ዳናቱዋ 10

ቶላአ

1 አብመሌክ ሀይቄዳዋፐ ጉይያን፥ ዶዶ ናኣ ፑሀ ናአይ ቶላእ እስራኤልያ አሻናዉ ደንዴዳ። እ ይሳኮራ ዛርያ ግዴዳ፥ ኤፍሬማ ገዝያን ሻሚራ ግያ ሳን ደኤዳ። 2 ቶላእ እስራኤልያ አሳ ላታማነ ሄዙ ላይዉ ፕርድያ ዳና ግዴዳ። ቶላእ ሀይቂደ፥ ሻሚራን ሞገቴዳ።

ያኢራ

3 ቶላአፐ ካሊደ፥ ጋላኣድያ ያኢር ደንዴዳ፤ እስራኤልያ አሳ ላታማነ ላኡ ላይዉ ፕርድያ ዳና ግዴዳ። 4 ሀታሙ ሀረቱዋ ቶግያ ሀታሙ አቱማ ናናይ ደኢኖ፤ ኡንቱንቶ ጋላኣደ ጋድያን ሀታሙ ካታማቱ ደኢኖ። ሄ ካታማቱ ሀቼ ጋካናዉ ሀቦት-ያኢራ ካታማቱዋ ጌተቲደ ጼሰቲኖ። 5 ያኢር ሀይቂደ፥ ቃሞናን ሞገቴዳ።

ዮፍታሀ

6 እስራኤልያ አሳይ መና ጎዳ ስንን ቃይካ ኢታባ ኦዳ፤ ኡንቱንቱ ባኣላነ አስታሮታ ጌተትያ ኤቃቶነ ሶርያ ጾሳቶ፥ ሲዶና ጾሳቶ፥ ሞኣበ ጾሳቶ፥ አሞናቱዋ ጾሳቶነ ፕልስጼማ ጾሳቶ ጎይኔድኖ። ኡንቱንቱ መና ጎዳ አግ ባሼድኖ፤ አዉ ጎይንያዋካ አጌድኖ። 7 ያትና፥ ጾሳይ እስራኤልያ አሳ ቦላ ሀንቀቲደ፥ ኡንቱንታ ፕልስጼማ አሳቶነ አሞና አሳቶ አደ እሜዳ። 8 ሄ ላይን እስራኤልያ አሳ ኡንቱንቱ ናቄድኖነ ኡቁኔድኖ። ዮርዳኖሳ ሻፋፐ ሄፍን አዋይ ዶልያ ባጋን፥ አሞራዋናቱ ካሰ ደኤዳ ጋላኣደ ጋድያን ደኤዳ እስራኤልያ አሳ ኡባ ኡንቱንቱ ታማነ ሆስፑን ላይ ኡቁኔድኖ። 9 አሞና አሳቱ ቃይካ ይሁዳ፥ ቢንያማነ ኤፍሬማ ዘረ ኦላናዉ ዮርዳኖሳ ሻፋ ፕኔድኖ፤ ያትና፥ እስራኤልያ አሳይ ሎይ ኡንኤቴዳ።

10 ሄዋፐ ጉይያን እስራኤልያ አሳቱ፥ "ኑን ኔና ኑ መና ጎዳ አጊደ፥ ባኣላ ኤቃቶ ጎይኒደ፥ ኔና ናቄዶ" ያጊደ ጾሳዉ ዋሴድኖ።

11 መና ጎዳይ ኡንቱንቶ፥ "ግብጼቱ፥ አሞራዋናቱ፥ አሞናዋቱዋ፥ ፕልስጼማቱ፥ 12 ሲዶናቱ፥ አማሌቃቱነ ማኦናቱ ህንተንታ ኡቁንና፥ ታዉ ዋሴድታ፤ ታን ህንተንታ ኡንቱንቱ ኩሽያፐ አሻበይክታ? 13 ሽን ህንተንቱ ታና አጊደ፥ ሀራ ጾሳቶ ጎይኔድታ። ሄዋ ድራዉ፥ ታን ህንተንታ ኡባካ አሽከ። 14 ቢደ ህንተንቱ ዶሬዳ ጾሳቶ ዋስተ። ህንተንቱ መቱዋ ዎድያን ኡንቱንቱ ህንተንታ አሺኖ" ያጊደ ዛሬዳ።

15 ሽን እስራኤልያ አሳይ ዛረደ መና ጎዳ፥ "ኑን ናጋራ ኦዶ። ነዉ ሎኦ ማላትያዋ ኑ ቦላ ኪተታ፤ ሽን ሀያና፥ ሀቼ ኑና አሻ" ያጌዳ። 16 አላጋ ጾሳቱዋ ባረንቱ ግዶፐ ድጊደ፥ መና ጎዳዉ ጎይኔድኖ። እስራኤልያ አሳይ ቱጋቴዳዎ ጾሳይካ ሴለቴዳ።

17 ሄዋፐ ጉይያን፥ አሞናቱዋ ኦላንቻቱ ኦላዉ ጊጊደ፥ ጋላኣደን ሺቄድኖ፤ እስራኤልያ አሳይካ እትፐ ሺቂደ፥ ጋላኣደን ምጽጳ ግያ ሳን ሺቄዳ። 18 ጋላኣደ ጋድያ አሳይነ ካፓቱ ባረንቱ ግዶን፥ "አሞናቱዋ ኦላንቻቱዋና ኮይሮቲደ ኦላ ጋከታናዌ ኦኔ? ሄ ኡራይ ጋላኣደ ጋድያን ደእያ አሳዉ ኡባዉ ካፑዋ ግዳናዋ" ያጌድኖ።