2 ሳሜላ 5

ኮይሮ ላይቱዋ

1 እስራኤልያ ዛርያ ኡባቱ ዳዊታኮ ከብሮነ ካታማ ዪደ፥ "ኑን ነ አሾነ ነ ሱ። 2 ካሰ ሳኦል ኑዉ ካትያ ግዲደ ደእያ ዎደካ፥ እስራኤልያ አሳ ኦላዉ ካለዳዌ ኔና። መና ጎዳይ ኔና፥ ‘ኔን ታ አሳ እስራኤልያ ሄማና፤ ኔን ኡንቱንቱ ቦላ ካተታና’ ያግ ዎዳ" ያጌድኖ። 3 ሄዋ ድራዉ፥ እስራኤልያ ጭማቱ ኡባይ ዳዊታኮ ከብሮነ ካታማ ዬድኖ፤ እ ኡንቱንቱና ከብሮናን መና ጎዳይ ስንን ቃላ ጫቁዋ ጫቀቴዳ፤ እስራኤልያ ቦላ ካተታናዳን ዳዊታ ኡንቱንቱ ኦኬድኖ።

4 ዳዊተ ካተትያ ዎደ አዉ ሀታሙ ላይ፤ ኦይታሙ ላይ እ ካተቴዳ።✝5:4-5 1 ካታ. 2:11፤ 1 ኦዱዋ 3:4፤ 29:27 5 ከብሮነ ካታማን ይሁዳ ቦላ ላፑን ላይነ ኡሱፑን አግና እ ካተቴዳ፤ የሩሳላመን እስራኤልያ ኡባቱዋ ቦላነ ይሁዳ ቦላ ሀታማነ ሄዙ ላይ ካተቴዳ።

ዳዊተ የሩሳላማ ጾኔዳ

6 የሩሳላመን ደእያ ያቡሳ አሳቱዋ ኦላናዉ ዳዊተነ ዳዊታ አሳይ ቤድኖ፤ ያቡሳ አሳቱ፥ "ዳዊተ ሀ ካታማ ገላናዉ ዳንዳየና" ጊደ ቆፔድኖ። ያቲደ ኡንቱንቱ አ፥ "ኔን ሀ ሳኣ ገላካ፤ ሀራይ አቶ ሽን፥ ቆቀቱዋነ ዎባቱ ኔና ተአናዉ ዳንዳዪኖ" ያጌድኖ።✝5:6 ኢያሳ 15:63፤ ዳና. 1:21 7 ግዶፐነ፥ ዳዊተ ጽዮነን ደእያ ኡንቱንቱ ጌሱዋ ኦይቄዳ፤ ጽዮነ ዳዊታ ካታማ ጌተቴዳ።

8 ሄ ጋላስ ዳዊተ ባረ አሳ፥ "ያቡሳ አሳቱዋ ጾንያ አሳይ ኦንነ ዳዊታ ሞርከቱ፥ ሄ ‘ዎባቱነ ቆቃቱ’ ደእያ ሳኣ ጋካናዉ፥ ሃይ ጎጊደ ከስያ ጾእያና ገላናዉ ኮሼ" ያጌዳ። ሄዋ ድራዉ፥ "ቆቀቱነ ዎባቱ ካትያ ጎልያ ገልክኖ" ጌተቴዳ። 9 ዳዊተ ሄ ጌሱዋ ኦይቂደ፥ ያን ደኤዳ፤ ሄ ጌሱዋ ዳዊታ ካታማ ያጊደ ሱንዳ። ዳዊተ ሚሎፐ ዶሚደ፥ ሄ ካታማ ዩሽ አደ ግምቢሴዳ። 10 ኡባፐ ዎልቃማ መና ጎዳ ጾሳይ አናና ደእያ ድራዉ፥ ዳዊተ ምን ምኒደ ቤዳ።

11 ጺሮሳ ካቲ ኪራም ዳዊታዉ አሳ ኪቴዳ። ዝጋ ሙደ፥ አናጸቱዋነ ሹቻ ማስያዋንታ አዉ የዴዳ፤ አሳቱ ዳዊታዉ ጎልያ ኬጼድኖ። 12 መና ጎዳይ እስራኤልያ ቦላ አ ካትያ ኦደ ኤሴዳዋነ ባረ አሳ እስራኤልያ ድራዉ አ ካዉተ ቁ ኦደ ቦንቼዳዋ ዳዊተ ኤሬዳ።

13 ዳዊተ ከብሮናፐ የሩሳላመ ዬዳዋፐ ጉይያን፥ ሀራ ጋራዳቱዋነ ሀራ ማቼቱዋ ጉጂደ አኬዳ። ሀራ ማጫ ናናይነ አቱማ ናናይ አዉ የለቴድኖ። 14 ያን አዉ የለቴዳ አቱማ ናና ሱንይ ሻሙአ፥ ሾባባ፥ ናታና፥ ሶሎሞና፥ 15 ይብሃራ፥ ኤልሹአ፥ ነፌጋ፥ ያፍአ፥ 16 ኤልሻማአ፥ ኤልያዳአነ ኤልፈሌጻ።

ዳዊተ ፕልስጼማ አሳቱዋ ጾኔዳ

17 ዳዊተ እስራኤልያ ቦላ ካትያ ግዲደ ኦከቴዳዋ ፕልስጼማ አሳቱ ስሴዳ ዎደ፥ ኡንቱንቱ ኡባይ ዳዊታ ኮያናዉ ከሴድኖ፤ ሽን ዳዊተ ሄዋ ስሲደ፥ ዱገ ግምቢያ ግዶ ቤዳ። 18 ፕልስጼማቱ ቃይካ ቢደ፥ ራፋይማ ዎምባን ላለቲደ ኡቴድኖ። 19 ሄዋ ድራዉ፥ ዳዊተ መና ጎዳዉ፥ "ታን ባደ ፕልስጼማቱዋ ኦሎ? ኔን ኡንቱንታ ታዉ አ እማኒ?" ያጊደ ኦቼዳ።

መና ጎዳይ ዳዊታ፥ "ኤ ኦላ። ታን ኡንቱንታ ነዉ አ እማና" ያጌዳ።

20 ዳዊተ ባኣል-ፓራጺማ ግያ ሳኣ ቢደ፥ ያን ኡንቱንታ ጾኔዳ። ያቲደ ዳዊተ፥ "ሃ ድኡ ስ አያዋዳን መና ጎዳይ ታ ሞርከቱዋ ግዱዋና ታና አዳ" ያጌዳ። ሄዋ ድራዉ፥ ሄ ሳኣ ሱንይ ባኣል-ፓራጺማ ጌተቴዳ።*5:20 ባኣል-ፓራጺማ፦ ሀ ሱን ብለይ "ሲደ ገሌዳ ጎዳ" ግያዋ። 21 ፕልስጼማቱ ባረንቱ ኤቃቱዋ ሄ ሳኣን የጊደ ቤድኖ። ያትና ዳዊተነ አ አሳይ ሄ ኤቃቱዋ አኪደ አፌድኖ።

22 ፕልስጼማቱ ጉየ ስሚደ ቢደ፥ ላኤንዋ ራፋይማ ዎምባን ላለት ኡቴድኖ። 23 ዳዊተ መና ጎዳ ላኤንዋካ ኦችና፥ ጾሳይ አ፥ "ስት ጋደ ፑደ ኡንቱንቱ ቦላ ቦፓ፤ ኡንቱንቱ ጉየና ዩያ አ፥ ቦእያ ምፐ ስን ባጋና ኦላናዉ ጊጋ። 24 ቦእያ ሁጲያን ኦላ ኮሻ ኔን ስስያ ዎደ ኤሌላ። አያዉ ጎፐ፥ ሄዌ ፕልስጼማ ኦላንቻቱዋ ሾጫናዉ መና ጎዳይ ኔፐ ስንዉ አዳ ግያዋ" ያጌዳ። 25 ዳዊተ መና ጎዳይ አዛዜዳዋዳን ኦዳ፤ ገባአፐ ቢደ ገዜራ ጋካናዉ፥ ፕልስጼማ ኦላንቻቱዋ ዳዊተ ዎዳ።