። ኡንቱንቱፐ ሄዛቱ ሎይ ኤረቴዳዋንታ። ሄዛቱዋፐ ኮይሩ ታህክሞናፐ ዬዳ ዮሸብ-ባሸቤታ ጌተቴ፤ እ እት ገደ ኦላን ባረ ቶራን ሆስፑን ጼቱ አሳ ዎዳ።

9 ሄዙ ምኖ አሳቱዋ ግዶን አ ካሊደ ደእያዌ አሆህያ ዶዶ ናኣ ኤልኣዛራ። እት ጋላስ እነ ዳዊተ ኦላዉ ሺቄዳ ፕልስጼማቱዋ ናሴድኖ፤ ሄዋፐ ጉይያን፥ እስራኤልያ አሳይ ጉየ ስሜዳ። 10 ሽን እ ባረ ሳኣን ምን ኤቂደ፥ አ ኩሺ ጻላሊደ፥ ማሻና ኦይቀታና ጋካናዉ፥ ፕልስጼማ አሳቱዋ ሾጬዳ። ሄ ጋላስ መና ጎዳይ ዎልቃማ ጾኑዋ እሜዳ። ኦላይ ኤቂና፥ ኦላንቻቱ ኤልኣዛራኮ ስሚደ ዬድኖ፤ ሽን ኡንቱንቱ ሀይቄዳ ፕልስጼማቱዋፐ ኦላ ማዩዋ ቃሬድኖፐ አትና፥ ሀራባ ኦበይክኖ።

11 አፐ ካልያዌ ቃይ ሃራራፐ ዬዳ አገ ናኣ ሻማ። እት ጋላስ ፕልስጼማ አሳቱ ምስሪ ኩም ኡቴዳ ሾይቃን ሺቄድኖ፤ እስራኤልያ አሳቱ ኡንቱንቱ ስንፐ ባቃቴድኖ። 12 ሽን ሻም ሾይቃዉ ግዶ ባዙዋን ምን ኤቂደ ኦለቴዳ። ፕልስጼማ አሳቱዋ ሾጪደ ድፕ ኦዳ። መና ጎዳይ ዎልቃማ ጾኑዋ እሜዳ።

13 ካ ጫካን ሀታሙ ምኖ አሳቱዋፐ ሄዛቱ ዳዊታኮ አዱላማ ካታማ ማታን ደእያ ጎንጎሉዋ ቤድኖ። ሄ ዎደ ፕልስጼማ ኦላንቻቱ ራፋይማ ዎምባን ሺቅ ኡቴድኖ። 14 ሄ ዎደ ዳዊተ ጌሱዋ ግዶን ደኤ፤ ፕልስጼማ ኦላንቻቱ ጭታይ ቃይ ቤታልሄመን ደኤ። 15 ዳዊተ ሃ ኡሻናዉ አሞቲደ፥ "ቤተሌመ ካታማ ፐንግያ ላንቂያን ደእያ ፑልቱዋ ሃፐ ታና ኦን ኡሻንዴሻ!" ያጌዳ። 16 ሄዙ ምኖ አሳቱ ፕልስጼማ ኦላንቻቱ ሞ አደ፥ ቤተሌመ ካታማ ፐንግያን ደእያ ፑልቱዋፐ ሃ ዱቂደ ዳዊታዉ አሄድኖ። ሽን እ ኡሸናን እጼዳ፤ መና ጎዳ ስንን ትጊደ፥ 17 "አቤት መና ጎዳዉ፥ ሀዋ ኡሻናዌ ታፐ ሃኮ! ሀ ሃይ ባረንቱ ሸምፑዋ ሸነኮ ጊደ ጻሊደ ቤዳ አሳቱዋ ሱ ግደኔ?" ያጊደ ኡሸናን እጼዳ።

ሀ ሄዙ ምኖ አሳቱ ሀዋ ኦድኖ።

18 ጻሩይ ናኣ እዮኣባ እሻይ አብሻይ ሀታማቶ ካፑዋ፤ እ ሄዙ ጼቱ አሳቱዋ ባረ ቶራን ኦለቲደ ዎዳ፤ ያቲደ እካ ሀራ ሄዛቱዋዳን ኤረቴዳ። 19 እ ሀታማቱዋፐ አደ ቦንቼቴዳ አሳ፤ እ ኡንቱንቶ ካፑዋ ግዴዳ። ግዶፐነ፥ እ ሄ ሄዛቱዋ ፓይዱዋን ባዋ።

20 ቃይ ቃብጽኤላፐ ዬዳ ዮዳሄ ናአይ ባናይካ ምኖ አሳ። እ ምኖ ኦሳቱዋ ኦዳ። እ ላኡ ኤረቴዳ ሞኣበ አሳቱዋ ዎዳ። ቃይ ሻቻይ ዳርያ እት ጋላስ ኦላ ዱገ ገሊደ፥ ጋሙዋ ዎዳ። 21 ቃይ ግብጼ ብታንያ እት ዎልቃማ ዎዳ፤ ግብጼ ብታኒ ቶራ ኦይቄዳ፤ ሽን እ ዱላ ኦይቂደ አ ቦላ ቤዳ፤ አ ኩሽያፐ ቶራ ቦንቂ አኪደ፥ አ ቶራን አ ዎዳ። 22 ዮዳሄ ናአይ ባናይ ሀዋንታ ኦዳ። አ ሱንይካ ሄ ሄዛቱዋዳን ኤረቴዳ። 23 እ ሀታማቱዋ ግዶን ዳሮ ቦንቼቴዳ፤ ሽን እ ሄዛቱዋ ፓይዱዋን ባዋ። ዳዊተ አ ባረና ናግያ ኦላንቻቶ ካፑዋ ከሴዳ።

24 ሄ ሀታማቱዋ ግዶን ደእያዋንቱ: ዮኣባ እሻ አሳሄላ፥ ቤተሌመፐ ዬዳ ዶዶ ናኣ ኤልሀናና፥ 25 ሀሮዳፐ ዬዳ ሻማነ ኤሊቃ፥ 26 ፓልጻ ያራ ግድያ ሄሌጻ፥ ታቆአፐ ዬዳ እቄሻ ናኣ እራ፥ 27 አናቶታፐ ዬዳ አብኤዘራ፥ ሁሻፐ ዬዳ ማቡናያ፥ 28 አሆሀ ያራ ግድያ ጻልሞና፥ 29 ናጾፋፐ ዬዳ ማህራያነ ባኣና ናኣ ሄሌባ፥ ቢንያማ ቢታፐ፥ ግብአፐ ዬዳ ርባያ ናኣ እታያ፥ 30 ፕርኣቶናፐ ዬዳ ባናያ፥ ጋኣሻ ዛንጋራ ማታፐ ዬዳ ህዳያ፥ 31 አራባፐ ዬዳ አብአልቦና፥ ባህሩማፐ ዬዳ አዝማዌታ፥ 32 ሻአልቦናፐ ዬዳ ኤልያህባ፥ ያሼና ናና፥ ዮናታና፥ 33 ሃራራፐ ዬዳ ሻማ፥ ሃራራፐ ዬዳ ሻራራ ናኣ አህኣማ፥ 34 ማእካፐ ዬዳ አሀሳባያ ናኣ ኤልፈሌጻ፥ ጊሎፐ ዬዳ አክጾፌላ ናኣ ኤሊኣማ፥ 35 ቃርመሎሳፐ ዬዳ ሄጽራ፥ አራባ ካታማፐ ዬዳ ፓአራያ፥ 36 ጾባ ካታማፐ ዬዳ ናታና ናኣ ይግኣላ፥ ጋዳፐ ዬዳ ባና፥ 37 አሞናፐ ዬዳ ጸለቃ፥ ጻሩይ ናኣ ዮኣባ ኦላ ሚሻ ቶክያ ባኤሮታፐ ዬዳ ናህራያ፥ 38 ያትራ ያራ ግድያ እራ፥ ያትራ ያራ ግድያ ጋሬባነ 39 ሂትያ ኦርዮና። ኡንቱንቱ ኡባና ሀታማነ ላፑና።