2 Samuel 13

አምኖናነ ታማሮ

1 እት ዎደ ሀዋዳን ሀኔዳ። ዳዊታ ናኣ አበሰሎማዉ ታማሮ ግያ እት ማላ ሎኦ ምቻታ ደአዉ፤ ዳዊታ ናአይ አምኖን ታማሮ ሲቄዳ። 2 አ ምቻታ ታማራ ዎዶሮ ግዴዳ ድራዉነ እ እዞ አይነ ኦናዉ ዳንዳየናባ አዉ ማላቴዳ ድራዉ፥ አምኖን ታማሮ ቆፒደ ግልቄዳ።

3 ሽን አምኖናዉ ዳዊታ እሻ ሻማ ናኣ ዮናዳባ ጌተትያ ላጊ ደኤ፤ ዮናዳብ ዳሮ ሂላንቻ አሳ። 4 ዮናዳብ አምኖና፥ "ኔን ካትያ ናኣ፤ ያትና፥ ጋላስ ጋላስ አያዉ ግልቃይ? ኔን ታዉ አያዉ ኦድኪ?" ያጊደ ኦቼዳ።

ሽን አምኖን አ፥ "ታ እሻ አበሰሎማ ምቻቶ ታማሮ ታን ዶሳይ" ያጌዳ።

5 ዮናዳብ አምኖና፥ "ባ፤ ሳከትያዋ ማላታደ ግሱዋን ግሳ ባሻ። ነ አዉ ኔና በአናዉ ይያ ዎደ፥ ‘ታ ምቻታ ታማራ ያደ ታዉ ምያባ እሙ፤ ታን እዞ ጼልሽን ቁማ ታ ስንን ካደ ታና ባርሱ’ ያጋደ ኦቻ" ያጌዳ።

6 አምኖን ሳከቴዳዋ ማላት ቢደ ግሱዋን ግሴዳ። ካቲ አ በአናዉ ዬዳ ዎደ፥ አምኖን አ፥ "ታ ምቻታ ታማራ ያደ፥ ታዉ እት ሎኦ ኡክ ታ ጼልሽን ኡካንቶነ ታን እ ኩሽያፐ ምንቶ ዶሳይ ሽን" ያጌዳ።

7 ዳዊተ ታማርኮ ካትያ ሶ ኪቲደ፥ "ነ እሻ አምኖና ሶ ሀእ ባደ፥ አዉ ቁማ ካ" ያጌዳ። 8 ታማራ ባረ እሻ አምኖና ሶ ባዱ፤ ሄ ዎደ እ ግሴዳ። ታማራ አማሬዳ ልያ ሙናቃደ፥ አምኖን ጼልሽን ኡክ ኡካዱ። 9 ታማራ ባሽያፐ ኡክ ከሳደ አዉ አዱ፤ ሽን እ ሜናን እጼዳ።

አምኖን፥ "አሳ ኡባ ሀዋፐ ከስ ድግተ" ያጌዳ፤ አሳይ ኡባይ አ ማታፐ ከሴዳ። 10 ሄዋፐ ስሚደ አምኖን ታማሮ፥ "ታን ነ ኩሽያፐ ማናዳን ቁማ ሃ ታ ሲርጻ አካደ ያ" ያጌዳ፤ ታማራ ባረ ኡኬዳ ኡክ አካደ፥ ባረ እሻ አምኖና ሲርሳ ገልሳዱ። 11 ታማራ ቁማ አኮ ሺሼዳ ዎደ፥ እዞ ኦይቂደ፥ "ታ ምቻተ፥ ሃያ! ታናና ግሳ" ያጌዳ።

12 እዛ፥ "ታ እሻዉ፥ ክቻ ሀነና! ታና ዎልቃንፓ! ሀዋ ማላባይ እስራኤልያ ቢታን ኦሰታናዉ በሰናባ፤ ሀዋ ማላ ኢታባ ኦፓ። 13 ታ ፖኩዋ ታን ዋታደ ገንናዉ ዳንዳያይታ? ቃይ ኔንካ እስራኤልያ ግዶን ካዉሻ አሳ ግዳና። ሀያና ካትያ ሀእ ኦቻ። እ ታን ኔና ገላናዉ ድገና" ያጋዱ። 14 ሽን እዛ ኦድያዋ ስሰናን እጼዳ። እ ኢፐ ዎልቃማ ግድያ ድራዉ፥ እዞ ዎልቃን ኦይቂደ ባይዜዳ።

15 ሄዋፐ ጉይያን፥ አምኖን እዞ ሎይ እጼዳ፤ ካሰ እዞ ሲቄዳዋፐ አደ እጼዳ። አምኖን እዞ፥ "ከሳ! ከሳደ ባ!" ያጌዳ።

16 እዛ፥ "ቢከ! ኔን ታና ሀእ ካረ የደርስያ ባላይ ኔን ሀኖ ጋካናዉ ታ ቦላ ኦዳ ባላፐ አ" ያጋዱ።

ሽን እ እዝዉ ስሰናን እጼዳ። 17 አምኖን ባረ ቆማ ጼሲደ፥ "ሀ ምሽራቶ ታ ስንፐ ከሳ፤ እዞ ካረ ከሳ ድጋደ፥ ካርያ ጎርዳ" ያጌዳ። 18 ቆማይ ምሽራቶ ካረ ከሲደ፥ ካርያ ጎርዴዳ።

አ ዳሮ አሌቁዋና ደእያ ማዩዋ ማያዱ፤ አያዉ ጎፐ፥ ካትያ ማጫ ናናይ ዎዶራቱ ሄዋ ማላ ማዩዋ ማዪኖ። 19 ታማራ ብድን ባረ ሁጲያን ቆላደ፥ ባረ ማዬዳ አሌቁዋና ደእያ ማዩዋ ፔዱ፤ ባረ ሁጲያ ኦይቃደ፥ ዋሱዋ ጹላደ ባዱ።

20 እ እሻ አበሴሎም እዞ በኤዳ ዎደ፥ "ነ እሻይ አምኖን ኔና ባይዜዴ? ታ ምቻተ፥ ኔን ሀእ ጮኡ ጋ። እ ነ እሻ፤ ሀ የዉዋ ኔን ኡሉዋን ኦይቆፓ" ያጌዳ። ሄዋ ድራዉ፥ ታማራ ካዮታደ ባረ እሻ አበሰሎማ ሶን፥ አሳን ጋከተናን ደኣዱ።

21 ካቲ ዳዊተ ሀ የዉዋ ስሴዳ ዎደ፥ ሎይ ሀንቀቴዳ። 22 አበሴሎም አምኖናዉ ማልኡዋ ጫሙዋካ ቃትቤና። ባረ ምቻቶ ታማሮ ባይዜዳ ድራዉ፥ አምኖና ሞርኬዳ።

አበሴሎም አምኖና ዎዳ

23 ላኡ ላይፐ ጉይያን፥ ኤፍሬማ ዛዋ ማታን ባኦል-ሀጾራ ግያ ሳኣን አበሴሎም ዶርሳ እስክያ ሜድሴ፤ ካትያ ናናይ ኡባይ ሄ ሳኣ ያናዳን አበሴሎም ኡንቱንታ ጼሴዳ። 24 አበሴሎም ካትያኮ ዪደ፥ "ታ ካትያዉ፥ ታን ነ ቆማይ ታ ዶርሳቱዋ እስክያ ሜድሳይ፤ ኔንነ ነ ኦሳንቻቱ ኑናና ደንዴርክተ!" ያጌዳ።

25 ካቲ አበሰሎማ፥ "ቱይት ታ ናአዉ! ኑን ኡባይ ቦፐ፥ ነዉ ቶኮ ግዳናዋ" ያጌዳ። አበሴሎም ካትያ ዳሮፐ ሾቤዳ፤ ካቲ ቡሳ እጼዳ፤ ሽን አበሰሎማ አንጄዳ።

26 አበሴሎም ካትያ፥ "ኔን ባና ዮፐ፥ ታ እሻ አምኖን ኑናና ቦ" ያጌዳ።

ካቲ፥ "እ ኔናና አያዉ ባኔ?" ያጌዳ። 27 ሽን አበሴሎም ሾቢደ አገናን እጽና፥ ዳዊተ አምኖናነ ባረ አቱማ ናና የንኮቱዋ አናና የዴዳ።

28 አበሴሎም ባረ ቆማቱዋ፥ "ስስተ! አምኖን ዎይንያ ኤሳ ኡሺደ ካልያ ዎደነ ታን ህንተንታ፥ ‘አምኖና ሾጭተ’ ያግያ ዎደ፥ ህንተንቱ አ ዎተ። ያዮፕተ! ህንተና አዛዜዳዌ ታና። ምንተ! ጻልተ!" ያጊደ አዛዜዳ። 29 አበሰሎማ ቆማቱ እ አዛዜዳዋዳን አምኖና ኦድኖ። ሄዋፐ ጉይያን፥ ካትያ አቱማ ናናይ ኡባቱ ደንዲደ፥ ባረንቱ ባቁሉዋ ባቁሉዋ ቶጊደ ባቃቴድኖ።

30 ኡንቱንቱ ብሮ ኦግያን ደእሽን፥ "አበሴሎም ካትያ ናና ኡባ ዉርሴዳ፤ ኡንቱቱፐ እቱነ አትቤና" ጌተትያ ኦዱ ዳዊታኮ ጋኬዳ። 31 ካቲ ደንድ ኤቂደ፥ ካዮ ባረ ማዩዋ ፔዳ፤ ያቲደ ቢታን ግሴዳ። አ ቆማቱ ኡባቱካ ባረንቱ ማዩዋ ፔደ፥ አ ማታን ኤቄድኖ።

32 ዳዊታ እሻ ሻማ ናአይ ዮናዳብ፥ "ታ ጎዳዉ፥ ኡንቱንቱ ካትያ ናና ኡባ ዎ ድጌድኖ ጋደ ቆፖፓ፤ አምኖና ጻላላይ ሀይቄዳ። አያዉ ጎፐ፥ አምኖን ባረ ምቻቶ ታማሮ ባይዜዳ ጋላሳፐ ዶሚደ፥ አበሴሎም አ ቦላን ፖላናዉ ሀልቼዳዋ ግዴዳ። 33 ሀእካ ታ ጎዳይ ካቲ ባረ ዎዛናን፥ ‘ካትያ ናናይ ኡባቱ ሀይቄድኖ’ ያጊደ ኦዴዳ ኦዱዋ ቱማ ጎፖ፤ አምኖና ጻላላይ ሀይቄዳ" ያጌዳ።

34 ሄ ዎደ አበሴሎም ባቃቴዳ።

ናግያ ብታኒ ቁ ጊደ ጼልያ ዎደ፥ ባረፐ አዋይ ዉልያ ባጋና ደእያ ኦግያና ደርያ ላንቂያ ኦይቂደ፥ ጮራ አሳይ ይያዋ በኢደ ካትያዉ ኦዴዳ። 35 ሄ ዎደ ዮናዳብ ካትያ፥ "በአ! ታን ነ ቆማይ ኦዴዳዋዳን ካትያ ናናይ ዬድኖ" ያጌዳ።

36 እ ሃሳዪደ ዉርስና ካትያ ናናይ ገሊደ ባረንቱ ቃላ ቁ ኦደ ዋሴድኖ። ቃይ ካቲነ አ ኦሳንቻቱ ኡባይ ይባታ ዬኩዋ ዬኬድኖ።

37 አበሴሎም ባቃቲደ፥ አምሁዳ ናኣ ታልማያኮ፥ ጋሹራ ቢታ ካትያኮ ቤዳ፤ ሽን ካቲ ዳዊተ ኡባ ጋላስ ባረ ናአዉ ዬኬዳ።✝13:37 2 ሳሜላ 3:3

38 አበሴሎም ባቃቲደ ጋሹራ ጋድያ ቤዳዋፐ ጉይያን፥ ያን ሄዙ ላይ ደኤዳ። 39 ካቲ ዳዊተ አበሰሎማ በአናዉ አሞቴዳ፤ አያዉ ጎፐ፥ አምኖና ሀይቆ ካዮትያዋፐ እ ምነቴዳ።